1 Ere rriyulʼ nug be yoeg ngomed, kug piiʼ ba pow ngomed, ni nge yog ni ngam nanged e ngiyalʼ ni arame nge buch e pinnʼey—ni arame ngiyalʼ ni nggu kunuy bayay, e gidiiʼ rog, O gidiiʼ ku Israel, ni ngar suloed bayay ya ke nʼuw napʼan ni kar garar gaed, ma bay gu yarmiy bayay e Zion rok nga fithikʼraed;

2 Ere musap gaed, baʼaray e nʼen ni nggu piiʼ nib pow ngomed—ya rriyulʼ ni gube yoeg ngomed ni pinnʼey ni kug weliy, nge tin kubay nga mʼon ni bay fin gu weliy ngomed, ma dakean gelingin fare Kan ni Thothup ni bayi piiʼ e en Chitamangiy ngomed, e bay ni dag riy ngakʼ fapi Gentiles ni nge yog ni ngar nanged morngaʼagen e pi gidiiʼ ney ni yaed e tin ni kar magaey gaed ko gidiiʼ ku Jacob, nge morngaʼagen e pi gidiiʼ rog ney ni yaed e bayra wereged raed;

3 Rriyulʼ, nriyulʼ, ni gube yoeg ngomed, nnapʼan ni ra dag e en Chitamangiy e pinnʼey ngoraed, ma ra yib rokʼ e en Chitamangiy ngoraed, me yib roraed ngomed;

4 Ya gonop rokʼ e en Chitamangiy ni ngar pired u dakean e biney e nam, ma ngan tay raed ni yaed bogi gidiiʼ nib puf matʼawraed u gelingin e en Chitamangiy, ni nge yog ni yib e pinnʼey roraed ngakʼ e tin ni ke magaey ko gidiiʼ rom, ni nge yog ni muguʼul fare mʼag rokʼ e en Chitamangiy ni mʼag ngakʼ e gidiiʼ rokʼ, O gidiiʼ ku Israel;

5 Ere, napʼan e pi muruwel ney nge pi muruwel ni bay ni gagyeg nag u fithikʼmed u tomuren e ngiyalʼ ney e bay yib rokʼ fapi Gentiles, ngakʼ e pi bitir romed ni bay ra palog gaed ko mich ni bachan e denen;

6 Ya rogon laniyaenʼ e en Chitamangiy ni lemnag ni nge yib rokʼ fapi Gentiles, e nge yog ni dag gelingin ngakʼ fapi Gentiles, ni fan e fapi Gentiles e faʼanra dabra ʼelʼel niged gumʼirchaʼraed, mar kalgaed ngaenʼraed ngar baed ngog min tawfe nagraed u fithingag, mar nanged e pinʼen nib gaʼfan mab riyulʼ ko machib rog, me yog nni unegraed ko mathaʼeg nga fithikʼ e gidiiʼ rog, O gidiiʼ ku Israel;

7 Ma napʼan ni bayi buch e pinnʼey ni arame nge tabab pifakmed i nang e pinnʼey—ma arame bayi paer nib pow ngoraed, ni nge yog ni ngar nanged ni fare muruwel rokʼ e en Chitamangiy e arame ke tabab ni nge muguʼul fare mʼag ni tay ngakʼ e gidiiʼ ni yaed fapi gidiiʼ ku Israel.

8 Ma napʼan ni ra yib e re rran nem, ma bay yibi buch ni pi pilung e bay ra uchmiyed langraed; ya pinʼen ni dawor ni weliy ngoraed e bay ra guyed; nge pinʼen ni dawor rrungʼaged e bay ra lemniged.

9 Ya lan e re rran nem, ni fan ngog, e en Chitamangiy e bayi muruwliy ba muruwel, nib muruwel nib gaaʼ mab maʼangʼang u fithikʼraed; ma bay boech I yaed u fithikʼraed ni dabi michaenʼ ngay, ni yug aram rogon ni beeʼ nib moʼon e ra weliy ngoraed.

10 Machane musap gaed, yafos rokʼ e tapigpig rog e bay u lani paʼag; ere dabiyog ni ngar madʼad gaed ngakʼ, ni yug aram rogon ni bay ra gafgow niged. Machane bay ggol nag, ya bay gudag ngoraed ni gonop rog e bagaʼ ko fare sasaliyeb rokʼ fare moʼoniyanʼ.

11 Ere bay yibi buch ni en dabi michaenʼ ko thin rog, ni gag Yesus Kristus, niʼir e bayi guy rogon e en Chitamangiy niʼir e nge fek e thin rog iyaen ngakʼ fapi Gentiles, ma bayi piiʼ ngakʼ gelingin ni nge fek e thin rog iyaen ngakʼ fapi Gentiles, (bay nrinʼ ni woed ni yoeg Moses) ni bay ni chuwegraed u fithikʼ e gidiiʼ rog ni yaed gidiiʼen fare mʼag.

12 Ere gidiiʼ rog ni ke magaey ko gidiiʼ ku Jacob e bay ra pired u fithikʼ fapi Gentiles, arragon, u fithikʼraed ni boed ba layon u fithikʼ e gamanman ni malboch nu mapan, ni boed ba layon nib felʼ yangren u fithikʼ yu ulung i saaf, niʼir e, faʼanra nge yaen u fithikʼraed me yitʼraed nga butʼ me radiyraed ni nochiyang, ma dariy reb nra fos.

13 Paʼaraed e bay ra tininged nga dakean e piʼin togopluw roraed, ma gubin e pi toʼogor roraed e bay ni chuwegraed.

14 Arragon, gafgow ngakʼ e pi Gentiles ma kemus ni faʼan yaedra kalngaenʼ; ya bay yibi buch u lan e re rran nem, ni yoeg e en Chitamangiy, ni bay gu chuweg e pi os romed u fithikʼmed, ma bay gu gatheay e pi chariots romed;

15 Ma bay gu chuweg e pi binaw ko nam romed, mug buthug nga butʼ gubin e pi yungi nʼen ni kam noemow niged ni tagilʼ e miith romed;

16 Ma bay gu chuweg e pig u lan e nam romed, me chuw e pi tamarong romed;

17 Pi liyos romed ni kan ker, nge pi liyos romed nib sakʼiy, e bay gu chuweg u fithikʼmed ma dabkiyog ni ngam liyoer gaed ko pi muruwel nibe sum u paʼmed;

18 Ma bay gu pug ngalang e pi gakʼiy romed nge chuw u fithikʼmed; ere aram rogon ni bay gu gatheay e pi binaw romed.

19 Ma bay yibi buch ni gubin e sasalap, nge sabaenbaen, nge moʼowaenʼ, nge togopluw, nge gamʼing nib falʼngakʼ, nge pi gathar, e bayi tal.

20 Ya bay yibi buch, nibe yoeg e en Chitamangiy, ni re rran nem e chaʼ ni dabi kalngaenʼ me yib ngakʼ Fakag nib Tʼuf rog, e ireram e piʼin ni gura chuwegraed u fithikʼ e gidiiʼ rog, O gidiiʼ ku Israel;

21 Ma bay gu gagyeg nag e gechig nge damomuw nga dakeanraed, ni boed ni kan rinʼ ngakʼ e piʼin ni dariy loren Got u wunʼraed, ni boed ni dawor rungʼaged biʼid.

22 Machane faʼan yaedra kalngaenʼ mar motoyil gaed ko thin rog, ma dabra ʼelʼel niged gumʼirchaʼraed, ma bay gu yarmiy e galasia rog u fithikʼraed, ma bay ra og niged yaed nga lan ba mʼag min uneg raed ko mathaʼeg nga fithikʼ e tiney e gidiiʼ ku Jacob ni ke magaey, ni yaed e piʼin ni kug piiʼ e re nam ney ngoraed ni ngar tafnayed;

23 Ma bay ra ayuweged e gidiiʼ, ni piʼin ni ke magaey ko gidiiʼ ku Jacob, nge oren e pi gidiiʼ ku Israel ni yaedra yib, ni ngar sunmiyed bbinaw, ni bay noeg ni fare Jerusalem ni Beʼech.

24 Ma arame bay ra ayuweged e gidiiʼ rog ni kar garar gaed u dakean gaʼangin yang fare nam, ni yog ni ngar mukun gaed nga taʼabang, nga lan fare Jerusalem nib Beʼech.

25 Ma arame bay yib fare gelingin nu tharmiy nga butʼ nga fithikʼraed; ma ku arragon ngog ni bay gub nga fithikʼraed.

26 Ma arame fare muruwel rokʼ e en Chitamangiy e bayi tabab ko re rran nem, ni ireram napʼan ni bay ni machib nag e re gospel u fithikʼ e tin ni ke magaey ko pi gidiiʼ ney. Rriyulʼ ni gube yoeg ngomed, nre rran nem e bayi tabab fare muruwel rokʼ e en Chitamangiy u fithikʼ gubin e pi gidiiʼ rog ni kar garar gaed, arragon, ni boed fapi ganong ni kar malog gaed, ni powiʼiyraed e en Chitamangiy nga wuruʼ yu Jerusalem.

27 Arragon, fare muruwel e bayi tabab u fithikʼ gubin fapi gidiiʼ rog ni kar garar gaed, ni nge tabab nag e en Chitamangiy ni nge falʼeg rogon woʼen me yog ni ngar baed riy ngog, ni nge yog ni ngar meybil gaed ngakʼ e en Chitamangiy u fithingag.

28 Arragon, ma arame bayi tabab fare muruwel, ni nge tabab nag e en Chitamangiy u fithikʼ gubin e gidiiʼ ko pi nam ni nge falʼeg rogon woʼen me yog ni nge mukun e gidiiʼ rokʼ riy nga tabnaw ko fare nam ni taferaed.

29 Ma bay ra chuw gaed ko gubin e pi nam; ma dabra chuw gaed nib gur, ara yaed be miil, ya bay gu mʼon roraed, ni yoeg e en Chitamangiy, ma bay gu mang matanag roraed u wuryal.