1 ’E i teienei, tē parau atu nei au ia ’outou na, e mea ti’a roa ia ’outou ’ia ’imi i teie mau mea. ’Oia ïa, tē hōro’a atu nei au i te hō’ē fa’auera’a ia ’outou ’ia ’imi māite i teie mau mea ; e mea faufa’a rahi ho’i te mau parau a Isaia.

2 ’E ’oia mau roa ho’i ’ua parau ’oia e rave rahi mau mea nō ni’a i tō’u ra mau ta’ata nō te ’utuāfare o ’Īserā’ela ; nō reira e mea ti’a ’ia parau ato’a ’oia i te mau ’Ētene.

3 ’E te mau mea ato’a ’o tāna i parau, ’ua tupu ïa ’e e tupu ato’a ïa a muri atu, ’ia au i te mau parau ’o tāna i parau na.

4 Nō reira ’a ha’apa’o i tā’u mau parau ; ’a pāpa’i ho’i i te mau mea ’o tā’u i fa’a’ite atu ia ’outou na ; ’e ’ia au te tau ’e te hina’aro o te Atua e tae atu ai te reira i te mau ’Ētene.

5 ’E ’o ’oia ’o tē ha’apa’o i tā’u ra mau parau ’e ’o tē tātarahapa ’e ’o tē bāpetizohia, e ora ïa. ’A ’imi māite i tā te mau peropheta, e rave rahi ho’i tō rātou ’o tei fa’a’ite pāpū mai i taua mau mea nei.

6 ’E i teienei, i muri a’era, ’ia oti a’era tā Iesu paraura’a atu i teie mau parau, ’ua parau fa’ahou atu ra ’oia ia rātou, i muri iho i tōna tātarara’a atu i te mau pāpa’ira’a mo’a ato’a i noa’a ia rātou, ’ua nā ō ’oia ia rātou : Inaha, tē vai fa’ahou ra te tahi mau pāpa’ira’a mo’a ’o tā’u i hina’aro ia ’outou ’ia pāpa’i, ’e ’aore ho’i te reira ia ’outou na.

7 ’E i muri a’era, ’ua nā ’ō atu ra ’oia ia Nephi : ’A hōpoi mai na i te pāpa’a parau ’o tā ’outou i pāpa’i na.

8 ’E i tō Nephi hōpoira’a mai i te mau pāpa’a parau, ’e i te tu’ura’a mai i te reira i mua iāna, ’ua hi’o ihora ’oia i te reira, ’e ’ua nā ’ō atu ra :

9 ’Oia mau, tē parau atu nei au ia ’outou na, i fa’aue na vau i tō’u ra tāvini ia Samuela, te ’āti Lamana, ’ia fa’a’ite pāpū atu i teie nei feiā, i te nā-’ō-ra’a atu ē, ’ia tae i te mahana e fa’ahanahana ai te Metua i tōna ra i’oa iā’u nei, e rave rahi te feiā mo’a e ti’a mai, mai te pohe mai, ’e ’a fā mai ai i te mau ta’ata e rave rahi, ’e ’a poihere atu ai ia rātou. ’E ’ua nā ’ō atu ra ’oia ia rātou : ’Aita ānei te reira i tupu ?

10 ’E ’ua pāhono mai ra tāna mau pipi iāna : ’Oia mau, e te Fatu, ’ua tohu mai Samuela mai te au i tā ’oe ra mau parau, ’e ’ua tupu pā’āto’a te reira.

11 ’E ’ua nā ’ō atu ra Iesu ia rātou : Nō te aha ho’i ’aita ’outou i pāpa’i i taua mea nei ē, e rave rahi feiā mo’a i ti’a mai ’e ’ua fā mai i te mau ta’ata e rave rahi, ’e ’ua poihere mai ia rātou ?

12 ’E i muri a’era, ’ua ha’amana’o ihora Nephi ē, ’aita te reira i pāpa’ihia.

13 ’E i muri a’era, ’ua fa’aue atu ra Iesu ’ia pāpa’ihia te reira ; nō reira ’ua pāpa’ihia te reira mai tāna i fa’aue mai.

14 ’E i teienei, i muri a’era, ’ia oti a’era tā Iesu tātarara’a atu i te mau pāpa’ira’a mo’a pā’āto’a ’ei hō’ē, ’e ’o tā rātou ho’i i pāpa’i, ’ua fa’aue atu ra ’oia ia rātou ’ia ha’api’i atu i te mau mea ’o tāna i tātara atu ia rātou.