1 ’E i teienei, i muri a’era, ’ua ho’i atu te mau ta’ata ato’a o te mau ’āti Nephi i tō rātou iho mau fenua i te matahiti e piti ’ahuru ’e ma ono, te ta’ata tāta’itahi, ’e tōna ’utuāfare, tāna mau nana māmoe ’e tāna mau nana pua’atoro, tāna mau pua’ahorofenua ’e tāna mau pua’atoro, ’e tā rātou mau mea ato’a ra.

2 ’E i muri a’era, ’aita i pau roa tā rātou mau mā’a i te ’amuhia ; nō reira ’ua rave rātou i te mau mea ato’a ’o tei ’ore i ’amuhia e rātou ra, i tā rātou mau huru huero sītona ato’a, ’e tā rātou ’auro, ’e tā rātou ’ārio, ’e tā rātou mau tao’a faufa’a rahi, ’e ’ua ho’i atu rātou i tō rātou ihora mau fenua ’e tō rātou mau ’āi’a, i te pae apato’erau ’e i te pae apato’a, i te fenua i te pae apato’erau ’e i te fenua i te pae apato’a.

3 ’E ’ua hōro’a atu rātou nā te feiā ’eiā haru ’o tei fa’aoti i te hō’ē fafaura’a ’ia fa’atupu noa i te hau i ni’a i te fenua, ’e ’o tei hina’aro ’ia riro noa ’ei mau ’āti Lamana, te tahi mau fenua mai te au i tō rātou rahira’a, ’ia roa’a tā rātou mā’a nā roto i te ravera’a i te ’ohipa ; ’e ’ua nā reira rātou i te fa’atupu i te hau i ni’a i te fenua tā’āto’a.

4 ’E ’ua ha’amata fa’ahou rātou i te manuia ’e i te tupu i te rahi ; ’e ’ua hope a’era te piti ’ahuru ’e ma ono ’e te piti ’ahuru ’e ma hitu o te matahiti, ’e ’ua vai noa te hau rahi i ni’a i te fenua ; ’e ’ua fa’anahonaho rātou i tā rātou mau ture mai te au i te fāito ti’a ’e te parauti’a.

5 ’E i teienei, ’aita roa te hō’ē mea i ni’a i te fenua tā’āto’a ’o tei tāfifi i te mau ta’ata ’ia manuia noa, maori rā ’ia topa rātou i roto i te hara.

6 ’E i teienei, nā Gidigidoni, ’e te ha’avā ra ’o Lakoneusa, ’e te mau ta’ata ato’a ’o tei mā’itihia ’ei feiā fa’atere, i fa’ati’a i teie hau rahi i ni’a i te fenua.

7 ’E i muri a’era, ’ua hāmani ihora rātou e rave rahi mau ’oire ’āpī, ’e ’ua fa’a’āpī fa’ahou rātou e rave rahi mau ’oire tahito.

8 ’E ’ua hāmani rātou e rave rahi mau purūmu rarahi, ’e ’ua hāmani ato’a rātou i te mau purūmu nō te haere i terā ’oire ’e i terā ’oire, ’e i terā fenua ’e i terā fenua, ’e i terā vāhi ’e i terā vāhi.

9 ’E ’o te hope’a te reira nō te piti ’ahuru ’e ma va’u o te matahiti, ’e ’ua vai noa te mau ta’ata i roto i te hau.

10 ’Āre’a rā i muri a’era, i te piti ’ahuru ’e ma iva o te matahiti ’ua tupu a’era te tahi mau mārōra’a i rotopū i te mau ta’ata ; ’e ’ua fa’ateitei te tahi pae ia rātou i roto i te te’ote’o ’e te fa’aahaahara’a, nō tā rātou mau tao’a rahi roa, ’oia ïa, ē tae noa atu i tā rātou mau hāmani-’ino-ra’a rahi.

11 Nō te mea tē vai ra e rave rahi mau ta’ata ho’o tao’a i ni’a i te fenua, ’e e rave rahi ato’a mau pāruru ture, ’e e rave rahi ato’a mau ta’ata tōro’a.

12 ’E ’ua ha’amata te mau ta’ata i te fa’ata’a ’ē ia rātou i roto i te tahi mau pupu mai te au i te rahi o tā rātou mau tao’a ’e tō rātou ’ite ; ’oia ïa, e mea pōiri te tahi pae nō tō rātou veve, ’e ’ua fāri’i te tahi pae i te ’ite rahi nō te rahi o tā rātou mau tao’a.

13 ’Ua fa’ateiteihia te tahi pae i roto i te te’ote’o, ’e e mea ha’eha’a roa te tahi pae ; te fa’a’ino fa’ahou ra te tahi pae i tei fa’a’ino mai ia rātou, ’āre’a te tahi pae ra, tē fa’a’oroma’i ra rātou i te mau huru fa’a’inora’a ’e te hāmani-’ino-ra’a, ’e te mau huru ’ati ato’a, ’e ’aita rātou e fa’a’ino fa’ahou atu, ’āre’a rā ’ua riro rātou ’ei feiā ha’eha’a ’e te ’ā’au tātarahapa mau i mua i te Atua.

14 ’E nō reira ’ua tupu rahi roa te ’aifāito ’ore i ni’a i te fenua tā’āto’a, ’e nō reira ’ua ha’amata te ’ēkālesia i te pararī ; ’oia ïa, ’e nō reira ho’i i te toru ’ahuru o te matahiti, ’ua pararī te ’ēkālesia i ni’a i te fenua tā’āto’a, maori rā i rotopū noa i te tahi mau ’āti Lamana ’o tei fa’afāriuhia mai i te fa’aro’o mau ; ’e ’aita roa ïa rātou e fa’aru’e i te reira, e feiā mau pāpū ho’i rātou, ’e te pa’ari, ’e te ’āueue ’ore, ’e ’o tei hina’aro ma te itoito ato’a ’ia ha’apa’o i te mau fa’auera’a a te Fatu.

15 I teienei, te tumu nō teie mau ’ohipa ’ī’ino a te mau ta’ata, ’o teie ïa—e mana rahi tō Sātane i te fa’ati’arepura’a i te mau ta’ata ’ia rave i te mau huru ’ohipa ’ī’ino ato’a, ’e i te fa’arahira’a i tō rātou te’ote’o, ’e i te fa’atupura’a i te mana’o i roto ia rātou ’ia tītau i te mana, ’e te ha’amanara’a, ’e te mau tao’a rahi, ’e te mau mea faufa’a ’ore o te ao nei.

16 ’E ’ua nā reira Sātane i te arata’i ’ē atu i te ’ā’au o te mau ta’ata ’ia rave i te mau huru ’ohipa ’ī’ino ato’a ; nō reira e mea iti roa te mau matahiti nō tō rātou ’oa’oara’a i roto i te hau.

17 ’E nō reira, i te ha’amatara’a nō te toru ’ahuru o te matahiti—i vai maoro na te mau ta’ata ’e i arata’i-’ē-hia na rātou e te mau fa’ahemara’a a te diabolo i te mau vāhi tāna i hina’aro nō te arata’i atu ia rātou, ’e ’ia rave i te mau ’ohipa ’ī’ino ’o tāna i hina’aro ia rātou—’e nō reira, i te ha’amatara’a nō teie nei matahiti, ’oia ho’i te toru ’ahuru o te matahiti, ’ua vai noa rātou ’ei feiā parauti’a ’ore rahi.

18 I teienei, ’aita rātou i rave i te hara ma te ’ite ’ore, ’ua ’ite ho’i rātou i tō te Atua hina’aro ia rātou, nō te mea ’ua ha’api’ihia te reira ia rātou ; nō reira ’ua pāto’i atu rātou i te Atua ma te hina’aro mau.

19 ’E i teienei, ’o te mau mahana ïa teie o Lakoneusa, te tamaiti a Lakoneusa, ’e nā Lakoneusa ho’i i mono i te pārahira’a o tōna metua tāne ’e ’ua fa’atere ’oia i te mau ta’ata i taua matahiti ra.

20 ’E ’ua fa’auruhia ihora te tahi mau ta’ata mai te ra’i mai ’e ’ua tono-haere-hia atu ra rātou, ’e ’ua ti’a atu ra rātou i rotopū i te mau ta’ata i roto i te mau fenua ato’a, i te a’ora’a atu ’e te fa’a’ite-pāpū-ra’a atu i te mau hara ’e te mau ’ohipa ’ī’ino a te mau ta’ata ma te mata’u ’ore, ’e te fa’a’ite-pāpū-ra’a atu ia rātou i te parau nō te fa’aorara’a ’o tā te Fatu e rave nō tōna ra mau ta’ata ; ’oia ho’i te ti’afa’ahoura’a o te Mesia ; ’e ’ua fa’a’ite pāpū atu rātou ma te mata’u ’ore nō ni’a i tōna pohera’a ’e te mamae ma te mata’u ’ore.

21 I teienei, tē vai ra e rave rahi ta’ata tei riri roa mai ia rātou ’o tei fa’a’ite atu i taua mau mea nei, ’e teie mau ta’ata ’o tei riri ra, ’o te mau ha’avā rahi ïa, ’e ’o rātou ato’a ’o tei riro na ’ei mau tahu’a rahi ’e ’ei mau pāruru ture ; ’oia ïa, ’ua riri mai te mau pāruru ture ato’a i te feiā ’o tei fa’a’ite atu i taua mau mea nei.

22 I teienei, ’aita roa tō te pāruru ture ’e tō te ha’avā ’e tō te tahu’a rahi e mana ’ia fa’ahapa i te hō’ē ta’ata ’ia pohe, maori rā ’ia tārimahia tā rātou parau fa’ahapara’a e te tāvana o te fenua.

23 I teienei, tē vai ra e rave rahi tei fa’a’ite māite i te mau parau nō ni’a i te Mesia ’e ’ua fa’a’ite māite rātou ma te mata’u ’ore, ’e ’ua taparahi-huna-hia rātou ’e te mau ha’avā, ’e ’aita roa te parau nō tō rātou pohera’a i tae atu i mua i te tāvana o te fenua ē tae noa atu ’ua pohe roa rātou.

24 I teienei, inaha, ’aita teie i tano i te mau ture o te fenua, ’ia taparahihia te ta’ata maori rā nā roto i te mana o te tāvana o te fenua—

25 Nō reira ’ua tae mai ra te parau fa’ahapara’a i te fenua ra nō Zarahemela, i te tāvana nō te fenua, i te fa’ahapara’a i taua mau ha’avā ra ’o tei fa’ahapa ’ia taparahi-pohe-hia te mau peropheta o te Fatu, ma te tano ’ore i te ture.

26 I teienei, i muri a’era, ’ua ravehia rātou ’e ’ua arata’ihia mai ra i mua i te ha’avā, ’ia ha’avāhia nō te hapa tā rātou i rave, mai te au i te ture i fa’ata’ahia e te mau ta’ata.

27 I teienei, i muri a’era, e rave rahi tō taua mau ha’avā ra mau hoa ’e mau fēti’i ; ’e te toe’a, ’oia ïa, te pae rahi o te mau pāruru ture ’e te mau tahu’a rahi, ’ua ha’aputuputu ’āmui rātou, ’e ’ua tāhō’ē atu rātou i te mau fēti’i o te mau ha’avā ’o tei fātata i te ha’avāhia mai te au i te ture.

28 ’E ’ua fafau rātou te tahi i te tahi, ’oia ïa, i te fafaura’a i ravehia e rātou i te ’anotau tahito ra, ’e ’ua hōro’ahia ’e ’ua fa’aterehia teie fafaura’a e te diabolo, ’ia tāhō’ē nō te ’aro atu i te tā’āto’ara’a o te parauti’a.

29 Nō reira ’ua tāhō’ē rātou nō te ’aro mai i te mau ta’ata o te Fatu, ’e ’ua fa’aoti rātou i te hō’ē fafaura’a nō te ha’amou ia rātou, ’e nō te fa’aora i te feiā ’o tei rave i te ’ohipa taparahi ta’ata i te rima nō te parauti’a, ’o tei fātata i te fa’aterehia ’ia au i te ture.

30 ’E ’ua vahavaha atu rātou i te ture ’e te ti’amāra’a o tō rātou fenua ; ’e ’ua fafau rātou te tahi i te tahi ’ia taparahi i te tāvana, ’e ’ia fa’ati’a i te hō’ē ari’i i ni’a i te fenua, ’ia ’ore tō te fenua e ti’amāra’a, ’ia auraro rā i te mau ari’i.