1 Musap gaed, chiney e yibi buch u napʼan ni yoeg Yesus e pi thin ney me chachngar bayay u dakean fare ulung i gidiiʼ, me gaʼar ngoraed: Musap gaed, ke taw ko nepʼ rog.

2 Gumanang ni gimed ba moʼowaer, ni dabiyog ni ngam nanged fan gubin e thin rog ni ke chiyliy e en Chitamangiy ngog ni nggu weliy ngomed e ngiyalʼ ney.

3 Ere, mmaroed nga tabinaew romed, magmed falʼeg i lemnag e pinʼen ni kugog, min fith ngakʼ e Chitamangiy, u fithingag, ni nge yog ni ngam nanged fan, magmed yarmiy e tafnaey romed ni fan ko gabul, ma kugub ngomed bayay.

4 Machane chiney e nggu waen ngakʼ e en Chitamangiy, ma ngkug mʼug ngakʼ fapi ganong ku Israel ni kar malog gaed, ya dawor ra malog gaed rokʼ e en Chitamangiy, ya manang e gin ni ke yaeni tay raed ngay.

5 Me yibi buch u napʼan ni non Yesus, me chachngar bayay u dakean fare ulung i gidiiʼ, me guy ni ke mapʼ e luʼ u oewchraed, ma kar miyuluyed e changar roraed ngakʼ ni gowa nga roeged ngakʼ ni ngki paer roraed nge nʼuw napʼan buchʼuw.

6 Ere gaʼar ngoraed: Musap gaed, lan ngorongreg e ke sug nag tawurngimed.

7 Bay e piʼin nib mʼar u fithikʼmed? Ma gimed fekraed iyib ngog e ngaray. Bay e piʼin nib mugutgut, fa malmit, fa yaf, fa bilis, fa daraw, fa piʼin ni ke ul ayraed, fa piʼin nib baling, fa piʼin ni demutrug e mʼar ni bay roraed? Mi gimed fekraed iyib e ngaray ngug gol nagraed, ya kug runguymed; ya lan ngorngoreg e ke sug ko murnguy.

8 Ya gumnang ni gimed baʼadag ni nggu dag ngomed e nʼen ni kug dag ngakʼ pi walagmed nu Jerusalem, ya kug guy ni mich romed e ba gaman ni ngug gol nagmed.

9 Me yibi buch u napʼan ni non ni aray rogon, ma gubin fare ulung i gidiiʼ, ma ranoed u taʼabang ni kar feked e pi mʼar nge liliy roraed, nge mugutgut roraed, nge malmit roraed, nge maʼay roraed, nge gubin e piʼin ni demutrug e miti mʼar ni bay roraed; me gol nagraed ni gubin e piʼin nni fekraed iyaen ngakʼ.

10 Ma yaed gubin, ni piʼin ni kan gol nagraed nge piʼin ni kuyaed ba poloʼ, e ra siroʼ gaed nga butʼ nga charen i rifrifanʼay, ma arame ra lukuyed rifrifanʼay ko luʼ roraed.

11 Me yibi buch ni yoeg ngoraed ni ngar feked e bitir roraed iyaen ngakʼ.

12 Ere ra feked e pi bitir roraed ngar tayed raed nga butʼ u charen nib liyeg, me sakʼiy Yesus u thilraed; ma fare ulung i gidiiʼ e ra kan gaed nga tomur nge madaʼ ko ngiyalʼ ni ke gubin e bitir ma kan fekraed iyaen ngakʼ.

13 Me yibi buch u napʼan ni yaed gubin ni kan fekraed iyaen ngakʼ, mab sakʼiy Yesus u thilraed, me yoeg ngakʼ fare ulung i gidiiʼ ni ngar ragbug gaed nga dakean e buutʼ.

14 Me yibi buch u napʼan ni kar ragbug gaed nga dakean e buutʼ, me yoeg Yesus rokʼ, me gaʼar: Chitamag, kari kireb anʼug ni bachan e denen rokʼ fapi gidiiʼ ku Israel.

15 Ma napʼan ni yoeg e pi thin ney, ma kuʼir rokʼ me ragbug nga dakean e buutʼ; me meybil ngakʼ e en Chitamangiy, ma pinʼen ni piiʼ e meybil riy e dabiyog i yoloey, ma piʼin ni rungʼag u fithikʼ fare ulung i gidiiʼ e pinʼen ni yoeg e ra micheged.

16 Ere baʼaray rogon ni ur micheged: Oewchey e dawori guy; ara rungʼag tiliy, bingyalʼ, rib felʼ mab poloʼ falʼngin e pinʼen ni kug guyed ma kug rungʼaged ni weliy Yesus ngakʼ e en Chitamangiy;

17 Ma dariy ba yunmon ni rayog ni nge yoeg, ara yog ni yoloey beeʼ, ara yog ni guy gumʼirchaʼen e gidiiʼ fini felʼ nge fini poloʼ falʼngin e pinʼen ni kug guyed ma kug rungʼaged ni ke yoeg Yesus; ma dariy beeʼ ni rayog ni nge guy u laniyaenʼ e falfalaenʼ ni ke suguy maed ni poloʼ ko re ngiyalʼ i nʼen nug rungʼaged nibe meybil ni fan ngomaed ngakʼ e en Chitamangiy.

18 Me yibi buch u napʼan ni muʼ Yesus ko meybil ngakʼ e en Chitamangiy, me sakʼiy ngalang; ma kari gel e falfalaenʼ rokʼ fare ulung i gidiiʼ me mʼay gelingraed.

19 Me yibi buch ni non Yesus ngoraed, me yoeg ni ngar sakʼiy gaed ngalang.

20 Mar sakʼiy gaed ngalang ngar chuw gaed u butʼ, me gaʼar ngoraed: Nge felʼ waʼathmed ni bachan e mich romed. Ere chiney e musap gaed, kari gel e falfalaenʼ rog.

21 Ma napʼan ni yoeg e pi thin ney, me yoer, me micheg fare ulung i gidiiʼ, me fek e pi bitir roraed, ni tataʼareb, nge yibliy raed, me meybil ngakʼ e en Chitamangiy ni fan ngoraed.

22 Ma napʼan ni rinʼ e biney, me yoer bayay;

23 Me non ngakʼ fare ulung i gidiiʼ, ni gaʼar ngoraed: Musap gaed, ngakʼ e pi bitir romed.

24 Ma napʼan ni kar sap gaed ni ngar guyed mar changar gaed nga tharmiy, mar guyed e tharmiy ni ke mab, mar guyed e angel ni karbaed nga butʼ u tharmiy ni gowa bilyeg raed e nifiy; marbaed nga butʼ ngar chalongbiyed fapi bitir, ma ke liyeg raed e nifiy; me machib fapi angel ngoraed.

25 Ma fare ulung i gidiiʼ e ra guyed mar rungʼaged mar falʼeged e chep riy; ma yaed manang ni chep roraed e ba riyulʼ ya yaed gubin ni kar guyed ma kar rungʼaged, ni gubin e gidiiʼ ni ra beeʼ ma manang rokʼ; ma gonpon lʼagruw e biyuʼ nge lal miriʼay urngi raed; ni yaed bogi pumoʼon, nge ppin, nge bitir.