1 Ere chiney e yibi buch ni rogon ni bay ko chep romaed, ma gamaed manang ni chep romaed e ba riyulʼ, ya musap gaed, beeʼ nib moʼon nib matʼaw e i chaʼariy fapi chep—ya rib yoʼor bogi maʼangʼang ni rinʼ u fithingan Yesus; ma dariy beeʼ ni rayog ni nge rinʼ ba maʼangʼang u fithingan Yesus ma kemus ni en ke beʼech nag ir ko denen rokʼ—

2 Ere chiney e yibi buch, ni faʼanra dariy e oloboch u rogon i tanmeg rokʼ e re moʼon ney e tayim romaed, ma arame bin guyey nge dalip e duw e ke mʼay;

3 Ere fapi gidiiʼ e ra yulʼyulʼ gadi sap nag fare pow ni ke piiʼ fare profet i Samuel, ni fare Lamanite, arragon, ra sap niged fare ngiyalʼ innʼem nra awe lumor u lan dalip e rran u dakean fare nam.

4 Ma arame tabab e maerwaer nganʼuy nge maleʼeg thin nga fithikʼ fapi gidiiʼ, ni yug aram rogon nib yoʼor bogi pow ni kan piiʼ.

5 Me yibi buch u lan e bin guyey nge aningeg e duw, u lan e bin mʼon e pul, ko bin aningeg e rran ko pul, me yib ba yokoʼ nib gaaʼ, ni dariy bingyalʼ ni bay reb ni aram rogon ni yimnang morngaʼagen u gaʼangin yang e nam.

6 Ma arame ki yib ba nifeng nib gel mab almarin; me choeb e dirraʼ nib gaaʼ lingan, ni arame rurug e fayleng ni gowa nge sey nge ruw rabaʼ.

7 Ma be matmat e uluch nib gel, ma dariy bingyalʼ ni aram fini gel ni yimnang u gaʼangin yang e nam.

8 Me yikʼ fare binaw nu Zarahemla.

9 Ma fare binaw ku Moroni e ligil nga ʼaer nga tʼay e rigur, ma pi gidiiʼ ni bay riy e ra lumoch gaed.

10 Me tharey e butʼ fare binaw ku Moronihah, ni arame fare binaw ni sum ba burey riy nib gaaʼ.

11 Ma arame aw ba mogothgoth nib gaaʼ mab almarin nga lan fare binaw ni bay nga yimuch.

12 Machane musap gaed, rib gaaʼ mab almarin boech ba mogothgoth ni aw nga lan fare binaw nib kan nga leluʼoch; ya musap gaed, gaʼangin i dakean fare nam e thil, ni bachan e yokoʼ nge nifeng nib gel, nge pi dirraʼ nge pi uluch, nge gelingin e durruʼ ni tay e fayleng ni poloʼ.

13 Nge pi yupaʼ i kanawo nib gagangʼ e puth, nge pi yupaʼ i kanawoʼ nib tagpas e mododngol, ma bayoʼor e yungi nʼen nib pochpoch e ki mododngol.

14 Ma bayoʼor e binaw ni gagangʼ mab magagyel ni ligil nga ʼaer, ma bayoʼor e tin ni yikʼ, ma bayoʼor e tini rur nge madaʼ ko ngiyalʼ ni ke puth e naʼun riy nga butʼ, ma piʼin ni yaed bay riy e goʼ ra mʼaed, me yaeni awe yungi binaw nem ni dakuriy beeʼ riy.

15 Ma pi binaw ni magaey; machane mogothgoth ni tay e rib almarin, ma bayoʼor e gidiiʼ riy ni yimʼ.

16 Ma bay boech ni un ko nifeng ni gel; ma gin nra sorgaed ngay e dariy beeʼ ni manang, ma kemus ni yaed manang ni kar uned ko nifeng.

17 Ere aray rogon ni thil yaʼan dakean e fayleng ni poloʼ, ni bachan e yokoʼ, nge pi dirraʼ, nge uluch, nge durruʼ ni tay e fayleng.

18 Ere musap gaed, pi yuyangi war e ke pil ke ruw rabaʼ; ke pil ke wear u dakean gaʼangin e fayleng, ni arame ni pirʼeg boech ni ke yaen e thaʼal riy nge boech ni ke pilpil, u dakean gaʼangin yang e nam.

19 Me yibi buch u napʼan ni tal fapi dirraʼ, nge uluch, nge lang, nge yokoʼ, nge durruʼ ni tay e fayleng—ya musap gaed, i buch e pinnʼey ni gonpon dalip e awa napʼan; ma bay boech e gidiiʼ ni yoeg ni rib nʼuw napʼan; machane, gubin e pinnʼey nib gaaʼ mab almarin e nrinʼ ni gonpon dalip e awa napʼan—ere musap gaed, i yibi awe lumor nga dakean gaʼangin yang e nam.

20 Me yibi buch ni yibi aw bangi lumor nib dubʼag u dakean gaʼangin yang e nam, ni arame pi gidiiʼ ni yaed bay riy ni dar mʼaed e yaed be thamiy e re chuwoʼ i lumor nem;

21 Ma dariy e tamilang, ni bachan e lumor, ma dabiyog i gaelʼ e kendal, ara molʼ; ara af e nifiy ko lʼud ni rib malikʼ, ere ri dariy e tamilang;

22 Ma dariy e tamilang ni yibe guy, ara nifiy, ara banʼen nibe gael raʼen, ara yalʼ, ara pul, ara tʼuf, ya rib gaaʼ chuwoʼ e lumor ni ke aw nga dakean fare nam.

23 Me yibi buch ni paer riy ni aram rogon u lan dalip e rran ni dariy e tamilang nni guy; ma rib gel e daloloeyʼ nge mayoer nge gelʼgelʼ u fithikʼ gubin e gidiiʼ; arragon, rib gel e gelʼgelʼ ni tay e gidiiʼ, ni bachan e lumor nge mogothgoth ni ke aw ngoraed.

24 Ma bay bang nni rungʼag lamraed riy ni yaed be yoeg, ni yaed be gaʼar: O faʼan manga da kalgaed ngaenʼdaed u mʼon ko re rran ney nib gaaʼ mab gel e gafgow riy, ma rayog ni ke paer pi walagdaed ni dar mʼaed, ma rayog ni nge siy ra moʼoruf gaed u lan fare binaw nu Zarahemla.

25 Ma kub yang e kun rungʼag lamraed riy ni yaed be yoer nge daloloeyʼ, ni yaed be gaʼar: O faʼan manga da kalgaed ngaenʼdaed u mʼon ko re rran ney nib gaaʼ mab gel e gafgow riy, ma dawor da liiʼed ara da malang niged fapi profet, min chuwegraed; ma rayog ni pi chitiningdaed nge pi walagdaed ni ppin, nge pi bitir roraed e kan tay raed ni dar mʼaed, ma dawori tharey raed fare binaw nu Moronihah. Ere aray rogon fini gaaʼ mab gel e gafgow ko mayoer ni tay fapi gidiiʼ.