1 Ere chiney e yibi buch u napʼan ni muʼ Yesus i yoeg e pi thin ney me chachngar u dakean fare ulung i gidiiʼ, me gaʼar ngoraed: Musap gaed, kam rungʼaged fapinʼen ni kug machib nag u mʼon ni ngguwon ngakʼ e Chitamag; ere, enra tay fanyen ko pi thin rog ney me fol riy, e ire gura chibiy ngalang ko bin tomur e rran.

2 Me yibi buch u napʼan ni yoeg Yesus e pi thin ney me pirʼeg ni bay boech i yaed u fithikʼraed ni ke balyangaenʼraed, ma yaed be lemnag ko mang e baʼadag ni ngar rinʼed ko fare motochiyel rokʼ Moses; ya darur nanged fan fare bugithin nibe yoeg ni tin kakrom banʼen e ke mʼay, ma gubin banʼen make beʼech.

3 Me gaʼar ngoraed: Dabi balyangaenʼmed ni kugog ngomed ni tin kakrom banʼen e ke mʼay, ma gubin banʼen make beʼech.

4 Musap gaed, gube yoeg ngomed ni fare motochiyel e ke muguʼul niʼir faram e ni piiʼ ku Moses.

5 Musap gaed, I gag e chaʼ nug piiʼ fare motochiyel, nge gag e chaʼ nug falʼeg ba mʼag u thilmow Israel ni gidiiʼ rog; ere fare motochiyel e ke muguʼul u dakeanag, ya kugub ning ngu muguʼuliy e motochiyel; ere bay napʼan me mus.

6 Musap gaed, dagur nʼaegfan fapi profet, ya oren e pi thin roraed ni dawori muguʼul u dakeanag, e gubin ma ra muguʼul.

7 Ma bachan e kugog ngomed ni tin kakrom banʼen e ke mʼay, ma arame gathi gube nʼaegfan e pinʼen ni kan weliy ni morngaʼagen e tin bay yib.

8 Ya musap gaed, fare mʼag niʼir e gutay ngakʼ e gidiiʼ rog e gathi gubin ni ke muguʼul; machane fare motochiyel niʼir e gupiiʼ ngakʼ Moses e ke yibi mus rog.

9 Musap gaed, I gag e motochiyel, nge tamilang. Nge pagaenʼmed ngog, ma gamed athamgil nge madaʼ ko tomur, ma ra yog ni ngam fos gaed; ya enra athamgil nge yaeni madaʼ ko tomur e gura piiʼ e yafos ni manechubog ngakʼ.

10 Musap gaed, kug piiʼ e motochiyel ngomed; ere mu fol gaed ko pi motochiyel rog. Ma ireray fare motochiyel nge fapi profet, ya rriyulʼ ni kar micheged gag.

11 Ere chiney e yibi buch u napʼan ni yoeg Yesus e pi thin ney, me gaʼar ngakʼ fare ragag nge lʼagruw ni ke melʼeg raed:

12 Gimed e piʼin gachalpeg; ma gimed e tamilang ngakʼ e pi gidiiʼ ney, ni yaed e tin ke magaey ko gidiiʼ ko tabinaew rokʼ Yosef.

13 Ere musap gaed, ireray e re nam ni kam suweyed; ma fachaʼ ni Chitamangiy e ke piiʼ ngomed.

14 Ma dariy bingyalʼ ni en Chitamangiy e ke piiʼ ngog e motochiyel ni nggog ngakʼ pi walagmed ni yaed bay u Jerusalem.

15 Ara bay bingyalʼ ni en Chitamangiy e ke piiʼ e motochiyel ngog ni nggu weliy ngoraed morngaʼagen yug boech e ganong ko gidiiʼ ku Israel, ni yaed e powiʼiyraed e en Chitamangiy nga wuruʼ fare nam.

16 Oren e tin ni chiyliy e en Chitamangiy ngog, ning gu weliy ngoraed:

17 Ni boech e saaf rog ni dar moyed ko biney e ulung; e ngkug fekraed, ngar rungʼaged lamag; me yaeni aw ni taʼareb e ulung, nge taʼareb e tachathowol.

18 Ere chiney, e bachan e ʼelʼel laniyaenʼ nge mich ni dariy ere darur nanged fan e thin rog; ere chiyliy e en Chitamangiy ngog ni nga dab kug weliy morngaʼagen e pinnʼey ngoraed.

19 Machane, rriyulʼ, ni gube yoeg ngomed ni en Chitamangiy e ke chiyliy ngog, ning nggog ngomed, nni kiiʼegmed u fithikʼraed ni bachan e denen roraed; ere bachan e denen roraed ma dar nanged morngaʼagmed.

20 Ere rriyulʼ, gube yoeg ngomed bayay ni bay boech e ganong ni en Chitamangiy e kiiʼeg raed roraed; ma bachan e denen roraed ere dar nanged morngaʼagraed.

21 Ma rriyulʼ ni gube yoeg ngomed, ni gimed e piʼin ni kug gaʼar: Boech e saaf rog ni dar moyed ko biney e ulung; yaed e thingar gu fekraedi i yib, ngar rungʼaged lamag; me yaeni aw ni taʼareb e ulung, nge taʼareb e tachathowol.

22 Ma darur nanged fan lamag, ya yaed be lemnag ni gube weliy morngaʼagen fapi Gentiles; ya darur nanged fan ni fapi Gentiles e ngar mich gaed u dakean e machib roraed.

23 Ma darur nanged fan u napʼan nugog ni yaedra rungʼag lamag; ma dar nanged fan ni fapi Gentiles e dariy bingyalʼ ni ngar rungʼaged lamag—ma dab gumʼug ngoraed ma kemus nu dakean fare Kan ni Thothup.

24 Machane musap gaed, gimed e kam rungʼaged lamag, ma kam guyed gag, ma gimed e saaf rog, ma kan unegmed nga fithikʼ fa piʼin ni ke piiʼ e en Chitamangiy ngog.