1 Manje, bukani, bomnaketfu, njengoba ngishito kini kutsi ngiyophrofetha, bukani, lesi siphrofetho sami—kutsi tintfo lomphrofethi Zenoshe latikhuluma, mayelana nendlu yaka-Israyeli, lapho ayifananisa nesihlahla semncumo lesitsanjisiwe, kufanele ngempela senteke.

2 Futsi lusuku lapho ayawukwelula khona sandla sakhe futsi kwesibili kubuyisa bantfu bakhe, ngilo lusuku, yebo, sikhatsi sekugcina, lapho tinceku teNkhosi tiyawuhamba ngemandla ayo, kondla kanye nekutsena sivini sayo; emvakwaloko siphetfo siyawuta masinyane.

3 Futsi babusiseke kangakanani labo labasebente ngekukhutsala esivinini sayo; bacalekisiwe kangakanani laba labayawulahlwa ngaphandle endzaweni yabo! Futsi umhlaba uyawushiswa ngemlilo.

4 Futsi unemusa kangakanani Nkulunkulu wetfu kitsi, ngoba uyayikhumbula indlu yaka-Israyeli, kokubili timphandze kanye nemagala; welula tandla takhe kubo bonkhe lusuku lonkhe; futsi babantfu labanetinhloko letilukhuni nalabanenkhani; kodvwa ngebuningi balabo labangeke batente lukhuni tinhlitiyo tabo bayawusindziswa embusweni waNkulunkulu.

5 Ngaloko-ke, bomnaketfu labatsandzekako, ngiyanincenga ngemavi lazotsile kutsi niphendvuke, futsi nite ngenhloso lephelele yenhlitiyo, ninamatsele kuNkulunkulu njengoba naye anamatsele kini. Futsi ngesikhatsi lapho sandla sakhe semusa selulelwe kini ekukhanyeni kwelusuku, ningatenti lukhuni tinhlitiyo tenu.

6 Yebo, namuhla, uma ningalalela livi lakhe, ningatenti lukhuni tinhlitiyo tenu; ngoba kuya ngani nitokufa na?

7 Ngoba bukani, emvakwekutsi senondliwe ngelivi lelihle laNkulunkulu lusuku lonkhe, ngabe nitawuveta sitselo lesibi, kute nisuswe futsi nilahlwe emlilweni na?

8 Bukani, ngabe nitawalahla yini lamavi na? Nitawalahla yini lamavi ebaphrofethi; futsi nitawaphika onkhe yini lamavi lakhulunywa mayelana naKhristu, emvakwekutsi labaningi kangaka sebakhulumile mayelana naye; niphindze nililahle livi lelihle laKhristu, nemandla aNkulunnkulu, kanye nesipho saMoya loNgcwele, nivimbele Moya loNgcwele, nente inhlekisa ngelisu lelikhulu lekuhlengwa, lelibekelwe nine na?

9 Anati yini kutsi uma nitawukwenta leti tintfo, emandla ekuhlengwa kanye newekuvuka, lakuKhristu, atonenta nime ninemahloni nekuba nelicala phambi kwesihlalo saNkulunkulu na?

10 Futsi ngekwemandla ekulunga, ngoba kulunga angeke kwaliwe, kufanele nihambe niye kulelo chibi lemlilo nesibabule, lelinemalangabi langacimeki, futsi lelinentfutfu lekhuphukela etulu phakadze naphakadze, lelo chibi lemlilo nesibabule lokubuhlungu lobungapheli.

11 Awu uma kunjalo-ke, bomnaketfu labatsandzekako, phendvukani, futsi ningene esangweni lelingumntjuntju, futsi nichubeke endleleni lencane, nite nitfole kuphila lokuphakadze.

12 Awu hlakaniphani; yini lenye lengingayisho na?

13 Kwekugcina, ngiyanivalelisa, ngite ngihlangane nani phambi kwesihlalo lesitfokotisako saNkulunkulu, sihlalo leso lesishaya lababi ngeluvalo lolubi kanye nekwesaba. Amen.