Guruy Ni 23
Yesus e ba mʼagaenʼ ko pi thin rokʼ Isaiah—I chiyliy ngakʼ fapi gidiiʼ ni ngar gayed fapi profet—Pi thin rokʼ Samuel ni fare Lamanite u morngaʼagen fare Foskoyamʼ e ni puthuy ko pi chep roraed. Napʼan T.Y. 34.
1 Ere chiney, musap gaed, gube yoeg ngomed, ni thingar mu filed e pinnʼey ngam nanged. Arragon, ba motochiyel ni kug piiʼ ngomed ni thingar mu filed e pinnʼey u fithikʼ e lʼagaenʼ; ya rib gaʼfan e pi thin rokʼ Isaiah.
2 Ya rriyulʼ ni ke weliy gubin banʼen ni morngaʼagen e gidiiʼ rog ni gidiiʼ ku Israel; ere ri kub tʼuf ni thingar ki non ngakʼ fapi Gentiles.
3 Ma gubin e pinʼen ni ke weliy make buch nge tin ni bayi buch, ni boed rogon e pi thin ni ke weliy.
4 Ere ngam motoyil gaed ko thin rog; mu yoloeyed e pinʼen ni kug weliy ngomed; ma rogon e ngiyalʼ nge rogon ni baʼadag e en Chitamangiy e bayi thap riy ngakʼ fapi Gentiles.
5 Ma enra motoyil ko thin rog nge kalngaenʼ min tawfe nag, e ireram chaʼ nra thap. Mu filed e thin rokʼ fapi profet, ya yaed boʼor ni yaed be micheg e pinnʼey.
6 Ere chiney e yibi buch u napʼan ni yoeg Yesus e pi thin ney me gaʼar ngoraed bayay, u tomuren ni ke weliy fan gubin fapi chep nib thothup ngoraed ni ke thap ngoraed, i gaʼar ngoraed: Musap gaed, bay boech e chep nib thothup ni gubaʼadag ni ngam yoloeyed, niʼir e dawor mu yoloeyed.
7 Me yibi buch ni gaʼar ngakʼ Nephi: Mu fek iyib ngog fapi chep ni kuʼum chaʼariy.
8 Ma napʼan ni fek Nephi fapi chep iyaen ngakʼ, me yaeni tay nga butʼ u pʼoewchen, me yaeni sap ngay me gaʼar:
9 Rriyulʼ gube yoeg ngomed, kug chiyliy ngakʼ e tapigpig rog i Samuel, ni fare Lamanite, ni nge micheg ngakʼ e pi gidiiʼ ney, u napʼan e re rran nem ni en Chitamangiy e nge tayfan fithingan u dakenag, ma arame boʼor e saints ni bayra fos gaed ko yamʼ, mar mʼug gaed ngakʼ e gidiiʼ ni yoʼor, ngar machib gaed ngoraed. Me gaʼar ngoraed: Gathi aray rogon?
10 Ma fa piʼin gachalpen e ra fulweged lungun nra gaʼar gaed ngakʼ: Arragon, Somoel, Samuel e prophesy ni woed ni kamoeg, ma gubin ni ke muguʼul.
11 Ere gaʼar Yesus ngoraed: Mangfan ni dawor mu yoloeyed e rennʼey, ni boʼor e saints ni kar fos gaed ko yamʼ ma kar mʼug gaed ngakʼ e gidiiʼ nib yoʼor ngar machib gaed ngoraed?
12 Ere yibi buch ni yib ngaenʼ Nephi ni dawor ni yoloey e rennʼey.
13 Me yibi buch ni chiyliy Yesus ni thingar ni yoloey; ere ni yoloey ni boed rogon ni chiyliy.
14 Ere chiney e yibi buch u tomuren ni ke tamilngeg Yesus fan gubin fapi chep nib thothup u taʼabang, niʼir e kar yoloeyed, me chiyliy ngoraed ni ngar machib niged e pinʼen ni ke tamilngeg fan ngoraed.