1 Me yibi buch u napʼan nibe milekag fapi gachalpen Yesus ma yaed be machib nag fapinʼen ni kar rungʼaged ma kar guyed, ma yaed be tawfe u fithingan Yesus, me yibi buch ni pi gachalpen e ra mukun gaed nga taʼabang ngar peth gaed ko meybil nge baley nag e abich.

2 Ere yibi mʼug Yesus ngoraed bayay, ya yaed be meybil ngakʼ e en Chitamangiy u fithingan; me yibi Yesus I sakʼiy nga fithikʼraed, me gaʼar ngoraed: Mang e gimed baʼadag ni nggu piiʼ ngomed?

3 Mar gaʼar gaed ngakʼ: Somoel, gamaed baʼadag ni nga moeg ngomaed ko mang e re fithingan ni nggu tunguyed ko re galasia ney; ya be yoʼor e maleʼeg thin u thilin e gidiiʼ u morngaʼagen e rennʼey.

4 Ma fare Somoel e gaʼar ngoraed: Rriyulʼ, nriyulʼ, gube yoeg ngomed, mangfan ni fapi gidiiʼ e ngar nonnon gaed ma yaed be leleʼeg e thin ni bachan e pinnʼey?

5 Dawor ra poeyed fapi chep nib thothup, nibe yoeg ni thingar mu feked nga dakeanmed fithingan Kristus, niʼir fithingag? Ya ireray e re fithingan ni yira piningmed riy ko bin tomur e rran;

6 Ma enra fek fithingag nga dakean, me athamgil nge madaʼ ko tomur, e ireram e chaʼ nra thap ko bin tomur e rran.

7 Ere, demutrug e re nʼen ni gimed rarinʼ, ma ngam rinʼed u fithingag; ere ngam pininged fare galasia u fithingag; ma gimed meybil ngakʼ e en Chitamangiy u fithingag ni nge tawaʼath nag fare galasia ni fan ngog.

8 Ma buʼuw rogon ma galasia rog ni faʼanra dab ni pining fithingag ngay? Ya faʼanra bay ba galasia ni kan pining fithingan Moses ngay ma arame galasia rokʼ Moses; ara ni pining fithingan beeʼ nib moʼon ngay ma arame ba galasia rokʼ beeʼ nib moʼon; machane faʼan yira pining fithingag ngay meʼere gag e galasia rog, ni faʼanra kar dumow gaed nga dakean e gospel rog.

9 Rriyulʼ gube yoeg ngomed, ni kam dumow gaed nga dakean e gospel rog; ere ngam pininged ni demutrug e pinʼen ni gimed be pining, ma ngam rinʼed u fithingag; ere faʼanra ngam meybil gaed ngakʼ e en Chitamangiy, ni fan ko galasia, ni faʼan gimed rarinʼ u fithingag ma ra motoyil e en Chitamangiy ngomed;

10 Ma faʼanra ngan toey fare galasia nga dakean e gospel rog ma arame ra dag e en Chitamangiy e pi muruwel rokʼ u langgin.

11 Machane faʼanra dan toey nga dakean e gospel rog, ma kan toey nga dakean e pi muruwel ko gidiiʼ, ara nga dakean e pi muruwel ku moʼoniyanʼ, rriyulʼ ni gube yoeg ngomed ni bay ra falfalaenʼ gaed ko pi muruwel roraed u taʼboechingiyalʼ, ma bayi munmun me yibe tomur, ma yira thʼaeb raed nga butʼ maninʼ raed nga mite nifiy, ko gin ni dabiyog ni ngan sulriy.

12 Ya pi muruwel roraed e ra leak raed, ya ri bachan e pi muruwel roraed min thʼaeb raed nga butʼ; ere mu tayed u wunʼmed e pinʼen ni kugog ngomed.

13 Musap gaed kug piiʼ e gospel rog ngomed, ma baʼaray rogon e re gospel ney ni kug piiʼ ngomed—ni kugub nga fayleng ni nggu rinʼ fiti laniyaenʼ e Chitamag, ni bachan e ke lʼugeg e Chitamag.

14 Ma ke lʼugeg e Chitamag ni ngan chibiyeg ngalang u dakean e kuruth; ma tomuren ni kan chibiyeg ngalang u dakean e kuruth, ni nge yog nug miliy gubin e gidiiʼ ngog, ma boed ni ke chibiyeg e gidiiʼ ngalang e aram rogon nra chibiy e en Chitamangiy e gidiiʼ ngalang, ni ngar sakʼiy gaed nga pʼoewcheg, ni ngan pufthin nagraed ko pi muruwel roraed, ko ba mangil fab kireb—

15 Ere arayfan ni kan chibiyeg ngalang; ere rogon gelingin e en Chitamangiy e gura miliy gubin e gidiiʼ riy ngog, ni ngan pufthin nagraed u rogon e pi muruwel roraed.

16 Ma bay yibi buch, ni enra kalngaenʼ min tawfe nag u fithingag e ra sug ko fare Kan ni Thothup; ma faʼanra athamgil nge madaʼ ko tomur, ma musap gaed, ire gura tay ni dariy thibngin u pʼoewchen e Chitamag ko re rran nem u napʼan ni bay gu sakʼiy ni nggu pufthin nag e fayleng.

17 Ma enra dabi athamgil nge madaʼ ko tomur, e ireram e chaʼ ni yira thʼaeb nga butʼ nga ninʼ nga mite nifiy, ni ireram e gin ni dabiyog ni ngan sulriy, ni bachan e justice rokʼ e en Chitamangiy.

18 Ere ireray fare thin ni piiʼ ngakʼ e gidiiʼ. Ere arayfan ni ke muguʼuliy fapi thin ni ke piiʼ, ere dar ma baen, ya ma muguʼuliy gubin e thin rokʼ.

19 Ma dariy banʼen nib alit ni rayog ni nge yaen nga lan gilʼilungun; ere dariy banʼen ni ra yaen nga tafen e gapas rokʼ ma kemus ni piʼin ni kar lukuyed e mad roraed nga rachaʼeg, ni bachan e mich roraed, nge kalngaenʼ roraed ko gubin e pi denen roraed, nge yulʼyulʼ roraed nge yaeni madaʼ ko tomur.

20 Chiney e baʼaray fare motochiyel: Mu kalgaed ngaenʼmed, gimed gubin e gidiiʼ ni gimed bay ko tin tomur e rran u fayleng, magmed yib ngog ngan tawfe nagmed u fithingag, ni nge yog ni ngam machalbog gaed u dakean fare Kan ni Thothup, ni nge yog ni ngam sakʼiy gaed ni dariy thibngimed u pʼoewcheg ko bin tomur e rran.

21 Rriyulʼ, nriyulʼ, gube yoeg ngomed, ni ireray e gospel rog; ma gimed manang e pinʼen ni thingar mu rinʼed u lan e galasia rog; ya pi muruwel ni kam guyed gag ni kug rinʼ e ireram e pi muruwel ni ngam rinʼed; ya pinʼen ni kam guyed gag ni kug rinʼ e ireram e pinʼen ni ngam rinʼed;

22 Ere, faʼan gimed rarinʼ e pinnʼey ma ra felʼ waʼathmed, ya yira chibiymed ngalang ko bin tomur e rran.

23 Mu yoloeyed e pinʼen ni kam guyed ma kam rungʼaged, ma kemus ni pinʼen nib mathngeluwol e dab mu yoloeyed.

24 Mu yoloeyed e pi muruwel rokʼ e pi gidiiʼ ney, ni bay rrinʼed, ni boed ni kan yoloey morngaʼagen e tin ni ke buch.

25 Ya musap gaed, rogon e pinʼen ni kan yoloey nga langgin fayu ke babyor, nge tin ni bay finni yoloey, e yira pufthin nag e pi gidiiʼ ney riy, ya ireram e gin ni baʼrogon e pi muruwel roraed riy nra nang e gidiiʼ.

26 Ere musap gaed, gubin banʼen ma be yoloey e en Chitamangiy; ere rogon e pinʼen ni yira yoloey nga langgin fayuke babyor e yira pufthin nag e fayleng riy.

27 Ma gubaʼadag ni ngam nanged ni bay mmanged tapufthin rokʼ e pi gidiiʼ ney, u rogon ba yalen ni bay gu piiʼ ngomed, niʼir e ba matʼaw. Ere, ba mit i mang gidiiʼ e ngam boeded? Rug be gaʼar ngomed, ngam boeded gag.

28 Ere chiney e ngguwon ngakʼ e en Chitamangiy. Ma rug be yoeg ngomed, ni demutrug e renʼen ni gimed ra ning ngakʼ e en Chitamangiy u fithingag ma ra piiʼ ngomed.

29 Ere, mu ninged, min piiʼ ngomed; mu tugtuguyed, min bing ngomed; ya enra ning, e yira piiʼ ngakʼ; ma enra tugtuguy, e yira bing ngakʼ.

30 Ere chiney, e musap gaed, falfalaenʼ rog e kari gel, ma kari sug, ni bachmed, nge biney e mfen; arragon, ma mus ngakʼ e en Chitamangiy make falfalaenʼ, nge ku aram rogon ngakʼ gubin e pi angel nib thothup, ni bachmed nge biney e mfen; ya dariy bagyaed ni ke malog.

31 Musap gaed, gubaʼadag ni ngam nanged fan; ya gube yipʼ fan e piʼin ni yaed bay e chiney nib fos ko biney e mfen; ma dariy bagyaed ni ke malog; ere bachraed ma kug sug ko falfalaenʼ.

32 Machane musap gaed, be kireb anʼug ni bachan e bin aningeg e mfen nga mʼon ko biney e mfen, ya ke wawliyraed faʼanem iyaen ni kalbus ni woed ni rinʼ faʼen fak moʼoniyanʼ; ya yaedra piiʼeg ni chuwaeyʼ ko silber, nge gol, nge pinʼen nra kireb nag e chachngeg nge pinʼen ni rayog ni iring e pi moroʼroʼ. Ma lan e re rran nem e gura gechig nagraed, gura sulweg wengan e pi muruwel roraed nga dakean loelugraed.

33 Me yibi buch u napʼan ni muʼ Yesus iyoeg e pi thin ney me gaʼar ngakʼ pi gachalpen: Mmaroed nga langgin fare garog nib weʼinʼin; ya ba garog nib weʼinʼin, mab achichig radan nib sor iyaen ko yafos, ma rib lich e piʼin ni yaedra pirʼeg; ya rib gaaʼ langan fare garog, ma rib gaaʼ radan e woʼ nib sor iyaen ko yamʼ, ma rib yoʼor e piʼin ni yaed be milekag iyaen ngay, nge yaeni madaʼ nga napʼan ni ke nepʼ, ni dakuriy beeʼ ni rayog ni nge muruwel.