1 Ināianei ā ka whakaotia e au taku tuhinga e pā ana ki te whakangaromanga o tōku iwi, ngā Nīwhai. Ā, i pahawa ake, nā, i hīkoi atu mātou ki mua i ngā Rāmana.

2 Ā nāku, nā Moromona, i tuhi tētahi pukapuka ki te kīngi o ngā Rāmana, ā, e hiahia ana kia tukuna mai mātou e ia kia huihui tahi i tō mātou iwi ki te whenua o Kamora, i te taha o tētahi puke i karangatia ai ko Kamora, ā, ka whawhai mātou ki a rātou i reira.

3 Ā, i pahawa ake, nā, i tukuna mai e te kīngi o ngā Rāmana taua mea i hiahia ai au.

4 Ā, i pahawa ake, nā, ka hīkoi atu mātou ki te whenua o Kamora, ā, ka whakatūria ō mātou tēneti āwhio noa i te puke o Kamora; ā, kei roto i tētahi whenua he maha ōna wai, ōna awa, me ōna mātāpuna; i manako mātou mā konei whaikaha ai mātou ki runga i ngā Rāmana.

5 Ā, i te pahemotanga atu o ngā tau toru rau waru ngahuru mā whā, kua whakaemiemia e mātou te toenga atu o tō mātou iwi ki roto i te whenua o Kamora.

6 Ā, i pahawa ake, nā, i te wā kua whakaemia ngātahitia tō mātou iwi ki roto i te whenua o Kamora, nana ahau, a Moromona, kua koroheketia haeretia au; i te mea e mōhio ana au koinei te whawhai whakamutunga o tōku iwi, me te whakahau mai a te Ariki kia kaua e tuku kia taka iho ngā tuhinga kua tukuna iho mai e ō tātou tūpuna, he mea tapu ērā, ki ngā ringaringa o ngā Rāmana, (nā te mea ka whakangaromia ērā e ngā Rāmana) nō reira i hanga au i tēnei tuhinga mai i ngā papa a Nīwhai, ā, kua hunaia ake i roto i te puke Kamora ngā tuhinga katoa kua tukuna mai nei ki ahau e te ringa o te Ariki, hāunga koinei papa ruarua nei e hoatu nei e au ki taku tama a Moronai.

7 Ā, i pahawa ake, nā, ka kite ināianei tōku iwi, me ā rātou hoawāhine me ā rātou tamariki i ngā tauā a ngā Rāmana e hīkoi mai ana ki a rātou; ā, ka tatari rātou i runga i taua wehi weriweri e whakakī nei i ngā uma o te hunga kino katoa, kia whiwhi ai i a rātou.

8 Ā, i pahawa ake, nā, ka haere mai rātou ki te whawhai ki a mātou, ā, kua kī ngā wairua katoa i te mataku nā te nui o tō rātou tokomahatanga.

9 Ā, i pahawa ake, nā, ka taka iho rātou ki runga i tōku iwi ki te hoari, me te kōpere, me te pere, me te toki, me ērā tū rākau whawhai katoa.

10 Ā, i pahawa ake, nā, ka tuakina iho aku tāne, āe rā, ko taku tekau mano pū anō i ahau, ā, ka hinga iho au i runga i te taotūnga ki waenganui i a rātou; ā, ka hipa atu rātou i ahau nā konā kīhai i whakamutua tōku oranga.

11 Ā, i te wā kua haere rātou ki waenganui me te tua iho i tōku iwi katoa hāunga ko ngā mea rua tekau mā whā o mātou, (ko taku tama a Moronai tētahi o aua tāngata) ā, i te mea ko mātou ngā mōrehu o tō mātou iwi, ka kitea i te aonga ake, i te wā i hoki atu ngā Rāmana ki ō rātou hōpuni, mai i te tihi o te puke Kamora, ko te tekau mano o tōku iwi kua tuakina iho, kua ārahina atu ki mua e ahau.

12 Ā, i kite anō te tekau mano o tōku iwi kua ārahina atu e taku tama a Moronai.

13 Ā nana, kua hinga iho te tekau mano o Kikirona, ko ia anō hoki i waenganui.

14 Ā, kua hinga a Rama me tana tekau mano; me Kirikara me tana tekau mano; me Rimiha me tana tekau mano; me Honeama kua hinga me tana tekau mano; me Kameniha, me Moronaihā, me Anatianuma, me Hipiroma, me Heme, me Hoha, kua hinga rātou katoa me ā rātou ake tekau mano.

15 Ā, i pahawa ake, nā, he tekau anō ngā mea i hinga ai i te hoari, me ā rātou tekau mano anō; āe rā, ko tōku iwi katoa, hāunga ko aua rua tekau mā whā kei tōku taha, me ētahi hunga ruarua i mawhiti atu ki ngā whenua ki te tonga, ā, kua whakawhiti atu anō ētahi mea ruarua ki ngā Rāmana, kua hinga; ā, i te takoto iho ō rātou kikokiko, ō rātou kōiwi, me ō rātou toto ki runga i te mata o te whenua, he mea waiho e te hunga nāna nei rātou i patu kia horokiwa ai i runga i te whenua, ā, kia ngāhorohoro iho, ā, kia hoki anō ki tō rātou whaea, ki te whenua.

16 Ā, i haehaetia ake tōku wairua e te mamae, nā te hunga kua whakamatea nei o tōku iwi, ā, ka karanga ake au:

17 Auē, e koutou, e ngā mea ātaahua, me pēhea koutou i wehe atu ai i ngā huarahi o te Ariki! Auē, e koutou, e ngā mea ātaahua, me pēhea koutou i whakaparahako i taua Ihu, i tū ai me ngā ringaringa e tūwhera ana kia whakawhiwhia nei koutou!

18 Nana, mehemea kua kore koutou i pēnei, kua kore koutou i hinga. Engari nana, kua hinga koutou, ā, kei te tangi au i tō koutou ngaronga.

19 Auē, e koutou, e ngā tama me ngā tamāhine ātaahua, e koutou ngā matua me ngā whaea, e koutou e ngā hoatāne me ngā hoawāhine, e koutou ngā mea ātaahua, me pēhea koutou i hinga iho ai!

20 Engari nana, kua haere koutou, ā, tē taea koutou e aku auē te whakahoki mai.

21 Ā, e whakatata mai ana te rā me kākahu te hanga matemate i te hanga matekore, ā, ka meinga ākuanei ēnei tīnana e horo ana i runga i te pirau hei tīnana pirau kore; kātahi ka matua tū koutou i mua i te nohoanga-whakawā o te Karaiti, kia whakawākia ai e pā ana ki ā koutou mahinga; ā, ki te mea he tika koutou, kātahi koutou ka manaakitia ngātahitia me ō koutou tūpuna kua riro atu i mua i a koutou.

22 Auē, me i rīpenetā koutou i mua i te taunga iho o tēnei whakangaromanga nui ki runga i a koutou. Engari nana, kua haere koutou, ā, e mōhio ana te Matua, āe rā, te Matua Ora Tonu o te rangi, i tō koutou āhuatanga; ā, ka meatia koutou e ia kia rite ki tana tika me tana aroha.