1 Chiney e musap gaed, bay gudag ngomed ni dar sunmiyed ba pilung u dakean fare nam; machane ku lan e re duw ney, arragon, bin guyey e duw, mar baed ngar gatheayed fare gilʼ e tapuf-oloboch, arragon, ra thanged e fan rokʼ fare pilung ko tapuf-oloboch ko fare nam.

2 Ma fapi gidiiʼ e ra kiiʼ gaed ngar togopluw gaed ngoraed; mar kiiʼ gaed nge ra beeʼ ma birokʼ e ganong, gubin e gidiiʼ nra beeʼ ma ir nge rogon e tabinaew rokʼ nge gidiiʼ rokʼ nge pi fager rokʼ; ere aray rogon nra gatheayed fare am ko fare nam.

3 Ma gubin e ganong me dugliy rebo pilung ara rebo gaaʼ roraed; ere aray rogon nra manged bogi ganong nge pi tayugangʼ ko pi ganong.

4 Chiney e musap gaed, dariy beeʼ u fithikʼraed ni de yoʼor e tabinaew rokʼ, nge gidiiʼ rokʼ nge fager rokʼ; ere ri gaaʼ e ganong roraed.

5 Chiney e gubin e pinnʼey nrinʼ, ma dariy e mael u fithikʼraed; nge gubin e pi denen ney ma ke yibi aw nga dakean fapi gidiiʼ ni bachan e kar paged yaed nga gelingin Moʼoniyanʼ.

6 Ma fapi yalen fare am e ni gatheay, ni bachan fare ulung nib miith rokʼ fapi fager nge gidiiʼ rokʼ e piʼin nra thanged e fan rokʼ fapi profet.

7 Mar tabolngin niged ba togopluw nib gaaʼ nga lan fare nam, ni arame tin yoʼor nib matʼaw ko fapi gidiiʼ e ri chugur ni nge yaed gubin ma kar kireb gaed; arragon, kari buchʼuw e gidiiʼ nib matʼaw ni bay u fithikʼraed.

8 Ere dawori mʼay nelʼ e duw ma tin yoʼor ko fapi gidiiʼ e kar keruʼuyed e tin ni ur rinʼed nib matʼaw, ni woed e pilis ni ma sul nge kay e sullʼugun rokʼ, ara woed e babiy ni ppin ni ma sul nge lep u fithikʼ e rungduʼ.

9 Chiney e re ulung nib miith ney, niʼir e ke yib nag e re denen ni thʼabi gaaʼ nga dakean fapi gidiiʼ, e kar kunuyed yaed nga taʼabang, mar tayed beeʼ nib moʼon nge mang gaaʼ roraed ni karoeged i Jacob ngakʼ;

10 Mar pininged niʼir e pilung roraed; ere ire mang pilung ko re ulung ney nib kireb; ma ir rebe piʼin thʼabi gilbugwan ni ke non nib togopluw ngakʼ fapi profet ni kar micheged morngaʼagen Yesus.

11 Me yibi buch ni gathi ri yaed bayoʼor ni woed fapi ganong rokʼ fapi gidiiʼ, ni kar taʼabang gaed ma kemus nigoʼ pi tiyugangʼ roraed ni kar sunmiyed e pi motochiyel roraed, ni gubin e gidiiʼ nra beeʼ ma be yaen u rogon e birokʼ e ganong; machane kar pired ni yaed ba toʼogor roraed; ni yug aram rogon ni gathi yaed bogi gidiiʼ nib matʼaw, machane kar taʼabang gaed ko fananikan rokʼ e piʼin ni kar og niged yaed nga lan ba mʼag ni ngar gatheayed fare am.

12 Ere, bachan e guy Jacob ni pi toʼogor roraed e yaed bayoʼor ngoraed, ma bachan e ire pilung ko fare ulung, ere yoeg ngakʼ e gidiiʼ rokʼ ni ngar miil gaed ngar lan e leluʼoch ko fare nam, mar sunmiyed ba gilʼilung ngoraed, ni yaeni madaʼ ko ngiyalʼ ni ke peth ngoraed fa piʼin ni kar chuw gaed, (ya ke sabaenbaen nagraed ni bay yib e piʼin ni kar chuw gaed ni yaed bayoʼor) nge yaeni madaʼ ko ngiyalʼ ni kar yoʼor gaed ni ngar togopluw gaed ngakʼ fapi ganong rokʼ fapi gidiiʼ; ere rrinʼed ni aram rogon.

13 Ere rib papay e thelep ni ur tayed ni deyog i tileg raed nge yaeni madaʼ ko ngiyalʼ ni kar thimur gaed ni dakiyog ni nge koelraed fapi gidiiʼ. Ere aray rogon ni mʼay e bin guyey e duw; ma aray rogon e gagyeg rokʼ fapi gidiiʼ ku Nephi.

14 Me yibi buch nu lan e bin guyey nge taʼareb e duw ni arame ra kiiʼ gaed ngar yoʼor gaed ni ganong, ni gubin e gidiiʼ nra beeʼ ma rogon e tabinaew rokʼ, nge gidiiʼ rokʼ, nge pi fager rokʼ; machane me yibi taʼarebaenʼraed ni nga dabra mael gaed nga taʼabang; machane dar taʼabang gaed ko pi motochiyel roraed, nge rogon e am roraed, ya kan falʼeg u rogon tafnaey rokʼ e piʼin pilung nge tiyugangʼ roraed. Machane ra sunmiyed bogi motochiyel nib gel ni rareb e ganong ma dabi yaen nga tafen reb, ni arame bay yungiyalʼ ni bay e gapas roraed u lan e nam; machane, pi gumʼirchaʼ roraed e kar chefeged nga orel rokʼ Somoel ni Got roraed, mar malang niged fapi profet mar chuweged raed u fithikʼraed.

15 Me yibi buch ni Nephi—e bachan e ke yibi mʼug e angel ngakʼ, ma ki rungʼag laman Somoel, ere bachan e ke guy e angel, ma ire mich riy, ma bachan e bay e gelingin ni kan piiʼ ngakʼ ni nge yog ni nge nang e muruwel rokʼ Kristus, nge ku bachan e ire mich riy ni yaed bagur ni ngar chuw gaed ko tin nib matʼaw ngar suloed ko pi ngongol ni kireb nge fananikan roraed;

16 Ere, bachan e ke kirbaenʼ ni fan e ʼelʼel ko gumʼirchaʼ roraed nge maʼew u laniyaenʼraed—me yaen u fithikʼraed ni ku lan e re duw innʼem, me tabab i yoeg ni be micheg, nib tamilang, morngaʼagen e kalngaenʼ nge manʼaegfan ko pi denen u dakean e michaenʼ ngakʼ Somoel i Yesus Kristus.

17 Ere weliy bogi banʼen nib yoʼor ngoraed; ma gubin ma dabiyog i yoloey, ma ra buchʼuw riy ma dabi poloʼ, ere dan yoloey nga lan e reke babyor ney. Ere Nephi e pigpig u gelingin nge matʼawon.

18 Me yibi buch nra damomuw gaed ngakʼ, ni bachan e gelingin ni bay rokʼ e bagael ko bin bay roraed, ya be math liyiben ni nge dabi mich u wunʼraed e thin rokʼ, ya rib gel e mich rokʼ ngakʼ fare Somoel i Yesus Kristus ni arame yibi pigpig e angel ngakʼ ni gubin e rran.

19 Ma fithingan Yesus e chuweg e pi moʼoniyanʼ nge pi yaʼel nib kireb; ma mus ngakʼ walagen me faseg ko yamʼ, u tomuren fapi gidiiʼ ni kar malang niged nge yimʼ.

20 Ere fapi gidiiʼ e ra guyed, mar manged e mich riy, mar damomuw gaed ngakʼ ni bachan gelingin; ma ki rinʼ boech e maʼangʼang nib yoʼor, u pʼoewchen fapi gidiiʼ, u fithingan Yesus.

21 Me yibi buch ni mʼay e bin guyey nge taʼareb e duw, ma rib lich e piʼin ni ke michaenʼraed ngakʼ Somoel; machane oren e piʼin ni michaenʼraed e rriyulʼ nra daged e pow riy ngakʼ fapi gidiiʼ ni kan mʼug ngoraed u gelingin nge fare Kan ni Thothup rokʼ Got, niʼir e Yesus Kristus, niʼir e ba michaenʼraed ngakʼ.

22 Ma oren e piʼin nni chuweg e pi moʼoniyanʼ roraed, man gol nagraed ko pi mʼar roraed nge pi moʼowaer roraed, e raedaged ngakʼ fapi gidiiʼ ni ke yib angin fare Kan ni Thothup rokʼ Got ngoraed, ma kar gol gaed ko mʼar; ma kur daged bogi pow mar rinʼed boech e maʼangʼang u fithikʼ fapi gidiiʼ.

23 Ere ki mʼay e bin guyey nge lʼagruw e duw. Ma Nephi e yoer ngakʼ fapi gidiiʼ u napʼan ni tabab e bin guyey nge dalip e duw; me machib nag ngoraed e kalngaenʼ nge rogon min nʼaegfan e pi denen.

24 Chiney e gubaʼadag ni thingar kum tayed u wunʼmed, ni dariy beeʼ ni kalngaenʼ ma dan tawfe nag ko raen.

25 Ere, immoy e pumoʼon nni yibliy raed Nephi ko re guruy i muruwel ney, ni nge gubin e piʼin ni yaedra yib ngoraed ma thingar ni tawfe nagraed ko raen, ni biney e nge mang mich riy nge mich royiy u pʼoewchen Got, ma kub mich ngakʼ e gidiiʼ, ni kar kalgaed ngaenʼraed ma kan nʼaegfan e pi denen roraed.

26 Ere boʼor e piʼin ni tawfe nagraed u napʼan ni tabab e biney e duw; ere aray rogon ni mʼay e gin gaaʼ yang ko fare duw.