1 ’E i muri a’era, ’ua fa’aue atu ra ’oia ia rātou ’ia pāpa’i i te mau parau tā te Metua i hōro’a ia Malaki ra, ’o tāna e fa’a’ite ia rātou. ’E i muri a’era, ’ia oti a’era te reira i te pāpa’ihia, ’ua tātara atu ra ’oia i te reira. ’E teie te mau parau tāna i fa’a’ite ia rātou ra, i te nā-’ō-ra’a atu ē : Tē nā ’ō mai ra te Metua ia Malaki—Inaha, e tono atu vau i tā’u ve’a, ’e nāna e fa’aineine i te ’ē’a i mua iā’u, ’e te Fatu tā ’outou e ’imi ra, e tae vave mai ïa i tōna ra hiero, te ve’a ho’i nō te fafaura’a, ’o tā ’outou i ’oa’oa na ; inaha, e tae mai ’oia, tē nā reira mai ra te Fatu Sabaota ra.

2 ’O vai rā tē ti’a ’ia fa’a’oroma’i i te mahana nō tōna haerera’a mai, ’e ’o vai tē mau māite ’ia fā mai ’oia ? Nō te mea ’ua au ho’i ’oia i te auahi a te ta’ata tāmā moni ra, ’e mai te pu’a a te ta’ata tāmā ’ahu ra.

3 ’E e pārahi mai ’oia mai te ta’ata tāmā moni ’e te ta’ata tāmā ’ārio ra ; ’e nāna e tāmā i te mau tamari’i tamāroa a Levi, ’e e tāmā ia rātou mai te ’auro ’e te ’ārio ra, ’ia ti’a ia rātou ’ia pūpū mai i te mau ō i te Fatu nā roto i te parauti’a.

4 I reira e riro ai te ō a Iuda ’e tā Ierusalema ’ei mea māuruuru nā te Fatu, mai te au i te ’anotau tahito ra, ’e mai te au i te mau matahiti i muta’a ihora.

5 ’E e ha’afātata atu vau nō te ha’avā ia ’outou ; ’e e riro vau ’ei ’ite ’oi’oi i te feiā tahutahu, ’e i te feiā fa’aturi, ’e i te feiā tapu ha’avare, ’e i te feiā i fa’aiti roa i te ’aufau i tei tārahuhia ra, i te vahine ’ivi ’e te ’ōtare, ’e i tei fa’aru’e ’ē atu i te ta’ata ’ē, ’e ’aore i mata’u mai iā’u, tē nā reira mai ra te Fatu Sabaota ra.

6 ’O vau ho’i te Fatu, ’aita roa vau e taui ; nō reira ho’i ’aita roa ’outou ’e te mau tamaiti a Iakoba i ha’amouhia.

7 Mai te mau mahana mai ā o tō ’outou mau metua tō ’outou fāriu-’ē-ra’a atu i tā’u ra mau ’ōro’a, ’e ’aore i ha’apa’o i te reira. ’A fāriu mai iā’u nei, ’e e fāriu atu vau ia ’outou na, tē nā reira mai ra te Fatu Sabaota ra. ’Āre’a rā te parau mai nei ’outou ē : E fāriu atu mātou i te aha ?

8 E ’eiā ānei te ta’ata nei i tā te Atua ? ’Ua ’eiā ho’i ’outou i tā’u nei. ’Āre’a rā te parau mai nei ’outou ē : I ’eiā mātou i tā ’oe i te aha ? I te ’ahuru o te tao’a ’e te mau ō.

9 ’Ua ’anatemahia ’outou i te hō’ē ’anatemara’a, nō te mea ’ua ’eiā ’outou, tō teie nūna’a tā’āto’a, i tā’u nei.

10 Hōpoi mai na ’outou i te ’ahuru ato’a o te mau tao’a i roto i te fare vaira’a tao’a, ’ia mā’ahia tō’u nei fare ; ’e ’a tāmata mai ai iā’u nei, tē nā reira mai ra te Fatu Sabaota ra, ’e ’aita ānei au e ’īriti atu i te mau ha’amāramarama o te ao ra, ’e ’a nīni’i atu ai i te hō’ē ha’amaita’ira’a ’e ’aita roa e nava’i te vaira’a nō te fāri’i mai i te reira.

11 ’E nō ’outou e ’avau atu ai au i tei ha’amou ra, ’e e ’ore roa ’oia e ha’amou i te mau mā’a nō tō ’outou ra fenua ; ’e e ’ore ho’i tā ’outou vine nō te ’āua e aupārahia, tē nā reira mai ra te Fatu Sabaota ra.

12 ’E e parauhia ’outou e tō te mau nūna’a ato’a, ’o te maita’i, ’e e riro ’outou ’ei feiā nehenehe, tē nā reira mai ra te Fatu Sabaota ra.

13 Tē nā ’ō mai ra te Fatu, e mea teiaha tā ’outou parau i ni’a iā’u nei. Tē parau nei ho’i ’outou ē : E aha tā mātou i parau nō te fa’ahapa ia ’oe na ?

14 ’Ua parau ho’i ’outou ē : E mea faufa’a ’ore ’ia ha’amori i te Atua, ’e e aha tā tātou faufa’a ’ia ha’apa’o i tāna mau ’ōro’a ’e ’ua haere noa ho’i tātou ma te ’oto i mua i te Fatu Sabaota ra ?

15 ’E i teienei, tē parau ra tātou i te feiā te’ote’o ’ei mea ’oa’oa ; ’oia ïa, ’e te feiā i rave i te ’ohipa ’ī’ino ra ’ei mea manuia ; ’oia ïa, ’e te feiā i fa’ahapa i te Atua ra ’ei mea fa’aorahia.

16 ’E ’o rātou ’o tei mata’u i te Fatu ra, ’ua paraparau pinepine ïa i te tahi ’e i te tahi ; ’e ’ua ha’apa’o mai ’e ’ua fa’aro’o mai te Fatu ; ’e ’ua pāpa’ihia ihora te tahi buka ha’amana’ora’a i mua iāna, nō te feiā i mata’u i te Fatu, ’e ’o tei mana’o i tōna ra i’oa.

17 ’E tē nā ’ō mai ra te Fatu Sabaota, e riro rātou nā’u, ’ia tae i taua mahana ra ’a rave ai au i tā’u mau tao’a faufa’a rahi roa ; ’e e fa’aherehere au ia rātou mai te ta’ata e fa’aherehere i tāna iho tamaiti ’o tei tāvini mai iāna.

18 ’Ei reira ’outou e fāriu ai ’e e hāro’aro’a ai i te huru-’ē-ra’a i roto i te feiā parauti’a ’e te feiā parauti’a ’ore, i roto i te ta’ata i tāvini i te Atua ’e te ta’ata ’aore i tāvini iāna.