1 Ere chiney e musap gaed, yibi buch ni gubin fapi gidiiʼ ko fare nam ma rrungʼaged e pi thin ney, mar manged mich riy. Ma tomuren e pi thin ney me awe gapas u lan fare nam ni bukun e awa;

2 Ya ri balyangaenʼ fapi gidiiʼ nib gel mar tal gaed ko mayoer nge gelʼgelʼ ni fan ko pi gidiiʼ roraed ni kar mʼaed; ere ri awe choʼ u dakean gaʼangin yang fare nam ni bukun e awa.

3 Me yibi buch ni yib balam bayay ngakʼ fapi gidiiʼ, ma gubin e gidiiʼ ni rungʼag, mar manged mich riy, ni be gaʼar:

4 O gimed e pi gidiiʼ ko pi binaw ney ni kan gatheaymed, ni gimed pi gidiiʼen Jacob, arragon, ni gidiiʼen yu Israel, nge uw urngin yay ni nggu kunuy med ni boed ba alabol ni ma kunuy pifak nga tan poen, ma nge uw urngin yay ni nggu chathowoliymed.

5 Nge bayay, ke uw urngin yay ni kug kunuy med ni boed ba alabol ni ma kunuy pifak nga tan poen, arragon, O gimed e gidiiʼen e gidiiʼ ku Israel, ni kam mʼaed; arragon, O gimed e gidiiʼen e gidiiʼ ku Israel, gimed e piʼin ni ma paer u Jerusalem, nge gimed e piʼin ni kam mʼaed; arragon, nge uw urngin yay ni nggu kunuy med ni boed ba alabol ni ma kunuy pifak, ma damur mukun gaed.

6 O gimed e gidiiʼ ku Israel ni kug pag kam pired ni gimed bafos, nge uw urngin yay ni gura kunuy med ni boed ba alabol ni ma kunuy pifak nga tan poen, ni faʼan gimed ra kalngaenʼ magmed sul ngog u poloʼ i gumʼirchaʼmed.

7 Machane faʼanra dab mu rinʼed, O gimed e gidiiʼ ku Israel, ma pi yungi nʼen ni gimed ma paer riy e bay ni pag nge yaeni madaʼ ko ngiyalʼ ni ke muguʼul fare mʼag ntay ngakʼ e pi chitamangmed.

8 Ere chiney e yibi buch u tomuren ni ke rungʼag fapi gidiiʼ e pi thin ney, ma musap gaed, mar tabab gaed ko yoer nge gelʼgelʼ bayay ni bachan e pi gidiiʼ roraed nge pi fager roraed ni kar mʼaed.

9 Me yibi buch ni aray rogon ni mʼay fare dalip i rran. Ma ke yaeni kadbul, ma farengi lumor e ke mʼay ngabang u dakean e nam, ma fare fayleng e tal ko rurrur, ma fapi yungi war e tal ni daki pil nge ruw rabaʼ, ma fare gelʼgelʼ ni ubchiyaʼ e tal, nge gubin mit e lingan me mʼay.

10 Me sul fare fayleng nge dachug nga taʼabang bayay, nge paer; ma fare daloloeyʼ, nge mayoer, ma fare siyoeryoer rokʼ fapi gidiiʼ ni tayraed ngar pired ni yaed bafos e tal; ere daloloeyʼ roraed e pig nge ngaelʼ ni falfalaenʼ, ma kirbaenʼ roraed e ngaelʼ ni liyoer nge og magaer ngakʼ Somoel i Yesus Kristus, ni Tabiyul roraed.

11 Ere aray rogon ni ke yibi madaʼ ko ngiyalʼ ney ni fapi chep nib thothup niki i weliy fapi profet e ke muguʼul.

12 Ma tin baʼaray e gidiiʼ ni bagaʼ nib matʼaw e ra thap gaed, ma yaed e piʼin ni yib e fapi profet ngoraed ma dar malang niged raed; ma yaed e piʼin ni dar puʼoeged rachaʼen fapi saints, ma ireram e piʼin ni kan tayraed ni dar mʼaed—

13 Ere kan tayraed ni dar mʼaed ma ku dar ligil gaed nga ʼaer nge tharey raed e buutʼ; ma dar lumoch gaed u tʼay e rigur; ma dar yikʼ gaed ko nifiy, ma dariy banʼen ni mul nga dakeanraed nge thilpiriy raed ngar mʼaed; ma dar uned u paʼ e nifeng iyaen nga orel; ara liiʼraed fare chuwoʼ i ath nge lumor.

14 Ere chiney, chaʼ nibe poey e pi thin ney, e ngan pag nge nangfan; ma chaʼ ni bay fapi chep rokʼ nib thothup, ma nge fil nge nang, me sap nge guy gubin e pi yamʼ ney nge gafgow ntay ko nifiy, nge ath, nge yokoʼ nge nanyor, nge fayleng nibe mab ngar mulgaed ngay, ma gathi gubin e pinnʼey e be muguʼuliy fapi prophecy ko tin yoʼor ko fapi profet nib thothup.

15 Musap gaed, gube yoeg ngomed, Arragon, ni boʼor e piʼin ni yoeg e pinnʼey u napʼan fare wub rokʼ Kristus, min liiʼraed ngar mʼaed ni bachan e karoeged morngaʼagen e pinnʼey.

16 Arragon, fare profet I Zenos e yoeg morngaʼagen e pinnʼey, nge ku arragon I Zenock ni weliy morngaʼagen e pinnʼey, ni bachan e yow e ra weliyew morngaʼagmaed, ni piʼin ni kug magaey gaed ni pifakrow.

17 Musap gaed, I chitamangdaed I Jacob e ki weliy morngaʼagen ba ulung ni magaey u pifak Yosef. Ere musap gaed, gathi gadaed ba ulung ni magaey u pifak Yosef? Nge gubin e pinnʼey nibe weliy morngaʼagdaed, e gathi kan yoloey nga dakean fapi plate ni brass niʼir e fek e chitamangdaed I Lehi nga wuruʼ e binaw nu Jerusalem?

18 Me yibi buch u napʼan tungun e bin guyey nge aningeg e duw, ma musap gaed, nggu dag ngomed ni fapi gidiiʼ ku Nephi e ni tayraed ni dar mʼaed, nge ku piʼin ni kan pining e Lamanites ngoraed, e ni tayraed ni dar mʼaed, min dag e tʼufeg ngoraed, ma rib gaaʼ e tawaʼath nni puʼoeg nga dakean loelugraed, ni arame denʼuw napʼan nga tomuren e yaen ni tay Kristus nga tharmiy ma rriyulʼ ni yibi mʼug ngoraed—

19 Me dag ir ngoraed, me weliy ngoraed; ere bay bbabyor ni morngaʼagen e muruwel rokʼ ni bay finni piiʼ u tomuren e tiney. Ere chiney e nggu museg e thin rog u roey.