1 Ere chiney e musap gaed, dariy beeʼ u fithikʼ gubin fapi gidiiʼ ko Nephites ni maerwaer buchʼuw u waenʼ fapi thin rokʼ gubin fapi profet nib thothup ni kar non gaed; ya yaed manang nib tʼuf ni thingari muguʼul.

2 Ma yaed manang ni thingari tʼuf ni ke yib Kristus, ni bachan e pi pow nib yoʼor ni kan piiʼ, ni boed rogon fapi thin ni yoeg e pi profet; nge bachan e pinʼen ni ke yibi buch ere yaed manang nib tʼuf ni thingari gubin banʼen ma nge yibi buch ni boed rogon ni kan weliy.

3 Ere ra keruʼuyed gubin e pi denen roraed, nge pi fananikan roraed, nge pi galong roraed, mar pigpig gaed ngakʼ Got u fithikʼ e lʼagaenʼ roraed ni poloʼ ni rran nge nepʼ.

4 Ere chiney e yibi buch u napʼan ni kar feked gubin fapi moroʼroʼ ni kalbus, ma dariy bagyaed e piʼin dan liiʼraed ngar mʼaed ni miil, mar yinʼed e pi kalbus roraed nga lan e kalbus, mar guyed rogon fare thin rokʼ Got ni ngan machib nag ngoraed; ma oren e piʼin ni yaedra kalngaenʼ ko pi denen roraed mar falʼeged ba mʼag ni dab kur mathang pogofan gaed bayay, e ni pagraed u kalbus.

5 Machane oren e piʼin ni dar falʼeged ba mʼag, ni piʼin ni ku yaed be finey e mathang pogofan u lan gumʼirchaʼraed, arragon, oren e piʼin nni pirʼeg raed ni yaed be makʼar murus ngakʼ pi walagraed e ni koelraed ngan gechig nagraed u rogon e motochiyel.

6 Ere aray rogon ni ra tileged gubin e pi kireb nem, nge pinʼen nib miith, nge pi ulung ni thʼabi kireb, niʼir e bayoʼor e ngongol ni kireb riy, ma bayoʼor e mathang pogofan ntay riy.

7 Ere aray rogon ni mʼay bin riliw nge lʼagruw e duw, ma ku aram rogon ko bin riliwʼ nge dalip e duw, nge bin riliwʼ nge aningeg, nge bin riliwʼ nge lal; ma aray rogon ni yaeni mʼay riliwʼ nge lal e duw.

8 Ma bayoʼor bogi banʼen ni mʼug, ni guy boech e gidiiʼ ni rib mangil, mab maʼangʼang; machane, dabiyog i yoloey ni gubin nga lan e reke babyor ney; arragon, reke babyor ney e dabiyog ni ngan yoloey ngay ba raʼay guruy ko tin ni ke buch u fithikʼ e gidiiʼ nib yoʼor u lan riliwʼ nge lal e duw.

9 Machane musap gaed bay yuke babyor ni bay morngaʼagen gubin banʼen riy ni buch rokʼ e pi gidiiʼ ney; nge bake babyor nib ngochngoch mab riyulʼ ni yoloey Nephi.

10 Ere kug ngongoliy e chep rog ko pinnʼey u rogon e chep rokʼ Nephi, ni kan ker nga dakean yungi plate ni kanoeg ni plates ku Nephi.

11 Ma musap gaed, guma yoloey e chep nga dakean yungi plate ni kug falʼeg nga paʼag.

12 Ere musap gaed, kan tunguy Mormon ngog, ya kan tunguy fithingan farengi binaw ku Mormon ngog, fare binaw niʼir e yarmiy Alma fare galasia riy u fithikʼ fapi gidiiʼ, arragon, fare galasia ni sommʼon nni yarmiy nga fithikʼraed u tomuren e ngongol roraed nib kireb.

13 Musap gaed, I gag beeʼ ni gachalpen i Yesus Kristus, ni fachaʼ ni Fak Got. Ke piningeg ni nggu weliy e thin rokʼ u fithikʼ e pi gidiiʼ rokʼ, ni nge yog e yafos ngoraed ni dabimus biʼid.

14 Ma ke yibi mʼug nib tʼuf ni gag, u rogon ni baʼadag Got, ni fapi meybil rokʼ e piʼin ni kar mʼaed, ni yaed e piʼin nib thothup, e ra muguʼul u rogon e mich roraed, e nggu falʼeg bbabyor ni morngaʼagen e pinnʼey ni kan rinʼ—

15 Arragon, bake babyor nib achichig ni morngaʼagen e pinʼen ni ke buch u napʼan ni chuw Lehi u Jerusalem, nge yibi madaʼ ko ngiyalʼ ney.

16 Ere gag e gube falʼeg e babyor ko pi chep ni ke piiʼ e piʼin ni ur moyed ni yaed ba mʼon rog, nge yibi madaʼ ko ngiyalʼ ni tabab e birog e rran.

17 Ma aram mug falʼeg bbabyor ni morngaʼagen e pinʼen ni kug guy nga oewcheg.

18 Ere gumnang ni fare ke babyor ni kug falʼeg e bake babyor nib matʼaw mab riyulʼ; machane boʼor bogi banʼen, ni deyog nug yoloeyed morngaʼagen ni bachan rogon e thin romaed.

19 Ere chiney e nggu museg e thin rog u roey, ni morngaʼageg, ere nggu tabab i piiʼ e chep rog ni morngaʼagen e pinʼen ni immoy ko pi rran nib mʼon rog.

20 I gag Mormon, ni gidiiʼen Lehi. Ri baʼfan ni nggu oge magaer ngakʼ e Got rog nge Tathapeg rog i Yesus Kristus, niʼir e fek e pi chitamangmaed nga wuruʼ fare binaw nu Jerusalem, (ma dariy beeʼ ni manang ma kemus ni yigoʼ ir nge piʼin ni fekraed nga wuruʼ e re nam nem) ma ke piiʼ ngog nge gidiiʼ rog e tamilang u rogon me yog woʼen e thap ngomaed ni poloʼ.

21 Rriyulʼ ni ke tawaʼath nag e tabinaew rokʼ Jacob, ma ke wurengaenʼ ngakʼ pifak Yosef.

22 Nge nʼumngin i napʼan ni ke fol pifak Lehi ko pi motochiyel rokʼ ma ke tawaʼath nagraed ma ke monʼog nagraed ni boed rogon ni yoeg.

23 Arragon, ma rriyulʼ ni ra fek bayay e tin ni ke magaey u pifak Yosef ko fare tamilang rokʼ Somoel ni Got roraed.

24 Ma ri woed nib fos Somoel, e aram rogon nira kunuy nga taʼabang u lan fare aningeg guruy i fayleng gubin e tin ni ke magaey u pifak Jacob, ni kar garar gaed u dakean gaʼangin yang e fayleng.

25 Ma bachane ke falʼeg e mʼag u thilraed gubin chon e tabinaew rokʼ Jacob, ere fare mʼag ni falʼeg u thilraed chon e tabinaew rokʼ Jacob e ra muguʼul ko re ngiyalʼ i nʼen ni baʼadag, ni ngan sulweg gubin chon e tabinaew rokʼ Jacob ko fare tamilang ko mʼag ni ke falʼeg u thilʼraed.

26 Ma arame bay ra nanged e Tabiyul roraed, ni Yesus Kristus, ni fachaʼ ni Fak Got; ma arame bay ni kunuy raed u fa aningeg guruy i fayleng nga dakean e pi nam roraed, ko pi yungi nʼen ni kar garar gaed iyaen ngay; arragon, woed nib fos Somoel e aram rogon ni bay yaeni aw. Amen.