1 ’E i teienei, i muri a’era, ’ia fa’aoti a’era Iesu i te parau atu i teie mau parau, ’ua fāriu fa’ahou atu ra ’oia i te mau ta’ata, ’e ’ua parau fa’ahou atu ra tōna vaha ia rātou, i te nā-’ō-ra’a atu ē : ’Oia mau, ’oia mau, tē parau atu nei au ia ’outou na, ’eiaha e ha’avā atu, ’ia ’ore ’outou ’ia ha’avāhia mai.

2 Nō te mea te ha’avāra’a tā ’outou e ha’avā atu ra, e ha’avāhia mai ïa ’outou ; ’e te fāito tā ’outou e fāito atu ra, e fāito-ato’a-hia mai ïa ia ’outou na.

3 ’E nō te aha ho’i ’oe i hi’o ai i te pāpā’a iti i roto i te mata o tō ’oe ra taea’e, e ’aore ho’i ’oe i ’ite i te rā’au rahi i roto i tō ’oe iho mata ?

4 E nāhea ho’i e ti’a ai ia ’oe ’ia parau atu i tō taea’e : Hō mai nā’u e ’īriti i te pāpā’a i roto i tō mata na—e inaha, e rā’au rahi ho’i tei roto i tō ’oe iho mata ?

5 E tena nā mau ta’ata ha’avare ē, ’a ’īriti nā ’oe nā mua i te rā’au rahi i roto i tō ’oe iho mata ; ’ei reira ’oe e ’ite maita’i ai ’ia ’īriti i te pāpā’a iti i roto i te mata o tō taea’e.

6 ’Eiaha te mea mo’a ’ia hōro’ahia atu nā te mau ’ūrī, ’eiaha ato’a tā ’outou mau poe ’ia paruhia atu nā te pua’a, ’e ’ia ta’ata’ahihia i raro a’e i tō rātou ’āvae, ’e ’a fāriu fa’ahou mai ai nō te hohoni ia ’outou.

7 ’A ani, ’e e hōro’ahia mai tā ’outou ; ’a ’imi, ’e e ’itea ia ’outou ; ’a pātōtō, ’e e ’īritihia mai ia ’outou.

8 Nō te mea te ta’ata ato’a ’o tē ani ra, e fāri’i ïa ; ’e ’o ’oia ’o tē ’imi ra, e ’itea ïa ; ’e ’o ’oia ’o tē pātōtō ra, e ’īritihia mai ïa.

9 ’E ’o vai ïa ta’ata i roto ia ’outou na ’o tē hōro’a atu i te ’ōfa’i nā tāna tamaiti ’ia ani mai ’oia i te faraoa ?

10 ’E ’aore rā ’ia ani mai ’oia i te i’a, e hōro’a atu ānei ’oia i te ’ōphī nāna ?

11 ’E mai te mea e ti’a ia ’outou na, ’o tei riro na ’ei mea parauti’a ’ore, ’ia ’ite nāhea ’ia hōro’a i te mau tao’a aroha maita’i nā tā ’outou mau tamari’i, e aha atu ïa te rahira’a o te mau tao’a aroha maita’i tā tō ’outou Metua i te ao ra e ti’a ’ia hōro’a atu nā te feiā i ani atu iāna ra ?

12 Nō reira, te mau mea ato’a tā ’outou i hina’aro i te mau ta’ata ’ia nā reira mai ia ’outou ra, ’a nā reira ato’a atu ïa ’outou ia rātou, ’o te ture teie ’e te mau peropheta.

13 ’A tomo nā te ’ūputa piriha’o ; e mea ’ā’ano ho’i te ’ūputa, ’e e mea rarahi te ’ē’a e tae atu ai i te pohe ; ’e e rave rahi tē tomo atu nā reira.

14 Nō te mea e mea piriha’o te ’ūputa, ’e e mea oaoa ho’i te ’ē’a e tae atu ai i te ora, e mea iti ho’i ïa te feiā i ’ite atu i te reira.

15 ’A ara i te mau peropheta ha’avare, ’o tē haere mai ia ’outou ma te huru o te māmoe ra, ’āre’a rā i roto ra, e luko taehae ïa.

16 E ’ite ho’i ’outou ia rātou nā roto i tō rātou mau hotu ; e pāfa’i mai ānei te ta’ata i te vine nō ni’a mai i te tātarāmoa, ’e te suke nō ni’a mai i te mōtu’u ?

17 ’Oia ato’a e fa’ahotu mai te tumu rā’au maita’i tāta’itahi i te hotu maita’i, ’āre’a rā te tumu rā’au ’ino ra e fa’ahotu mai ïa i te hotu ’ino.

18 E ’ore ho’i e ti’a i te tumu rā’au maita’i ’ia fa’ahotu mai i te hotu ’ino, e ’ore ato’a ho’i e ti’a i te tumu rā’au ’ino ’ia fa’ahotu mai i te hotu maita’i.

19 Te mau tumu rā’au ato’a ’o tē ore e fa’ahotu mai i te hotu maita’i ra, e tāpūhia ïa i raro ’e e hurihia i roto i te auahi.

20 Nō reira, nā roto i tō rātou mau hotu e ’ite ai ’outou ia rātou.

21 ’Aita te mau ta’ata ato’a ’o tē parau mai iā’u ē : E te Fatu, e te Fatu, e ō i roto i te bāsileia o te ao ra ; ’o te ta’ata rā i ha’apa’o i te hina’aro o tō’u Metua i te ao ra.

22 E rave rahi tē parau mai iā’u ’ia tae i taua mahana ra : E te Fatu, e te Fatu, ’aore ānei mātou i tohu nā roto i tō ’oe na i’oa, ’e i ti’avaru i te mau diabolo nā roto i tō ’oe na i’oa, ’e i rave i te mau ’ohipa māere e rave rahi nā roto i tō ’oe na i’oa ?

23 ’E i reira vau e parau atu ai ia rātou : ’Aita roa vau i ’ite ia ’outou ; ’a haere ’ē atu ’outou, ’outou ’o tei rave i te mau ’ohipa ’ī’ino.

24 Nō reira, ’o ’oia ’o tē fa’aro’o mai i tā’u nei mau parau ’e ’o tē ha’apa’o i te reira, e fa’aau ïa vau iāna i te hō’ē ta’ata pa’ari, ’o tei fa’ati’a i tōna fare i ni’a i te papa—

25 ’E ’ua ma’iri ihora te ua, ’e ’ua tahe ihora te mau pape pu’e, ’e ’ua tupu ihora te mata’i, ’e ’ua tae ihora i ni’a iho i taua fare ra ; ’e ’aore roa te reira i topa, nō te mea ’ua patuhia i ni’a iho i te papa.

26 ’E te feiā ato’a ’o tei fa’aro’o mai i tā’u nei mau parau e ’aore i ha’apa’o i te reira, e fa’aau ïa vau iāna i te hō’ē ta’ata ma’ama’a, ’o tei fa’ati’a i tōna fare i ni’a i te one—

27 ’E ’ua ma’iri ihora te ua, ’e ’ua tahe ihora te pape pu’e, ’e ’ua tupu ihora te mata’i, ’e ’ua tae ihora i ni’a iho i taua fare ra ; ’e ’ua topa ihora te reira, ’e e mea huru rahi tōna topara’a.