1 ’E i teienei, i muri a’era, ’ia oti a’era tā Iesu fa’a’itera’a atu i teie mau mea, ’ua ha’amāramarama atu ra ’oia i te reira i te mau ta’ata ; ’e ’ua ha’amāramarama atu ’oia i te mau mea ato’a ia rātou, te mau mea rahi ’e te mau mea iti ato’a ho’i.

2 ’E ’ua parau atu ra ’oia : ’Ua fa’aue mai te Metua iā’u ’ia hōro’a atu i teie mau pāpa’ira’a mo’a ia ’outou, ’e ’ia au i tōna ra pa’ari, e mea ti’a roa i te reira ’ia hōro’ahia atu i te mau u’i a muri atu.

3 ’E ’ua ha’amāramarama atu ’oia i teie mau mea ato’a, ’e ’oia mau mai te ha’amatara’a mai ē tae roa atu i te taime ’oia e haere mai ai i roto i tōna ra hanahana—’oia ïa, ’e ’oia mau i te mau mea ato’a ’o tē tae mai i ni’a i te fenua nei, ē tae noa atu ’ua tahe te mau mea ri’i tumu i te ve’ave’a rahi, ’e e ’ōtarohia ho’i te fenua mai te parau e ’ōtarohia ra, ’e e mou te mau ra’i ’e te fenua.

4 Ē tae noa atu i te mahana rahi ’e te hope’a ra, te mahana e ti’a atu ai te mau ta’ata ato’a, ’e te mau ’ōpū ato’a, ’e te mau nūna’a ato’a, ’e tō te mau reo ato’a i mua i te Atua, ’ia ha’avāhia nō tā rātou ra mau ’ohipa, mai te mea e mea maita’i te reira ’e ’aore rā mai te mea e mea ’ino te reira—

5 Mai te mea e mea maita’i te reira, e roa’a ia rātou te ti’afa’ahoura’a nō te ora mure ’ore ; ’e mai te mea e mea ’ino e roa’a ia rātou te ti’afa’ahoura’a nō te fa’ahapara’a ; ’ia tuea noa te hō’ē i te tahi pae, ’e te tahi pae i te tahi atu pae, mai te au i te aroha, ’e te parauti’a, ’e te mo’ara’a i roto i te Mesia ra, ’o tei ora na nā mua roa i te ha’amatara’a o te ao nei.

6 ’E i teienei, ’aita roa e ti’a ’ia pāpa’ihia i roto i teie nei buka te hānerera’a nō te tufa’a o te mau mea tā Iesu i ha’api’i atu i te mau ta’ata.

7 Inaha rā, tei roto i te mau ’api a Nephi te tufa’a rahi nō te mau mea tāna i ha’api’i atu i te mau ta’ata.

8 ’E ’o teie mau mea tā’u i pāpa’i, e tufa’a iti a’e ïa te reira nō te mau mea tāna i ha’api’i atu i te mau ta’ata ; ’e ’ua pāpa’i au i te reira nō tō’u hina’aro ’ia fa’a’ite-fa’ahou-hia mai te reira, mai te mau ’Ētene mai i teie mau ta’ata, mai te au i te mau parau tā Iesu i parau mai ra.

9 ’E ’ia fāri’i rātou i teie mau mea, e mea ti’a roa ho’i ’ia nā mua rātou i te fāri’i i teie mau mea ’ia tāmatahia tō rātou fa’aro’o, ’e ’ia ti’aturi rātou i teie mau mea, ’ei reira ïa e fa’a’itehia mai ai te mau mea huru rahi a’e ia rātou.

10 ’E ’ia ’ore rātou e ti’aturi i teie mau mea, ’ei reira ïa e tāpe’ahia atu ai te mau mea huru rahi a’e ia rātou, nō te fa’ahapara’a ia rātou.

11 Inaha, tē fātata ra vau i te pāpa’i i te reira, ’e i ’ō’otihia te tā’āto’ara’a nō te reira i ni’a iho i te mau ’api a Nephi, ’ua tāpe’ahia rā vau e te Fatu, i te nā-’ō-ra’a mai ē : E tāmata vau i te fa’aro’o o tō’u ra mau ta’ata.

12 Nō reira, tē pāpa’i nei au, ’o Moromona, i te mau mea i fa’auehia mai iā’u e te Fatu. ’E i teienei, tē fa’aoti nei au, ’o Moromona, i tā’u ra mau parau, ’e tē pāpa’i nei au i te mau mea i fa’auehia mai iā’u.

13 Nō reira, tē hina’aro nei au ’ia ’ite ’outou ē, ’ua ha’api’i te Fatu i te mau ta’ata, nō te ārea e toru mahana te maoro ; ’e i muri iho i te reira ’ua fa’a’ite pinepine mai ’oia iāna iho ia rātou, ’e ’ua vāvāhi pinepine ’oia i te pāne, ’e ’ua ha’amaita’i i te reira, ’e ’ua hōro’a atu i te reira nā rātou.

14 ’E i muri a’era, ’ua ha’api’i atu ra ’e ’ua tauturu atu ra ’oia i te mau tamari’i a te mau ta’ata ’o tāna i parau a’enei, ’e ’ua ha’amatara atu ra ’oia i tō rātou arero, ’e ’ua parau atu ra rātou i tō rātou mau metua i te mau mea rahi ’e te māere, ’oia i te mau mea rahi a’e i tei fa’a’itehia mai i te mau ta’ata ; ’e ’ua ha’amatara ’oia i tō rātou arero ’ia ti’a ia rātou ’ia paraparau.

15 ’E i muri a’era, i muri iho i tōna haerera’a atu i ni’a i te ra’i—teie te piti o te taime ’oia i fa’a’ite mai ai iāna iho ia rātou, ’e i haere atu ai i te Metua ra, i muri iho i tōna fa’aorara’a i tō rātou feiā ma’i, ’e te piri’o’i, ’e te matapō, ’e te tari’a turi, ’e i muri iho i tāna mau huru fa’aorara’a ato’a i te mau ta’ata i rotopū ia rātou, ’e te fa’ati’ara’a i te hō’ē ta’ata mai te pohe mai, ’e te fa’a’itera’a i tōna mana ia rātou, ’e te haerera’a i ni’a i te Metua—

16 Inaha, i muri a’era, ’ia ao a’era, ’ua ha’aputuputu ’āmui mai ra te mau ta’ata i te vāhi hō’ē, ’e ’ua ’ite atu ’e ’ua fa’aro’o ho’i rātou i teie mau tamari’i ; ’oia mau ïa, ’ua hāmama mai te mau aiū i tō rātou vaha, ’e ’ua fa’ahiti mai i te mau mea māere ; ’e te mau mea tā rātou i fa’ahiti mai ’ua ’ōpanihia ’eiaha roa te hō’ē noa atu ta’ata ’ia pāpa’i i te reira.

17 ’E i muri a’era, mai taua taime mai ra ’ua ha’amata ihora te mau pipi i mā’itihia e Iesu i te bāpetizo ’e i te ha’api’i i te mau ta’ata e rave rahi ’o tei haere mai ia rātou ra ; ’e te mau ta’ata e rave rahi ’o tei bāpetizohia nā roto i te i’oa o Iesu, ’ua fa’a’īhia ïa rātou i te Vārua Maita’i.

18 ’E e rave rahi tō rātou ’o tei ’ite atu ’e ’o tei fa’aro’o ho’i i te mau mea ’aore e ti’a ’ia fa’ahiti-fa’ahou-hia, ’e ’aore ho’i e fa’ati’ahia ’ia pāpa’ihia.

19 ’E ’ua ha’api’i rātou ’e ’ua poihere ho’i i te tahi ’e i te tahi ; ’e ’ua ’āmui-tāhō’ē-hia tā rātou mau mea ato’a i rotopū ia rātou, ’e ’ua rave te ta’ata tāta’itahi i te ’ohipa parauti’a te tahi i te tahi.

20 ’E i muri a’era, ’ua rave rātou i te mau mea ato’a mai tā Iesu i fa’aue mai ia rātou ra.

21 ’E ’o rātou ’o tei bāpetizohia nā roto i te i’oa o Iesu ra, ’ua parauhia ïa rātou i te ’ēkālesia a te Mesia.