1 Ināianei ā i pahawa ake i te tau toru rau ono ngahuru mā toru ka haere ake ngā Nīwhai me ā rātou tauā ki te whawhai ki ngā Rāmana, ki waho atu i te whenua Whakangaromanga.

2 Ā, i pahawa ake, nā, ka āia atu anō ngā tauā a ngā Nīwhai ki te whenua Whakangaromanga. Ā, i a rātou e ngenge tonu ana, ka tau iho tētahi tauā Rāmana hou ki runga i a rātou; ā, ka tū tētahi whawhai nanakia, nā konā riro i ngā Rāmana te pā Whakangaromanga, ā, ka whakamatemate i ngā Nīwhai tokomaha, ā, ka kawea atu ngā mauhere tokomaha.

3 Ā, ka tahuti atu te toenga, ā, ka hono atu ki ngā tāngata o te pā Teanakuma. Nā, i takoto te pā o Teanakuma i ngā rohe e tata atu ana ki te takutai moana; ā, e tata atu ana ki te pā Whakangaromanga.

4 Ā, he mea nā te haerenga atu o ngā tauā Nīwhai ki ngā Rāmana i patupatua ai rātou; nā te mea kua kore i pērā, kāore i taea e ngā Rāmana te rapu kaha ki runga i a rātou.

5 Engari, nana, ka mau te hunga kino i ngā whakawākanga a te Atua; ā, mā te hunga kino e whakawhiu te hunga kino; nā te mea nā te hunga kino i whakaoho ake ngā ngākau o ngā tamariki a te tangata kia whakaheke ai i te toto.

6 Ā, i pahawa ake, nā, ka whakariterite ngā Rāmana kia whakaeke mai ki te pā o Teanakuma.

7 Ā, i pahawa ake i te tau toru rau ono ngahuru mā whā ka whakaeke mai ngā Rāmana ki te pā o Teanakuma, kia riro i a rātou te pā o Teanakuma anō hoki.

8 Ā, i pahawa ake, nā, ka panaia rātou, ā, ka āia atu e ngā Nīwhai. Ā, i te wā i kite ai ngā Nīwhai kua āia atu e rātou ngā Rāmana ka whakamanamana anō rātou mō tō rātou ake kaha; ā, ka haere atu i runga i tō rātou ake kaha, ā, ka riro anō i a rātou te pā Whakangaromanga.

9 Ināianei ā kua meatia ēnei mea katoa, ā, kua patupatua ngā mano i ngā taha e rua, i te taha ki ngā Nīwhai me ngā Rāmana.

10 Ā, i pahawa ake, nā, kua pahemo atu te tau toru rau ono ngahuru mā ono, ā, ka haere mai anō ngā Rāmana ki runga i ngā Nīwhai ki te whawhai; heoi, kāore tonu ngā Nīwhai i rīpenetā i te kino i mea ai rātou, engari ka hono tonu tā rātou mahi kino.

11 Ā, tē taea e te arero te whakaahua, te tuhituhi rānei i tētahi whakaaturanga tino tika e te tangata mō ngā āhuatanga whakaweriweri o te whakahekenga toto me te parekura i waenganui i te iwi, i te taha ki ngā Nīwhai me ngā Rāmana; ā, kua whakapakekehia ngā ngākau katoa, nā konā hono tonu tō rātou āhuareka i roto i te whakahekenga toto.

12 Ā, kīhai rawa he kino nui pēnei i roto i ngā tamariki katoa a Rīhai, kīhai rānei i waenganui i te whare katoa o Iharaira, e rite ana ki ngā kupu a te Ariki, e pērā ana i tērā i waenganui i tēnei iwi.

13 Ā, i pahawa ake, nā, ka riro i ngā Rāmana te pā Whakangaromanga, ā pēnei nā te mea he nui ake tō rātou tokomahatanga i tō ngā Nīwhai.

14 Ā, ka hīkoi whakamua atu rātou ki te pā o Teanakuma, ā, ka āia atu ngā tāngata o reira ki waho atu i a ia, ā, ka kahakina atu e rātou ngā mauhere maha, wahine mai, tamariki mai, ā, ka tāpaea atu rātou e rātou hei whakahere ki ō rātou atua whakapakoko.

15 Ā, i pahawa ake i te tau toru rau ono ngahuru mā whitu, i te riri ngā Nīwhai nā te whakaheretanga a ngā Rāmana i ā rātou wāhine me ā rātou tamariki, nā konā ka haere atu anō rātou ki ngā Rāmana i runga i te riri tino nui, nā konā patua anōtia ai e rātou ngā Rāmana, ā, ka āia atu rātou ki waho i ō rātou whenua.

16 Ā, kāore ngā Rāmana i haere mai anō ki ngā Nīwhai tae rawa atu ki te tau toru rau whitu ngahuru mā rima.

17 Ā, i tēnei tau ka haere iho mai rātou ki ngā Nīwhai i runga i ō rātou kaha katoa; ā, kīhai rātou i tatauria nā te nui o tō rātou tokomahatanga.

18 Ā, kāore ngā Nīwhai i whaikaha anō i runga i ngā Rāmana mai i tēnei wā haere ake nei, engari ka tahitahia atu e rātou me te mea nei he tōmairangi i mua i te rā.

19 Ā, i pahawa ake, nā, ka heke iho mai ngā Rāmana ki runga i te pā Whakangaromanga; ā, ka whawhaitia tētahi whawhai tino nanakia rawa atu i te whenua Whakangaromanga, i konā patua ai e rātou ngā Nīwhai.

20 Ā, ka tahuti atu anō rātou i tō rātou aroaro, ā, ka haere mai rātou ki te whenua Poata; ā, i reira rātou tū atu ai ki ngā Rāmana i runga i te māia tino nui, nā konā kīhai ngā Rāmana i patu i a rātou tae rawa atu ki te wā tuarua.

21 Ā, i te wā i haere mai ai rātou i te wā tuarua, ka āia atu, ā, ka parekuratia ngā Nīwhai ki tētahi parekura tino nunui; ka tāpaea anōtia ā rātou wāhine me ā rātou tamariki hei whakahere ki ngā whakapakoko.

22 Ā, i pahawa ake, nā, ka tahuti atu anō ngā Nīwhai i tō rātou aroaro, e kawea atu ana ngā tāngata whenua katoa e rātou, i roto i ngā pā me ngā papakāinga.

23 Ināianei ahau, a Moromona, e kite ana whano ka tūraki ngā Rāmana i te whenua, nō reira au haere atu ai ki te puke Himi, ā, ka tīkina ake ngā tuhinga katoa i hunaia ai e Amarona ki te Ariki.