1 Kodvwa bukani, mine, Jakobe, ngitokhuluma kini nine lenimsulwa enhlitiyweni. Bukani kuNkulunkulu ngekugcila kwemcondvo, nithandaze kuye ngelukholo lolukhulu, utawunidvudvuta etinhluphekweni tenu, futsi uyawunikhulumela, aphindze atfumele kulunga etikwalabo labafuna kunibhubhisa.

2 Awu nonkhe nine lenimsulwa enhlitiyweni, phakamisani tinhloko tenu nemukele livi lelitfokotisako laNkulunkulu, futsi nititike elutsandvweni lwakhe; ngoba ningakwati, uma imicondvo yenu igcilile njalo.

3 Kodvwa, maye, maye, kini leningekho msulwa enhlitiyweni, nine leningcolile ngalolusuku phambi kwaNkulunkulu; ngoba ngaphandle kwekutsi niphendvuke lelive licalekisiwe ngenca yenu; futsi emaLamani, langakangcoli njengani, noko acalekisiwe ngesicalekiso lesibuhlungu, ayawunihlupha nite nibhubhe.

4 Futsi sikhatsi siyeta masinyane, sekutsi ngaphandle kwekutsi niphendvuke ayawulitsatsa live lenu lelilifa, neNkhosi Nkulunkulu itawuhola labalungile baphume emkhatsini wenu.

5 Bukani, emaLamani bomnakenu, lenibazondako ngenca yekungcola kwabo kanye naleso sicalekiso leseta etikwetikhumba tabo, balunge kakhulu kunani; ngoba abakawukhohlwa umyaleto weNkhosi, lowanikwa babe—wekutsi kumele babe namunye kuphela umfati, tingani bangabi ngisho nasinye, futsi kungabi khona bugwadla lobentekako emkhatsini wabo.

6 Manje, lomyaleto bayetama kuwugcina; ngaloko-ke, ngenca yaloku kuwugcina, lomyaleto, iNkhosi Nkulunkulu angeke ibabhubhise, kodvwa itawuba nemusa kubo; futsi ngalolunye lusuku bayawuba bantfu lababusisiwe.

7 Bukani, bayeni babo bayabatsandza bafati babo, nebafati babo bayabatsandza bayeni babo; nebayeni babo kanye nebafati babo bayabatsandza bantfwana babo, futsi kungakholwa kwabo kanye nenzondo yabo kini kungenca yebubi lobukhulu baboyise; ngaloko-ke, ngabe nincono kangakanani nine kunabo, emehlweni eMdali wenu lomkhulu na?

8 Awu bomnaketfu, ngiyesaba kutsi ngaphandle kwekutsi niphendvuke etonweni tenu tikhumba tabo titawuba mhlophe kakhulu kunetenu, uma seniletfwa kanye nabo phambi kwesihlalo saNkulunkulu.

9 Ngaloko-ke, ngininika umyaleto, lolivi laNkulunkulu, kutsi ningabe nisabetfuka nanini ngenca yebumnyama betikhumba tabo; noma nibetfuke ngenca yekungcola kwabo; kodvwa nikhumbule kungcola kwenu lucobo, futsi nikhumbule kutsi kungcola kwabo kweta ngenca yaboyise.

10 Ngaloko-ke, niyawukhumbula bantfwana benu, kutsi nitidzabukise kanjani tinhlitiyo tabo ngenca yesibonelo lenisente phambi kwabo; ngetulu kwaloko, khumbulani kutsi, ngenca yekungcola kwenu, ningaletsa bantfwana benu ekubhujisweni, netono tabo tiyocwabelana etikwetinhloko tenu ngelusuku lwekugcina.

11 Awu bomnaketfu, vanini emavi ami; letsani emandla emiphefumulo yenu; titsintsitseni kute nivuke ebutfongweni bekufa; nitikhulule ebuhlungwini besihogo kute ningabi tingilosi kudeveli, kute niphoswe kulelo chibi lemlilo kanye nesibabule lesikufa kwesibili.

12 Manje mine, Jakobe, ngakhuluma tintfo letiningi kakhulu kubantfu baNefi, ngibacwayisa ngekuhlobonga nangenkhanuko, kanye nayo yonkhe inhlobo yesono, ngibatjela ngemphumela lomubi waso.

13 Futsi incenye yelikhulu yetento talaba bantfu, manje labesebacale kuba baningi, angeke ibhalwe kulaba bongcwengcwe; kodvwa letiningi tetento tabo tibhaliwe kubongcwengcwe labakhudlwana, netimphi tabo, nemibango yabo kanye nekubusa kwemakhosi abo.

14 Laba bongcwengcwe babitwa ngabongcwengcwe baJakobe, futsi bentiwa ngesandla saNefi. Futsi ngenta siphetfo sekukhuluma lamavi.