1 Ā, i pahawa ake i taua tau anō ka tīmata tētahi pakanga anō ki waenganui i ngā Nīwhai me ngā Rāmana. Ā, hei aha koa he taiohi au, he kaitā au; nō reira ka whakataua au e te iwi kia tū ai au hei rangatira mō rātou, hei rāngatira rānei mō ō rātou tauā.

2 Nō reira, i pahawa ake i te tekau mā ono o ōku tau ka haere atu au i mua i tētahi tauā nō ngā Nīwhai, ki ngā Rāmana; nō reira kua pahemo atu ngā tau e toru rau e rua tekau mā ono.

3 Ā, i pahawa ake, nā, ka whakaeke mai ngā Rāmana i runga i te kaha tino nui i te tau e toru rau e rua tekau mā whitu, nā konā whakawehi rātou i ōku tauā; nō reira kāore rātou i pai ki te whawhai, ā, ka tīmata tā rātou whawhati atu ki ngā whenua whakateraki.

4 Ā, i pahawa ake, nā, ka tae mātou ki te pā o Anakora, ā, ka riro i a mātou te pā, ā, ka whakarite mātou kia tiaki i a mātou anō i ngā Rāmana. A, i pahawa ake, nā, ka whakatūwatawata mātou i te pā i runga i tō mātou kaha; engari ahakoa ā mātou whakatūwatawata ka haere mai ngā Rāmana, ā, ka āia atu mātou e rātou ki waho i te pā.

5 Ā, ka āia anō hoki mātou e rātou ki waho atu i te whenua o Rāwiri.

6 Ā, ka hīkoi atu mātou, ā, ka haere ki te whenua o Hōhua, kei roto nei i ngā rohe i te uru i te taha o te takutai moana.

7 Ā, i pahawa ake, nā, ka whakakao mātou i tō mātou iwi i runga i te kakama nui, kia whakaminea ngātahitia rātou ki roto i te whakaminenga kotahi.

8 Engari nana, kua muia te whenua ki ngā kaipāhua me ngā Rāmana; ā, ahakoa te whakangaromanga nui e iri ana i runga i tōku iwi, kāore rātou i rīpenetā i ō rātou mahinga kino; nō reira kua whakawhānuitia atu te whakahekenga toto me te parekura puta noa i runga i te mata katoa o te whenua, i te taha o ngā Nīwhai me te taha o ngā Rāmana; ā, koia tētahi whananga nui puta noa i te mata katoa o te whenua.

9 Ināianei ā, he kīngi tō ngā Rāmana, ā, ko Arona tōna ingoa; ā, ka whakaeke mai ia ki a mātou me tētahi tauā whā tekau mā whā mano tāngata te nui. Ā nana, ka tū atu ahau me te whā tekau mā rua mano. Ā, i pahawa ake, nā, ka hinga ia i ahau me taku tauā, nā, ka tahuti atu ia. Ā nana, kua meatia katoatia tēnei, ā, kua pahemo atu ngā tau e toru rau e toru ngahuru.

10 Ā, i pahawa ake, nā, ka tīmata ngā Nīwhai ki te rīpenetā i ō rātou kino, ā, ka tīmata tā rātou hāmama pērā i tā Hamuera te poropiti i poropiti ai; nana rā, kāore i taea e te tangata kotahi te pupuri i āna mea, nā ngā kaitāhae, me ngā kaipāhua, me ngā kaikōhuru, me ngā mahi mangamangaiatua, me te mahi whaiwhaiā i runga i te whenua.

11 Pēnei tīmata ai tētahi tangihanga me tētahi auē puta noa i te whenua nā ēnei mea, ā, tērā noa ake i roto i te iwi o Nīwhai.

12 Ā, i pahawa ake, nā, i tāku, i tā Moromona kitenga atu i tā rātou auē me tā rātou tangihanga me tō rātou pōuritanga i te aroaro o te Ariki, ka hari anō tōku ngākau i roto nei i ahau, e mōhio ana ki te aroha me te manawanui o te Ariki, nō reira i te whakaaro au ka aroha ia ki a rātou kia meinga anō rātou hei iwi tika.

13 Engari he auare ake taku hari, nā te mea ehara tā rātou auē i te mea rīpenetātanga nā te painga o te Atua; engari nā te auētanga o te hunga kua pāpunihia, nā te mea kāore te Ariki e tuku i a rātou i ngā wā katoa kia hari i runga i te hara.

14 Ā, kīhai rātou i haere mai ai ki a Ihu i runga i te ngākau marū me te wairua iro, engari i kanga rātou i te Atua, ā, ka hiahia kia mate. Hei aha koa ka totohe rātou ki te hoari mō ō rātou oranga.

15 Ā, i pahawa ake, nā, ka hoki mai anō tōku pōuritanga ki ahau, ā, ka kite au kua pahemo atu te rangi aroha i a rātou, mō te taha tīnana me te taha wairua; nā te mea i kite au i ngā mea manomano o rātou i tuakina iho ai i runga i te haututū mārire ki tō rātou Atua, ā, kua purangatia anō nei he wairākau i runga i te mata o te whenua. Ā pēnei kua pahemo atu ngā tau e toru rau whā ngahuru mā whā.

16 Ā, i pahawa ake i te tau toru rau whā ngahuru mā rima ka tīmata tā ngā Nīwhai tahuti atu i te aroaro o ngā Rāmana; ā, ka arumia rātou tae noa atu ki tā rātou taenga atu ki roto i te whenua o Hāhona, i mua i te wā i taea ai te aukati i tā rātou tahutitanga atu.

17 Ināianei ā, e tūtata ana te pā o Hāhona ki te whenua i whakatakotoria ai e Amarona ngā tuhinga ki te Ariki, kia kore ai rātou e whakangaromia. Ā nana, kua haere au e rite ana ki ngā kupu a Amarona, ā, kua tīkina atu ngā papa a Nīwhai, ā, ka meatia tētahi tuhinga e rite ana ki ngā kupu a Amarona.

18 Ā, ka meatia e au i runga i ngā papa a Nīwhai tētahi tuhinga whānui mō ngā whakarihariha me ngā mōrikarikia katoa; engari i kaiponu taku mahi i tētahi tuhinga whānui mō tō rātou whakarihariha me tō rātou mōrikarika, nana rā, hono tonu ngā whakarihariha me ngā mōrikarika i mua i ōku karu mai i te wā i kaha au ki te tirotiro i ngā āhuatanga o te tangata.

19 Ā, auē te mate i ahau nā tō rātou whakarihariha; nā te mea kua kī tōku ngākau i te pōuri nā tō rātou whakarihariha, i ōku rā katoa; hei aha koa, e mōhio ana au ka hīkina ake au hei te rā whakamutunga.

20 Ā, i pahawa ake i tēnei tau ka arumia anōtia, ā, ka āia anōtia te iwi o Nīwhai. Ā, i pahawa ake, nā, ka āia atu mātou kia tae atu mātou ki te whenua whakateraki i karangatia nei ko Hema.

21 Ā, i pahawa ake, nā, ka whakatūwatawata mātou i te pā o Hema, ā, ka whakakao mai mātou i tō mātou iwi, arā, ko ngā mea e taea ana te whakakao mai, me kore pea mātou e whakaora i a rātou i te whakangaromanga.

22 Ā, i pahawa ake i te tau toru rau whā ngahuru mā ono ka tīmata tā rātou whakaeke mai anō ki runga i a mātou.

23 Ā, i pahawa ake, nā, ka kōrero atu au ki tōku iwi, ā, ka akiaki i a rātou i runga i te kaha nui, kia tū māia atu rātou i mua i ngā Rāmana kia whawhai ai mō ā rātou hoawahine, me ā rātou tamariki, me ō rātou whare, me ō rātou kāinga.

24 Ā, ka āhua whakaohooho aku kupu i a rātou kia kaha, nā konā kāore rātou i tahuti ai i ngā Rāmana, engari ka tū māia atu ki a rātou.

25 Ā, i pahawa ake, nā, ka whawhai mātou me tētahi tauā toru tekau mano ki tētahi tauā rima tekau mano. Ā, i pahawa ake, nā, ka tū atu mātou i tō rātou aroaro i runga i te kaha nā konā tahuti atu ai rātou i a mātou.

26 Ā, i pahawa ake i te wā i tahuti atu ai rātou ka arumia rātou e ō mātou tauā, ā, ka tūtaki anō ki a rātou, ā, ka patua rātou; hei aha koa kāore i a mātou te kaha o te Ariki; āe rā, kua mahue mātou ki a mātou anō, nā, kāore te Wairua o te Ariki i noho tahi me mātou; nō reira kua ngoikore haere mātou pērā i ō mātou tuākana.

27 Ā, i tangi tōku ngākau nā te aituā nui kua pā nei ki tōku iwi, he mea nā tō rātou whakarihariha me ō rātou mōrikarika. Engari nana, ka haere ake mātou ki ngā Rāmana me ngā kaipāhua o Karianato, kia riro anō i a mātou ō whenua tuku iho.

28 Ā, kua pahemo atu te tau toru rau whā tekau mā iwa. Ā, ka meatia e mātou tētahi tiriti ki ngā Rāmana me ngā kaipāhua o Karianato i te tau toru rau rima tekau, nā konā wehewehea ō mātou whenua tuku iho.

29 Ā, ka homai e ngā Rāmana ki a mātou te whenua whakateraki, āe rā, tae atu ana ki te ara kūiti i ārahina atu ai ki roto i te whenua whakatetonga. Ā, ka hoatu e mātou ki ngā Rāmana te whenua whakatetonga katoa.