မော်မုန်ကျမ်း

နီဖိုင်း၏ပုရပိုက်ပြားများမှ
ကောက်နှုတ်၍ ပုရပိုက်ပြားများပေါ်တွင်
မော်မုန်၏လက်ဖြင့်
ရေးထားသည့် မှတ်တမ်း။

သို့ဖြစ်၍၊ ထိုမှတ်တမ်းသည် နီဖိုင်းလူမျိုးများနှင့် လာမန်အမျိုးသားတို့အကြောင်းမှတ်တမ်းမှ အကျဉ်းချုပ်ဖြစ်၏—ဣသရေလအမျိုးသားတို့၏ ကျန်ကြွင်းသောသူများဖြစ်သည့် လာမန်အမျိုးသားများထံသို့၊ ထို့အတူ ယုဒလူမျိုးနှင့် တပါးအမျိုးသားတို့ထံသို့လည်း ရေးထားခြင်းဖြစ်၏—ပညတ်တော်အတိုင်း၊ ပရောဖက်ပြုဟောသောဝိညာဉ်နှင့် ဗျာဒိတ်တော်ဝိညာဉ်တို့အားဖြင့် ရေးထား၏—ထိုပုရပိုက်ပြားများကို ရေးပြီး၊ ဖျက်ဆီးမခံရနိုင်စေခြင်းငှာ၊ တံဆိပ်ခတ်၍ ကိုယ်တော်ရှင်ထံသို့ ဝှက်ထား၏—ထိုမှတ်တမ်းအကျဉ်းချုပ်မှာ ဘုရားသခင်၏ဆုကျေးဇူးနှင့် တန်ခိုးတော်တို့အားဖြင့် ပေါ်ထွက်လာစေပြီး၊ အနက်ဖွင့်ပြခြင်းသို့ ရောက်ပေ၏—မော်ရော်နိုင်း၏လက်ဖြင့် တံဆိပ်ခတ်၍၊ ကိုယ်တော်ရှင်ထံသို့ ဝှက်ထားပြီး၊ ကာလအချိန်တန်သောအခါ၌၊ တပါးအမျိုးသားအားဖြင့်၊ ပေါ်ထွက်လာစေခြင်းငှာဖြစ်၏—ထိုပုရပိုက်ပြားများ၏ အနက် ဖွင့်ပြခြင်းမှာ ဘုရားသခင်၏ဆုကျေးဇူးအားဖြင့် ဖြစ်ပေ၏။

ယာရက်လူမျိုးတို့၏မှတ်တမ်းဖြစ်သည့် ဧသာကျမ်းမှ ကောက်နှုတ်ထားသော အကျဉ်းချုပ်လည်း ပါဝင်၏။ ထိုလူမျိုးတို့သည်ကား ကောင်းကင်သို့ ရောက်ခြင်းငှာ၊ ရဲတိုက်ကို တည်ဆောက်လျက်ရှိကြစဉ်တွင်၊ လူတို့၏ဘာသာစကားကို ကိုယ်တော်ရှင်က ရှုပ်ထွေးစေတော်မူသည့်အချိန်၌ ကွဲပြားပြန့်ကျဲစေခြင်းခံရကြသည့် လူမျိုးများဖြစ်၏—ထိုအကျဉ်းချုပ်သည်ကား၊ ဣသရေလအမျိုးသားတို့၏ ကျန်ကြွင်းသောသူတို့အား သူတို့ဘိုးဘေးတို့အတွက် ကြီးစွာသောအမှုများကို ကိုယ်တော်ရှင်ပြုတော်မူလေကြောင်းပြခြင်းငှာ၊ ထို့အတူ၊ ကိုယ်တော်ရှင်၏ပဋိညာဉ်များကို သူတို့သိနိုင်ကြစေခြင်းငှာနှင့် ကာလအစဉ်အဆက်စွန့်ပစ်ခြင်းကို သူတို့မခံရကြောင်းသိစေခြင်းငှာပေတည်း—ယေရှုသည်ကား၊ ခရစ်တော်၊ ထာဝရဘုရားသခင်၊ ခပ်သိမ်းသောလူမျိုးတို့ထံ သူကိုယ်တိုင် ထင်ရှားစွာပြတော်မူသောသူဖြစ်တော်မူကြောင်း၊ ယုဒလူမျိုးနှင့် တပါးအမျိုးသားတို့ကို နားသွင်းခြင်းငှာလည်း ဖြစ်၏—ယခုမူကား၊ ထိုမှတ်တမ်း၌ အမှားများရှိလျှင်၊ ၎င်းတို့သည် လူသားတို့၏ အမှားအယွင်းများပေတည်း။ သို့ဖြစ်၍၊ ဘုရားသခင်၏အမှုတော်များကို ပြစ်တင်ရှုတ်ချခြင်းမပြုကြနှင့်၊ သို့မှာသာ ခရစ်တော်၏တရားပလ္လင်၌ သင်တို့ကို အပြစ်ကင်းစင်လျက်တွေ့ရနိုင်ပေမည်။

ဂျိုးဇက်စမစ်အငယ်အားဖြင့်
ပုရပိုက်ပြားများမှ အင်္ဂလိပ်ဘာသာသို့ ဘာသာပြန်ဆိုခြင်းမူရင်း