1 Manje buka, kwenteka kutsi mine, Jakobe, sengibafundzise lokuningi bantfu bami ngelivi, (futsi ngeke ngikwati kubhala ngaphandle kwalamancane nje emavi ami, ngenca yebulukhuni bekucopha emavi etfu kubongcwengcwe) futsi siyati kutsi tintfo lesitibhalako kulabongcwengcwe kufanele tihlale;

2 Kodvwa noma ngabe ngutiphi tintfo lesitibhalako kunoma nguyini lenye intfo ngaphandle kwakubongcwengcwe kufanele tishabalale futsi tinyamalale; kodvwa singawabhala lamavi lambalwa kubongcwengcwe, labatawuniketa bantfwana betfu, nabomnaketfu labatsandzekako, lwati loluncane mayelana natsi, noma mayelana naboyise—

3 Manje kulentfo siyatfokota; futsi sisebenta ngekukhutsala kucopha lamavi kubongcwengcwe, setsemba kutsi bomnaketfu labatsandzekako kanye nebantfwana betfu batawemukela ngetinhlitiyo letibongako, baphindze babuke kuwo kute bafundze ngekujabula hhayi ngekudzabuka, noma ngekwedzelela, mayelana nebatali babo bekucala.

4 Ngoba, ngalesi sizatfu sitibhalile letintfo, kute bati kutsi besati ngaKhristu, futsi sasinelitsemba lenkhatimulo yakhe emakhulu lamaningi eminyaka ngaphambi kwekufika kwakhe; futsi hhayi kutsi ngitsi kuphela nje lebesinelitsemba lenkhatimulo yakhe, kodvwa ngalokunjalo nabo bonkhe baphrofethi labangcwele labebangaphambi kwetfu.

5 Buka, bebakholwa kuKhristu futsi bamkhonta Babe egameni lakhe, ngalokunjalo natsi sikhonta Babe egameni lakhe. Ngalesi sizatfu sigcina umtsetfo waMosi, ngenca yekutsi ukhombisa imiphefumulo yetfu kuye; futsi ngalesi sizatfu kutsatfwa ngekutsi senta kulunga, njengoba kwancomeka ku-Abrahama ehlane kutsi alalele imiyaleto ya-Nkulunkulu ekunikeleni ngendvodzana yakhe Isaka, loko lokungumfanekiso waNkulunkulu kanye neNdvodzana yakhe leTelwe Yodvwa.

6 Ngaloko-ke, siyabaphenya baphrofethi, futsi sinetembulo letiningi kanye namoya wekuphrofetha; futsi ngekuba nabo bonkhe labofakazi sitfola litsemba, nelukholo lwetfu alunyakatiseki, kangangekutsi ngempela singayala ngeligama laJesu phindze tihlahla tona kanye tisilalele, noma tintsaba, noma emagagasi elwandle.

7 Noko, iNkhosi Nkulunkulu isikhombisa butsakatsaka betfu kute sati kutsi kungenca yemusa wayo, kanye nekutehlisa kwayo lokukhulu kubantfwana bebantfu, kutsi sibe nemandla ekwenta leti tintfo.

8 Buka, mikhulu futsi iyamangalisa imisebenti yeNkhosi. Akuphenyeki kangakanani kujula kwetimfihlakalo tayo; futsi akunakwenteka kutsi umuntfu atfole tonkhe tindlela tayo. Futsi kute umuntfu lowatiko ngetindlela tayo ngaphandle kwekutsi tembulwe kuye; ngaloko-ke, bomnaketfu, ningatidzeleli tembulo taNkulunkulu.

9 Ngoba buka, ngemandla elivi lakhe umuntfu weta etikwebuso bemhlaba, umhlaba lowo lobewudalwe ngemandla elivi lakhe. Ngaloko-ke, uma Nkulunkulu akwati kukhuluma futsi umhlaba wabakhona, wakhuluma futsi umuntfu wadalwa, Awu pho, kungani anganawukwati kuyaleta umhlaba, noma umsebenti wetandla takhe etikwawo, ngekwetsandvo kanye nekufisa kwakhe na?

10 Ngaloko-ke, bomnaketfu, musani kufuna kweluleka iNkhosi, kodvwa kutsatsa kwelulekwa esandleni sayo. Ngoba bukani, nine cobo lwenu niyati kutsi yeluleka ngekuhlakanipha, nangekulunga, kanye nangemusa lomkhulu, ngetulu kwayo yonkhe imisebenti yayo.

11 Ngaloko-ke, bomnaketfu labatsandzekako, buyisanani nayo ngenhlawulo yaKhristu, iNdvodzana yakhe leTelwe Yodvwa, futsi ningatfola kuvuka, ngekwemandla ekuvuka lakuKhristu, futsi niletfwe njengetitselo tekucala taKhristu kuNkulunkulu, ninelukholo, futsi nitfole litsemba lelihle lenkhatimulo kuyo ngaphambi kwekutibonakalisa kwakhe asenyameni.

12 Manje, batsandzekako, ningamangali kutsi nginitjela leti tintfo; ngoba kungani kungakhulunywa ngenhlawulo yaKhristu, futsi kufunwe kutfola lwati loluphelele lwakhe, njengekufuna kutfola lwati lwekuvuka kanye nemhlaba lotako na?

13 Bukani, bomnaketfu, loyo lophrofethako, akaphrofethe kute bantfu bacondze; ngoba Moya ukhuluma liciniso futsi awucambi manga. Ngaloko-ke, ukhuluma ngetintfo njengoba tinjalo, futsi nangetintfo njengoba titawuba njalo; ngaloko-ke, leti tintfo tibonakaliswa kitsi ngalokusobala, kute kusindziswe imiphefumulo yetfu. Kodvwa bukani, tsine asisibo bofakazi sodvwa kuleti tintfo; ngoba ngetulu kwaloko Nkulunkulu watikhuluma nakubo baphrofethi basendvulo.

14 Kodvwa bukani, emaJuda bekabantfu labebanetinhloko letilukhuni; futsi awadzelela emavi lacacile, abulala baphrofethi, afuna tintfo lebekangeke aticondze. Ngaloko-ke, ngenca yebumphumphutse bawo, bumphumphutse lobo lobafika ngekubuka ngale kwemgomo, kufanele awe; ngoba Nkulunkulu ukususile lokusobala kwakhe kuwo, futsi watfumela kuwo tintfo letiningi langatange aticondze, ngenca yekutsi bekatifisa. Futsi ngenca yekutsi bekatifisa Nkulunkulu ukwentile loku, kute akhutjwe.

15 Manje mine, Jakobe, ngiholelwa nguMoya ekuphrofetheni; ngoba ngiyabona ngekusebenta kwaMoya lokimi, kutsi ngekukhutjwa kwemaJuda atolilahla lelo litje labekangakhela etikwalo futsi abe nalesiphephile sisekelo.

16 Kodvwa bukani, ngekwemibhalo lengcwele, lelitje liyawuba ngulesikhulu, nesekugcina, nesisekelo lesingiso kuphela, emaJuda langakhela etikwaso.

17 Manje, batsandzekako bami, kungenteka kanjani kutsi laba, emvakwekutsi sebasalile sisekelo lesingiso, bangakhela etikwaso futsi, kute sibe yinhloko yendlu yabo na?

18 Bukani, bomnaketfu labatsandzekako, ngitawuyembula lemfihlakalo kini; uma kungenteki, nangayiphi indlela, ngitfole kunyakatiswa ekucineni kwami kuMoya, futsi ngikhutjwe ngenca yekukhatsateka lokukhulu kwami ngani.