1 Ere chiney e yibi buch nu lan e bin ragag nge nelʼ e duw ni ke yaen u napʼan ni yib Kristus, ma Lachoneus, ni fare am ko nam, e thap ngakʼ bangi babyor ni yib rokʼ fachaʼ ni gaaʼ nge am ko re ulung i moroʼroʼ ney; ma baʼaray e pi thin ni kan yoloey ngay, nibe gaʼar:

2 Lachoneus, ni thʼabi gilbugwan ma pilung ko am ko nam, musap, kug yoloey e rangi babyor ney ngom, ma gube oge magaer ngom nib gel ni bachan fanam miyuluy, nge ku bachan fini miyuluy e pi gidiiʼ rom, i ayliy e pinʼen ni gimed be lemnag ni matʼawngimed nge puf-matʼawon romed; arragon, rib felʼ rogon ni gimed be thang nga paʼ e pi toʼogor romed, ni gowa bay paʼ ba got romed nibe ayuwegmed, i chaʼariy e puf-matʼawon romed, nge pi chugum romed, nge nam romed, ara rogon ni gimed be yoeg.

3 Ma be mʼug nra kireb anʼug ngay, o Lachoneus ni thʼabi gilbugwan, ni nge yaeni aw ni gab meechiyang ma gab yowlop ni ngam lemnag ni rayog rom ni ngam togopluw ngakʼ e gidiiʼ nib yoʼor nib madangdang ni gube gafaliy raed, ni bay e chiney ko ngiyalʼ ney ni kar falʼeged rograed, ma yaed be soen nibe oebaenʼraed ni nge puf e thin ngoraed—Ni ngar oggaed ngakʼ fapi Nephites ngar liiʼed raed.

4 Me gag, ni gumnang fini mʼuthaenʼ raed, ma kug sikeng nagraed u gilʼ e mael, ma gumnang rogon e fananikan roraed ngomed ni dabimus biʼid ni bachan e pi ngongol nib kireb ni yoʼor ni kam rinʼed ngoraed, ere faʼan yaedra yib ngar oggaed ngomed ma yaedra gafgow nagmed.

5 Ere kug yoloey e gi babyor ney, ni kug falʼeg nga paʼag, ya be magaf anʼug ngomed, ni bachan fanmed miyuluy ko pinʼen ni gimed be lemnag nib mich u wunʼmed nib matʼaw, nge fanmed gilbugwan u gilʼ e mael.

6 Ere gube yol ngom, ni gube athapeg ni ngam paged gimed ngakʼ e pi gidiiʼ rog ney, nge pi binaw romed, nge pi yungi binaw romed, nge tafenmed, ko bin baʼaray ni ngar og niged e sayden ngomed nge gafgow ni nge yibi aw ngomed.

7 Ara ngan pingeg i yoeg, mu piiʼed gimed ngomaed, magmed cheag ngomaed magmed nang boech rogon e pi muruwel romaed nib miith, magmed mang walagmaed ni nge yog ni ngam boeded gamaed—gathi sib romaed, ya walagmaed, ma ngam taʼabang gaed ngomaed ko gubin banʼen romaed.

8 Ere musap, gube dugliy ngom, ni faʼan gimed rarinʼ e biney, u fithikʼ michmich, ma dab ni gatheaymed; machane faʼanra dab mu rinʼed e biney, ma gube dugliy ngomed u fithikʼ e michmich, ni bin migid e pul e bay gu gafaliy e salthaw rog ngar baed ni mael ngomed, ma dabra sasagaʼal gaed nga paʼraed ma dabra paged beeʼ, ya yaedra liiʼmed, ma bayra liiʼed gimed ko sayden nge yaeni madaʼ ko ngiyalʼ ni kam mʼay gaed.

9 Ere musap, I gag Giddianhi; nge gag fare am ko biney ulung ko Gadianton nib miith; nib ulung ni pi muruwel riy ni gumnang nib mangil; ma ke kakrom ni ke afiyib nga butʼ iyib ngomaed.

10 Ma kug yoloey e gi babyor ney ngom, o Lachoneus, ma gube athapeg ni ngam paged e pi binaw romed nge pinʼen nib tʼuf romed, ni dariy e puʼoeg rachaʼ riy, ni nge yog ni sul matʼawon e pi gidiiʼ rog ney nge am roraed ngoraed, ni yaed e kar chuw gaed romed ni bachan e pi ngongol romed nib kireb ni gimed be tel roraed matʼawngiraed ko am, ma faʼanra dab mu rinʼed e biney, ma gura sulweg labgen e pi kireb ni kan rinʼ ngoraed. I gag Giddianhi.

11 Ere chiney e yibi buch u napʼan ni thap e gi babyor ney ngakʼ Lachoneus mari mat banʼen u oewchen, ni bachan fini tamilang nibe yoeg Giddianhi ni ngan piiʼ e binaw ko fapi Nephites, ma kube kʼaring e morus ngakʼ fapi gidiiʼ ma be yoeg ni nge sulweg labgen e kireb ni kan rinʼ ngakʼ e piʼin ni dawor nrinʼ e kireb ngoraed, ma kemus ni faʼan yaedra chel ngar kireb niged yaed ni kar manged ngakʼ fa piʼin ni yaed ba kireb ma yaed ba moroʼroʼ.

12 Ere musap gaed, chaʼaney i Lachoneus, niʼir e am, ma beeʼ nib moʼon nib matʼaw, ma dabiyog ni nge rus nga lungun nge makʼar morus nibe tay beeʼ nib moroʼroʼ, ere de fol ko thin ko faregi babyor rok Giddianhi ni fare am ko moroʼroʼ, ere yoeg ko pi gidiiʼ rokʼ ni ngar meybil gaed ngakʼ Somoel ni nge piiʼ gelingraed ngar falʼeged rograed ko re ngiyalʼ i nʼen ni bay yib fapi moroʼroʼ ngoraed ni cham.

13 Arragon, i piiʼ bbugi thin nge yaen u fithikʼ gubin fapi gidiiʼ, ni ngar kunuyed yaed nga taʼabang e pi ppin roraed, nge bitir roraed, nge pi gamanman roraed, nge pi garbaw roraed, nge gubin banʼen roraed, ma kemus nigoʼ binaw roraed.

14 Me yoeg ni ngan ngongoliy e yoror nge liyeg raed, ni ngar ngongoliyed ni rib gel mab noemow. Me yoeg ni fapi salthaw ko Nephites nge Lamanites, ara gubin e salthaw rokʼ e piʼin ni kar manged ko Nephites, e ngar pired ni matanag nge liyeg e ginnʼem ni ngar matangiyed raed, ma ngar matangiyed raed rokʼ fapi moroʼroʼ ni rran nge nepʼ.

15 Arragon, i gaʼar ngoraed: Ma woed fos fare Somoel, e aram rogon ni faʼanra dab mu kalgaed ngaenʼmed ko gubin e pi denen romed, magmed meybil ngakʼ Somoel, ma dariy liyiben magmed chuw u paʼ fapi Gadianton ni moroʼroʼ.

16 Ma rib felʼ mab poloʼ falʼngin e pi thin nge prophecy rokʼ Lachoneus ni yib nag e murus ngakʼ gubin fapi gidiiʼ; mar paged yaed u poloʼ i gelingraed ni ngar rinʼed ni boed ni ke yoeg Lachoneus.

17 Me yibi buch ni Lachoneus e dugliy e pilung ko kapten nga dakean gubin fapi salthaw ko Nephites, ni ngar gafaliyed raed ko re ngiyalʼ i nʼen ni bay yib fapi moroʼroʼ u wuruʼ e binaw ngoraed.

18 Chiney e chaʼ ni thʼabi pilung u fithikʼ gubin e pi pilung ko kapten nge chaʼ ni thʼabi gaaʼ ko commander ko gubin fapi salthaw ko Nephites e ni dugliy, ni Gidgiddoni fithingan.

19 Chiney e ba yalen ni yima rinʼ u fithikʼ gubin fapi Nephites ni nga ur dugiliyed e pi pilung ko kapten roraed, (ma kemus nigoʼ ngiyalʼ i nʼen ni yaed bay u fithikʼ e ngongol roraed ni kireb) ni beeʼ ni bay e nangaenʼ ko yiʼiy nge prophecy rokʼ; ere, chaʼaney i Gidgiddoni e ba profet nib gilbugwan u fithikʼraed, ni ku boed nib pilung ko tapuf-oloboch.

20 Ere gaʼar fapi gidiiʼ ngakʼ Gidgiddoni: mumeybil ngakʼ Somoel, mag pagmaed nggu waroed nga dakean fapi burey ngo lan wuruʼ e binaw, ni nge yog nug oggaed ko fapi moroʼroʼ nggu liiʼed raed u lan e pi binaw roraed.

21 Machane Gidgiddoni e gaʼar ngoraed: Fare Somoel e de mʼagaenʼ ngay; ya faʼanra nga daroed ngoraed ma fare Somoel e ra taydaed nga lan paʼaraed; ere ngad falʼeged rogdaed u lulukungun e pi binaw rodaed, ma gaed kunuy gubin fapi salthaw rodaed nga taʼabang, ma dab daroed ngoraed, ya ngad soen gaed nge yaeni madaʼ ko ngiyalʼ ni kar baed ngodaed; ere boed nib fos fare Somoel, e faʼan gadaed rarinʼ ni aray rogon ma ra piiʼraed nga lan paʼadaed.

22 Me yibi buch u lan e bin ragag nge medilip e duw, ni ke chugur nga tungun e duw, ma fare bugithin rokʼ Lachoneus e ke yaen u dakean gaʼangin yang e nam, ere rafeked e os roraed, nge pi chariots roraed, nge garbaw roraed, nge gubin e gamanman roraed, nge pi yu ulung i gamanman roraed, nge pi grain roraed, nge gubin banʼen roraed, mar thelep gaed iyaen ni yu biyuʼ nge yu ragag i biyuʼ, nge yaeni madaʼ ko ngiyalʼ ni kar taw gaed ko farengi nʼen ni kan dugliy ni ngar mukun gaed ngay, ni ngar ayuweged yaed rokʼ e pi toʼogor roraed.

23 Ma fare binaw niʼir e kan dugliy e fare binaw nu Zarahemla, nge fare binaw ni bay u thilin fare binaw nu Zarahemla nge fare binaw nu Galwog, arragon, nge yaeni madaʼ nga mathil ni bay u thilin fare binaw nu Galwog nge fare binaw nu Kanpag.

24 Ma arame rib yoʼor e biyuʼ e gidiiʼ ni kanoeg ni yaed bogi Nephites, ni kar mukun gaed nga taʼabang nga lan e re binaw ney. Ma aram me yoeg Lachoneus ni ngar mukun gaed nga taʼabang u lan fare binaw ni bay nga yimuch, ni bachan fare wol ni kireb ni ke aw nga dakean fare binaw nib kan nga leluʼoch.

25 Mar noemow niged yaed ngar pired ngar soen niged e pi toʼogor roraed; ni kar pired u dakean taʼabang e binaw, u lan taʼareb e ulung, ni kar rus gaed ko fapi thin ni weliy Lachoneus, ma arame ra kalgaed ngaenʼraed ko gubin e pi denen roraed; mar meybil gaed ngakʼ fare Somoel ni Got roraed, ni nge yororiy raed ko re ngiyalʼ i nʼen ni bay yib e pi toʼogor roraed ngoraed ni mael.

26 Ma kari kirbaenʼ raed nib gel ni bachan e pi toʼogor roraed. Ma Gidgiddoni e yoeg ni ngar ngongoliyed e pi talin e mael ni gubin mit, ma ngar noemow niged madan e mael, nge shields, nge bucklers, ni boed rogon ni ke yoeg.