1 Me yibi buch u tomuren ni ke yoeg Yesus e pi thin ney, me non ngakʼ pi gachalpen, ni tataʼareb, nibe gaʼar ngoraed: Mang e gimed baʼadag ni nggu piiʼ ngomed, u tomuren ni ku guwaen ngakʼ e en Chitamangiy?

2 Ma kemus ni dalip i yaed e dar non naed, ma yaed gubin nra non naed, ni yaed be gaʼar: Gamaed be athapeg ni nggu baed ngom nib papay nga lan gilʼilungum, u tomuren ni kug pired ni nʼumngin i napʼan nni midil nag ni nggu pired ni gamaed bafos, ma ke mʼay e muruwel romaed ni kam piningmaed ngay ni nggu rinʼed.

3 Me gaʼar ngoraed: Nge felʼ waʼathmed ni bachan e gimed be athapeg e biney rog; ere, tomuren ni ke gaman medilip i ragag nge lʼagruw e duw romed ma bay mu baed ngog nga langgin gilʼilungug; ma bay mu pirʼeged rog e toffan.

4 Ma tomuren ni ke non ngoraed, me chel nga sap ngakʼ fadalip nem, me gaʼar ngoraed: Mang e gimed baʼadag ni nggu rinʼ ngomed, u tomuren ni ku guwaen ngakʼ e en Chitamangiy?

5 Me kirbaenʼ raed, ya dabi thog roraed ni ngar weliyed ngakʼ e nʼen ni yaed be athapeg.

6 Me gaʼar ngoraed: Musap gaed, gumnang e tafnaey romed, ere gimed be athapeg e nʼen ni athapeg John nib tʼuf rog, ni immoy rog u napʼan e muruwel rog, u mʼon ni nge tiningeg fapi Jews ngalang.

7 Ere, ri kub felʼ boech waʼathmed, ya gimed e dab mu thamiyed e yamʼ; ya bay mu pired ni gimed bafos ni ngam guyed e pinʼen bay irinʼ e en Chitamangiy ngakʼ e gidiiʼ, nge yaeni madaʼ ko ngiyalʼ ni gubin banʼen make muguʼul nrogon ni baʼadag e en Chitamangiy, u napʼan ni bay gub u fithikʼ e rir rog nge pi gelingin nu tharmiy.

8 Ma dab mu gafgow gaed u amithun e yamʼ; ya napʼan ni bay gub u fithikʼ e rir rog ma bay mu thil gaed ni boed ba taleableab ngam chuw gaed ko dagur nra yimʼ ngam maroed ko dagur ni dabi yimʼ; ma arame bay ni tawaʼath nagmed u lan gilʼilungun e Chitamag.

9 Nge ku boech, gimed e dab mu thamiyed e amith u napʼan ni gimed bay u lan e biney e dowef, ara kirbaenʼ ma kemus ni bachan e pi denen ko fayleng; ere gubin e pinnʼey ma gura rinʼ ni bachan e nʼen ni kam athapeged rog, ya kam athapeged ni gomanga yog ni ngam yog niged e gidiiʼ ni poloʼ ngog, u nʼumngin i napʼan ni bayi paer e fayleng.

10 Ere arayfan ni bay yog e falfalaenʼ ngomed ni poloʼ; ma bay mu pired nga butʼ u lan gilʼilungun e Chitamag; arragon, falfalaenʼ romed e bayi poloʼ, ni boed e en Chitamangiy ni ke piiʼ ngog e falfalaenʼ ni poloʼ; ma bay mu boeded Gag, me Gag e guboed e en Chitamangiy; ere en Chitamangiy nge Gag e gamow taʼareb;

11 Ma fare Kan ni Thothup e be micheg e en Chitamangiy nge gag; ma en Chitamangiy e be piiʼ fare Kan ni Thothup ngakʼ e gidiiʼ, ni bachag.

12 Me yibi buch u napʼan ni ke yoeg Yesus e pi thin ney, me matheg bugulipaʼ ngoraed ni yaed gubin ma kemus ni fadalip niiʼ ni ngar pired, e de matheg buglipaʼ ngoraed, ma arame me yaen.

13 Ere musap gaed, mab e tharmiy, min fekraed nga tharmiy, mar guyed mar rungʼaged bogi banʼen ni dabiyog i weliy.

14 Ma rib mathngeluwol ngoraed ni ngar weliyed morngaʼagen; ara ngan piiʼ gelingraed ni nge yog ni ngar weliyed e pinʼen ni kar guyed ma kar rungʼaged;

15 Ma dar nanged ko yaed bay u lan e dowef fa yaed bay u wuruʼ, dabiyog ni yaedra yoeg; ya be mʼug ngoraed ni gowa kethil yaʼaraed, ni kar chuw gaed ko biney e dowef nga ranoed nga rebe dodowen e dowef ni dabi yimʼ, ni nge yog ni ngar guyed e tirokʼ Got banʼen.

16 Machane yibi buch nra machib gaed bayay u dakean e fayleng; machane dar machib niged morngaʼagen fapinʼen ni kar guyed ma kar rungʼaged, ni bachan fare motochiyel nni piiʼ ngoraed u tharmiy.

17 Ere chiney, gomanga yaed bay ko dagur nra yimʼ fa dabi yimʼ, aram ko napʼan fare rran ni thilyaʼaraed, e dagnang;

18 Machane baʼaray e chuʼuw ni gumnang, u rogon fare chep ni kan yoloey—u ranoed iyaen u dakean fare nam, mar machib gaed ngakʼ gubin e gidiiʼ, ma yaed be thapeg urngin e piʼin nibe michaenʼraed ko machib roraed ko fare galasia; min tawfe nagraed, ma gubin e piʼin ni tawfe nagraed e rathapeged fare Kan ni Thothup.

19 Ma piʼin ni dar manged ko fare galasia e riynʼedraed nga kalbus. Ma tafene kalbus ni yi be yinʼraed ngay e daryog ni ngar pired u langgin, ya be puth nge ruw rabaʼ.

20 Ma ku ninʼraed nga lan e loew; machane ra buthuged e butʼ ko fare thin rokʼ Got, ni arame, dakean gelingin e ni chuwegraed riy u lan e pi loew; ere dariy ba loew ni kar kired nib toʼaer nibe yog ni ngan tay raed u langgin.

21 Ma dalip yay ni kaninʼ raed nga tafen e nifiy ma dar yikʼ gaed.

22 Ma lʼagruw yay nninʼraed nga lan e loew ni bay e gamanman nib malboch riy; ma musap gaed, ur fafeal gaed fapi gamanman nib malboch ni woed beeʼ nib bitir nge fak e saaf, ma dar madʼad gaed.

23 Me yibi buch ni aray rogon ni u ranoed u fithikʼ gubin fapi gidiiʼ ku Nephi, mar machib niged fare gospel rokʼ Kristus ngakʼ gubin e gidiiʼ u dakean fare nam; me michaenʼraed ngakʼ fare Somoel, mar manged gidiiʼen fare galasia rokʼ Kristus, ere aray rogon nni tawaʼath nag e gidiiʼ ko binem e mfen, ni boed rogon ni yoeg Yesus.

24 Ere chiney e gag, Mormon, e nggu museg I weliy morngaʼagen e pinnʼey boechi ngiyalʼ.

25 Musap gaed, guwaen ni nggu yoloey fithingan fa piʼinem ni yaed e dabra riʼed lamen e yamʼ, machane fare Somoel e siyeg; ere dab gu yoloey, ya kan mithaeg ko gidiiʼ.

26 Machane musap gaed, kug guy raed, ma kar machib gaed ngog.

27 Ma musap gaed bay rabaed nga fithikʼ fapi Gentiles, ma fapi Gentiles e dabra nanged raed.

28 Ma kubay rabaed nga fithikʼ fapi Jews, ma fapi Jews e dabra nanged raed.

29 Me bay yibi buch, u napʼan ni bayi guy Somoel u fithikʼ e gonop rokʼ nib gamog ni ngar machib gaed ngakʼ gubin fapi ganong ku Israel ni ke garar, nge gubin e pi nam, mfen, thin, nge gidiiʼ, mar yog niged e gidiiʼ ni poloʼ nib yoʼor ngakʼ Yesus, ni nge yog ni muguʼul fare athap roraed, nge ku bachan e yaed be machib ni nge mich u wunʼuy u dakean fare gelingin Got ni bay roraed.

30 Ma kar boeded e pi angel rokʼ Got, ma faʼan yaedra meybil ngakʼ e en Chitamangiy u fithingan Yesus ma rayog ni demutrug beeʼ mar mʼug gaed ngakʼ ni faʼanra yaed be guy nib mangil ni ngan rinʼ.

31 Ere, muruwel nib gaaʼ mab maʼangʼang e bay ra gagyeg niged, u mʼon ko fare rran nib gaaʼ ni bay yib ni gubin e gidiiʼ ma thingar sakʼiy gaed nga mʼon u gilʼ e pufthin rokʼ Kristus;

32 Arragon ni mus nga fithikʼ fapi Gentiles ma bay ra gagyeg niged ba muruwel nib gaaʼ mab maʼangʼang riy, u mʼon ko fare rran ko pufthin.

33 Ma faʼanra bay gubin fapi chep nib thothup romed nibe weliy gubin fapi muruwel nib maʼangʼang rokʼ Kristus, ma ngam nanged riy ni boed ni yoeg Kristus, ni pinnʼey e riyulʼ ni thingari buch.

34 Ma gafgow ngakʼ e chaʼ ni dabi motoyil ko thin rokʼ Yesus, nge piʼin ni ke melʼeg ke lʼoegraed nga fithikʼraed; ya chaʼ ni dabi thapeg e thin rokʼ Yesus nge thin rokʼ e piʼin ni ke lʼoegraed e dabi thapeg faʼanem ngakʼ; ma arame dabi thapegraed ngakʼ ko bin tomur e rran;

35 Ma arame kab felʼ ni faʼan gomanga dan gargelegraed. Ya gimed be lemnag nra yog ni ngam teleged e justice rokʼ Got ni kan kʼaring e puwaenʼ ngakʼ, ma kan yitʼ nga butʼ nga tan rifrifanʼay e gidiiʼ, ni nge yog ni yib woʼen e thap riy?

36 Ere chiney e musap gaed, boed ni kug weliy morngaʼagen fa piʼin ni ke melʼeg raed Somoel, arragon, ni boed fa dalip niiʼ kan fekraed nga tharmiy, ma dagnang ko kan beʼech nagraed ko dagur nra yimʼ nge af ko dagur ni dabi yimʼ—

37 Machane musap gaed, napʼan nug yol, mug deʼriy Somoel riy, me dag ngog nib tʼuf ni thingar ni thilyeg rogon e dowef roraed, ara dangay ma rib tʼuf ni ngar riʼed lamen e yamʼ;

38 Ere, rogon ma dar riʼed lamen e yamʼ e ni thilyeg rogon e dowef roraed, ni nge siy ra gafgow gaed ko amith ara kirbaenʼ ma kemus ni yigoʼ pi denen ko gidiiʼ nu fayleng e yaed ra gafgow riy.

39 Chiney e biney e thil nra tay e dowef e dabi taʼareb rogon ko bin ra buch ko bin tomur e rran; ya bay rogon e thil nni gagyeg nag nga dakeanraed, ni arame dakuriy gelingin Moʼoniyanʼ ni nge gagyeg nagraed, ma dabki yog ni nge lumel nag laniyaenʼraed; ma yaed ba machalbog u lan e dowef, ma yaed ba thothup, nge pi gelingin nu fayleng e dabiyog ni nge koelraed.

40 Ma ngar pired ko biney e dodow nge yaeni madaʼ ko fare rran ni pufthin rokʼ Kristus; ma napʼan e re rran nem ma bay ba thil nib gaaʼ ni bay ra tayed, ni ngar thap gaed nga langgin gilʼilungun e en Chitamangiy ma dab kur chuw gaed, ya ngar pired rokʼ Got u tharmiy ni manechubog.