1 Rriyulʼ, nriyulʼ, gube yoeg ngomed ni gubaʼadag ni ngam ayuweged e piʼin nib gafgow, machane ngam kolchiyaʼ gaed ngay ni dab mu ayuweged beeʼ u pʼoewchen e gidiiʼ ni ngan guymed riy; ara dangay ma dariy e tawaʼath romed rokʼ e Chitamangmed ni bay u tharmiy.

2 Ere, napʼan ni ngam piiʼed e ayuw ma dab mu thoeyed e yabul ni ngan nangmed, ni woed ni ma rinʼ e piʼin ma dake yigoʼ manang u lan e pi tafen e moʼolung ngu kanawoʼ, ni nge yog ni yoeg e gidiiʼ e soerokʼ ngoraed.

3 Machane napʼan ni ngam piiʼed e ayuw romed ma dabmu paged e baʼani gilaeyʼ i paʼaʼmed nge nang e nʼen nibe rinʼ e baʼan matʼaw i paʼmed;

4 Ni nge yog ni ayuw romed e nge aw nib miith; ma Chitamangmed ni maguy e tin nib miith, e ire ra tawaʼath nagmed riy nib puf woʼen.

5 Ma napʼan ni gimed ra meybil ma dab mu meybil gaed ni woed ni ma rinʼ e piʼin madake yigoʼ manang, ya yaed baʼadag ni ngar meybil gaed, ni yaed ba sakʼiy u tafen e pi tagilʼ e moʼolung nge pi yungi madardar ko kanawoʼ, ni nge guyraed e gidiiʼ. Rriyulʼ ni gube yoeg ngomed, ke mʼayi piiʼ puluwon ngoraed.

6 Machane gimed, e napʼan ni ngam meybil gaed, ma ngam maroed nga lan e singgil romed, ma napʼan ni kam ninged e mab romed, magmed meybil ngakʼ e Chitamangmed ni bay nib miith; ma Chitamangmed, niʼir e maguy e tin nib miith, e ra tawaʼath nagmed riy nib puf woʼen.

7 Machane napʼan ni ngam meybil gaed, ma dab mu suloed u dakean taʼab bugithin nib mʼayfan nge yoʼor yay, ni woed ni ma rinʼ e piʼin de michaenʼraed, ya yaed ma lemnag ni yira motoyil ngoraed ko thin roraed nib yoʼor.

8 Ere dab mu boeded yaed, ya Chitamangmed e manang e pinʼen nib tʼuf romed u mʼon ni ngam ninged ngakʼ.

9 Ere baʼaray rogon ni nga ʼum meybil gaed: Chitamangmaed ni gabay u tharmiy, ngan thothup nag fithingam.

10 Ngan rinʼ e tin nib mʼagaenʼum ngay u fayleng ni boed ni yibe rinʼ u tharmiy.

11 Mag nʼaegfan e denen romaed, u napʼan ni gamaed be nʼaegfan e denen rokʼ e pi toʼogor romaed.

12 Ma dab mu pagmaed nge lumel laniyaenʼ maed ko denen, ya ngam chuweg maed u paʼ e denen.

13 Ya gur e gilʼilungun rom, nge gelingin rom, nge rir rom, ni gubinfen. Amen.

14 Ya, faʼan gimed ra nʼaegfan e kireb rokʼ e gidiiʼ ma Chitamangmed nu tharmiy e kura nʼaegfan romed;

15 Machane faʼanra dab mu nʼaegfan e kireb rokʼ e gidiiʼ ma Chitamangmed e ku dabi nʼaegfan e pi kireb romed.

16 Nge ku boech, napʼan ni gimed ra baley nag e abich romed ma dab mu boeded fa piʼin ma dake yigoʼ manang, ni yaed be dag ni ke kirebaenʼ raed, ya kar kirkireb niged oewchraed ni nge guy raed e gidiiʼ ni gowa kar paged e abich. Rriyulʼ, ni gube yoeg ngomed, kan muʼ i tawaʼath nagraed.

17 Machane gimed, e napʼan ni gimed ra baley nag e abich romed, ma ngam gapgep niged loelugmed, magmed luknag oewchmed;

18 Ni nge siy ni guymed ni gimed be baley nag e abich romed, ya kemus ni ngakʼ e en Chitamangmed, ni bay nib miith; ma Chitamangmed, niʼir e maguy e tin nib miith, e ra tawaʼath nagmed riy nib puf woʼen.

19 Dab mu chaʼariyed ni fan ngomed e pi falaʼab nu fayleng, ni ireram e gin bay e chachngeg riy nge tʼay nra gatheay, nge gin dariy e moroʼroʼ riy ni ra chabliy e naʼun nge iring.

20 Machane ngam chaʼariyed ni fan ngomed e pi falaʼab nu tharmiy, ko gin dariy e chachngeg riy nge tʼay nra gatheay, nge gin dariy e moroʼroʼ riy ni ra chabliy e naʼun nge iring.

21 Ya gin bay e falaʼab romed riy, e ireram e gin ni ku bay e gumʼirchaʼ romed riy.

22 Tamilang ko dowef e ma yib u oewchey; ere faʼanra, miyuluy e changar romed ma dowef romed ni poloʼ e bayi sug ko tamilang.

23 Machane faʼanra guy oewchamed e tin kireb, ma doewmed ni poloʼ e ra sug ko lumor. Ere, faʼanra, farengi tamilang ni bay u fithikʼmed e ke lumor, ma rib gel e lumor riy!

24 Dariy beeʼ ni rayog ni nge pigpig ngakʼ lʼagruw e masta; ya nʼen rarinʼ e rebe nge fananikay bagyow me tʼufeg bagyow, ara dangay ma nge miyuluy nga reb me pag reb. Dabiyog ni ngam pigpig ngakʼ Got nge Salpiy.

25 Ere chiney e yibi buch u napʼan ni yoeg Yesus e pi thin ney me sap ngakʼ fare ragag nge lʼagruw niiʼ ni ke melʼegraed, me gaʼar ngoraed: Mu tayed fanmed yaen ko pi thin ney ni kug weliy. Ya musap gaed, ya gimed e piʼin ni kug melʼegmed ni ngam machib gaed ngakʼ e pi gidiiʼ ney. Ere gube yoeg ngomed, ni dabi magafaenʼmed ko yafos romed, ko mang e ngam kayed, ara mang e ngam unumed; ara magafaenʼmed ko dowef romed, ko mang e ngam chuweged ngay. Gathi ba gaʼfan e yafos ko ggan, nge dowef e ba gaʼfan ko mad?

26 Am guyed e pi archeʼ u lan e lang, ya darur yuw gaed, ara ratʼired e waʼamngin fa ra kunuyed nga lan e naʼun; machane Chitamangmed nu tharmiy e be duruwʼiy raed. Gathi kab felʼ boech rogmed ngoraed?

27 Miniiʼ romed e be lemnag ni rayog rokʼ ni nge puthuy bayang nga nʼumngin?

28 Ma mangfan ni gimed be lemnag e mad? Am lemniged rogon ni ma tugul e pi floras u dakean e falang; ya darur muruwel gaed, ara falʼeged e tiret;

29 Machane gube yoeg ngomed, ni mus ngakʼ Solomon, u fithikʼ gubin e rir rokʼ, ma de woed rogon fini felʼ usun e pinnʼey.

30 Ere, faʼanra ma upnguy Got e pan u dakean e falang ni bay e dabaʼ, me gabul min fek ngan lum ngay, me ere ku aram rogon ni ra chugewmed nga mad, ni faʼanra darwaer e mich romed.

31 Ere dabi magafaenʼmed, ni nge lungmed, Mang e ngad kayed? Fa, Mang e ngad unumed? Fa, mang e ngad chuw gaed ngay?

32 Ya Chitamangmed nu tharmiy e manang nib tʼuf romed gubin e pinnʼey.

33 Ere ngam gayed ko sommʼon gilʼilungun Got nge gubin matʼawon, ma gubin e pinnʼey e bay ni piiʼ ngomed.

34 Dabi magafaenʼmed ko bin gabul e rran, ya bin gabul e rran e bayi mang ire magafaenʼ ko tirokʼ banʼen. Ya ra rebo rran mab gaman e magawon ni bay riy ni daki tʼuf ni ngki magafaenʼuy nga yug boech e magawon.