1 Emavi aJakobe, umnakabo Nefi, lawakhuluma kubantfu baNefi, emvakwekufa kwaNefi.

2 Manje, bomnaketfu labatsandzekako, mine, Jakobe, ngekwesibopho lengiphansi kwaso kuNkulunkulu, kutsi ngidvumise umsebenti wami ngebucotfo, futsi nekutsi ngisuse tono tenu etembatfweni tami, ngikhuphukela ethempelini ngalolusuku kute ngimemetele kini livi laNkulunkulu.

3 Futsi nine lucobo lwenu niyati kutsi kute kube manje bengikhutsele emsebentini welubito lwami; kodvwa ngalolusuku ngicindzetelwa kuba nesifiso lesikhulu kakhulu kanye nekukhatsateka ngenca yenhlalakahle yemiphefumulo yenu ngetulu kwaloko lebenginako kute kube manje.

4 Ngoba bukani, kute kube manje, nililalele livi leNkhosi, lengininike lona.

5 Kodvwa bukani, ngilaleleni, futsi nati kutsi ngelusito lweMdali welizulu nemhlaba lonemandla onkhe nginganitjela mayelana nemicabango yenu, kutsi senicala kanjani kusebenta esonweni, lesibonakala sinengekile kakhulu kimi, yebo, lesinengekile nakuNkulunkulu.

6 Yebo, kuyawudzabukisa umphefumulo wami futsi kungenta ngishwaphane ngemahloni phambi kweMenti wami, kutsi kufanele ngifakaze kini mayelana nebubi betinhlitiyo tenu.

7 Ngetulu kwaloko kuyangidzabukisa kutsi kufanele ngisebentise sibindzi lesikhulu kangaka sekukhuluma mayelana nani, phambi kwebafati benu kanye nebantfwana benu, labaningi babo labanemizwa letsambe kakhulu nalabamsulwa futsi labaneluvelo phambi kwaNkulunkulu, lekuyintfo letfokotisako kuNkulunkulu;

8 Futsi ngicabanga kutsi bakhuphukele lana kutokuva livi lelitfokotisako laNkulunkulu, yebo, livi lelelapha umphefumulo lolimele.

9 Ngaloko-ke, kuyawucindzetela umphefumulo wami kutsi ngiphoceleleke, ngenca yemyaleto locinile lengiwutfole kuNkulunkulu, kutsi nginiyale ngekwemacala enu, kutsi ngandzise tilondza talabo lasebavele balimele, esikhundleni sekubadvudvuta nekubapholisa tilondza tabo; futsi labo labangakalimali, esikhundleni sekutsi batitike ngalelitfokotisako livi laNkulunkulu nginetinkemba letibekelwe kuhlaba imiphefumulo yabo tilimate imicondvo yabo lentekenteke.

10 Kodvwa, nanoma kungebukhulu balomsebenti, kufanele ngente njengekucina kwemiyaleto yaNkulunkulu, nginitjele mayelana nebubi kanye netinengiso tenu, phambi kwalabo labanetinhlitiyo letimsulwa, nalabanetinhlitiyo letidzabukile, kanye nangephansi kwekubuka kweliso lelihlabako laNkulunkulu Somandla.

11 Ngaloko-ke, kufanele nginitjele liciniso njengekuba sobala kwelivi laNkulunkulu. Ngoba bukani, ngesikhatsi ngibuta eNkhosini, leta livi kimi, litsi: Jakobe, vuka ukhuphukele ethempelini kusasa, umemetele livi lengiyawukunika lona kulaba bantfu.

12 Manje bukani, bomnaketfu, leli livi lengilimemetela kini, kutsi labaningi benu sebacale kufuna ligolide, nesiliva, kanye nalo lonkhe luhlobo lwensimbi leligugu, lokukulelive, lokulive lesetsembiso kini kanye nentalelwane yenu, lokukuningi nalokuyinala lenkhulu.

13 Futsi sandla sekupha simamatsekile etikwenu ngekutfokota lokukhulu, kangangoba nitfole umcebo lomningi; futsi ngenca yekutsi labanye benu bayitfole ngebuningi lobukhulu kunaleyo yabomnakenu seniyatigcabha, seninenkhani kanye nekutichenya ngenca yekubita kwetembatfo tenu, futsi nihlupha bomnakenu, ngoba nicabanga kutsi nincono kunabo.

14 Manje, bomnaketfu, ngabe nicabanga kutsi Nkulunkulu unitfola ningenacala yini kulentfo na? Bukani, ngitsi kini, Cha. Kodvwa unilahla ngelicala, futsi uma niphikelela kuleti tintfo kwehlulela kwakhe kufanele kufike masinyane kini.

15 Awu kwangatsi anganikhombisa kutsi anganihlaba, futsi ngekunitsi nhla nje kanye ngeliso lakhe anganishaya elutfulini!

16 Awu kwangatsi anganisusa kulobubi kanye naletinengiso. Awu kwangatsi beningalilalela livi lemiyaleto yakhe, futsi ningakuvumeli loku kutigcabha kwetinhlitiyo tenu kubhubhise imiphefumulo yenu!

17 Cabangani ngabomnakenu shengatsi bangini lucobo lwenu, futsi nivane nabo bonkhe niphindze nibe nemusa ngemphahla yenu, kute nabo banotse njengani.

18 Kodvwa ngaphambi kwekutsi nifune umcebo, funani umbuso waNkulunkulu.

19 Futsi emvakwekutsi senitfole litsemba kuKhristu niyawutfola umcebo, uma niwufuna; futsi niyawufuna ngenhloso yekwenta lokuhle—kwembatsisa labangcunu, nekupha labalambile, nekukhulula labatfunjwa, kanye nekuniketa lusito kulabagulako nalabakhatsatekile.

20 Manje, bomnnaketfu, sengikhulumile kini mayelana nekutigcabha; nalabo benu labakhatsate makhelwane wabo, bamhlupha ngenca yekutsi beninekutichenya etinhlitiyweni tenu, ngetintfo Nkulunkulu laninikete tona, nitsini ngaloko na?

21 Ngabe anicabangi yini kutsi tintfo letinje tinengekile kuloyo lowadala wonkhe umuntfu na? Futsi nguloyo muntfu uligugu emehlweni akhe njengalomunye. Futsi wonkhe umuntfu welutfuli; futsi ngenhloso lefanako wabadala, kutsi bagcine imiyaleto yakhe baphindze bamdvumise ingunaphakadze.

22 Manje sengenta siphetfo sekukhuluma kini mayelana naloku kutigcabha. Futsi kube bekungasiko kutsi kufanele ngikhulume kini mayelana nelicala lelibi kakhulu, inhlitiyo yami beyitotfokota kakhulu ngenca yenu.

23 Kodvwa livi laNkulunkulu liyangicindzetela ngenca yemacala enu lamabi kakhulu. Ngoba bukani, naku lokushiwo yiNkhosi: Laba bantfu bacala kukhula ebubini; abayicondzi imibhalo lengcwele, ngoba bafuna kuticolela ekwenteni bugwadla, ngenca yetintfo lebetibhaliwe mayelana naDavide, kanye naSolomoni indvodzana yakhe.

24 Bukani, Davide kanye naSolomoni ngempela bebanebafati labaningi kanye netingani, lokuyintfo leyayinengekile phambi kwami, kusho iNkhosi.

25 Ngaloko-ke, naku lokushiwo yiNkhosi, ngibaholile labantfu baphuma eveni laseJerusalema, ngemandla esandla sami, kute ngitikhulisele ligala lelilungile kuyo intalo yesisu saJosefa.

26 Ngaloko-ke, mine Nkhosi Nkulunkulu angeke ngivume kutsi labantfu bente njengalabo basendvulo.

27 Ngaloko-ke, bomnaketfu, ngiveni, phindze nilalele livi leNkhosi: Ngoba kute indvodza emkhatsini wenu leyawuba khona ngaphandle kwekuba nemfati munye; futsi tingani ayiyukuba ngisho nasinye.

28 Ngoba mine, iNkhosi Nkulunkulu, ngiyatfokota ngebumsulwa bebesifazane. Futsi bugwadla businengiso phambi kwami; naku lokushiwo yiNkhosi yemaBandla.

29 Ngaloko-ke, laba bantfu bayawuyigcina imiyaleto yami, kusho iNkhosi yemaBandla, noma licalekisiwe live ngenca yabo.

30 Ngoba uma ngitsandza, kusho iNkhosi yemaBandla, kutikhulisela intalelwane, ngitawubayaleta bantfu bami; ngaphandle kwaloko bayawulalela leti tintfo.

31 Ngoba bukani, mine, iNkhosi, ngikubonile kuhlupheka, ngakuva nekulila kwemadvodzakati ebantfu bami eveni laseJerusalema, yebo, kanye nakuto tonkhe tive tebantfu bami, ngenca yebubi netinengiso tebayeni babo.

32 Futsi angeke ngivume, kusho iNkhosi yemaBandla, kutsi kukhala kwemadvodzakati lamahle alaba bantfu, lengibahole ngabakhipha eveni laseJerusalema, kukhuphukele kimi ngalokumelene nalamadvodza ebantfu bami, kusho iNkhosi yemaBandla.

33 Ngoba angeke baholele ekutfunjweni lamadvodzakati ebantfu bami ngenca yekutsamba kwawo, ngaphandle kwekutsi ngibavakashele ngesicalekiso lesibuhlungu, nangekubhujiswa; ngoba abayukubenta bugwadla, njengalabo basendvulo, kusho iNkhosi yemaBandla.

34 Manje bukani, bomnaketfu, niyati kutsi lemiyaleto yayinikwe babe, Lehi; ngaloko-ke, beniyati phambilini; futsi ninikwa sijeziso lesikhulu; ngoba nitentile letintfo lebekungakafaneli kutsi nitente.

35 Bukani, nente bubi lobukhulu kunemaLamani, bomnaketfu. Nephule tinhlitiyo tebafati benu labatsambile, naphindze nalahlekelwa kwetsenjwa bantfwana benu, ngenca yetibonelo tenu letimbi phambi kwabo; futsi sililo setinhlitiyo tabo sikhuphukela etulu kuNkulunkulu ngalokumelene nani. Futsi ngenca yekucina kwelivi laNkulunkulu, lelehlela phansi ngalokumelene nani, letiningi tinhlitiyo tafa, tihlatjwe emanceba lajulile.