1 Ere chiney e yibi buch u napʼan ni ke yoeg Yesus e pinnʼey me tamilngeg fan ngakʼ fare ulung i gidiiʼ; ere tamilngeg gubin banʼen ngoraed, ni tin bagaʼ nge tin baʼachig.

2 Ere gaʼar: Pi chep ney nib thothup, ni dariy romed, e chiyliy e en Chitamangiy ni nggu piiʼ ngomed; ya ba gonop rokʼ ni thingar ni piiʼ ko tin kubay e mfen nga mʼon.

3 Me tamilngeg fan urngin banʼen, ni aram ko tabolngin iyib nge madaʼ ko ngiyalʼ ni bay yib u fithikʼ e rir rokʼ—arragon, ni gubin banʼen ni bayi buch u dakean e fayleng, nge yaeni madaʼ ko ngiyalʼ ni ke ranraen e gabin ko gawael ni gel, ma fare fayleng e ra yabochboch nga taʼabang ni gowa bangi babyor ni kan bachiy, ma tharmiy nge fare fayleng e bayi chuw;

4 Nge yaeni madaʼ ko fabin gaaʼ mab tomur e rran, ni gubin e gidiiʼ, nge gubin e pi mfen, nge gubin e pi nam nge thin ma ra sakʼiy nga pʼoewchen Got, ni ngan pufthin nagraed ko pi muruwel roraed, ko ba mangil fa ba kireb—

5 Ma faʼanra yaed ba mangil, ma yaedra foskoyamʼ ni yafos ni dabimus biʼid; ma faʼanra yaed ba kireb, ma yaedra foskoyamʼ ni gafgow; ni lʼagruw ni bay yib, reb nga barbaʼ i paʼay ma reb nga barbaʼ, u rogon e runguy, nge justice, nge thothup ni bay rokʼ Kristus, niʼir e immoy u mʼon ni ngan sunmiy e fayleng.

6 Ere chiney e mus nga raʼay yang ko pinʼen niʼir e kefil Yesus ngakʼ fapi gidiiʼ ma dabiyog i yoloey nga lan e reke babyor ney;

7 Machane musap gaed fapi plates ku Nephi e bay riy oren e pinʼen ni ke fil ngakʼ fapi gidiiʼ.

8 Ma pinnʼey e gag e kug yoloey, niʼir lichen e pinʼen ni ke fil ngakʼ fapi gidiiʼ; ma kug yoloey ni fan ko nge yog ni ngan fek bayay iyib ngakʼ e pi gidiiʼ ney, ni nge yib rokʼ fapi Gentiles, ni boed rogon e pi thin ni ke yoeg Yesus.

9 Ma napʼan nra thap ngoraed e pinnʼey, niʼir e batʼuf ni nge yib ngoraed ko sommʼon, ni ngan sikeng nag e mich roraed, ma faʼanra aram rogon ni nge mich u wunʼraed e pinnʼey ma arame bay ni dag e tin yoʼor ngoraed.

10 Ma faʼanra aram rogon ni dabi mich u wunʼraed e pinnʼey, ma arame bay ni tel e tin nib mangingʼ roraed, nge madaʼ ko ngiyalʼ ni kar gafgow gaed.

11 Musap gaed, ku guwaen ni nggu yoloey e pinnʼem, gubin e pinʼen ni kan ker nga dakean fapi plates ku Nephi, machane fare Somoel e siyeg, ni gaʼar: Gura sikeng nag e mich ko gidiiʼ rog.

12 Ere gag, Mormon, e gu yoloey e pinʼen ni ke tay Somoel chilen ngog. Ere chiney e gag, Mormon, e nggu museg e thin rog u roey, ma nggu tabab i yoloey e pinʼen ni kan chiyliy ngog.

13 Ere, gu baʼadag ni ngam guyed ni fare Somoel e rriyulʼ ni machib nag fapi gidiiʼ, u lan dalip e rran; ma tomuren niʼi yib i mʼug ngoraed, niʼi tʼetʼaer e flowa, nge yibliy, nge piiʼ ngoraed.

14 Me yibi buch ni machib me pigpig ngakʼ e pi bitir ni fak fare ulung i gidiiʼ ni kan weliy morngaʼagraed, me pithig balowthraed, mar weliyed bogi banʼen nib felʼ mab poloʼ falʼngin, ni rib mangil ko tin ni ke yiʼiy nag ngakʼ fapi gidiiʼ; me pithig balwothraed ni nge yog ni ngar non naed.

15 Me yibi buch u tomuren ni ke yaen nga tharmiy—ko yan lʼagruw yay ni ke yibi mʼug ngoraed, me yaen ngakʼ e en Chitamangiy, u tomuren ni ke golnag gubin e pi mʼar roraed, nge mugutgut roraed, me bing oewchen e pi maʼew roraed me bing tel e piʼin nib baling, me golnag gubin mit e liliy u fithikʼraed, me faseg beeʼ nib moʼon ko yamʼ, me dag gelingin ngoraed, me yaen ngakʼ e en Chitamangiy—

16 Machane, yibi buch ni rebo rran riy me mukun fare ulung i gidiiʼ nga taʼabang, mar guyed mar rungʼaged laman e pi bitir ney; arragon, ni mus ko madway mar binged langraed nga roeged bogi banʼen nib maʼangʼang; ma pinʼen nra weliyed e bogi banʼen nib mathngeluwol ni arame dariy beeʼ ni nge yoloey.

17 Me yibi buch ni fapi gachalpen Yesus ni melʼeg raed e ra tabab gaed e ngiyalʼ nem iyaen nga mʼon ko tawfe nge machib ngakʼ oren e piʼin ni rabaed ngoraed; ma gubin e piʼin ni tawfe nagraed u fithingan Yesus e rra sug gaed ko fare Kan ni Thothup.

18 Ma boʼor iyaed e guy me rungʼag bogi banʼen ni dab ni weliy, ni dab ni pag ngan yoloey.

19 Mar machib gaed, mar pigpig gaed ngoraed; ma urngin banʼen ma bay roraed, ma yaed gubin mab felʼ paʼaraed ngoraed, ni taareb rogon.

20 Me yibi buch ni rrinʼed gubin banʼen ni woed ni chiyliy Yesus ngoraed.

21 Ma piʼin ni tawfe nagraed u fithingan Yesus, e noeg ni yaed fare galasia ku Kristus.