1 Me yibi buch ni chiyliy ngoraed ni thingar yoloeyed e pi thin niʼir e piiʼ e en Chitamangiy ngakʼ Malachi, ni bay yoeg ngoraed. Me yibi buch u tomuren ni kar yoloeyed, me tamilngeg fan. Ere baʼaray e pi thin ni yoeg ngoraed, ni gaʼar: Aray rogon ni yoeg e en Chitamangiy ngakʼ Malachi—Musap gaed, Gag e bay gulʼoeg e tamalʼog rog, nge mʼon nge yarmiy woʼeg, ma fare Somoel niʼir e gimed be gay e bay yib nib tomgin ko temple rokʼ, niʼir e fare tamalʼog ko fare mʼag, niʼir e ba mʼagaenʼmed ngakʼ; musap gaed, bay yib, nibe yoeg fare Somoel ko Yoʼor.

2 Machane miniiʼ e ra kʼadaenʼ ko fare rran ni bay yib, nge miniiʼ e ra sakʼiy u napʼan ni ke yibi mʼug? Ya ire boed e nifiy ko chaʼ ni ma urufiy e wasey nge soep ko chaʼ ni ma malukmad.

3 Ma bayi paer niʼir e nifiy ko chaʼ ni ma urufiy e wasey nge tamachalbog ko silber; ma bayi machalbog nag fapi pagael ni fak Levi, me beʼech nagraed ni boed e gol nge silber, ni nge yog ni ngar piiʼed ba maligach ngakʼ Somoel nib matʼaw.

4 Ma arame rayog ni fare maligach ku Judah nge Jerusalem e ra felʼ u waenʼ fare Somoel, ni woed u lan fatin kakrom e rran, ma ku woed u lan e pi duw ni ke thimur.

5 Ma ke chugur ni nggub ni nggu pufthin nagmed; ma gura yib nib gur ni gag e mich nib togopluw ngakʼ e pi tapig, nge piʼin nib tagolong, nge piʼin darma riyulʼ ko michmich, nge piʼin ni yaedma sasaliyeb nag puluwoy, nge piʼin ma gafgow nag e piʼin dariy figirngiraed nge piʼin dariy e chitamangraed, nge piʼin ni ma piiʼ keruʼ ko milekag, nge piʼin ni dariy madguwag u wunʼraed, ni yoeg fare Somoel ko Yoʼor.

6 Ya gag fare Somoel, ni dagur thil; ere gimed e pi pagael ni fak Jacob e dab mu uruf gaed.

7 Ni mus aram ko pi rran rokʼ e pi chitamangmed ni mu keruʼuyed e pi gamʼing rog, ma ku dawor mu fol gaed riy. Mu suloed ngog mug sul ngomed, nibe yoeg fare Somoel ko Yoʼor. Machane gimed be gaʼar: Buʼuw rogon ma gamaed sul?

8 Gul ra moroʼroʼ beeʼ ngakʼ Got? Machane kam moroʼroʼ gaed ngog. Machane gimed be gaʼar: Buʼuw rogon ni kug moroʼroʼ gaed ngom? U dakean taʼab guruy u ragag guruy ko tin bay romed nge ggan nibe yog u napʼan ni yibe baley nag e abich ni damur piiʼed ngog.

9 Ke buch waʼathmed, ya kam moroʼroʼ gaed ngog, ni gaʼangin e re nam ney ni poloʼ.

10 Mu feked iyib gubin e pi taʼab guruy u ragag guruy ko tin bay romed nga lan e naʼun ni tafen e ggan, ni nge yog ni nge paer ni bay e ggan u naʼun rog; magmed sikeng nigeg ni aray rogon, nibe yoeg fare Somoel ko Yoʼor, ngam guyed ko gura bing e pi winda nu tharmiy ngomed, mug puʼoeg e tawaʼath nga dakeanmed ni dariy tagilʼ ni ngan tay ngay.

11 Ma bay gu chuweg e chachngeg ni fan ngomed, ya nge dab ki longuy e pi waʼamngin e mileayʼ romed; ara yakal nag waʼamngin e wuldug u mileayʼ romed u mʼon ni nge taw nga napʼan ni nge el, nibe yoeg fare Somoel ko Yoʼor.

12 Ma gubin e gidiiʼ ko pi nam ma bay roeged ni gimed ba tawaʼath, ya bay yog e nam ngomed nib galwog, nibe yoeg fare Somoel ko Yoʼor.

13 Thin romed e rib almarin ni ke togopluw ngog, nibe yoeg fare Somoel. Machane gimed be gaʼar: Mang e kugoged nib togopluw ngom?

14 Kam gaʼar gaed: Dariy angin ni ngan pigpig ngakʼ Got, ma mang falʼngin ni ngad ayuweged e pi gamʼing rokʼ, ma kuʼu daroed nib kirebaenʼdaed u pʼoewchen fare Somoel ko Yoʼor?

15 Ere chiney e gimed be yoeg ni piʼin nib ʼuf e yaed ba falfalaenʼ; arragon, piʼin ma rinʼ e kireb e ba felʼ rograed; arragon, piʼin ni ma wawliy Got ko lumel e riyulʼ ni danur gechig nagraed.

16 Ma arame piʼin ni ma yib madguwan Somoel ngoraed e bagaʼ ni yaed ma non roraed ngoraed, me motoyil fare Somoel nge rungʼag; ma bay bake babyor ko puguran nni yoloey u pʼoewchen ni fan ngakʼ e piʼin ni ma yib madguwan fare Somoel ngoraed, nge piʼin ni ma liyoer nga fithingan.

17 Ma bay ra manged gidiiʼ rog, nibe yoeg fare Somoel ko Yoʼor, ni lan e re rran nem u napʼan ni bay gu kunuy e pi falaʼab rog; ma bayi wureng anʼug ngoraed ni boed beeʼ nib moʼon ni ma wurengaenʼ ngakʼ fak ni ma pigpig ngakʼ.

18 Ma arame bay mu suloed ngam pirʼeged e nʼen nib thil ko tin nib matʼaw nge tin nib kireb, u thilin e chaʼ ni ma pigpig ngakʼ Got nge chaʼ ni darma pigpig ngakʼ.