1 Og svo bar við, að Eter lifði á tímum Kóríantumrs, en Kóríantumr var konungur yfir öllu landinu.

2 Og Eter var spámaður Drottins. Þess vegna gekk Eter fram á tímum Kóríantumrs og hóf að spá fyrir þjóðinni, því að ekkert gat aftrað honum vegna anda Drottins, sem í honum bjó.

3 Því að hann hrópaði frá sólaruppkomu til sólarlags og hvatti fólkið til að trúa á Guð og iðrast, ella yrði því tortímt, og hann sagði því, að fyrir trú uppfyllist allir hlutir —

4 Sá, sem tryði á Guð, gæti því með vissu vonast eftir betri heimi, já, jafnvel samastaðar til hægri handar Guði, en sú von sprettur af trú og er sálum mannanna sem akkeri, er gjörir þá örugga og trúfasta og ætíð ríka af góðum verkum, Guði til dýrðar.

5 Og svo bar við, að Eter spáði fyrir fólkinu um mikla og undursamlega hluti, sem það trúði ekki, vegna þess að það sá þá ekki.

6 Og nú vil ég, Moróní, segja nokkuð um þetta. Ég vil sýna heiminum, að trú er von um það, sem ekki er unnt að sjá. Deilið því ekki, sakir þess að þér sjáið ekki, því að þér fáið engan vitnisburð fyrr en eftir að reynt hefur á trú yðar.

7 Því að fyrir trú sýndi Kristur sig feðrum vorum eftir að hann hafði risið upp frá dauðum. Og hann birtist þeim ekki fyrr en þeir trúðu á hann. Þess vegna hljóta nokkrir að hafa trúað á hann, því að hann sýndi sig ekki heiminum.

8 En vegna trúar mannanna hefur hann sýnt sig heiminum og gjört nafn föðurins dýrðlegt og rutt veginn, svo að aðrir geti átt hlut í hinni himnesku gjöf og geti vonast eftir því, sem þeir hafa ekki séð.

9 Þess vegna getið þér einnig eignast von og hlutdeild í gjöfinni, ef þér aðeins trúið.

10 Sjá. Það var fyrir trú, að þeir til forna voru kallaðir samkvæmt hinni helgu reglu Guðs.

11 Fyrir trú var lögmál Móse þess vegna gefið. En með því að gefa son sinn hefur Guð fyrirbúið enn betri leið. Og það er fyrir trú, að það er uppfyllt.

12 Því að ef engin trú er meðal mannanna barna, getur Guð engin kraftaverk gjört meðal þeirra. Þess vegna sýndi hann sig ekki fyrr en menn trúðu.

13 Sjá. Það var fyrir trú Alma og Amúleks, að fangelsið hrundi til grunna.

14 Sjá. Það var trú Nefís og Lehís, sem olli breytingunni á Lamanítum, svo að þeir voru skírðir með eldi og heilögum anda.

15 Sjá. Það var fyrir trú Ammons og bræðra hans, að hin miklu kraftaverk urðu meðal Lamaníta.

16 Já, allir þeir, sem kraftaverk unnu, unnu þau fyrir trú, já, bæði þeir, sem voru uppi fyrir Krist, og einnig eftir.

17 Og það var fyrir trú, að lærisveinarnir þrír hlutu það fyrirheit, að þeir skyldu ekki smakka dauðann. Og þeir fengu ekki þetta loforð fyrr en þeir trúðu.

18 Og aldrei nokkru sinni hafa nokkrir unnið kraftaverk fyrr en þeir hafa trúað. Þess vegna trúðu þeir fyrst á Guðssoninn.

19 Og trú margra var svo sterk, jafnvel áður en Kristur kom, að ekki var unnt að halda þeim handan hulunnar, heldur sáu þeir í raun með augum sínum, það sem þeir sáu með auga trúarinnar, og þeir glöddust.

20 Og sjá. Vér höfum séð í þessari frásögn, að einn þeirra var bróðir Jareds. Því að svo mikil var trú hans á Guð, að þegar Guð rétti fram fingur sinn, gat hann ekki hulið hann sjónum bróður Jareds vegna þess orðs, sem hann hafði talað til hans, orðs, sem hann hafði hlotið fyrir trú.

21 Og eftir að bróðir Jareds hafði séð fingur Drottins vegna þess loforðs, sem bróðir Jareds hafði fengið fyrir trú, gat Drottinn ekki haldið neinu frá sjónum hans. Þess vegna sýndi hann honum allt, því að ekki var lengur unnt að halda honum handan hulunnar.

22 Og það er fyrir trú, að feður mínir hafa hlotið það fyrirheit, að Þjóðirnar skuli færa bræðrum þeirra þessa hluti. Þess vegna hefur Drottinn gefið mér fyrirmæli, já, Jesús Kristur.

23 Og ég sagði við hann: Drottinn, Þjóðirnar munu hæðast að þessu, vegna vangetu vorrar við að skrifa. Því að fyrir trú hefur þú, Drottinn, gjört oss máttuga í orði, en þú hefur ekki gjört oss máttuga í riti. Því að þú hefur gjört allt þetta fólk fært um að mæla margt vegna heilags anda, sem þú hefur gefið því —

24 En þú hefur aðeins gjört oss mögulegt að rita lítið eitt vegna þess, hve klaufalegar hendur vorar eru. Sjá. Þú hefur ekki gjört oss máttuga í riti eins og bróður Jareds, því að þú gjörðir það, sem hann reit, máttugt, já, máttugt sem þig, til að gagntaka þá, sem lesa það.

25 Þú hefur einnig gjört orð vor öflug og sterk, já, jafnvel svo að vér getum ei ritað þau. Þegar vér þess vegna ritum, sjáum vér veikleika vorn og hnjótum um samsetningu orða vorra. Og ég óttast, að Þjóðirnar muni hæðast að orðum vorum.

26 Og eftir að ég hafði mælt þetta, talaði Drottinn til mín og sagði: Heimskingjar draga dár að öðrum, en þeir munu sjá eftir því. Og náð mín nægir hinum bljúgu, svo að þeir munu ekki færa sér veikleika yðar í nyt —

27 Og komi menn til mín, mun ég sýna þeim veikleika sinn. Ég gef mönnum veikleika, svo að þeir geti orðið auðmjúkir. Og náð mín nægir öllum mönnum, sem auðmýkja sig fyrir mér. Því að ef þeir auðmýkja sig fyrir mér og eiga trú á mig, þá mun ég láta hið veika verða styrk þeirra.

28 Sjá. Ég mun sýna Þjóðunum veikleika sinn, og ég mun sýna þeim, að trú, von og kærleikur leiðir þær til mín — uppsprettu alls réttlætis.

29 En þegar ég, Moróní, hafði heyrt þessi orð, lét ég hughreystast og sagði: Ó Drottinn, verði þinn réttláti vilji, því að ég veit, að þú breytir við mannanna börn í samræmi við trú þeirra —

30 Því að bróðir Jareds sagði við fjallið Serín: Flyt þig — og það flutti sig. Og hefði hann ekki trúað, hefði það ekki flutt sig. Þess vegna fara verk þín eftir trú mannanna.

31 Því að þannig opinberaðir þú þig lærisveinum þínum. Eftir að þeir trúðu og töluðu í þínu nafni, sýndir þú þig þeim í miklu veldi.

32 Og ég minnist þess einnig, að þú sagðist hafa búið manninum bústað, já, jafnvel í híbýlum föður þíns, sem gæfi manninum glæstari von. Þess vegna verður maðurinn að vona, ella getur hann ekki erft þann stað, sem þú hefur fyrirbúið.

33 Og enn fremur minnist ég þess, að þú hefur sagt, að þú elskir heiminn, jafnvel svo mjög, að þú fórnir lífi þínu fyrir hann, svo að þú fáir tekið það aftur til að búa mannanna börnum bústað.

34 Og nú veit ég, að sú elska, sem þú hefur borið til mannanna barna, er kærleikur. Skorti menn þess vegna kærleik, geta þeir ekki erft þann stað, sem þú hefur fyrirbúið þeim í híbýlum föður þíns.

35 Af því, sem þú hefur mælt, veit ég þess vegna, að ef Þjóðirnar sýna ekki veikleika okkar kærleika, þá munt þú reyna þær og taka frá þeim hæfileika þeirra, já, jafnvel það, sem þeim hefur þegar verið gefið, og gefa þeim, sem enn ríkulegar mun veitt.

36 Og svo bar við, að ég bað Drottin að vera Þjóðunum náðugur, svo að þær fengju öðlast kærleika.

37 Og svo bar við, að Drottinn mælti við mig: Skorti þær kærleik, skiptir það þig engu, þú hefur verið trúr; þess vegna verða klæði þín hreinsuð. Og vegna þess að þú hefur komið auga á veikleika þinn, skalt þú styrkur gjörður, já, til að setjast niður á þeim stað, sem ég hef fyrirbúið í híbýlum föður míns.

38 En ég, Moróní, kveð nú Þjóðirnar, já, og einnig bræður mína, sem ég elska, þar til við munum hittast fyrir dómstóli Krists, þar sem allir menn skulu vita, að klæði mín eru óflekkuð af blóði yðar.

39 Og þá skuluð þér vita, að ég hef séð Jesú, og að hann hefur talað við mig augliti til auglitis, og að hann sagði mér frá þessum hlutum í einfaldleika og af auðmýkt, já, eins og maður talar við mann á eigin tungu —

40 En aðeins fátt af því hef ég ritað vegna vangetu minnar til þess.

41 Og nú býð eg yður að leita þessa Jesú, sem spámennirnir og postularnir hafa ritað um, svo að náð Guðs föðurins, og einnig Drottinn Jesús Kristur og heilagur andi, sem ber þeim vitni, megi vera og haldast í yður að eilífu. Amen.