1 Me yibi buch niki mʼay e bin mereb i ragag nge lal e duw, me tabab fapi gidiiʼ i pagtilin fapi pow nge maʼangʼang ni kar guyed, ma tabab i waer iyaen e balyangaenʼ ni yaed be tay ko pow nge maʼangʼang nu tharmiy, ni arame ra tabab gaed i ʼelʼel nag gumʼirchaʼraed, mar maʼew niged laniyaenʼraed, ma arame daki michaenʼraed ko gubin e pinʼen ni kar rungʼaged ma kar guyed—

2 Ya yaed be lemnag u lan gumʼirchaʼraed boech banʼen nib mʼay fan, ni gidiiʼ e gagyeg nag u gelingin fare moʼoniyanʼ, ni nge wawliy nga orel me baen nag e pi gumʼirchaʼ ko gidiiʼ; ere aray rogon ni Moʼoniyanʼ e suwey gumʼirchaʼen fapi gidiiʼ bayay, ni arame maʼew nag oewchraed me wawliyraed nga orel nge michaenʼraed ni fapi machib rokʼ Kristus e ba meechiyang mab mʼay fan.

3 Me yibi buch ni fapi gidiiʼ e arame ra almarin gaed ko ngongol ni kireb nge pi fananikan; ma daki mich u wunʼraed ni kubay boech e pow nge maʼangʼang ni yira piiʼ; ere Moʼoniyanʼ e yaen iyaen, nibe wawliy nga orel gumʼirchaʼen fapi gidiiʼ, ma be lumelegaenʼ raed ni ngar rinʼed e ngongol ni kireb u lan fare binaw.

4 Ere aray rogon ni mʼay e bin mereb i ragag nge nelʼ e duw; nge ku aram rogon ko bin mereb i ragag nge medilip e duw; ma ku aram rogon ko bin mereb i ragag nge meruk e duw; nge ku aram rogon ko bin mereb i ragag nge mereb e duw;

5 Ma ku aram rogon ni ke yaeni gaman ba raʼay e duw ni ke yaen u napʼan e pi rran rokʼ Mosiah, ni immoy ni pilung ko gidiiʼ ko fapi Nephites.

6 Ere nelʼ miriʼay nge mereb e duw ni ke yaen u napʼan ni chuw Lehi u Jerusalem.

7 Ma mereb e duw ni ke yaen u napʼan fare ngiyalʼ i nʼen nni piiʼ fare pow, niʼir e weliy fapi profet morngaʼagen, ni Kristus e ra yib nga fayleng.

8 Chiney e fapi Nephites e ra gonopiyed napʼan e ngiyalʼ innʼey nni piiʼ fare pow ara u napʼan fare wub rokʼ Kristus; ma aram, mar nanged ni mereb e duw ni ke yaen.

9 Ere Nephi, niʼir e chitamangin Nephi, niʼir e kan piiʼ gafalngin fapi chep ngakʼ, e daki sul ko fare binaw nu Zarahemla, ma dariy bang nni pirʼeg riy ni gaʼangin yang e nam.

10 Me yibi buch ni fapi gidiiʼ e kur pired u fithikʼ e ngongol ni kireb, ni yug aram rogon ni bay e machib nge prophesy npiiʼ nge yib nga fithikʼraed; ere aray rogon niki mʼay e bin ragag e duw; nge bin ragag nge taʼareb e duw e ki mʼay u fithikʼ e denen.

11 Me yibi buch nu lan e bin ragag nge dalip e duw me tabab e mael nge togopluw u gaʼangin yang fare nam; ya fapi Gadianton ni moroʼroʼ e kar yoʼor gaed, ni kar liiʼed boech fapi gidiiʼ ni rib yoʼor, mar gatheayed e binaw nib yoʼor, mar garareged e ldoew nge puʼoeg rachaʼ ni yoʼor u gaʼangin yang fare nam, ma arame yibi aw ni ke tʼuf ni gubin fapi gidiiʼ, ni fapi Nephites nge Lamanites, e thingar rafeked e pi talin e cham nga ranoed ni mael ngoraed.

12 Ere, gubin fapi Lamanites ni ke michaenʼraed ngakʼ fare Somoel e ra peth gaed ngakʼ pi walagraed, ni fapi Nephites, me yibi aw nib tʼuf ni ngar feked talin e cham roraed ngar mael gaed fapi Gadianton ni moroʼroʼ, ni fan ko ngar ayuweged yaed nge pi ppin roraed nge pi bitir roraed, arragon, ma ku fan e ngar ayuweged e pi matʼawon roraed nge pi yalraed ko galasia roraed nge liyoer roraed, nge pufpuf-rogon roraed nge puf-matʼawon roraed.

13 Me yibi buch u mʼon ni nge mʼay e bin ragag nge dalip e duw ma fapi Nephites e riyib e murus ngoraed ko gafgow ni bachan e re mael ney, ni kari almarin.

14 Me yibi buch ni fapi Lamanites ni kar cheag gaed ngakʼ fapi Nephites e ra manged Nephites;

15 Ma fare gechig e ni chuweg roraed, nge mireaʼ doewraed nge woed fapi Nephites;

16 Ma pi pagael nge pi ppin nib felʼ yangren ni fakraed e ra pidorang mar pichoʼay gaed, mar manged Nephites, min piningraed ni Nephites. Ere aray rogon ni mʼay e bin ragag nge dalip e duw.

17 Me yibi buch u napʼan ni tabab e bin ragag nge aningeg duw, ma fare mael u thilin fapi moroʼroʼ nge fapi gidiiʼ ku Nephi e ki ʼulʼul mari almarin iyaen; machane, fapi gidiiʼ ku Nephi e yog nra gelgaed ngakʼ fapi moroʼroʼ, ni arame ra tulufed raed ngar suloed nga wuruʼ e pi binaw roraed iyaen ko fapi burey nge pi yungin ni yaed ma miith riy.

18 Ma aray rogon ni mʼay e bin ragag nge aningeg e duw. Ma lan e bin ragag nge lal e duw e rabaed riy ngakʼ fapi gidiiʼ ku Nephi; ma bachan e pi denen ko gidiiʼ ku Nephi, nge pi togopluw roraed nib yoʼor nge chuw ni yaed be tay, me yog ni nge gel fapi Gadianton ni moroʼroʼ ngoraed.

19 Ere aray rogon ni mʼay e bin ragag nge lal e duw, ma fapi gidiiʼ e kar aw gaed nga ba dodow ko gafgow ni yoʼor; ma fare sayden ko gafgow e kan tining nga dakeanraed, ni arame be yaen ni nge thethʼaebraed nga butʼ, ni fan e biney e bachan e denen roraed.