1 Manje kwenteka emvakwekutsi sekwendlule iminyaka lemibalwa, kwafika indvodza emkhatsini webantfu baNefi, libito layo kwakunguSheremu.

2 Futsi kwenteka kutsi yacala kushumayela emkhatsini webantfu, nekumemetela kubo kutsi angeke abe khona Khristu. Yashumayela tintfo letiningi letayenga bantfu; futsi yakwenta loku kute icitse imfundziso yaKhristu.

3 Yasebenta ngekukhutsala kute iholele kudze tinhlitiyo tebantfu, kangangekutsi yatiholela kudze tinhlitiyo letiningi; futsi yati kutsi mine, Jakobe, nganginelukholo kuKhristu lobekatofika, yalifuna kakhulu litfuba kute ite kimi.

4 Yayifundzile, kangangekutsi yayinelwati loluphelele lwelulwimi lwebantfu; ngaloko ke, yayikwati kusebentisa kuyenga lokuningi, kanye nemandla ekukhuluma, ngekwemandla adeveli.

5 Yayinelitsemba lekunginyakatisa elukholweni, nanoma ngasengibone tembulo kanye netintfo letiningi mayelana naleti tintfo; ngoba ngempela ngase ngitibonile tingilosi, futsi tasetingisitile. Ngetulu kwaloko, ngasengilivile livi leNkhosi lucobo likhuluma kimi, tikhatsi ngetikhatsi; ngaloko-ke, ngangingeke nginyakatiseke.

6 Futsi kwenteka kutsi yeta kimi, yakhuluma kimi ngalendlela, yatsi: Mnaketfu Jakobe, sengilifune kakhulu litfuba lekutsi ngikhulume nawe; ngoba ngivile futsi ngetulu kwaloko ngiyati kutsi wena uhamba kakhulu, ushumayela loko lokubita ngelivangeli, noma imfundziso yaKhristu.

7 Futsi sewuholele kudze labaningi balaba bantfu kute bagucule indlela lecondzile yaNkulunkulu, bangawugcini umtsetfo waMose loyindlela lecondzile; nekutsi bawugucule umtsetfo waMosi kukhontwe umuntfu wena lotsi uyawufika eminyakeni lengemakhulu lamaningi letako. Manje buka, mine, Sheremu, ngimemetela kuwe kutsi loku kuhlambalata; ngoba kute umuntfu lowatiko ngaleti tintfo letinje; ngoba angeke akwati kwatisa ngetintfo letisatofika. Sheremu waphikisana nami ngalendlela.

8 Kodvwa buka, iNkhosi Nkulunkulu yatsela Moya wayo emphefumulweni wami, kangangekutsi ngamtfobisa kuwo onkhe emavi akhe.

9 Ngatsi kuye: uyamphika yini Khristu loyawufika na? Watsi: Uma kuyoba khona Khristu, anginakumphika; kodvwa ngiyati kutsi kute Khristu, nekutsi akate abe khona, futsi akayuze abe khona.

10 Ngatsi kuye: Ngabe uyayikholwa yini imibhalo lengcwele na? Watsi, Yebo.

11 Ngatsi kuye: Uma kunjalo-ke awuyicondzi; ngoba ifakaza ngekweliciniso ngaKhristu. Buka, ngitsi kuwe kute umphrofethi lobhalile, noma lophrofethile, ngaphandle kwekutsi akhulume mayelana naloKhristu.

12 Futsi akusiko loku kuphela—kubonakalisiwe kimi, ngoba ngivile futsi ngabona; ngetulu kwaloko kubonakalisiwe ngemandla aMoya loNgcwele; ngaloko-ke, ngiyati kutsi uma kute inhlawulo lengentiwa bonkhe bantfu kufanele balahleke.

13 Futsi kwenteka kutsi watsi kimi: Ngikhombise sibonakaliso ngalamandla aMoya loNgcwele, lowati kangaka ngawo.

14 Ngatsi kuye: Ngingubani mine kutsi ngingalinga Nkulunkulu kutsi akhombise wena sibonakaliso ngentfo loyatiko kutsi iliciniso na? Noma kunjalo uyayiphika, ngenca yekutsi unguwadeveli. Noko, akungentiwa intsandvo yami; kodvwa uma Nkulunkulu atokushaya, loko akube sibonakaliso kuwe kutsi yena unemandla, ezulwini kanye nasemhlabeni; futsi nekutsi Khristu uyawufika. Futsi intsandvo yakho, Awu Nkhosi, ayentiwe, hhayi yami.

15 Futsi kwenteka kutsi emvakwekutsi mine, Jakobe, sengiwakhulumile lamavi, emandla eNkhosi ehlela kuye, kangangekutsi wawela phansi. Futsi kwenteka kutsi wondliwa sikhatsi lesitinsuku letiningi.

16 Futsi kwenteka kutsi watsi kubantfu: Gcogcanani ndzawonye kusasa, ngoba ngitofa; ngaloko-ke, ngifisa kukhuluma kubantfu ngaphambi kwekutsi ngife.

17 Futsi kwenteka kutsi ngakusasa sicuku sagcogcana ndzawonye; wakhuluma ngalokusobala kuso futsi watiphika tintfo lebekabafundzise tona, wamvuma Khristu, nemandla aMoya loNgcwele, kanye nekusitwa tingilosi.

18 Futsi wakhuluma ngalokusobala kubo, kutsi bekakhohliswe ngemandla adeveli. Wakhuluma ngesihogo, nangeliphakadze, kanye nangesijeziso lesingapheli.

19 Watsi: Ngiyesaba hleze sengente sono lesingacoleleki, ngoba ngicambe emanga kuNkulunkulu; Ngoba ngiphike Khristu, ngatsi ngiyayikholwa imibhalo lengcwele, nekutsi ngempela ifakaza ngaye. Ngenca yekutsi ngicambe emanga kuNkulunkulu ngiyesaba kakhulu hleze licala lami libe libi kakhulu; kodvwa ngiyatihlambulula kuNkulunkulu.

20 Futsi kwenteka kutsi emvakwekutsi sekawashito lamavi akatange asakwati kusho lamanye, wabese uyafa.

21 Emvakwekutsi sicuku sesibonile kutsi wakhuluma leti tintfo ngesikhatsi sekatawukufa, bamangala kakhulu; kangangekutsi emandla aNkulunkulu ehlela etikwabo, futsi abancoba kangangekutsi bawela phansi.

22 Manje, lentfo yayitfokotisa kimi, Jakobe, ngoba ngangiyicelile kuBabe losezulwini; ngoba wakuva kukhala kwami futsi wawuphendvula umthandazo wami.

23 Futsi kwenteka kutsi kuthula kanye nelutsandvo lwaNkulunkulu kwaphindze kwabuyiselwa emkhatsini webantfu; futsi bayihlolisisa imibhalo lengcwele, futsi bangaphindzi balalela emavi alendvodza lembi.

24 Futsi kwenteka kutsi tindlela letiningi tatisungulelwe kugucula kanye nekubuyisela emaLamani ekwatini liciniso; kodvwa konkhe loku kwaba lite, ngoba bekatfokoteka timphi kanye nekucitsa ingati, futsi bekanenzondo lengapheli ngalokumelene natsi, bomnakabo. Afuna ngemandla etikhalini tawo kusibhubhisa njalonjalo.

25 Ngaloko-ke, bantfu baNefi baticinisa ngalokumelene nawo ngetikhali tabo, kanye nangawo onkhe emandla abo, batsembela kuNkulunkulu lolidvwala nensindziso yabo; ngaloko-ke, bachubeka kwaleso sikhatsi, baba bancobi betitsa tabo.

26 Futsi kwenteka kutsi mine, Jakobe, ngacala kuba mdzala, futsi imibhalo yalaba bantfu njengoba ingcinwe kulabanye bongcwengcwe baNefi, ngaloko-ke, ngiyawephetsa lombhalo, ngatisa kutsi ngibhale njengekwelwati lwami, ngekusho kutsi sikhatsi sendlula natsi, ngetulu kwaloko netimphilo tetfu tendlula kwangatsi kwakunjengeliphupho kitsi, tsine sibantfu labanesitunge futsi labanesizotsa, singulabazulazulako, sicoshwe eJerusalema, sitalelwe ekuhluphekeni, ehlane, futsi sitondvwa bomnaketfu, lokwadala timphi kanye nemibango; ngaloko-ke, sakhala ngetinsuku tetfu tonkhe.

27 Futsi mine, Jakobe, ngabona kutsi kwasekufanele masinyane ngehlele phansi ethuneni lami; ngaloko-ke, ngatsi kundvodzana yami Enoshi: Tsatsa laba bongcwengcwe. Ngamtjela leto tintfo umnaketfu Nefi labekangiyalete ngato, futsi watsembisa kuyilalela lemiyaleto. Ngenta siphetfo sekubhala kwami kulaba bongcwengcwe, lobekungumbhalo lomncane; futsi kumfundzi ngiyavalelisa, ngetsemba kutsi labaningi babomnaketfu batawafundza lamavi ami. Bomnaketfu, salani kahle.