1 ’E i muri a’era, ’a haere atu ai ’e ’a poro haere ai te mau pipi a Iesu i te mau mea tā rātou i fa’aro’o ’e i hi’o, ’e ’a bāpetizo ai nā roto i te i’oa o Iesu, i muri a’era, ’ua ha’aputuputuhia mai ra te mau pipi ’e ’ua tāhō’ēhia rātou nā roto i te pure ’ū’ana ’e te ha’apaera’a mā’a.

2 ’E ’ua fa’a’ite fa’ahou atu ra Iesu iāna iho ia rātou, ’e tē pure ra rātou i te Metua nā roto i tōna ra i’oa ; ’e ’ua fā atu ra Iesu ’e ’ua ti’a atu ra i rotopū ia rātou, ’e ’ua nā ’ō atu ra ia rātou : E aha tā ’outou e hina’aro iā’u ’ia hōro’a atu ia ’outou ?

3 ’E ’ua nā ’ō mai ra rātou iāna : E te Fatu, tē hina’aro nei mātou ’ia fa’a’ite mai ’oe i te i’oa tā mātou e pi’i i teie nei ’ēkālesia ; tē vai nei ho’i te mau mārōra’a i rotopū i te mau ta’ata nō ni’a i taua vāhi ra.

4 ’E ’ua nā ’ō atu ra te Fatu ia rātou : ’Oia mau, ’oia mau, tē parau atu nei au ia ’outou, nō te aha te mau ta’ata e amuamu ai ’e e mārō ai nō teie nei mea ?

5 ’Aita ānei rātou i tai’o i te mau pāpa’ira’a mo’a, ’o tei nā ’ō mai ē, e mea ti’a roa ia ’outou ’ia rave i te i’oa o te Mesia, ’oia ho’i, i tō’u nei i’oa i ni’a iho ia ’outou ? ’E ’o teie ho’i te i’oa e pi’ihia i ni’a iho ia ’outou i te mahana hope’a ra.

6 ’E ’o ’oia ’o tē rave i tō’u nei i’oa i ni’a iho iāna ’e ’o tē fa’aitoito tāmau noa ē tae noa atu i te hope’a ra, ’o ’oia ïa te fa’aorahia i te mahana hope’a ra.

7 Nō reira, te mau mea ato’a tā ’outou e rave, e rave ïa ’outou i te reira nā roto i tō’u nei i’oa ; nō reira e pi’i ’outou i te ’ēkālesia i tō’u nei i’oa ; ’e e pure atu ’outou i te Metua nā roto i tō’u nei i’oa, ’ia ha’amaita’i ’oia i te ’ēkālesia nō’u ra.

8 ’E nāhea te reira e riro ai ’ei ’ēkālesia nā’u, maori rā ’ia pi’ihia i tō’u nei i’oa ? Mai te mea ho’i e pi’ihia te hō’ē ’ēkālesia i te i’oa nō Mose ra, e ’ēkālesia ïa nā Mose ; ’e ’aore rā ’ia pi’ihia te reira i te i’oa nō te hō’ē ta’ata ra, e ’ēkālesia ïa nā taua ta’ata ra ; ’ia pi’ihia rā te reira i tō’u nei i’oa, e ’ēkālesia ïa nā’u, mai te mea ’ua patuhia te reira i ni’a i tā’u ra ’evanelia.

9 ’Oia mau, tē parau atu nei au ia ’outou na, ’ua patuhia ’outou i ni’a iho i tā’u nei ’evanelia ; nō reira ’a fa’ahiti mai i te mau mea ato’a tā ’outou e fa’ahiti mai nā roto i tō’u nei i’oa ; nō reira ’ia ti’aoro ’outou i te Metua, nō te maita’i o te ’ēkālesia, nā roto i tō’u nei i’oa, e fa’aro’o mai te Metua ia ’outou.

10 ’E mai te mea ’ua patuhia te ’ēkālesia i ni’a iho i tā’u nei ’evanelia, i reira e fa’a’ite mai te Metua i tāna iho mau ’ohipa i roto i te reira.

11 ’Āre’a rā ’ia ’ore te reira ’ia patuhia i ni’a iho i tā’u nei ’evanelia, ’e ’ia patuhia te reira i ni’a iho i te mau ’ohipa a te ta’ata nei, ’e ’aore rā i ni’a iho i te mau ’ohipa a te diabolo, ’oia mau tē parau atu nei au ia ’outou na, e ’oa’oa tō rātou i roto tā rātou mau ’ohipa nō te hō’ē noa tau, ’e ’aita e maoro e tae mai te hope’a, ’e i reira e tāpūhia rātou i raro ’e e hurihia atu i roto i te auahi, ’e mai reira mai e ’ore roa e ti’a ia rātou ’ia riro fa’ahou mai tō rātou huru mātāmua.

12 E pe’ehia atu ho’i rātou e tā rātou mau ’ohipa, nō tā rātou mau ’ohipa ho’i i tāpūhia ai rātou i raro ; nō reira, ’a ha’amana’o i te mau mea tā’u i fa’a’ite atu ia ’outou na.

13 Inaha, ’ua hōro’a atu vau i tā’u ’evanelia ia ’outou, ’e ’o teie te ’evanelia tā’u i hōro’a atu ia ’outou—’oia ho’i, ’ua haere mai au i roto i te ao nei nō te rave i te hina’aro o te Metua, nō te mea ’ua tono mai tō’u Metua iā’u.

14 ’E ’ua tono mai tō’u Metua iā’u ’ia fa’ateiteihia vau i ni’a i te sātauro ; ’e i muri iho i tō’u fa’ateiteira’ahia i ni’a i te sātauro, ’ia ti’a iā’u ’ia ’ume mai i te mau ta’ata ato’a iā’u nei ; ’e mai iā’u i fa’ateiteihia i ni’a e te mau ta’ata, ’oia ato’a ïa e fa’ateiteihia te mau ta’ata i ni’a e te Metua, ’ia ti’a mai i mua iā’u, ’ia ha’avāhia nō tā rātou ra mau ’ohipa, mai te mea e mea maita’i te reira ’e ’aore rā mai te mea e mea ’ino te reira—

15 ’E teie ïa te tumu i fa’ateiteihia ai au ; nō reira, ’ia au i te mana o te Metua, e ’ume mai au i te mau ta’ata ato’a iā’u nei, ’ia ha’avāhia rātou mai te au i tā rātou ra mau ’ohipa.

16 ’E a muri a’era, ’o ’oia ’o tē tātarahapa ’e tē bāpetizohia i tō’u ra i’oa, e fa’a’īhia ïa ; ’e ’ia fa’aitoito tāmau noa ’oia ē tae noa atu i te hope’a ra, inaha, e fa’ariro vau iāna ’ei mea hapa ’ore i mua i tō’u ra Metua i taua mahana ra e ti’a atu ai au nō te ha’avā i tō te ao nei.

17 ’E ’o ’oia ’o tē ’ore e fa’aitoito tāmau noa ē tae noa atu i te hope’a ra, ’o ’oia ïa tē tāpūhia i raro ’e ’o tē huri-ato’a-hia i roto i te auahi, ’e mai reira mai e ’ore roa e ti’a ia rātou ’ia riro fa’ahou mai tō rātou huru mātāmua, nō te mea ’o te reira ïa te huru parauti’a o te Metua.

18 ’E ’o teie ïa te parau ’o tāna i hōro’a mai i te mau tamari’i a te ta’ata nei. ’E nō te reira ho’i ’ua fa’atupu ’oia i te mau parau ’o tāna i hōro’a mai, ’e ’aita roa ’oia e ha’avare, e fa’atupu rā ’oia i tāna mau parau ato’a.

19 ’E ’aita roa te hō’ē mea vi’ivi’i e ō i roto i tōna bāsileia ; nō reira ’aita roa te hō’ē mea e ō atu i roto i tōna fa’aeara’a, maori rā ’o rātou ’o tei tāmā i tō rātou mau ’ahu i roto i tō’u ra toto, ’e nō tō rātou fa’aro’o, ’e te tātarahapara’a i tā rātou mau hara ato’a, ’e tō rātou ha’apa’o maita’i ē tae noa atu i te hope’a.

20 I teienei, ’o teie te fa’auera’a : ’A tātarahapa, ’outou pā’āto’a e te mau hope’a o te fenua nei, ’e ’a haere mai iā’u nei ’e ’ia bāpetizohia i tō’u nei i’oa, ’ia ha’amo’ahia ’outou nā roto i te fāri’ira’a i te Vārua Maita’i, ’ia ti’a ia ’outou ’ia ti’a mai ma te pōra’o ’ore i mua iā’u i te mahana hope’a ra.

21 ’Oia mau, ’oia mau, tē parau atu nei au ia ’outou na, ’o tā’u ’evanelia teie ; ’e ’ua ’ite ’outou i te mau mea i tītauhia ia ’outou ’ia rave i roto i tā’u nei ’ēkālesia ; ’e te mau ’ohipa tā ’outou i ’ite iā’u i te ravera’a ’o tā ’outou ato’a ïa e rave ; ’e te mau mea tā ’outou i ’ite iā’u i te ravera’a ’o tā ’outou ïa e rave.

22 Nō reira, mai te mea e rave ’outou i teie mau mea, e ao ïa tō ’outou, nō te mea e fa’ateiteihia ’outou i te mahana hope’a.

23 ’A pāpa’i i te mau mea tā ’outou i ’ite na ’e i fa’aro’o na, maori rā i te mau mea ’o tei ’ōpanihia.

24 ’A pāpa’i i te mau ’ohipa a teie nei feiā, ’o tē tupu a muri atu, mai tei pāpa’ihia, nō te mau mea i tupu na.

25 Inaha ho’i, nā roto mai i te mau buka i pāpa’ihia ra, ’e ’o te pāpa’ihia ho’i a muri atu, e ha’avāhia ai teie nei feiā, nā roto i te reira e ’itehia ai tā rātou mau ’ohipa i te ta’ata nei.

26 ’E inaha, ’ua pāpa’ihia te mau mea ato’a e te Metua ; nō reira nā roto mai i te mau buka ’o tē pāpa’ihia e ha’avāhia ai tō te ao nei.

27 ’E ’ua ’ite ānei ’outou ē, e riro ’outou ’ei mau ha’avā nō teie nei feiā, mai te au i te ha’avāra’a ’o tā’u e hōro’a atu ia ’outou ; ’o tē riro ho’i ’ei mea tia. Nō reira, e aha tō ’outou huru e au ai ? ’Oia mau tē parau atu nei au ia ’outou na, mai iā’u nei ïa.

28 ’E i teienei, tē haere nei au i te Metua. ’E ’oia mau tē parau atu nei au ia ’outou na, te mau mea ato’a tā ’outou e ani atu i te Metua i tō’u nei i’oa, e hōro’ahia mai ïa ia ’outou.

29 Nō reira, ’a ani, ’e e fāri’i ’outou ; ’a pātōtō, ’e e ’īritihia mai ïa ia ’outou ; ’e ’o ’oia ’o tē ani, e fāri’i ïa ; ’e ’o ’oia ’o tē pātōtō, e ’īritihia mai ïa.

30 ’E i teienei, inaha, ’ua rahi tō’u ’oa’oa, ē tae roa atu i te ’īra’a, nō ’outou, ’e nō teie nei u’i ato’a ; ’oia ïa, ’e tē ’oa’oa nei ho’i te Metua ’e te mau melahi mo’a ato’a ho’i, nō ’outou ’e nō teie nei u’i ; ’e ’aita roa ho’i te hō’ē nō rātou i mo’e.

31 Inaha, tē hina’aro nei au ’ia ’ite pāpū ’outou ; tē parau nei au nō rātou ’o tē ora nei i teie nei, i roto i teie u’i ; ’e ’aita te hō’ē o rātou e mo’e ; ’e nā roto ia rātou i fāri’i ai au i te ’īra’a nō te ’oa’oa.

32 Inaha rā, tē ’oto nei au nō te maha o te u’i mai teie atu u’i, nō te mea ’ua arata’i-tītī-hia rātou e ana ’oia ho’i mai te tamaiti o te pohe ; ’e e ho’o atu ho’i rātou iā’u nō te ’ārio ’e te ’auro, ’e nō taua mea ra e pau i te huhu ’e ’o tē tomohia ’e ’o te ’eiāhia e te feiā ’eiā. ’E i taua mahana ra e fa’autu’a ai au ia rātou, ē tae noa atu ho’i i te fa’afāriura’a i tā rātou mau ’ohipa i ni’a iho i tō rātou iho upo’o.

33 ’E i muri a’era, ’ia fa’aoti a’era Iesu i teie mau parau, ’ua nā ’ō atu ra ’oia i tāna ra mau pipi : ’A tomo ’outou nā te ’ūputa piriha’o ; e mea piriha’o ho’i te ’ūputa, ’e e mea oaoa ho’i te ’ē’a e tae atu ai i te ora, e mea iti ho’i ’o tē ’ite atu i te reira ; ’āre’a rā e mea ’ā’ano te ’ūputa, ’e e mea ateatea te ’ē’a e tae atu ai i te pohe, ’e e rave rahi ho’i te nā reira i te haere, ’e ’ia tae mai te pō, ’aore atu ra e ti’a i te ta’ata ’ia rave i te ’ohipa.