1 ’E i muri a’era, ’ua fa’aue atu ra Iesu i tāna mau pipi ’ia hōpoi mai i te pāne ’e te uaina iāna ra.

2 ’E ’a haere atu ai rātou e ti’i i te pāne ’e te uaina, ’ua fa’aue atu ra ’oia i te mau ta’ata ’ia pārahi i raro i ni’a iho i te fenua.

3 ’E i te ho’ira’a mai te mau pipi ma te pāne ’e te uaina, ’ua rave ihora ’oia i te pāne ’e ’ua vāvāhi ihora ’e ’ua ha’amaita’i ihora i te reira ; ’e ’ua hōro’a atu ra i te mau pipi ’e ’ua fa’aue atu ra ia rātou ’ia ’amu.

4 ’E ’ia ’amu ihora rātou ’e ’ia pa’ia a’era, ’ua fa’aue atu ra ’oia ’ia hōro’a atu nā te mau ta’ata.

5 ’E ’ia ’amu ihora te mau ta’ata ’e ’ia pa’ia a’era, ’ua nā ’ō atu ra ’oia i te mau pipi : Inaha, e fa’atōro’ahia te hō’ē i rotopū ia ’outou, e nā’u e hōro’a atu i te mana iāna ’ia vāvāhi ’oia i te pāne ’e ’ia ha’amaita’i ho’i ’e ’ia hōro’a atu ho’i i te mau ta’ata nō tā’u nei ’ēkālesia, ’e ’ia rātou pā’āto’a ’o tē ti’aturi ’e ’o tē bāpetizohia i tō’u ra i’oa.

6 ’E ’ia nā reira noa ato’a ’outou i te rave-māite-ra’a, mai tā’u i rave iho nei, ’oia ho’i, mai tā’u i vāvāhi i te pāne ’e i ha’amaita’i i te reira ’e i hōro’a atu ia ’outou na.

7 ’E ’ia nā reira ’outou i te rave ’ei ha’amana’ora’a i tō’u tino, mai tā’u i fa’a’ite atu ia ’outou na. ’E e riro ïa ’ei fa’a’itera’a pāpū i te Metua, ’e e ha’amana’o noa ’outou iā’u. ’E mai te mea e ha’amana’o noa ’outou iā’u, e vai noa ïa tō’u Vārua i roto ia ’outou.

8 ’E i muri a’era, ’ia oti a’era tāna paraura’a atu i teie mau parau, ’ua fa’aue atu ra ’oia i tāna mau pipi ’ia rave i te uaina i roto i te ’āu’a ’e ’ia inu i te reira, ’e ’ia hōro’a ato’a atu i te mau ta’ata ’ia inu rātou i te reira.

9 ’E i muri a’era, ’ua nā reira rātou, ’e ’ua inu i te reira ’e ’ī a’era ; ’e ’ua hōro’a atu i te mau ta’ata, ’e ’ua inu ihora rātou, ’e ’ī a’era.

10 ’E ’ia oti a’era te reira i te ravehia e te mau pipi, ’ua nā ’ō atu ra Iesu ia rātou : E ao tō ’outou nō teie mea tā ’outou i rave iho nei, tē ha’apa’o ra ïa i tā’u mau fa’auera’a, ’e nā te reira e fa’a’ite i te Metua ē, ’ua hina’aro mau ’outou ’ia rave i tā’u i fa’aue atu ia ’outou na.

11 ’E e nā reira noa ’outou i te rave i te feiā ’o tei tātarahapa ’e tei bāpetizohia ho’i i tō’u ra i’oa ; ’e e rave ’outou i te reira ’ei ha’amana’ora’a i tō’u ra toto, ’o tā’u i ha’amani’i nō ’outou, ’e ’ia fa’a’ite atu ’outou i te Metua ē, e ha’amana’o noa ’outou iā’u. ’E mai te mea e ha’amana’o noa ’outou iā’u, e vai noa tō’u Vārua i roto ia ’outou.

12 ’E tē hōro’a atu nei au i te hō’ē fa’auera’a ia ’outou ’ia rave ’outou i teie mau mea. ’E ’ia nā reira noa ’outou i te rave i teie mau mea, e ao tō ’outou, nō te mea ’ua patuhia ’outou i ni’a iho i tā’u nei papa.

13 ’E ’o ’oia i rotopū ia ’outou ’o tē rave ri’i noa i te reira, ’aore ïa i patuhia i ni’a iho i tā’u ra papa, ’ua patuhia rā ïa i ni’a iho i te niu one ; ’e ’ia ma’iri mai te ua, ’e ’ia tahe mai te pape pu’e, ’e ’ia puhipuhi mai te mata’i i ni’a iho ia rātou ra, e ma’iri ïa rātou i raro, ’e ’ua vai matara noa te mau ’ūputa o hade nō te fāri’i mai ia rātou.

14 Nō reira, e ao tō ’outou ’ia ha’apa’o maita’i ’outou i tā’u mau fa’auera’a, ’o tā te Metua i fa’aue mai iā’u ’ia hōro’a atu ia ’outou na.

15 ’Oia mau, ’oia mau, tē parau atu nei au ia ’outou na, ’ia ara ’e ’ia pure tāmau noa, ’o te fa’ahemahia ’outou e te diabolo, ’e ’o te fa’atītīhia ’outou e ana.

16 ’E mai tā’u i pure i rotopū ia ’outou na, e nā reira ato’a ’outou i te pure i roto i tā’u ’ēkālesia, i rotopū i tō’u mau ta’ata i tātarahapa ’e i bāpetizohia i tō’u ra i’oa. Inaha, ’o vau te māramarama ; i fa’a’ite atu na vau i te hi’ora’a nō ’outou.

17 ’E i muri a’era, ’ia oti a’era tā Iesu paraura’a atu i teie mau parau i tāna mau pipi, ’ua fāriu fa’ahou atu ra ’oia i ni’a i te mau ta’ata ’e ’ua nā ’ō atu ra ia rātou :

18 Inaha, ’oia mau, ’oia mau, tē parau atu nei au ia ’outou na, e ara ’e ’ia pure tāmau noa ’outou e ti’a ai ; ’ia ’ore ’outou ’ia ro’ohia i te fa’ahemara’a ; i hina’aro na ho’i Sātane ia ’outou, ’ia ueue ’oia ia ’outou mai te sītona ra.

19 Nō reira ’ia pure tāmau noa ’outou i te Metua nā roto i tō’u ra i’oa.

20 ’E te mau mea ato’a tā ’outou e ani atu i te Metua i tō’u ra i’oa, ’oia ho’i te mea ti’a, ma te ti’aturi e fāri’i ’outou, inaha e hōro’ahia mai ïa ia ’outou.

21 ’A pure i roto i tō ’outou mau ’utuāfare i te Metua, nā roto noa i tō’u ra i’oa, ’ia ha’amaita’ihia tā ’outou mau vahine ’e tā ’outou mau tamari’i.

22 ’E inaha, ’ia ha’aputuputu pinepine ’outou ; ’e ’eiaha roa ’outou e ’ōpani i te hō’ē ta’ata ’ia haere mai ia ’outou na, ’a ha’aputuputu ’āmui ai ’outou, ’a fa’ati’a noa rā ia rātou ’ia haere mai ia ’outou na, ’e ’eiaha roa e ’ōpani atu ia rātou.

23 E pure rā ’outou nō rātou, ’e ’eiaha roa e ti’avaru atu ia rātou i rāpae ; ’e ’ia haere pinepine mai rātou ia ’outou na, ’a pure atu ’outou i te Metua nō rātou nā roto i tō’u ra i’oa.

24 Nō reira, ’a fa’ateitei i tō ’outou māramarama, ’ia ’ana’ana atu i tō te ao nei. Inaha, ’o vau nei te māramarama tā ’outou e fa’ateitei atu i ni’a—te mea tā ’outou i ’ite iā’u i te ravera’a. Inaha, ’ua ’ite ’outou ē ’ua pure atu vau i te Metua, ’e ’ua ’ite pāpū ’outou i te reira.

25 ’E ’ua ’ite ho’i ’outou ē ’ua fa’aue atu vau ’eiaha te hō’ē o ’outou ’ia haere ’ē atu, ’ua fa’aue atu rā vau ’ia haere mai ’outou iā’u nei, ’ia ti’a ia ’outou ’ia fāfā mai ’e ’ia ’ite mata ho’i ; ’e ’ia nā reira ato’a ’outou i tō te ao nei ; ’e ’o ’oia ’o tē ’ōfati i teie nei fa’auera’a, tē fa’ati’a ra ïa ’oia iāna iho ’ia arata’ihia atu i roto i te fa’ahemara’a.

26 ’E i teienei, i muri a’era, ’ia oti a’era tā Iesu paraura’a atu i teie mau parau, ’ua fāriu fa’ahou atu ra tōna mata i ni’a i te mau pipi ’o tāna i mā’iti, ’e ’ua nā ’ō atu ra ia rātou :

27 Inaha, ’oia mau, ’oia mau, tē parau atu nei au ia ’outou na, tē hōro’a atu nei au i te tahi fa’ahou fa’auera’a ia ’outou na, ’e i reira e mea ti’a iā’u ’ia haere atu i tō’u ra Metua, ’ia ti’a iā’u ’ia fa’ati’a i te tahi atu ā mau fa’auera’a tāna i hōro’a mai iā’u ra.

28 ’E i teienei, inaha, teie te fa’auera’a tā’u e hōro’a atu nei ia ’outou na, ’eiaha roa ’outou e fa’ati’a ma te ’ite i te hō’ē ta’ata ’ia rave i tō’u tino ’e tō’u toto ma te ti’amā ’ore, ’a ’ōpere ai ’outou i te reira.

29 ’O ’oia ho’i ’o tē ’amu i tō’u tino ’e ’o tē inu i tō’u toto ma te ti’amā ’ore, ’ua ’amu ïa ’e ’ua inu i te pohe nō tōna vārua ; nō reira, ’ia ’ite ’outou e mea ti’amā ’ore te hō’ē ta’ata ’ia ’amu i tō’u tino ’e ’ia inu i tō’u toto, e ’ōpani ïa ’outou iāna.

30 Noa atu rā i te reira, ’eiaha roa ’outou e ti’avaru atu iāna i rāpae mai rotopū atu ia ’outou, e poihere rā ’outou iāna, ’e e pure ho’i nōna i te Metua, i tō’u ra i’oa ; ’e mai te mea e tātarahapa ’oia ’e ’ua bāpetizohia i tō’u ra i’oa, ’ei reira ïa ’outou e fāri’i mai iāna, ’e e hōro’a atu ai i tō’u tino ’e tō’u toto nāna.

31 ’Ia ’ore rā ’oia e tātarahapa, e ’ore ato’a ïa ’oia e tai’ohia i rotopū i tō’u ra mau ta’ata, ’e ’ia ’ore ho’i ’oia e ha’amou i tō’u ra mau ta’ata, inaha ho’i, ’ua ’ite au i tā’u mau māmoe, ’e ’ua oti rātou i te tai’ohia.

32 Noa atu rā i te reira, ’eiaha roa ’outou e ti’avaru atu iāna i rāpae i tō ’outou mau sunago, ’e ’aore i tō ’outou mau fare purera’a, e tāmau ā ho’i ’outou i te poihere i taua huru ta’ata ra ; ’aita ho’i ’outou i ’ite ’o te ho’i mai rātou ’e ’o te tātarahapa, ’e ’o te haere mai iā’u ma te ’ā’au hina’aro mau, ’e nā’u e fa’aora ia rātou, ’e ’ua riro ’outou ’ei rāve’a nō te hōpoi atu i te fa’aorara’a ia rātou.

33 Nō reira, ’a ha’apa’o i teie mau parau tā’u i fa’aue atu ia ’outou na, ’ia ’ore ’outou ia fa’ahapahia ; e pohe ho’i tō te ta’ata ’o tā te Metua i fa’ahapa ra.

34 ’E tē hōro’a atu nei au i teie mau fa’auera’a nō te mau mārōra’a i tupu a’enei i rotopū ia ’outou na. E ao ho’i tō ’outou mai te mea ē ’aita e mārōra’a i rotopū ia ’outou na.

35 ’E i teienei, e haere atu vau i te Metua, nō te mea e mea tītauhia iā’u ’ia haere atu i te Metua nō tō ’outou maita’i.

36 ’E i teienei, ’ia oti a’era tā Iesu paraura’a i teie mau parau, ’ua tāpe’a atu ra tōna rima i te mau pipi tāta’itahi ’o tāna i mā’iti, ē tae noa atu ’ua hope iāna i te tāpe’a atu ia rātou pā’āto’a, ’e ’ua paraparau atu ’oia ia rātou ’a tāpe’a atu ai ’oia ia rātou.

37 ’E ’aita roa te mau ta’ata i fa’aro’o i te mau parau ’o tāna i parau atu, nō reira ’aita roa i ti’a ia rātou i fa’a’ite pāpū i te reira ; ’āre’a rā ’ua fa’a’ite pāpū te mau pipi ē ’ua hōro’a mai ’oia i te mana ia rātou nō te hōro’a i te Vārua Maita’i. ’E e fa’a’ite atu vau ia ’outou i muri nei ē e parau mau tā rātou ra parau.

38 ’E i muri a’era, ’ia oti a’era tā Iesu tāpe’ara’a atu ia rātou pā’āto’a, ’ua tae mai ra te hō’ē ata ’e ’ua tāpo’i mai ra i te mau ta’ata ’e ’aore a’era i ti’a ia rātou ’ia ’ite atu ia Iesu.

39 ’E ’a tāpo’i-noa-hia ai rātou ’ua fa’aru’e mai ra ’oia ia rātou, ’e ’ua haere atu ra i ni’a i te ra’i. ’E ’ua ’ite te mau pipi ’e ’ua fa’a’ite pāpū ho’i rātou ē, ’ua haere fa’ahou atu ’oia i ni’a i te ra’i.