1 Me yibi buch ni bay ba lam ni rungʼag gubin e gidiiʼ nu fayleng, u dakean gaʼangin yang e re nam ney, ni be gaʼar:

2 Gafgow, gafgow, gafgow ngakʼ e pi gidiiʼ ney; gafgow ngakʼ e gidiiʼ ko fayleng ni poloʼ ma kemus ni faʼan yaedra kalngaenʼ; ya fare moʼoniyanʼ e ribe minmin, nge pi angel rokʼ e riyaed be falfalaenʼ, ni bachan e yamʼ ni ke tay e piʼin pagael nge ppin ni fak e gidiiʼ rog; nge ku bachan e denen roraed nge pi ngongolen e fananikan roraed ni kar mʼaed riy!

3 Musap gaed, fare binaw ni gaaʼ nu Zarahemla e kug urufiy nge gidiiʼ ni bay riy ko nifiy.

4 Ma musap gaed, fare binaw ni gaaʼ ku Moroni e kug guy rogon ni nge ligil nga tʼay e rigur, ni nge lumoch e gidiiʼ riy.

5 Ma musap gaed, fare binaw ni gaaʼ nu Moronihah nge gidiiʼ ni bay riy e kug tharey ko buutʼ, ni nge miith e pi denen roraed nge pi ngongolen e fananikan roraed nge chuw u pʼoewcheg, ni nge tal ni dab ki yib rachaʼen fapi profet nge fapi saints ngog nib togopluw ngoraed.

6 Ma musap gaed, fare binaw nu Gilgal e kug ligil nag nga ʼaer, ma gidiiʼ ni bay riy e ngan kʼeyag raed nib toʼaer nga fithikʼ e butʼ.

7 Arragon, ma fare binaw nu Onihah nge gidiiʼ riy, nge fare binaw nu Mocum nge gidiiʼ riy, nge fare binaw nu Jerusalem nge gidiiʼ riy; e kug guy rogon ngar mathrow gaed ko raen, ni nge miith e pi ngongol roraed nib kireb nge pi fananikan roraed ni nge chuw u pʼoewcheg, ni nge tal ni dab ki yib rachaʼen fapi profet nge fapi saints ngog nib togopluw ngoraed.

8 Ere musap gaed, fare binaw ku Gadiandi, nge fare binaw ku Gadiomnah, nge fare binaw ku Jacob, nge fare binaw ku Gimgimno, e gubin ma kug ligil nag nga ʼaer, mug sunmiy e falang nge loway riy; ma gidiiʼ riy e kug kʼeyag nga fithikʼ e butʼ, ni nge miith e pi ngongol ni kireb nge fananikan roraed nge chuw u pʼoewcheg, ni nge tal ni dab ki yib rachaʼen fapi profet nge fapi saints ngog nib togopluw ngoraed.

9 Ma musap gaed, fare binaw ni Jacobugath, ni bay e gidiiʼ rokʼ fare pilung i Jacob riy, e kug guy rogon ke mathrow ko nifiy ni bachan e pi denen roraed nge pi ngongol roraed nib kireb, niʼir e thʼabi kireb u fithikʼ gubin e kireb ko fayleng ni poloʼ, ni bachan e pi mathang pogofan ni ur tayed nib miith morngaʼagen nge pi ulung ni kireb; ya yaed e piʼin ni ra gatheayed e gapas ko gidiiʼ rog nge fare am ko nam; ere gguy rogon ni ngar yikʼ gaed, ni ngar mʼaed ngar chuw gaed u pʼoewcheg, ni nge tal ni dab ki yib rachaʼen fapi profet nge saints ngog nib togopluw ngoraed.

10 Ma musap gaed, fare binaw ku Laman, nge fare binaw ku Josh, nge fare binaw ku Gad, nge fare binaw ku Kishkumen, e kug guy rogon ni nge moʼoruf nge gidiiʼ ni bay riy ko nifiy, ni bachan e pi ngongol roraed nib kireb ni ur chuweged fapi profet, ma yaed be malang nag e piʼin nug lʼoegraed ni ngar weliyed ngoraed morngaʼagen e pi ngongol roraed nib kireb nge pi fananikan roraed.

11 Nge bachan e yaed gubin ni kar chuweged raed, ma dakuriy beeʼ nib matʼaw u fithikʼraed, ere gupiiʼ e nifiy nge yib nga butʼ nge gatheayraed, ni nge yog ni chuw e pi ngongol roraed nge pi fananikan roraed u pʼoewcheg, ma rachaʼen fapi profet nge fapi saints nug lʼoeg raed nga ranoed nga fithikʼraed e gomange siy i yoer ngog u fithikʼ e butʼ nib togopluw ngoraed.

12 Ma rib yoʼor e mogothgoth nug guy rogon ni nge yib nga dakean e re nam ney, nge pi gidiiʼ ney, ni bachan e pi ngongol roraed nib kireb nge pi fananikan roraed.

13 O gimed gubin e piʼin ni kagmed bafos ni bachan e gimed ba yalaʼow boech ngoraed, dab mu chelgaed ngam suloed ngog, magmed kalngaenʼ ko pi denen romed, me michaenʼmed, ni ra yog nug gol nagmed?

14 Arragon, rriyulʼ ni gube yoeg ngomed, ni faʼan gimed ra yib ngog ma rayog ngomed e yafos ni manechubog. Musap gaed, kug kʼiyeg paʼag nib sug ko murnguy ngomed, ni enra yib ngog, e irechaʼ ni gura fek; ma rafelʼ waʼathan e piʼin ni yaedra yib ngog.

15 Musap gaed, I gag Yesus Kristus ni fachaʼ ni Fak Got. Gag e gu sunmiy e tharmiy nge fayleng, nge gubin banʼen ni bay riy. Gag e ʼug moy rokʼ e en Chitamangiy aram ko tabolngin. Gubay u fithikʼ e en Chitamangiy ma en Chitamangiy e bay u fithikʼag; ma en Chitamangiy e be rir nag fithingan rog.

16 Gub ngakʼ e piʼin gidiiʼ rog, ma piʼin gidiiʼ rog e dar feked gag. Ma fapi chep nib thothup ni morngaʼagen e wub rog e ke muguʼul.

17 Ma gubin e piʼin kar feked gag, e ireram e piʼin ni piiʼ matʼawraed ni ngar manged fak Got; ere ku aram rogon ni gurarinʼ ngakʼ oren e piʼin ni ra michaenʼraed nga fithingag, ya musap gaed, bayul e ra yib rog, ma fare motochiyel rokʼ Moses e gag e kug muguʼuliy.

18 I gag e tamilang nge yafos ko fayleng. I gag Alpha nge Omega, ni fare sommʼon nge fare tomur.

19 Ma dab kum maligach gaed ngog ngalang ni puʼoeg rachaʼ; arragon, pi maligach romed nge pi moʼoruf ni maligach romed e ke tal, ya daki tʼuf rog e pi maligach romed nge pi moʼoruf ni maligach romed.

20 Ma ngam piiʼed ngog ni maligach ni mʼingaenʼ nge kalngaenʼ. Ma enra yib ngog ni ke mʼingaenʼ make kalngaenʼ, e ireram e chaʼ ni gura tawfe nag ko nifiy nge fare Kan ni Thothup, ni woed fapi Lamanites, ni bachan e mich roraed ngog ko ngiyalʼ ni pigaenʼraed, min tawfe nagraed ko nifiy nge fare Kan ni Thothup, ma dar nanged.

21 Musap gaed, kugub nga fayleng ni nggu bayuliy e fayleng, ni nggu thapeg e fayleng nge chuw u fithikʼ e denen.

22 Ere, enra kalngaenʼ me yib ngog ni boed beeʼ nib bitir, e ireram e chaʼ ni gura fek, ya piʼin aram rogon e taferaed gilʼilungun Got. Musap gaed, ya ireram e pichaʼ ni kug piiʼ e yafos rog, ma kug fek bayay ni fan ngoraed; ere mu kalgaed ngaenʼmed, mi gimed yib ngog e piʼin ni gimed bay u tomuren e fayleng, ngam thap gaed.