1 ’E ’oia mau, ’oia mau, tē parau atu nei au ia ’outou na, e māmoe ’ē atu ā tā’u nei, e ’ere i tō teie nei fenua, e ’ere ato’a i tō te fenua ra nō Ierusalema, e ’ere ato’a i tō te tahi noa atu mau tufa’a o taua fenua ’o tā’u i haere atu nō te tāvini.

2 ’E ’o rātou ho’i ’o tā’u e parau nei, ’o rātou ïa ’o tei ’ore ā i fa’aro’o i tō’u nei reo ; ’aore ato’a ā vau i fa’a’ite iā’u iho nei ia rātou.

3 ’Āre’a rā ’ua fāri’i au i te hō’ē fa’auera’a nō ’ō mai i te Metua ’ia haere atu vau ia rātou ra, ’e ’ia fa’aro’o mai ho’i rātou i tō’u nei reo, ’e ’ia tai’ohia ho’i i rotopū i tā’u nei mau māmoe, ’e ’ia hō’ē a’e nana ’e ’ia hō’ē a’e tīa’i māmoe ; nō reira tē haere nei au e fa’a’ite atu iā’u iho ia rātou ra.

4 ’E tē fa’aue atu nei au ia ’outou ’ia pāpa’i ’outou i teie nei mau parau i muri iho i tō’u haerera’a atu, ’ia ’ore tō’u feiā i Ierusalema ’o tei ’ite mata mai iā’u, ’e ’o tei pārahi na i pīha’i iho iā’u ’a tāvini ai au, ’ia ani atu i te Metua nā roto i tō’u ra i’oa ’ia roa’a tō rātou ’ite nō ni’a ia ’outou nā roto i te Vārua Maita’i, ’e nō ni’a ato’a i te tahi atu mau ’ōpū ’o tei ’ore i ’itehia na e rātou ra, ’ei reira ’ia fa’a’itehia atu teie mau parau ’o tā ’outou e pāpa’i ’e ’o tā ’outou e tāpe’a i te mau ’Ētene, ’e nā roto i te ’īra’a o te mau ’Ētene e roa’a ai i te toe’a o te hua’ai o tō’u ra feiā i ha’apurara-’ē-hia nā ni’a i te fenua nei nō tō rātou ti’aturi ’ore, te ’ite nō ni’a iā’u, tō rātou Tāra’ehara.

5 ’E i reira e ha’aputuputu ai au ia rātou mai nā tufa’a e maha o te ao nei ; ’e i reira e fa’atupu ai au i te fafaura’a ’o tā te Metua i fafau atu i te tā’āto’ara’a o te mau ta’ata nō te ’utuāfare o ’Īserā’ela.

6 E ao tō te mau ’Ētene nō tō rātou ti’aturi iā’u nei, nā roto i te Vārua Maita’i, ’o tei fa’a’ite pāpū atu ia rātou nō ni’a iā’u ’e i te Metua.

7 Inaha, tē nā ’ō mai ra te Metua, nō tō rātou ti’aturi iā’u, ’e nō tō ’outou ti’aturi ’ore, e te ’utuāfare o ’Īserā’ela, ’ia tae i te tau hope’a ra, e tae ai te parau mau i te mau ’Ētene ra, ’ia fa’a’itehia atu te ’īra’a nō teie mau mea nei ia rātou.

8 Tē nā ’ō mai ra ho’i te Metua, ’auē ho’i te mau ta’ata ti’aturi ’ore o te mau ’Ētene ē—’e noa atu ā ’ua tae mai rātou i ni’a i teie nei fenua, ’e ’ua ha’apurara ’ē i tō’u mau ta’ata nō te ’utuāfare o ’Īserā’ela ; ’e tō’u mau ta’ata nō te ’utuāfare o ’Īserā’ela ’ua tīahi-’ē-hia atu ïa rātou mai rotopū atu ia rātou ra, ’e ’ua ta’ata’ahi-noa-hia i raro a’e i tō rātou ’āvae.

9 ’E nō te aroha o te Metua i te mau ’Ētene, ’e nō te mau ha’avāra’a ato’a ho’i a te Metua i tō’u mau ta’ata nō te ’utuāfare o ’Īserā’ela, ’oia mau, ’oia mau, tē parau atu nei au ia ’outou na, ’ia oti te reira ato’a ra, ’e ’ia oti ato’a iā’u te fa’ati’a ia tā’irihia tō’u ra mau ta’ata nō te ’utuāfare o ’Īserā’ela, ’e ’ia hāmani-’ino-hia, ’e ’ia taparahihia, ’e ’ia tīahi-’ē-hia atu mai rotopū atu ia rātou, ’e ’ia riro rātou ’ei feiā ririhia e rātou, ’e ’ia riro ’ei fa’a’inora’a ’e ’ei tau’āparaura’a i rotopū ia rātou.

10 ’E nō reira ’ua fa’aue mai te Metua e mea ti’a roa iā’u ’ia parau atu ia ’outou ē : ’Ia tae i te tau e hara ai te mau ’Ētene i tā’u ra ’evanelia, ’e e pāto’i ai i te ’īra’a nō tā’u ra ’evanelia, ’e e fa’ateiteihia ai tō rātou ’ā’au te’ote’o i ni’a a’e i te mau nūna’a ato’a ra, ’e i ni’a a’e ho’i i te mau ta’ata pā’āto’a o te ao ato’a nei, ’e e fa’a’īhia ai i te mau huru ha’avare ato’a, ’e te mau parau huna, ’e te mau parau e ha’ape’ape’a ai, ’e te mau huru fa’ahua parauti’a, ’e te mau ’ohipa taparahi ta’ata, ’e te mau ’ohipa ha’avare a te mau tahu’a, ’e te mau ’ohipa taiata, ’e te mau ’ohipa huna ’e te vi’ivi’i ra ; ’e ’ia rave rātou i taua mau mea ato’a ra, ’e ’ia pāto’i ho’i i te ’īra’a nō tā’u ra ’evanelia, inaha, te nā ’ō mai ra te Metua, e rave ’ē atu ai au i te ’īra’a nō tā’u ’evanelia mai rotopū atu ia rātou.

11 ’E i reira, e ha’amana’o vau i tā’u fafaura’a ’o tā’u i fafau atu i tō’u ra mau ta’ata, e te ’utuāfare o ’Īserā’ela ē, ’e e fa’atae atu vau i tā’u ’evanelia ia rātou.

12 ’E e fa’a’ite atu vau ia ’outou, ’e te ’utuāfare o ’Īserā’ela ē, ’e ’aita roa tō te mau ’Ētene e mana i ni’a a’e ia ’outou na ; e ha’amana’o rā vau i tā’u fafaura’a ia ’outou na, ’e te ’utuāfare o ’Īserā’ela ē, ’e e fāri’i ’outou i te ite nō te ’īra’a o tā’u ra ’evanelia.

13 ’Āre’a rā mai te mea e tātarahapa te mau ’Ētene ’e e fāriu mai ho’i iā’u nei, tē nā reira mai ra te Metua, inaha, e tai’ohia mai rātou i rotopū i tō’u ra mau ta’ata, ’e te ’utuāfare o ’Īserā’ela ē.

14 ’E e ’ore roa vau e fa’ati’a i tō’u mau ta’ata nō te ’utuāfare o ’Īserā’ela ’ia haere i rotopū ia rātou, ’e ’ia ta’ata’ahi ia rātou, tē nā reira mai ra te Metua.

15 ’Āre’a rā mai te mea ē ’aita rātou e fāriu mai iā’u nei, ’e e fa’aro’o mai i tō’u reo, e fa’ati’a ïa vau ia rātou, ’oia ïa, e fa’ati’a vau i tō’u mau ta’ata nō te ’utuāfare o ’Īserā’ela, ’ia haere atu rātou i rotopū ia rātou, ’e ’ia ta’ata’ahi ia rātou, ’e e riro rātou mai te miti mā’aro ra, ’o tei riro ’ei mea faufa’a ’ore, e fa’aru’ehia ïa, ’e e ta’ata’ahihia e te ’āvae o tō’u ra mau ta’ata, ’e te ’utuāfare o ’Īserā’ela ē.

16 ’Oia mau, ’oia mau, tē parau atu nei au ia ’outou na, ’ua nā reira te Metua i te fa’aue mai iā’u—’ia hōro’a atu vau i teie nei fenua ’ei ’āi’a nō teie nei feiā.

17 ’E i reira e fa’atupuhia ai te mau parau a te peropheta Isaia ’o tei nā ’ō mai ē :

18 E fa’ateitei tō ’oe mau tīa’i i tō rātou reo ; ’e e ’āmui tāhō’ē tō rātou reo i te hīmenera’a ; ’e e ’ite rātou te mata ’e te mata ’ia fa’aho’i mai te Fatu ia Ziona.

19 ’Ia puroro noa atu te ’oa’oa ; ’a hīmene ’āmui mai e te mau vāhi pararī nō Ierusalema ; ’ua ha’amāhanahana ho’i te Fatu i tōna mau ta’ata, ’e ’ua fa’aora ’oia ia Ierusalema.

20 ’Ua fa’a’ite mai ho’i te Fatu i tōna rima mo’a i mua i te mata o te mau nūna’a ato’a ; ’e e ’ite tō te mau hope’a ato’a o te fenua nei i te fa’aorara’a a tō tātou Atua.