1 Ma arame pinʼen ni kan yoloey e bay yibi buch: Mu tang gaed, gimed e ppin nib mathʼyin, gimed e piʼin damur fakayed e bitir; mu tang gaed nib gaaʼ lammed, magmed tolul, gimed e piʼin ni dawor mu filed amithun e bitir; ya nge yoʼor e bitir romed e piʼin dariy fakmed, ngakʼ e piʼin ni bay figirngiraed, nibe yoeg fare Somoel.

2 Mu gaaʼ niged lan e tent romed, magmed pagraed ngar tiled madane rungrung ko naʼun romed nge mataltal, dab mu tiled gimed nga tomur, magmed nʼuw nag gafan e tent romed magmed gel nag e rumog romed;

3 Ya bay mu yoʼor gaed nga baʼani matʼaw I paʼay ngo baʼani gilaeyʼ, ma pi fakmed e bay ra tafnayed tafen fapi Gentiles mar falʼeged e pi yungi binaw ni kan pag nge yog ni ngan paer riy.

4 Dab murus gaed, ya gimed e dab mu tamraʼ gaed; ara minaenʼmed, ya gimed e dab ni tamraʼ nagmed; ya gimed e bay mu paged talin e tamraʼ ni um tayed u napʼan ni kagmed ba rugod, ma dabki yib ngaenʼmed e moʼogthar ni untay ngomed u napʼan ni kagmed ba rugod, ma dabki yib ngaenʼmed bayay e moʼogthar ni untay ngomed ni dariy figirngimed.

5 Ya chaʼ ni sunmiymed, ni figirngimed, ni fare Somoel ko Yoʼor fithingan; ma ireTabiyul romed, ni Fachaʼ nib Thothup ku Israel—ma bay ni pining ni fare Got ko fayleng ni poloʼ.

6 Ya fare Somoel e ke piningmed ni boed beeʼ nib ppin ni kan nʼaeg ma kari kirbaenʼ, nge beeʼ nib ppin ni unfek yathin u napʼan ni kab rugod, nibe yoeg e Got romed.

7 Ya rib ngoch napʼan ni kug pagmed, machane u fithikʼ e murnguy nib gel e bay gu kunuy med riy nga taʼabang.

8 U fithikʼ buchʼuw e puwaenʼ rog mug mithaeg oewcheg romed boechi ngiyalʼ, machane fithikʼ e runguy ni dabimus biʼid e bayi wureng anʼug ngomed, nibe yoeg fare Somoel ni Tabiyul romed.

9 Ya biney e taʼab rogon u wunʼug ko fare ngiyalʼ i nʼen ni yib dayin Noah, ya aram rogon ni kug michmicheg ni dab kiyib dayin Noah bayay nge tharey e fayleng, ere aray rogon ni kug thʼaebi micheg ni dab kug puwaenʼ ngomed.

10 Ya pi burey e bayi mʼay nge pi yungi ted e bay ni chuweg, machane wurengaenʼ rog e dabi chuw romed, ara ni chuweg fare mʼag ko gapas rog, nibe yoeg fare Somoel niʼir e be runguymed.

11 O gimed e piʼin ni kam gafgow gaed, nibe yinʼ med e yokoʼ, ma damur pirʼeged e gapas! Musap gaed, bay ggaed e malang nib felʼ raʼen u lan e binaw romed, ma bay gu ufung e pi dayif romed ko sapphires malang ni yarraʼ.

12 Ma bay gu falʼeg e pi winda romed ko malang nibe gael raʼen, nge garog romed ko malang ni row nibe gael raʼen, nge gubin e pi yoror romed ni bay gu falʼeg ko malang nib felʼ usun.

13 Ma gubin e pi bitir romed e bayi machib nagraed Somoel; me pirʼeg pifakmed e gapas ni gaaʼ.

14 Ma bay ni gagyeg nagmed nga fithikʼ e tin nib matʼaw; ma bay mu malʼaf gaed ko magafaenʼ ya dab murus gaed, nge tamdag ya dabi chugur ngomed.

15 Musap gaed, bay ra mukungaed nga taʼabang ngar gafgow nagmed ko pinnʼem, ma dag gumoʼ riy; piʼin ra mukun nga taʼabang ngar gafgow niged gimed e yaedra aw nga butʼ ni fan ngomed.

16 Musap gaed, kug sunmiy e gidiiʼ ni ma muruwel ko wasey niʼir e ma koʼoreg e nifiy, ma ire ma falʼeg talin e muruwel ni fan ko muruwel rokʼ; ma kug sunmiy e chaʼ ni ma gatheay banʼen.

17 Dariy talin e mael ni kan falʼeg ni rayog ni nge madʼad ngomed; ma gubin e yinmon nra togopluw ngomed u gilʼ e pufthin ma bay e fulweg riy romed. Ireray fare michmich ngakʼ e pi tapigpig rokʼ fare Somoel, ma falʼngiraed nib matʼaw e yib rog, ni yoeg fare Somoel.