1 Ere chiney e yibi buch ni immoy ba ulung i gidiiʼ ko gidiiʼ rokʼ Nephi nib yoʼor nra mukun gaed nga taʼabang, ni kar liyeged fare temple ni bay u lan fare binaw ni Galwog; ma ur pired ni ke balyangaenʼraed make ginaenʼraed nga ur nnad roraed ngoraed, ma yaed be dag roraed ngoraed e pinʼen nib almarin ni ke thil nge maʼangʼang ni ke buch.

2 Ma kuyaed be weliy morngaʼagen e chaʼaney I Yesus Kristus, niʼir faram e kan piiʼ fare pow rokʼ riy u morngaʼagen e yamʼ nra tay.

3 Ere yibi buch u napʼan ni yaed be non roraed ngoraed, mar rungʼaged ba lam ni gowa ke yib u tharmiy; mar chachngar gaed, ya dawor ra nanged fan fare lam ni kar rungʼaged; ma gathib ba lam nib tomgin, ara balam nib gaaʼ; machane, ma yug aram rogon nib lam nib achig ma ngakʼ e piʼin ni rungʼag, ni arame dariy bang roraed ni derur; arragon, ri kuruf raed ni poloʼ, me gawael e gumʼirchaʼ roraed riy.

4 Me yibi buch ni rrungʼaged fare lam bayay, me dar nanged fan.

5 Ngo bayay ko yaen dalip yay ni kar rungʼaged fare lam, mar binged telraed ni nge yog ni ngar rungʼaged; mar sap gaed ko gin nibe yib fare lam riy; mar sap gaed ni ke miyuluy oewchraed nga tharmiy, ko gin nibe yib fare lam riy.

6 Ere musap gaed, yan dalip yay ngay ma kar nanged fan fare lam ni kar rungʼaged, me gaʼar ngoraed:

7 Muguyed Fakag nib Tʼuf rog, niʼir e rib falanʼug ngakʼ, niʼir e ke rir nag fithingag u dakean—mmotoyil gaed ngakʼ.

8 Ere yibi buch, u napʼan ni kar nanged fan mar sap gaed bayay nga tharmiy; ma musap gaed, ra guyed beeʼ nib Moʼon nibe yib u tharmiy nga butʼ; ma ke chuw nga ba mad nreb u lang nga butʼ nib wechwech; me yib nga butʼ nge yibi sakʼiy nga lukungun e ulung roraed; ma gubin fapi gidiiʼ ko fare ulung ni poloʼ mar chelgaed ngar sap gaed ngakʼ, ma de thog roraed ni ngar binged lʼuggun raed, ngar nnad ngoraed, ma darnanged ko mangfan, ya ra lemniged nib angel ni ke mʼug ngoraed.

9 Me yibi buch ni kʼiyeg paʼ me non ngakʼ fapi gidiiʼ, ni gaʼar:

10 Musap gaed, I gag Yesus Kristus, ni yoeg fapi profet ni bay yib nga fayleng.

11 Ere musap gaed, I gag e tamilang nge yafos ko fayleng; ma kug unum ko fare kap ni moʼoy ni piiʼ fachaʼ ni Chitamangiy ngog, ma kug tayfan fachaʼ ni Chitamangiy u dakean e pi denen ko gidiiʼ nu fayleng ni kug fek nga dakeanag, niʼir e kug athamgiliy laniyaenʼ fachaʼ ni Chitamangiy riy u fithikʼ gubin banʼen aram ko tabolngin.

12 Me yibi buch u napʼan ni ke weliy Yesus e pi thin ney ma fare ulung i gidiiʼ ni poloʼ e ra thiggaed ngar awgaed nga butʼ; ya ke yib ngaenʼraed ni kan prophesy nag u fithikʼraed ni Kristus e ra yibi mʼug ngoraed u tomuren ni ke yaen nga tharmiy.

13 Me yibi buch ni non fare Somoel ngoraed ni gaʼar:

14 Mu sakʼiy gaed ngalang ngam baed ngog, ni nge yog ni ngam math gaed ko fath u pʼeyoeg, nge ku arragon ni nge yog ni ngam math gaed nga fathan e richib u lan paʼag ngu rifrifanʼeg, ni nge yog ni ngam nanged ni gag fare Got ku Israel, nge fare Got ko fayleng ni poloʼ, ma kan liiʼeg nggumʼ ni bachan e pi denen ko gidiiʼ nu fayleng.

15 Me yibi buch ni fare ulung i gidiiʼ e ranoed, ngar math gaed nga pʼeyoen, mar thamiyed fathan e richib u lan paʼ ngu rifrifanʼay; ma biney e rrinʼed, ni yaed be yaen ni tataʼabeeʼ nge madaʼ ko ngiyalʼ ni ka ranoed ni yaed gubin, mar guyed nga oewchraed mar thamiyed nga paʼaraed, ma arame fini riyulʼ u wunʼraed mar falʼeged babyoren, ni ireram fachaʼ ni i yoloey fapi profet morngaʼagen ni bay yib.

16 Ma napʼan ni yaed gubin ni ka ranoed ma kar guyed nga oewchraed, mar tolul gaed ni yaed gubin u taʼabang, ni yaed be gaʼar:

17 Hosanna! Ke magaer fare Got ni Thʼabi Tolang! Mar awgaed nga butʼ nga charen I rifrifanʼay Yesus, mar liyoer gaed ngakʼ.

18 Me yibi buch ni non ngakʼ Nephi (ya bay Nephi u fithikʼ fare ulung i gidiiʼ) me yoeg ngakʼ ni nge yaen ngakʼ.

19 Me sakʼiy Nephi nge yaen ngakʼ, me siroʼ ngakʼ fare Somoel, me faray rifrifanʼay.

20 Me yoeg fare Somoel ngakʼ ni nge puw ngalang. Me puw ngalang nge sakʼiy nga pʼoewchen.

21 Me gaʼar fare Somoel ngakʼ: Kug piiʼ e gelingin ngom ni ngam tawfe nag e pi gidiiʼ ney u napʼan ni kug sul bayay nga tharmiy.

22 Ma ki pining Somoel boech e gidiiʼ, me non ngoraed ni kuʼ aram rogon, me piiʼ e gelingin ngoraed ni ngar tawfe gaed. Me gaʼar ngoraed: Baʼaray rogon ni ngam tawfe gaed; me yaeni aw ni dariy e maleʼeg thin u fithikʼmed.

23 Riyulʼ ni gube yoeg ngomed, ni enra kalngaenʼ ko pi denen rokʼ u dakean e thin romed, ma baʼadag ni ngan tawfe nag u fithingag, e baʼaray rogon ni ngam tawfe niged raed—Musap gaed, ngam maroed mu sakʼiy gaed nga fithikʼ e raen, magmed tawfe niged raed u fithingag.

24 Ere chiney e musap gaed, baʼaray rogon e pi thin ni thingar moeged, ni kam pininged fithingraed, magmed gaʼar:

25 Matʼawog ni ke piiʼ Yesus Kristus, e nggu tawfe nigem riy u fithingan e Chitamangiy, nge Fak nge fare Kan ni Thothup. Amen.

26 Ma arame ngam lithaeged raed nga fithikʼ e raen, magmed sulwegraed bayay u fithikʼ e raen ngalang.

27 Ere ireray rogon ni ngam tawfe gaed u fithingag; ya musap gaed, rriyulʼ ni gube yoeg ngomed, ni fachaʼ ni Chitamangiy, nge fare Fak, nge fare Kan ni Thothup e yaed ba taʼareb; me gag e gu bay u fithikʼ e en Chitamangiy, ma en Chitamangiy e bay u fithikʼag, ere fare Chitamangiy nge gag e gamow ba taʼareb.

28 Ere ireray woʼen ni kug chiyliy ngomed ni ngam tawfe gaed riy. Ma arame dabi yib e maleʼeg thin nga fithikʼmed, ni boed niki i buch; ara dabi yib e maleʼeg thin nga fithikʼmed ni morngaʼagen e pi gaʼfan ko machib rog ni woed niki i buch.

29 Ya rriyulʼ, nriyulʼ, ni gube yoeg ngomed, ni chaʼ ni bay fare lem ko togopluw rokʼ e gathi gamow, machane yow fare moʼoniyanʼ, niʼir e chitamangin e togopluw, ma ire ma kʼaring e damomuw nga lan gumʼirchaʼen e gidiiʼ ni ngar togopluw gaed u fithikʼ e damomuw roraed ngoraed.

30 Musap gaed, gathi ireray e machib rog, ni nggu kʼaring e damomuw nga lan gumʼirchaʼen e gidiiʼ, ngar togopluw gaed ngoraed; machane baʼaray e machib rog, ni pinʼen ni aray rogon e ngan pag i rinʼ.

31 Musap gaed, rriyulʼ, nriyulʼ, ni gube yoeg ngomed, bay gu tamilngeg e machib rog ngomed.

32 Ere baʼaray e machib rog, ma ireray fare machib ni en Chitamangiy e piiʼ ngog; me gag e gube micheg e en Chitamangiy, ma en Chitamangiy e be michegeg, ma fare Kan ni Thothup e be micheg e en Chitamangiy nge gag; ere gube micheg ni fachaʼ ni Chitamangiy e ke chiyliy ngakʼ gubin e gidiiʼ, u gubin yang, ni ngar kalgaed ngaenʼraed me michaenʼraed ngog.

33 Ma enra michaenʼ ngog, min tawfe nag, e ireram e chaʼ nra thap; ma ireram e piʼin ni yaedra tafnaʼ boech gilʼilungun Got.

34 Ma enra dabi michaenʼ ngog, ma dab ni tawfe nag, e yira gechig nag.

35 Rriyulʼ, nriyulʼ, ni gube yoeg ngomed, ni ireray e machib rog, ma gube micheg ni yib rokʼ e en Chitamangiy; ma enra michaenʼ ngog e kube michaenʼ ngakʼ e en Chitamangiy; ma ireram e chaʼ nra michegeg e en Chitamangiy ngakʼ, ya ire ra mʼug ngakʼ u dakean e nifiy nge fare Kan ni Thothup.

36 Ere aray rogon ni fachaʼ ni Chitamangiy e ra michegeg, nge fare Kan ni Thothup ni ra micheg fachaʼ ni Chitamangiy nge gag ngakʼ faʼanem; ya fachaʼ ni Chitamangiy, nge gag, nge Kan ni Thothup e gamaed ba taʼareb.

37 Nge ku bayay gube yoeg ngomed, ni thingar mu kalgaed ngaenʼmed, ngam boeded beeʼ nib bitir nib achichig, min tawfe nagmed nga fithingag, ara dangay ma dariy woʼen me thap e pinnʼey ngomed.

38 Ma ku bayay gube yoeg ngomed, ni thingar mu kalgaed ngaenʼmed, min tawfe nagmed nga fithingag, magmed boed beeʼ nib bitir nib achichig, ara dangay ma dariy woʼen magmed tafnaʼ boech gilʼilungun Got.

39 Rriyulʼ, nriyulʼ, Gube yoeg ngomed, ni ireray e machib rog, ma enra dumow nga dakean e ke dumow nga dakean e war rog, ma fapi garog nu infierno e dabiyog ni nge togopluw ngomed.

40 Ma piʼin ra weliy nib yoʼor ara balich ko biney, me yarmiy nge yoeg ni machib rog, e ireram e piʼin ni yib rokʼ moʼoniyanʼ, ma dawor ra dumow gaed nga dakean e war rog, machane kar ufunguyed e dayif roraed nga dakean e yaenʼ, ma fare garog nu infierno e ba sakʼiy nib mab nge paer nibe soen ni nge fek e piʼin ni aram rogon u napʼan ni bay yibi awe day nge nifeng nib gel ngoraed.

41 Ere, mmaroed ngakʼ e pi gidiiʼ ney, ngam weliyed fapi thin ni kugog, nge madaʼ ngakʼ e gidiiʼ nga tomren e fayleng.