1 Me yibi buch ni yoeg ngakʼ fare ulung i gidiiʼ ni ngar talgaed ko meybil, nge ku aram rogon ngakʼ fa piʼin gachalpen. Me yoeg ngoraed ni dabra talgaed ko meybil u lan gumʼirchaʼraed.

2 Me yoeg ngoraed ni ngar puw gaed nga ngalang mar sakʼiy gaed. Ere ra bagbag gaed ngalang mar sakʼiy gaed.

3 Me yibi buch ni tetʼaer e flowa bayay me yibliy, me piiʼ ngakʼ pi gachalpen ni ngar kayed.

4 Ma napʼan ni kar kayed me yoeg ngoraed ni ngar tetʼaered e flowa ngar piiʼed ngakʼ fare ulung i gidiiʼ.

5 Ma napʼan ni kar piiʼed ngakʼ fare ulung i gidiiʼ ma ki piiʼ e waeyin ngoraed ni ngar unumed, me yoeg ngoraed ni ngar piiʼed ngakʼ fare ulung i gidiiʼ.

6 Ngiyalʼ ney, e dariy e flowa, ara waeyin, ni fek fa piʼin gachalpen, ara fare ulung i gidiiʼ;

7 Machane rriyulʼ ni piiʼ ngoraed e flowa ni ngar kayed, nge waeyin ni ngar unumed.

8 Me gaʼar ngoraed: Enra kay e re flowa ney e ke kay doewngig ni fan ko yaʼel rokʼ; ma enra unum e re waeyin ney e ke unum rachaʼeg ni fan ko yaʼel rokʼ; ma yaʼel rokʼ e dakuriy liyiben me yimʼ ko bilig ara balel, ya ra paer nib sug.

9 Ere napʼan ni ke kay fare ulung i gidiiʼ ni gubin fare flowa ma kar unumed fare waeyin, ma musap gaed, me suguyraed fare Kan ni Thothup; mar tolul gaed u taʼabang, mar oged e magaer ngakʼ Yesus, niʼir e kar guyed ma kar rungʼaged laman.

10 Me yibi buch u napʼan ni yaed gubin ni kar oged e magaer ngakʼ Yesus, me gaʼar ngoraed: Musap gaed chiney e kug muʼ i yoeg fare motochiyel ni chiyliy fachaʼ ni Chitamangiy ngog ni morngaʼagen e pi gidiiʼ ney, ni yaed e piʼin ni kar magaey gaed ko gidiiʼ ku Israel.

11 Mu tayed u wunʼmed ni kug weliy ngomed, ni kugog ngomed napʼan nra muguʼul fapi thin rokʼ Isaiah—musap gaed kan muʼ i yoloey, ni bay romed, ere mu biʼeged—

12 Ma rriyulʼ, nriyulʼ, ni gube yoeg ngomed, nnapʼan nra muguʼul ma arame ke muguʼul fare mʼag ni tay e fachaʼ ni Chitamangiy ngakʼ e gidiiʼ rokʼ, O gidiiʼ ku Israel.

13 Ma arame tin ni magaey e gidiiʼ, ni yaedra garar u dakean e fayleng, e yaedra sul nga taʼabang u lan e ngek ngu lan e ngael, ngu lan e yimuch ngu lan e leluʼoch; ma bayi tamilang laniyaenʼraed u morngaʼagen fare Somoel ni Got roraed, niʼir e ke bayuliyraed.

14 Ma fachaʼ ni Chitamangiy e ke chiyliy ngog ni nggu piiʼ ngomed e re nam ney, ni ngam tafnayed.

15 Ma gube yoeg ngomed, ni faʼanra dabi kalngaenʼ fapi Gentiles u tomuren ni ke yog fare tawaʼath ngoraed, u tomuren ni kar garareged e gidiiʼ rog—

16 Ma arame gimed, e piʼin ni kam magaey gaed ko gidiiʼ ku Jacob, e ngam maroed nga fithikʼraed; ni yaed bayoʼor ni bay mu pired u fithikʼraed; ma ngam pired u fithikʼraed ni boed ba layon u fithikʼ e gamanman u magerger, nge ku boed ba layon u fithikʼ yu ulung i saaf, ni faʼanra yaen u fithikʼraed nibe yitʼ raed ma be thʼethʼaeb raed ni yuyang, ma dariy beeʼ nra ayuwegraed.

17 Paʼmed e bay ni pug nga dakean e pi toʼogor romed, ma gubin e pi toʼogor romed ma yira thirif raed u butʼ.

18 Ma gura kunuy e gidiiʼ rog nga taʼabang ni boed beeʼ ni ma ulnguy yuthum i uchel nga dakean e faraf u naʼun rokʼ.

19 Ya gura falʼeg ni fan ngakʼ e gidiiʼ rog ni yaed e ke falʼeg faʼen Chitamangiy ba mʼag u thilraed, arragon, gura falʼeg e gagay romed ko wasey, ma gura falʼeg e tʼiyung romed ko brass. Ma gimed ra thʼethʼaeb e gidiiʼ nib yoʼor nge yuyang; ma gura bangbeng nag e pinʼen ni ke yog ngoraed ngakʼ Somoel, nge chugum roraed ngakʼ fare Somoel ko fayleng ni poloʼ. Ere musap gaed, gag e chaʼ ni nggu rarinʼ.

20 Ma bay yibi buch, ni yoeg fachaʼ ni Chitamangiy, ni farengi sayden rog ko gechig e yira tining nga dakeanraed ko bin tomur e rran; ma faʼanra dabra kalgaed ngaenʼraed ma ra mul nge aw nga dakeanraed, ni yoeg fachaʼ ni Chitamangiy, arragon, ra mul nge aw nga dakean gubin e pi nam ko fapi Gentiles.

21 Ma bay yibi buch ni gura monʼog nag e gidiiʼ rog, O gidiiʼ ku Israel.

22 Ere musap gaed, pi gidiiʼ ney e gura monʼog nag u lan e re nam ney, ni nge muguʼul fare mʼag nug tay ngakʼ e chitamangmed i Jacob; ma bayi paer ni bin Beʼech e Jerusalem. Ma fare gelingin nu tharmiy e ra paer u fithikʼ e pi gidiiʼ ney; arragon, gura paer u fithikʼmed.

23 Musap gaed, gag faʼanem ni weliy Moses morngaʼagen, ni gaʼar: Bay ba profet ni bayi piiʼ fare Somoel ni Got romed ngomed u fithikʼ pi walagmed, ni boed gag; ire ngam motoyil gaed ko urngin e pinʼen ni bayi weliy ngomed. Ma bay yibi buch ni gubin e piʼin ni dabra motoyil gaed ko re profet nem e yira chuwegraed u fithikʼ fapi gidiiʼ.

24 Riyulʼ ni gube yoeg ngomed, arragon, nge gubin fapi profet ni aram ku Samuel nge tin niki yib nga tomuren, ni gubin i yaed ni non, ma ke michegeg.

25 Ere musap gaed, gimed pifak fapi profet; nge gimed e gidiiʼ ku Israel; nge gimed gidiiʼen fare mʼag ni tay fachaʼ ni Chitamangiy ngakʼ e pi chitamangmed, ni gaʼar ngakʼ Abraham: Ma dakean pifakam e yira tawaʼath nag gubin e pi mfen nu fayleng riy.

26 Fachaʼ ni Chitamangiy e ke fasegeg kug mʼug ngomed ko sommʼon, ma ke piiʼeg ni nggub gu falʼeg waʼathmed, ni nggu chefegmed ni gimed gubin ko pi ngongol romed nib kireb; ni biney e bachan e gimed e bitir ko fare mʼag—

27 Ma tomuren ni kan falʼeg waʼathmed ma arame muguʼuliy fachaʼ ni Chitamangiy fare mʼag ni tay ngakʼ Abraham, ni gaʼar: U dakean pifakam e yira tawaʼath nag gubin e pi mfen u fayleng riy—ko fare Kan ni Thothup ni bayi mapʼ rog nga dakean fapi Gentiles, nib tawaʼath nga dakean fapi Gentiles nra gel nagraed ko gubin e gidiiʼ, nra garareg e gidiiʼ rog, O gidiiʼ ku Israel.

28 Ma bay ra manged ba gechig ngakʼ e gidiiʼ ko re nam ney. Machane, napʼan nra thap e gospel rog ngoraed ni poloʼ, ma faʼanra ngar ʼelʼel niged gumʼirchaʼraed ngog ma gura sulweg e pi ngongol roraed ni kireb nga dakean loelugraed, ni yoeg fachaʼ ni Chitamangiy.

29 Ma ra yib nga nʼug fare mʼag nug falʼeg u thilmaed e gidiiʼ rog; gu falʼeg e ba mʼag u thilmaed ni gura kunuy raed nga taʼabang ko ngiyalʼ nib mʼag anʼug ngay, ni nggu piiʼ ngoraed bayay fare nam rokʼ e pi chitamangraed ngar tafnayed, ni fare nam nu Jerusalem, niʼir fare nam nni michmicheg ngoraed ni manemus, ni yoeg fachaʼ ni Chitamangiy.

30 Ma bay yibi buch ni bayi taw nga napʼan, ni fare gospel rog ni poloʼ e bay ni machib nag roraed;

31 Ma bayi michaenʼraed ngog, ni gag Yesus Kristus, fachaʼ ni Fak Got, ma bay ur meybil gaed ngakʼ e en Chitamangiy u fithingag.

32 Ma arame pi matanag roraed e bay ra non gaed ngalang, ni kar tang gaed u taʼabang; ya bay ruguyed nga oewchraed.

33 Ma arame fachaʼ ni Chitamangiy e bayi kunuy raed nga taʼabang bayay, me piiʼ ngoraed yu Jerusalem ni nge mang ba nam ni taferaed.

34 Ma arame bay ra tolul niged e falfalaenʼ—Ni yaed be tang u taʼabang ni yaed be gaʼar, gimed e pi yungi nam nu Jerusalem ni kan gatheaymed; ya fachaʼ ni Chitamangiy e ke falʼegaenʼ e gidiiʼ rokʼ, ma ke bayuliy yu Jerusalem.

35 Fachaʼ ni Chitamangiy e ke dag falʼngin i paʼ nib thothup u mit gubin e pi nam; nge gubin e gidiiʼ ko tin tomur e rran u fayleng ni yaedra guy fare woʼen e thap rokʼ fachaʼ ni Chitamangiy; ma fachaʼ ni Chitamangiy nge Gag e gamow taʼareb.

36 Ma arame bay yibi buch e pinʼen ni kan yoloey ni gaʼar: Muʼod gaed, muʼod gaed bayay, nga munʼed gelingmed nga dakeanmed, O Zion; munʼed nga dakeanmed e pi mad romed nib felʼ yaʼan, O Jerusalem, ni fare binaw nib thothup, ya ngiyalʼ ney iyaen nga mʼon e dab kiyib ngom e piʼin ni dawor ni madʼad ngakʼ nge piʼin nib alit.

37 Mu rurug nge chuw e fiyath u doewam; mu bagbag ngalang, ngam paer nga butʼ, O Jerusalem; mu pithig e gaf u balelʼugnam, O sib ni ppin nu Zion.

38 Ya baʼaray rogon ni yoeg fare Somoel: Kam piiʼed gimed ni chuwaeyʼ ni dariy fan, ere yira bayuliymed ni dariy e salpiy riy.

39 Rriyulʼ, nriyulʼ, ni gube yoeg ngomed, ni gidiiʼ rog e yaedra nang fithingag; arragon, lan e re rran nem e yaedra nang ni gag e gube non.

40 Ma napʼan ni yaedra gaʼar: Rib felʼ usun u dakean e pi burey rifrifan ay fachaʼ nra yib nag e thin nib mangil ngoraed, niʼir e ma awnag e gapas; niʼir e ma fek iyib ngoraed e thin nib felʼ ni morngaʼagen e tin nib mangil, niʼir e chaʼ ni yarmiy rogon e thap; ni gaʼar ngakʼ Zion: Got rom e suwon!

41 Ma arame bay yaen bbugi thin nibe gaʼar: Muchuw gaed, muchuw gaed, mmaroed ngam chuw gaed ko ginnʼir, dab mmath gaed ko pinʼen ni de beʼech; mmaroed ngam chuw gaed u lukungun e re binaw nir; mu pired ni gimed ba beʼech e piʼin ni bay matʼawon Somoel romed.

42 Ya dab mmaroed nib gur ara gimed be miil; ya bay mmaroed ni fare Somoel e bay nga mʼon romed, ma fare Got ku Israel e bayi paer nga tomur romed.

43 Musap gaed, tapigpig rog e ra gagyeg nib gonop; bay ni pug ngalang, min liyoer ngakʼ ngalang min tay niʼir e thʼabi tolang.

44 Boʼor e piʼin nra gin oewchraed ngom—ya oewchen e rib madʼad, ni dawori buch rokʼ beeʼ, nge doew ni ke madʼad ke pag rogon ni ma tay fak e gidiiʼ—

45 Ere bayi atngiy dakean e nam nib yoʼor; pi pilung e ra maen langraed u puluwon, ya pinʼen ni dawor noeg ngoraed e yaedra guy; nge pinʼen ni dawor rrungʼaged e yaedra nanged fan.

46 Rriyulʼ, nriyulʼ, ni gube yoeg ngomed, gubin e pinnʼey ma rriyulʼ nra buch, ni boed ni ke chiyliy fachaʼ ni Chitamangiy ngog. Ma arame re mʼag ney ni falʼeg fachaʼ ni Chitamangiy u thilraed e gidiiʼ rokʼ e bayi muguʼul; ma arame bayi paer e gidiiʼ rog bayay u Jerusalem, me paer ni fare nam ni taferaed.