1 Me yibi buch u tungun e bin ragag nge meruk e duw ni fapi salthaw ni moroʼroʼ e ra falʼeged rograed ko mael, mar tabab gaed ko wub ni tomgin nga wuruʼ e pi yungi falang, nge pi burey, nge wuruʼ e binaw, nge yoror roraed, nge pi yungi nʼen yaed ma miith riy, mar tabab gaedi koel fa yungi binaw, ni binaw ni bay nga yimuch nge binaw nib kan nga leluʼoch, mar tabab gaedi koel gubin yang e pi binaw ni ke chuw fapi Nephites riy, nge pi yungi binaw ni kan pag.

2 Machane musap gaed, dariy e gamanman ni malboch, ara gamanman ni yima longuy u lan e pi yungi binaw nem ni ke chuw fapi Nephites riy, ere dakuriy e gamanman ni nge longuy fapi moroʼroʼ u roem ma kemus ni yigoʼ lan wuruʼ e binaw e bay riy.

3 Ere fapi moroʼroʼ e daryog ni ngar pired u lan fa yungi binaw, ma kemus nigoʼ wuruʼ e binaw e rayog ni ngar pired riy ni bachan e ggan ni dariy; ya fapi Nephites e kar paged e pi yungi binaw roraed ni dakuriy banʼen riy, ma kar kunuyed e pi gamanman roraed nge pi yu ulung i gamanman roraed, nge gubin banʼen roraed, ma kar pired nga taʼabang.

4 Ere, dariy rogon me yog rokʼ fapi moroʼroʼ ni ngar matgael gaed ni nge yog e ggan ngoraed, ma kemus ni ngar baed nga lan e tamilang ngar mael gaed fapi Nephites; ma fapi Nephites ni kar pired nga taʼabang e ri yaed bayoʼor, ma kar chaʼariyed e ggan ni fan ngoraed, nge os nge garbaw, nge gamanman ni gubin mit, ni fan ngoraed u lan medilip e duw, ma yaed be athapeg ni re ngiyalʼ innʼem ma kar thanged mit fapi moroʼroʼ u dakean e nam; ere aray rogon ni mʼay e bin ragag nge meruk duw.

5 Ere yibi buch nu lan e bin ragag nge mereb e duw ni pirʼeg Giddianhi nib tʼuf ni nge yaen nni mael ngakʼ fapi Nephites, ya dariy kanawoʼen me yog ni ngar pired ni yaed ba fos, ma kemus ni ngar matgael gaed mar moroʼroʼ gaed mar mathang pogofan gaed.

6 Ma dar thog u wunʼraed ni ngar garar gaed u dakean e nam ni ngar yunged e grain, ya yaed be rus ngay ni richey me yib fapi Nephites ngoraed ngar liiʼed raed; ere Giddianhi e piiʼ e motochiyel ngakʼ e pi salthaw rokʼ ni nga ranoed u lan e re duw ney ni mael ngakʼ fapi Nephites.

7 Me yibi buch ni arame rabaed ni mael; u lan e bin nelʼ e pul; ere musap gaed, rib digow mab tamdag e re rran ni rabaed riy ko mael; ni kar chuw gaed nga mad ni yalen e moroʼroʼ; ma kar mʼaged e mad ni keruʼ e saaf nga lukungraed, ni kan liyef ko rachaʼ, ma loelugraed e kan puy e piy riy, ma kar tayed head-plates nga loelugraed; ere rib digow mab tamdag yaʼan fapi salthaw rokʼ Giddianhi, ni bachan madan e mael roraed, ni kan liyef ko rachaʼ.

8 Me yibi buch ni fapi salthaw ko Nephites, e napʼan ni kar guyed yaʼan fapi salthaw rokʼ Giddianhi, mar awgaed nga butʼ, ngar yoer gaed ngakʼ fare Somoel ni Got roraed, ni nge ayuwegraed me chuwegraed u paʼ e pi toʼogor roraed.

9 Ere yibi buch u napʼan ni guy fapi salthaw ku Giddianhi e biney, mar tabab gaed ko tolul nib gaaʼ lamraed, ni bachan e falfalaenʼ roraed, ya kar lemniged ni fapi Nephites e kar awgaed nga butʼ ni murus ni bachan e tamdag u yaʼan e pi salthaw roraed.

10 Machane ireray e gin ni mʼingaenʼraed riy, ya fapi Nephites e dar tamdag gaed ngoraed; ya kar tamdag gaed ko Got roraed mar meybil gaed ngakʼ ni nge ayuwegraed; ere, napʼan ni og fapi salthaw ku Giddianhi ngoraed ma kar falʼeged rograed ni yaed be soen nagraed; arragon, mar tapngiyed raed u gelingin Somoel.

11 Ere fare mael e tabab u lan e biney nnelʼ e pul; ma rib almarin mab gel e mogothgoth ko mael ntay riy, arragon, rib almarin mab noemow e yamʼ ntay riy, ni arame dariy bingyalʼ i banʼen ni yimnang morngaʼagen ni aram fini almarin e yamʼ ni aw nga fithikʼ gubin fapi gidiiʼ ku Lehi ni kaʼaram napʼan i yib ni chuw u Jerusalem.

12 Ma yug aram rogon e pi makʼar murus nge michmich ko thin ni tay Giddianhi, machane musap gaed, i gel fapi Nephites ngoraed, mar sulsuloed roraed nga tomur.

13 Me yibi buch ni Gidgiddoni e yoeg ni salthaw rokʼ e ngar tulufed raed iyaen nge madaʼ ko pi mathil u wuruʼ e binaw, ma dariy beeʼ nra thap nga paʼaraed ni nge paer nib fos; ere aray rogon nra tulufed raed ngar liiʼed raed, iyaen ko pi mathil u wuruʼ e binaw, ni aram rogon nge yaeni madaʼ ko ngiyalʼ ni kar muguʼuliyed fare motochiyel ku Gidgiddoni.

14 Me yibi buch ni fachaʼ i Giddianhi, ni ke sakʼiy nge cham nib almarin, e ni tuluf u napʼan ni miil; ere bachan e kari magaer ko cham ni ke tay, min koel ngan liiʼ ngemʼ. Ere aray rogon ni mus e yafos rokʼ Giddianhi ni fare moroʼroʼ.

15 Me yibi buch ni fapi salthaw ko Nephites e ra suloed bayay nga lan e yoror roraed. Me yibi buch ni mʼay e biney ni ragag nge mereb e duw, ma fapi moroʼroʼ e dakur baed bayay ko mael; ara kur baed bayay u lan e bin riliwʼ e duw.

16 Ma lan e bin riliwʼ nge taʼareb e duw ma ku dar baed ko mael, machane rabaed u gubin yang ngar liyeged fapi gidiiʼ ku Nephi; ya kar lemniged ni faʼan yaedra thabey fapi gidiiʼ ku Nephi ko binaw roraed, ngar longbiyed raed u gubin yang, ma faʼanra yog ni ngar thabeyed raed ko pinʼen nib tʼuf roraed u wuruʼ e yoror, ma rayog ni ngar guyed rogon ni ngar wenig gaed nrogon ni yaed be athapeg.

17 Ere kar dugiliyed beeʼ ni ngki mang gaaʼ roraed, ni fithingan e Zemnarihah; ere chaʼaney i Zemnarihah e guy rogon ni ngan rinʼ e biney.

18 Machane musap gaed, biney e ba tawaʼath ngakʼ fapi Nephites; ya ribe math liyiben ngakʼ fapi moroʼroʼ ni ngar longbiyed raed nge gaman napʼan ni ke magawon fapi Nephites, ni bachan e yaed ba gaman ko urngin ni kar chaʼariyed ni fan ngoraed,

19 Ma ku bachan e de gaman fapi moroʼroʼ ko urngin banʼen; ya musap gaed, dariy banʼen roraed ni yaedra kay ma kemus ni yigoʼ ufin e damunmun roraed, ni ufin ni yaed be fek u wuruʼ e binaw;

20 Me yibi buch ni gamanman ni yima longuy e kari lich u lan wuruʼ e binaw ma arame yaen ni nge yimʼ fapi moroʼroʼ ko bilig.

21 Ma fapi Nephites e kur ululiyed e yaen ni rran nge nepʼ, ni yaed be og ko salthaw roraed, nga ur thabey raed ni yu biyuʼ nge yu ragag e biyuʼ.

22 Ere aray rogon me lemnag fapi gidiiʼ ku Zemnarihah ni ngar paged e tin ni yaed be nomeg, ni bachan e gafgow ni yamʼ ni ke aw ngoraed ni nepʼ nge rran.

23 Me yibi buch ni Zemnarihah e yoeg ko fapi gidiiʼ rokʼ ni ngar paged i thabey, mar thelep gaed iyaen nga lan e yungin baʼaram e binaw nib kan nga leluʼoch nib palog nga orel.

24 Ma chiney, e Gidgiddoni e ba naʼab ko tin ni yaed be nomeg, nge bachan e kar waer gaed ni bilig, nge ldoew nib almarin ni ke aw nga fithikʼraed, ere piiʼ e salthaw rokʼ ko ngiyalʼ nib nepʼ, ngar thabeyed raed u mʼon ni ngar miil gaed, me tay e salthaw rokʼ ko gin yaed ra miil riy.

25 Ere biney e rrinʼed u napʼan ni ke nepʼ, ma ranoed ngar thilyeged fapi moroʼroʼ, ya nge yaeni rebo rran riy, ni ke tabab fapi moroʼroʼ ko yaen, mar madaʼ gaed fapi salthaw ko Nephites ni bay boech nga mʼon roraed ma bay boech nga wuryal roraed.

26 Ma fapi moroʼroʼ ni bay nga yimuch e nning e thabey ngoraed ko yungin ni yaedra miil riy. Ma gubin e pinnʼey e nrinʼ u rogon ni chiyliy Gidgiddoni.

27 Ere bukun e biyuʼ e piʼin nra paged yaed ngar manged kalbus ko Nephites, ma tin ni magaey roraed e nliiʼraed ngar mʼaed.

28 Ma fachaʼ gaaʼ roraed, i Zemnarihah, e ni fek ngan uchluy u lʼugun bake gakʼiy, arragon, nni uchluy riy nge madaʼ ko ngiyalʼ ni ke yimʼ. Ma napʼan nra uchluyed nge yimʼ mar thʼaebed fare ke gakʼiy nge thig nga butʼ, mar tolul gaed nib gaaʼ lamraed ni yaed be gaʼar:

29 Gomanga yigi tay Somoel e gidiiʼ rokʼ u fithikʼ e tin nib matʼaw nge gumʼirchaʼ nib thothup, ni nge yog nra thikiyed nga butʼ gubin e piʼin ni yaed be gay rogon ni ngar liiʼed raed ni bachan e gelingin nge pi ulung nib miith, ni boed rogon e re moʼon ney ni ke thig ke aw nga butʼ.

30 Mar falfalaenʼ gaed mar tolul gaed bayay ni taʼareb lamraed ni yaed be gaʼar: Gomanga yigi ayuweg fare Got ku Abraham, niʼir fare Got ku Isaac, niʼir fare Got ku Jacob e pi gidiiʼ ney u fithikʼ e tin nib matʼaw, u nʼumngin i napʼan ni yaed be meybil ngakʼ e Got roraed ni nge ayuwegraed.

31 Me yibi buch ni nra tang gaed ni yaed gubin u taʼabang, ma yaed be oge magaer ngakʼ e Got roraed ko pinʼen ni rib felʼ ni ke rinʼ ni fan ngoraed, ni ke ayuwegraed nge siy ra mul gaed nga lan paʼ e pi toʼogor roraed.

32 Arragon, mar tolul niged e: Soerokʼ fare Got ni Thʼabi Tolang. Mar tolul niged e: Soerokʼ fare fithingan Somoel ni Got ni Gubin Marayog Rokʼ, fare Got ni Thʼabi Tolang.

33 Me oeb gumʼirchaʼraed ko falfalaenʼ, me mapʼ e luʼ u oewchraed nib yoʼor, ni bachan e fini felʼ Got ni ke chuwegraed u paʼ e pi toʼogor roraed; ma yaed manang ni bachan e kalngaenʼ roraed nge sobutʼaenʼ roraed ma kan chuwegraed u ba gafgow ni dabimus biʼid.