1 Ā, i pahawa ake, nā, kāore ngā Rāmana i haere mai anō ki te pakanga kia pahemo atu ngā tau tekau. Ā nana, kua whakamahi au i tōku iwi, ngā Nīwhai, i te whakariteritenga i ō rātou whenua me ā rātou patu mō te wā o te whawhai.

2 Ā, i pahawa ake, nā, i kī ai te Ariki ki a au: Karangatia atu ki tēnei iwi—Rīpenetā koutou, ā, haere mai ki ahau, ā, kia rumakina koutou, ā, hangaia ake anō taku hāhi, ā, ka tohua koutou.

3 Ā, i karanga au ki tēnei iwi, engari auare ake tēnei; ā, kāore rātou i kite nā te Ariki rātou i tohu, i tuku atu ki a rātou tētahi huarahi mō te rīpenetā. Ā nana, i whakapakeke rātou i ō rātou ngākau ki te Ariki tō rātou Atua.

4 Ā, i pahawa ake, nā, whai muri iho i te pahemotanga atu o te tau tuangahuru, arā, ko te katoa, kua neke atu i te toru rau ono ngahuru ngā tau mai i te haerenga mai a te Karaiti, ka tuku pukapuka te kīngi o ngā Rāmana ki ahau, nā konei mōhio ai au i te whakariterite rātou kia haere mai anō ki te whawhai ki a mātou.

5 Ā, i pahawa ake, nā, i mea au kia huihui tahi tōku iwi i a rātou anō ki te whenua Whakangaromanga, ki tētahi pā kei roto i ngā rohe, e tata atu ana ki te ara kūiti i ārahina atu ai ki te whenua whakatetonga.

6 Ā, ka whakanoho mātou i ā mātou tauā ki reira, kia aukati mātou i ngā tauā a ngā Rāmana, kia kore ai e riro i a rātou ō mātou whenua; nā reira mātou whakatūwatawata ai ki a rātou i runga i ō mātou kaha katoa.

7 Ā, i pahawa ake, nā, i haere iho mai ngā Rāmana ki te pā Whakangaromanga ki te whawhai ki a mātou i te tau toru rau ono ngahuru mā tahi; ā, i pahawa ake i taua tau ka patua rātou e mātou, nā konā hoki atu ai rātou ki ō rātou ake whenua.

8 Ā, i te tau toru rau ono ngahuru mā rua ka heke iho mai rātou anō ki te pakanga. Ā, ka patua rātou e mātou anō, ā, ka whakamate i ngā mea tokomaha o rātou, ā, ka makaia atu ō rātou tūpāpaku ki roto i te moana.

9 Ināianei ā, nā tēnei mea nunui i mea ai tōku iwi, ngā Nīwhai, ka tīmata rātou ki te whakamanamana i runga i tō rātou ake kaha, ā, ka tīmata ki te oati i te aroaro o ngā rangi kia ngaki mate rātou anō i ngā toto o ō rātou teina kua whakamatea nei e ō rātou hoariri.

10 Ā, i oati rātou ki ngā rangi, me te torona o te Atua, kia haere ake rātou ki te whawhai ki ō rātou hoariri, ā, ka hātepea atu rātou i te mata o te whenua.

11 Ā, i pahawa ake i ahau, i a Moromona, ka tino whakakore atu i tēnei wā haere ake nei kia tū ai hei kaiwhakahau, ā, hei rangatira mō tēnei iwi, nā tō rātou whakarihariha me tō rātou mōrikarika.

12 Nana, nāku rātou i ārahi, ahakoa tō rātou mōrikarika he maha anō aku ārahitanga i a rātou ki te whawhai, ā, kua arohaina rātou, e rite ana ki te aroha o te Atua kei roto nei i ahau, i runga i tōku ngākau katoa; ā, kua riringihia iho tōku wairua i runga i te inoi ki tōku Atua mō te roanga katoa o te rā mō rātou; hei aha koa, he mea whakaponokore, nā te pakeke o ō rātou ngākau.

13 Ā, e toru aku whakaputanga i a rātou i ngā ringaringa o ō rātou hoariri, ā, kāore anō rātou kia rīpenetā i ō rātou hara.

14 Ā, ina oati rātou ki ngā mea katoa kua whakakorea atu e tō rātou Ariki me tō rātou Kaihoko a Ihu Karaiti, kia haere ake rātou ki ō rātou hoariri ki te whawhai, me te ngaki mate rātou anō i ngā toto o ō rātou tuākana, nana ka puta mai te reo o te Ariki ki ahau, e mea ana:

15 Nōku te utu, ā, māku e whakautu; ā, nā te mea kīhai tēnei iwi i rīpenetā whai muri iho i taku whakaputanga i a rātou, nana, ka hātepea atu rātou i te mata o te whenua.

16 Ā, i pahawa ake, nā, i tino whakakore atu au kia haere ake ai ki ōku hoariri; ā, i mahi au kia rite ki tā te Ariki i whakahau mai ai i ahau; ā, i tū kau ahau hei kaititiro noa e whakaatu atu ki te ao i ngā mea i kite ai, ā, i rongo ai au, e rite ana ki ngā whakakitenga o te Wairua kua whakaatuhia mai mō ngā mea e puta mai ai.

17 Nō reira ka tuhi atu au ki a koutou, e ngā Tauiwi, ā, ki a koutou anō hoki, e te whare o Iharaira, ina tīmata te mahi, ina whano tā koutou whakarite kia hoki ake ki ō koutou whenua tuku iho;

18 Āe rā, nana, ka tuhi atu au ki ngā tōpito katoa o te ao; āe rā, ki a koutou, e ngā hapū tekau mā rua o Iharaira, e whakawākia ai kia rite ki ā koutou mahinga e te tekau mā rua kua kōwhiria nei e Ihu hei apataki i roto i te whenua o Hiruharama.

19 Ā, kei te tuhi atu anō hoki au ki ngā mōrehu o tēnei iwi, e whakawākia ai e te tekau mā rua i kōwhiria ai e Ihu i tēnei whenua; ā, ka whakawākia rātou e tērā atu tekau mā rua i kōwhiria ai e Ihu i te whenua o Hiruharama.

20 Ā, koinei ngā mea e whakakitea mai nei e te Wairua ki ahau; nō reira au e tuhituhi atu nei ki a koutou katoa, kia mōhio ai koutou katoa me matua tū katoa koutou i mua i te aroaro o te nohoanga-whakawā a te Karaiti, āe rā, ko ngā wairua katoa nō te whānau tangata o Arama; ā, me tū ake koutou kia whakawākia ai i ā koutou mahinga, mehemea i pai, i kino rānei;

21 Kia whakapono anō hoki koutou ki te rongopai o Ihu Karaiti, e tau ai ki waenganui i a koutou; me ngā Hūrai anō hoki, te iwi kawenata a te Ariki, ka riro i a rātou ētahi atu tohu, atu i a ia te mea i kite ai, ā, i rongo ai rātou, ko taua Ihu, nā rātou nei i whakamate, ko ia te tino Karaiti me te tino Atua.

22 Ā, e hiahia ana au kia taea ai te whakapakepake e au ngā tōpito katoa o te ao kia rīpenetā me te whakarite kia tū ai i te aroaro o te nohoanga-whakawā o te Karaiti.