1 Ere chiney e yibi buch u napʼan ni yoeg Yesus e pi thin ney me chel bayay ko fare ulung i gidiiʼ, maki non ngoraed bayay, ni gaʼar: Rriyulʼ, nriyulʼ, gube yoeg ngomed, Dab mu turguyed rogon e tafnaey romed ngakʼ beeʼ, ni nge siy ni dugliy rogon e tafnaey ngomed.

2 Ya rogon ni kam turguyed e tafnaey romed ngakʼ beeʼ, e aram rogon ni yira turguy e tafnaey ngomed; ma rogon gelingin e gechig ni ngam turguyed ngakʼ beeʼ e ku aram rogon gelingin e gechig ni yira turguy ngomed.

3 Ma mangfan ni ngam sap gaed nga ba tabyuʼ ni bay u oewchen walagmed, ma damur guyed baley i gakʼiy nib gaaʼ ni bay u lan oewchemed?

4 Ara uw rogon ni ngam gaʼar ngakʼ walagem: Mu pageg nggu chuweg e tabyuʼ u lan oewchem—ni gur, ma ku bay baley i gakʼiy u lan oewchem?

5 Gimed e piʼin ni gimed ma dake goʼ manang, sommʼon e ngam chuweged fare lay i gakʼiy ni bay u lan oewchemed; mfin arame rayog ni nge tamilang e changar romed ni ngam chuweged e tabyuʼ u lan oewchen walagmed.

6 Dab mu piiʼed e tin nib thothup ngakʼ e pilis, ara munʼed e pi churwoʼ romed ngakʼ e babiy, ya yaedra yitʼ nga butʼ nga tan rifrifanʼay raed, mar chelgaed ngomed bayay ngar kʼaeded gimed.

7 Mu ninged, min piiʼ ngomed; mu gayed, ma gimed ra pirʼeg; mu tugtuguyed e mab, min bing ngomed.

8 Ya gubin e piʼin ni yaedra ning, e yira piiʼ ngoraed; ma enra gay, e ra pirʼeg; ma enra tugtuguy e mab, e yira bing ngakʼ.

9 Fa miniiʼ ra moʼon ni bay romed, nra ning fak e ggan ngakʼ, me piiʼ e malang ngakʼ?

10 Ara faʼanra ning ba nig ngakʼ, me piiʼ ba porchoyog ngakʼ?

11 Faʼanra arragon ni gimed ba kireb, ma gimed manang rogon ni ngam piiʼed e tawaʼath nib mangil ngakʼ e pi bitir romed, ere uw fini yoʼor boech nra piiʼ e en Chitamangmed ni bay u tharmiy e pinʼen nib mangil ngakʼ e enra ning ngakʼ?

12 Ere, gubin banʼen ni gimed baʼadag ni nge rinʼ e gidiiʼ ngomed, e kuʼir e ngam rinʼed ngoraed, ya ireray fare motochiyel nge fapi profet.

13 Mmaroed nga lan fare garog nib wuninʼ, ya bmab fare garog, ma puf radan, niʼir e basor iyaen ko gafgow, ma boʼor e piʼin ni yaed be yaen riy;

14 Ma bachane rib wuninʼ fare garog, mab achichig radan e kanawoʼ riy, nib sor iyaen ko yafos, ere rib lich e piʼin ni yaedra pirʼeg.

15 Mu ayuweged gimed ko pi profet ni deriyulʼ, ni bay rabaed ngomed ni boed bunuʼen e saaf wuruʼ i doewraed, machane nga fithikʼ i doewraed e boed e pi wolf ni ma kʼaad.

16 Gimed ranang u waamngiraed. Gulley ma kunuy e gidiiʼ e grape ko gakʼiy ni bay rachangalen, ara gakʼiy ni yigoʼ rachangal?

17 Ere aram rogon ni gubin e gakʼiy nib mangil e ma piiʼ e waʼamngin nib mangil, machane bake gakʼiy nib kireb e ma piiʼ e waʼamngin nib kireb.

18 Bake gakʼiy nib mangil e dabiyog ni nge piiʼ e waʼamngin nib kireb, ara bake gakʼiy nib kireb e dabiyog ni nge piiʼ e waʼamngin nib mangil.

19 Gubin e gakʼiy ni dabi piiʼ e waʼamngin nib mangil e yira thaeb nga butʼ, nga ninʼ nga mite nifiy.

20 Ere, gara nang raed u waamngiraed.

21 Gathi gubin e gidiiʼ ni ma gaʼar ngog, Somoel, Somoel, e ra yaen nga lan fare gilʼilungun nu tharmiy; ya enra rinʼ fiti laniyaenʼ e Chitamag ni bay u tharmiy.

22 Boʼor e piʼin e yaedra gaʼar ngog u lan e re rra nem: Somoel, Somoel, gathi kuʼug prophesy gaed u fithingam, nge gathi fithingam e ni tuluf e pi moʼoniyanʼ ngay, ma gathi kug rinʼed e maʼangʼang nib yoʼor u fithingam?

23 Ma arame bay gguʼar ngoraed: Da ugnang med; mu chuw gaed rog, gimed e piʼin ni gimed ma rinʼ e denen.

24 Ere, enra rungʼag e pi thin rog ney me rinʼ, e gura taʼareb nag ngakʼ beeʼ nib moʼon nib gonop, ni toey e naʼun rokʼ nga dakean e war—

25 Ma napʼan ni ra awe nʼuw, me yib e yuluʼ, me thow e nifeng, nge aw ko fare naʼun; ma dabi puth, ya kan dayif nag nga dakean e war.

26 Ma gubin e piʼin ni yaedra rungʼag e pi thin rog ney ma dab rrinʼed, e yaed boed beeʼ nib moʼon nib meechiyang, ni toey e naʼun rokʼ nga dakean e yanʼ—

27 Ma napʼan nra awe nʼuw, me yib e yuluʼ, me thow e nifeng, nge aw ko fare naʼun; me puth, ma rib almarin e puth nra tay.