1 ’E i teienei, i muri a’era, i tō Iesu haerera’a atu i ni’a i te ra’i, ’ua purara haere atu ra te mau ta’ata, ’e ’ua rave ihora te ta’ata tāta’itahi i tāna vahine ’e i tāna mau tamari’i ’e ’ua ho’i atu ra i tōna ihora fare.

2 ’E ’ua parare ’oi’oi haere atu ra te parau ’āpī i rotopū i te mau ta’ata, nā mua a’e i te pō, ’oia ho’i ’ua ’ite mata te mau ta’ata ia Iesu, ’e ’ua poihere mai ’oia ia rātou, ’e e fa’a’ite fa’ahou mai ’oia iāna iho ’ia po’ipo’i a’e i te mau ta’ata.

3 ’Oia ïa, ’e i te pō tā’āto’a ’ua parare haere te parau ’āpī nō ni’a ia Iesu ; ’e ’ua tono a’era rātou i te tahi mau ve’a i te mau ta’ata ato’a, ’e nō reira ho’i e rave rahi, ’oia ïa, e rave rahi ta’ata ’o tei rave pūai i te ’ohipa i taua pō tā’āto’a ra, ’ia ti’a ia rātou ’ia tae mai i te vāhi tā Iesu e fa’a’ite mai iāna iho i te mau ta’ata.

4 ’E i muri a’era, ’ia ao a’era, ’ia ha’aputuputu-’āmui-hia mai te mau ta’ata, inaha, tei reira ato’a ’o Nephi ’e tōna taea’e o tāna i fa’ati’a mai, mai te pohe mai ra, ’o Timoteo tōna i’oa, ’e tāna tamaiti ato’a ’o Iona tōna i’oa, ’e ’o Matoni ato’a, ’e ’o Matoniha, tōna taea’e, ’e ’o Kumena, ’e ’o Kumenoni, ’e ’o Ieremia, ’e ’o Semenona, ’e ’o Iona, ’e ’o Zedekia, ’e ’o Isaia—’e ’o teie ho’i ïa te i’oa o te mau pipi tā Iesu i mā’iti—’e i muri a’era, ’ua haere atu ra rātou ’e ’ua ti’a atu ra i rotopū i te mau ta’ata.

5 ’E inaha, ’ua rahi roa te mau ta’ata ’e nō reira ’ua fa’ata’ahia rātou i roto i te mau pupu hō’ē ’ahuru ’e ma piti.

6 ’E ’ua ha’api’i atu ra te tino ’ahuru ’e ma piti i te mau ta’ata ; ’e inaha, ’ua fa’aue atu ra rātou i te mau ta’ata ’ia tūturi i raro i ni’a i te fenua, ’e ’ia pure atu rātou i te Metua nā roto i te i’oa o Iesu.

7 ’E ’ua pure ato’a atu te mau pipi i te Metua nā roto i te i’oa o Iesu. ’E i muri a’e, ’ua ti’a a’era rātou i ni’a, ’e ’ua tāvini atu ra i te mau ta’ata.

8 ’E ’ia oti a’era rātou i te ha’api’i atu i taua iho mau parau ra tā Iesu i parau na—ma te fa’ahuru ’ē ’ore i te mau parau tā Iesu i parau na—inaha, ’ua tūturi fa’ahou ihora rātou i raro ’e ’ua pure atu ra i te Metua nā roto i te i’oa o Iesu.

9 ’E ’ua pure atu rātou nō te mau mea tā rātou i hina’aro rahi ; ’e ’ua hina’aro rātou ’ia hōro’ahia mai te Vārua Maita’i ia rātou.

10 ’E ’ia oti a’era rātou i te pure nō te reira, ’ua haere a’era rātou i raro i te hiti pape, ’e ’ua pe’e mai ra te mau ta’ata ia rātou.

11 ’E i muri a’era, ’ua haere atu ra Nephi i roto i te pape ’e ’ua bāpetizohia ihora.

12 ’E ’ua haere mai ra ’oia i ni’a mai raro mai i te pape ’e ’ua ha’amata a’era i te bāpetizo i te ta’ata. ’E ’ua bāpetizo ’oia i te mau ta’ata ato’a ’o tā Iesu i mā’iti.

13 ’E i muri a’era, ’ia oti a’era rātou pā’āto’a i te bāpetizohia ’e ’ua haere mai rātou i ni’a mai raro mai i te pape, ’ua tae mai ra te Vārua Maita’i i ni’a iho ia rātou, ’e ’ua ’ī a’era rātou i te Vārua Maita’i ’e i te auahi.

14 ’E inaha, ’ua ha’a’atihia rātou e te hō’ē mea mai te auahi ra te huru ; ’e nō te ra’i mai te reira i te poura’a mai, ’e ’ua ’ite pāpū atu te mau ta’ata i te reira, ’e ’ua fa’a’ite pāpū ho’i rātou i te reira ; ’e ’ua pou mai te mau melahi nō te ra’i mai, ’e ’ua utuutu mai ra ia rātou.

15 ’E i muri a’era, ’a ha’api’i noa ai te mau melahi i te mau pipi, inaha, ’ua haere mai ra Iesu ’e ’ua ti’a mai ra i rōpū ’e ’ua utuutu mai ra ia rātou.

16 ’E i muri a’era, ’ua paraparau atu ra ’oia i te mau ta’ata, ’e ’ua fa’aue atu ra ia rātou ’ia tūturi fa’ahou i raro i ni’a i te fenua, ’e i tāna ato’a mau pipi ’ia tūturi i raro i ni’a i te fenua.

17 ’E i muri a’era, ’ia hope rātou pā’āto’a i te tūturi i raro i ni’a i te fenua, ’ua fa’aue atu ra ’oia i tāna mau pipi ’ia pure.

18 ’E inaha, ’ua ha’amata ihora rātou i te pure ; ’e ’ua pure atu ra rātou ia Iesu, ma te pi’i iāna ’ei Fatu ’e ’ei Atua nō rātou.

19 ’E i muri a’era, ’ua reva atu ra Iesu mai roto atu ia rātou, ’e ’ua haere atu ra ’oia i te ātea ri’i atu ia rātou ’e ’ua ha’api’o ihora iāna iho i raro i te fenua, ’e ’ua nā ’ō a’era :

20 E te Metua, tē ha’amāuruuru nei au ia ’oe, ’o ’oe i hōro’a mai i te Vārua Maita’i i teie mau ta’ata ’o tā’u i mā’iti ; ’e nō tō rātou fa’aro’o iā’u nei i mā’iti ai au ia rātou mai roto mai i tō teie nei ao.

21 E te Metua, tē pure atu nei au ia ’oe na, ’ia hōro’a mai i te Vārua Maita’i ia rātou pā’āto’a ’o tē ti’aturi i tā rātou ra mau parau.

22 E te Metua, ’ua hōro’a mai ’oe i te Vārua maita’i ia rātou, nō te mea ’ua ti’aturi rātou iā’u nei, ’e tē ’ite na ’oe ē, ’ua ti’aturi rātou iā’u nei, nō te mea ’ua fa’aro’o ’oe ia rātou, ’e tē pure mai nei rātou iā’u ; ’e tē pure mai nei rātou iā’u nō te mea tē pārahi nei au i ’ō rātou ra.

23 ’E i teienei, e tō’u Metua, tē pure atu nei au ia ’oe nō rātou, ’e ’oia ato’a nō rātou pā’āto’a ’o tē ti’aturi i tā rātou mau parau, ’ia ti’aturi rātou iā’u, ’ia vai au i roto ia rātou mai ia ’oe, e te Metua, e vai nei i roto iā’u nei, ’ia riro tātou ’ei hō’ē.

24 ’E i muri a’era, ’ia oti a’era Iesu i te pure atu i te Metua, ’ua haere mai ra ’oia i tāna ra mau pipi, ’e inaha, tē tāmau noa ra rātou i te pure atu iāna, ma te tu’utu’u ’ore ; ’e ’aita rātou i fa’arahi i te mau parau, nō te mea ’ua hōro’ahia mai ia rātou i te mea tā rātou e pure atu, ’e ’ua ’ī roa rātou i te hina’aro.

25 ’E i muri a’era, ’ua ha’amaita’i atu ra Iesu ia rātou ’a pure atu ai rātou iāna ; ’e ’ua fa’a’ite atu ra ’oia i tōna hōho’a mata māuruuru ia rātou, ’e ’ua ’ana’ana atu ra te māramarama o tōna mata i ni’a iho ia rātou, ’E inaha, ’ua teatea roa rātou mai te hōho’a mata ’e te mau ’ahu ato’a o Iesu ; ’e inaha, te teatea nō te reira, ’ua hau ïa i te mau mea teatea ato’a, ’oia ïa, ’aore roa e mea teatea i ni’a i te fenua nei ’o tei hau atu i te teatea mai te reira te huru.

26 ’E ’ua nā ’ō atu ra Iesu ia rātou : ’A tāmau noa i te pure, ’e ’aita roa ho’i rātou i fa’aea i te pure.

27 ’E ’ua fāriu ’ē fa’ahou atu ra ’oia ia rātou, ’e ’ua haere atu ra i te ātea ri’i, ’e ’ua ha’api’o ihora iāna iho i raro i te fenua ; ’e ’ua pure fa’ahou atu ra ’oia i te Metua, i te nā-’ō-ra’a atu ē :

28 E tō’u Metua, tē ha’amāuruuru nei au ia ’oe na, i te mea ē ’ua tāmā ’oe ia rātou ’o tā’u i mā’iti, nō tō rātou fa’aro’o, ’e tē pure nei au nō rātou, ’e nō rātou ato’a ho’i ’o tē ti’aturi i tā rātou mau parau, ’ia tāmāhia rātou iā’u nei nā roto i te fa’aro’o i tā rātou mau parau, mai ia rātou nei ho’i i tāmāhia iā’u nei.

29 E tō’u Metua, ’aore au e pure nei nō tō teie nei ao, nō rātou rā ’o tā ’oe i hōro’a mai iā’u nei nō roto mai i tō teie nei ao, nō tō rātou fa’aro’o, ’ia tāmāhia rātou iā’u nei, ’ia vai au i roto ia rātou, mai ia ’oe, e te Metua, e vai nei i roto iā’u, ’ia riro tātou ’ei hō’ē, ’ia fa’ahanahanahia vau i roto ia rātou.

30 ’E ’ia oti a’era tā Iesu paraura’a atu i teie mau parau, ’ua haere fa’ahou mai ra ’oia i tāna mau pipi ; ’e inaha, tē pure māite ra rātou iāna, ma te tu’utu’u ’ore ; ’e ’ua fa’a’ite fa’ahou atu ra ’oia i tōna mata māuruuru ia rātou ; ’e inaha ’ua teatea rātou, mai ia Iesu ra.

31 ’E i muri a’era, ’ua haere fa’ahou atu ra ’oia i te ātea ri’i, ’e ’ua pure atu ra i te Metua.

32 ’E ’aita roa e ti’a i te vaha ’ia parau i te mau parau ’o tāna i pure, ’e ’aita ato’a e ti’a i te ta’ata ’ia pāpa’i i te mau parau ’o tāna i pure.

33 ’E ’ua fa’aro’o a’era te mau ta’ata, ’e ’ua fa’a’ite pāpū rātou i te reira ; ’e ’ua mahora tō rātou ’ā’au, ’e ’ua māramarama tō rātou ’ā’au i te mau parau ’o tāna i pure.

34 Nō te rahi rā ’e te māere o te mau parau ’o tāna i pure ra, ’aita atu ra e ti’a ’ia pāpa’ihia, ’e ’aita ato’a e ti’a ’ia fa’ahitihia e te ta’ata nei.

35 ’E i muri a’era, ’ia fa’aoti a’era Iesu i tāna ra purera’a, ’ua haere fa’ahou mai ra ’oia i tāna ra mau pipi, ’e ’ua nā ’ō atu ra ia rātou : ’Aita ā vau i ’ite atu ra i te hō’ē fa’aro’o rahi i rotopū i te mau ’āti Iuda ato’a ra ; nō reira, ’aita i ti’a iā’u ’ia fa’a’ite atu i te mau semeio rahi ia rātou, nō tō rātou ti’aturi ’ore.

36 ’Oia mau tē parau atu nei au ia ’outou na, ’aita roa te hō’ē o rātou i ’ite i te mau mea rahi mai tā ’outou i ’ite na ; ’e ’aita roa ato’a rātou i fa’aro’o i te mau mea rahi mai tā ’outou i fa’aro’o na.