1 Ere rriyulʼ, nriyulʼ, gube yoeg ngomed ni bay boech e saaf rog, ni dar moyed ko biney e nam, ara fare nam nu Jerusalem, ara lan bayang e pi binaw nib liyeg e yungin ni kug machib riy.

2 Ya yaed e piʼin ni gube yoeg ni dawor ra rungʼaged lamag; ara bay bingyalʼ ni kug mʼug ngoraed.

3 Machane ke thap ngog ba motochiyel rokʼ e en Chitamangiy ni thingar guwaen ngoraed, ni nge yog ni ngar rungʼaged lamag, min unegraed nga fithikʼ e saaf rog, ni nge yog ni nge yaeni aw ni taʼareb e ulung nge taʼareb e tachathowol; ere nggu waen gumʼug ngoraed.

4 Ma gube chiyliy ngomed ni ngam yoloeyed e pi thin ney u tomuren ni kug waen, ni faʼanra gidiiʼ rog nu Jerusalem, ni yaed e piʼin ni kar guyed gag ma ur moyed rog u napʼan e machib rog, e dabra ninged ngakʼ fachaʼ ni Chitamangiy u fithingag, ni nge gomanga yog ni ngar nanged morngaʼagmed u dakean fare Kan ni Thothup, nge ku tin baʼaram e ganong ni dar nanged morngaʼagen, ni nge yaeni aw ni pi thin ney ni ngam yoloeyed e ngar chaʼariyed ni ngan dag ngakʼ fapi Gentiles, ni gomanga e yog riy u dakean fapi Gentiles ni poloʼ, ngakʼ e piʼin ni ke magaey u pifakraed, ni bay ra garar gaed u dakean e fayleng ni bachan e mich roraed ni dariy, e tamilngaenʼ ara yog ni tamilang laniyaenʼraed rog, ni gag e Tabiyul roraed.

5 Ma arame bay gu kunuy raed nga taʼabang ko fa aningeg rabaʼ i fayleng; ma arame bay gu muguʼuliy fare mʼag ni tay fachaʼ ni Chitamangiy ngakʼ gubin fapi gidiiʼ ku Israel.

6 Ma nge felʼ waʼathan fapi Gentiles, ni bachan e mich roraed ngog, u fithikʼ ngo dakean fare Kan ni Thothup, niʼir e be michegeg nge fachaʼ ni Chitamangiy ngoraed.

7 Musap gaed, ri bachan e mich roraed ngog, nibe yoeg fachaʼ ni Chitamangiy, nge bachan e mich romed ngomed ni dariy, O gimed e gidiiʼ ku Israel, nu lan e bin tomur e rran ma bay yib e tin riyulʼ ngakʼ fapi Gentiles, ni nge yog ni tamilang laniyaenʼraed ko pinnʼey.

8 Machane gafgow, e ra yib ngakʼ fapi Gentiles ni dar michaenʼraed, ni yoeg fachaʼ ni Chitamangiy—ya yug aram rogon machane karbaed nga dakean e giney e nam, ma kar wereged e gidiiʼ rog ni yaed fapi gidiiʼ ku Israel; ma fapi gidiiʼ ku Israel e kan chuwegraed u fithikʼraed, ma kar yitʼed raed nga butʼ;

9 Ma bachan e pi wurngaenʼ rokʼ fachaʼ ni chitamangiy ngakʼ fapi Gentiles, nge fare gechig rokʼ fachaʼ ni Chitamangiy ngakʼ e gidiiʼ rog ni yaed e gidiiʼ ku Israel, ma rriyulʼ, nriyulʼ, gube yoeg ngomed, u tomuren gubin e pinnʼey, nge tomuren ni kug lemnag rogon ni ngan liiʼ e gidiiʼ rog, ni gidiiʼ ku Israel, min gafgow nagraed, min liiʼraed, ma ngan chuwegraed u fithikʼraed, ma ngar fananikayed raed, ma ngan muning nagraed mar tabnathin gaed u fithikʼraed.

10 Ere aray rogon ni chiyliy e en Chitamangiy ni nggog ngomed: U napʼan e re rran nem ni fapi Gentiles e bay ra denen gaed nib togopluw ko gospel rog, mar feked yathin e gospel rog ni poloʼ, ma napʼan ni bay ra nʼufed yaed ngalang nga fithikʼ e ufʼuf u lan gumʼirchaʼraed ngar tolang gaed ngakʼ gubin e pi nam, ma ngar tolang gaed ngakʼ gubin e gidiiʼ ko poloʼ e fayleng, ma bay ra suggaed nga fithikʼ gubin mite sasalap lʼugun, nge sasaliyeb, nge kireb, nge gubin mite baen, nge mathang pogofan, nge pi gamʼing nib falʼngakʼ, nge pi gathar, nge pi ngongolen e fananikan nib miith; ma faʼan yaedra rinʼ gubin e pinnʼem, mar feked yathin e gospel rog ni poloʼ, musap gaed, i gaʼar fachaʼ ni Chitamangiy, bay guchuweg e gospel rog ni poloʼ u fithikʼraed.

11 Ma arame bay yib nganʼug e mʼag rog nug tay ngakʼ e gidiiʼ rog, O gidiiʼ ku Israel, ma bay gu fek e gospel rog iyaen ngoraed.

12 Ma bay gudag ngomed, O gidiiʼ ku Israel, ni fapi Gentiles e dabiyog ni ngar gelgaed ngomed; machane bay yib nganʼug e mʼag rog ngomed, O gidiiʼ ku Israel, ma bay mu thapeged e llowaenʼ ko fare gospel rog ni poloʼ.

13 Machane faʼanra kalngaenʼ fapi Gentiles marbaed ngog, nibe yoeg fachaʼ ni Chitamangiy, ma musap gaed yira uneg raed ko mathaʼeg nga fithikʼ e gidiiʼ rog, O gidiiʼ ku Israel.

14 Ma dab gupag e gidiiʼ rog, ni gidiiʼ ku Israel, ni nga ranoed u fithikʼraed ni ngan yitʼed raed nga butʼ, ni yoeg fachaʼ ni Chitamangiy.

15 Machane faʼanra dabra chelgaed ngar sap gaed ngog, mar motoyil gaed ko thin rog, ma gura pagraed, arragon, gura pag e gidiiʼ rog, O gidiiʼ ku Israel, ni nga ranoed u fithikʼraed min yitʼraed nga butʼ, mar boeded e sol ni ke mʼay lamen, ni arame dakuriy banʼen nib felʼ ngay ya ngan nʼaeg nga wean, nge yitʼ e gidiiʼ rog nga butʼ, O gidiiʼ ku Israel.

16 Rriyulʼ, nriyulʼ, gube yoeg ngomed, ni aray rogon ni chiyliy e en Chitamangiy ngog—ni nggu piiʼ ngakʼ e pi gidiiʼ ney e giney e binaw ngar suweyed.

17 Ma arame bayi muguʼul fapi thin rokʼ fare profet i Isaiah, ni gaʼar:

18 Matanag romed e yaedra non nib gaaʼ lamraed; ma bay ra tang gaed ni taʼab lamraed u taʼabang, ya bay ruguyed nga oewchraed u napʼan ni ke sulweg Somoel bayay e Zion.

19 Ma bay ra tolul gaed nga fithikʼ e falfalaenʼ, ma yaed be tang u taʼabang, ni yaed be gaʼar, gimed e pi yungi nʼen ni kan gatheaymed u Jerusalem; ya fare Somoel e ke falʼeg laniyaenʼ e gidiiʼ rokʼ, make bayuliy yu Jerusalem.

20 Fare Somoel e ke dag falʼngin i paʼ nib thothup u mit gubin e pi mfen; nge gubin e gidiiʼ ko tin tomur e rran u fayleng e yaedra guy fare woʼen e thap rokʼ Got.