1 Ā, i pahawa ake, nā, ka haere atu au ki waenganui i ngā Nīwhai, ā, ka rīpenetā au i taku oati i oati ai au kia kaua e āwhina i a rātou; ā, ka riro mai anō ki ahau te mana whakahau i ō rātou tauā, nā te mea i titiro mai rātou ki ahau me te mea nei e āhei ana i a au te whakaputa i a rātou i ō rātou whakamamaetanga.

2 Engari nana, kāore ōku tūmanako, nā te mea i mōhio au ki ngā whakawākanga a te Ariki e tau ai ki runga i a rātou; nā te mea kāore rātou i rīpenetā i ō rātou hara, engari i totohe rātou mō ō rātou oranga, heoi, kīhai i karanga ake ki te Mea nāna nei rātou i hanga.

3 Ā, i pahawa ake, nā, i huaki mai ngā Rāmana ki a mātou i a mātou e tahuti atu ana ki te pā o Hōrana; engari nana, i āia atu rātou ki muri nā konā kīhai i riro i a rātou te pā i tērā wā.

4 Ā, i pahawa ake, nā, ka huaki mai anō rātou ki a mātou, ā, ka pupuri mātou i te pā. Ā, i reira anō ētahi atu pā i puritia ai e ngā Nīwhai, nā konei aukatia atu ai rātou e aua pā kaha kia kore ai e taea e rātou te haere atu ki te whenua e takoto mai ana i mua i a mātou, kia whakangaromia ai ngā tāngata o tō mātou whenua.

5 Engari i pahawa ake, nā, ko ngā whenua katoa i kapea ai e mātou, ā, ka whakamatea e ngā Rāmana ngā tangata kīhai i whakaminea ki roto, ā, ka tahuna ō rātou pā, ō rātou papakāinga, me ō rātou pā nui ki te ahi; ā pēnei pahemo atu ngā tau toru rau whitu ngahuru mā iwi.

6 Ā, i pahawa ake i te tau toru rau waru ngahuru ka haere mai anō ngā Rāmana ki a mātou ki te whawhai, ā, ka tū māia atu mātou ki a rātou; engari auare ake, nā te mea anō te nui o tō rātou tokomahatanga, nā, ka takatakahia iho te iwi o ngā Nīwhai e ō rātou waewae.

7 Ā, i pahawa ake, nā, ka rere atu anō mātou, ā, ka mawhiti atu te hunga katoa i tere ake tā rātou rerenga i tā ngā Rāmana, ā, ka haua iho, ā, ka whakangaromia te hunga kāore i tere ake tā rātou rere atu i tā ngā Rāmana.

8 Ināianei ā nana, kāore ōku, ō Moromona hiahia ki te whakaoho ake i te wairua o te tangata i runga i te makanga atu ki mua i a rātou tētahi āhuatanga weriweri o te whakahekenga toto me te parekura pērā i te mea i huapae mai ai i mua i ōku karu; engari au, e mōhio ana me matua whakamōhiotia atu ēnei mea, me ngā mea katoa anō e huna ana me matua whakakitea ki runga i ngā tuanui-whare—

9 Waihoki, ka puta anō tētahi mātauranga mō ēnei mea ki tētahi toenga o tēnei iwi, ki ngā Tauiwi anō hoki, kua kōrerotia ake e te Ariki mā rātou tēnei iwi e whakamarara atu, ā, ka tatauria tēnei iwi hei mea korekore noa iho i waenganui i a rātou—nō reira au tuhituhi atu ai i tētahi whakarāpopototanga, tē whaimāia kia tuhia tētahi tuhinga whānui mō ngā mea kua kitea nei e au, nā te whakahaunga kua whiwhi nei au, waihoki, kia kore ai e tino nui rawa atu tō koutou pōuri nā te whakarihariha o tēnei iwi.

10 Ināianei ā nana, ka kōrero au i tēnei ki ō rātou uri, ki ngā Tauiwi anō hoki e matapopore nei i te whare o Iharaira, ngā mea e kitea ana, ā, e mōhio ana i hea ahu mai ai ēnei manaakitanga.

11 Nā te mea e mōhio ana ahau ka pōuri te hunga pērā i te aituā o te whare o Iharaira; āe rā, ka pōuri rātou i te whakangaromanga o tēnei iwi; ka pōuri rātou mō tēnei iwi i te korenga o tā rātou rīpenetā me kore pea rātou e tauapohia i roto i ngā ringaringa o Ihu.

12 Nā, kua tuhituhia atu ēnei mea ki ngā mōrehu o te whare o Hākopa; ā, kua tuhia ērā mea e hāngai ana ki tēnei āhuatanga, nā te mea e mōhiotia ana e te Atua, nā, e kore te whakarihariha e whakaputa mai i ērā mea ki a rātou; ā, e tika ana kia hunaia ake ērā mea ki te Ariki kia puta mai ai ērā mea i tōna ake wā.

13 Ā, ko tēnei te whakahaunga i whiwhi nei au; ā nana, ka puta mai ērā mea e rite ana ki te whakahau a te Ariki, ina kite ana ia e tika ana, i runga i tōna whaimātauranga.

14 Ā nana, ka haere puta anō ērā mea ki ngā Hūrai whakaponokore; ā, ka puta ērā mea mō tēnei āhuatanga—kia whakapakepakehia rātou ko Ihu te Karaiti, te Tama a te Atua e ora ana; kia whakaputa mai te Matua, mā tana Mea Arohaina ake, tana take nui mau tonu, i tana whakahokinga i ngā Hūrai, i te whare rānei o Iharaira, ki tō rātou whenua tuku iho, kua hoatu nei e te Ariki tō rātou Atua ki a rātou, tae atu ki te whakatutukitanga i tana kawenata;

15 Waihoki, kia kaha ake te whakapono o tēnei iwi i tana rongopai, e puta atu ki a rātou mai i ngā Tauiwi; nā te mea ka whakamararatia atu tēnei iwi, ā, ka meinga hei iwi uriuri, hei paru, hei iwi weriweri, i kō atu i ērā āhuatanga kua tau mai ki waenganui i a mātou i mua, āe rā, i waenganui pū anō rānei i ngā Rāmana, ā, ka pēneitia nā tō rātou whakaponokore me tā rātou mahi whakapakoko.

16 Nana rā, kua mutu tā te Wairua o te Ariki akiaki i ō rātou tūpuna; ā, motu kē ana rātou i te Karaiti me te Atua i te ao; ā, kua āia atu rātou me te mea nei he pāpapa wīti i mua i te hau.

17 He iwi āhuareka rātou i tōna wā, ā, i a rātou te Karaiti hei hēpara mō rātou; āe rā, i ārahina rātou e te Atua te Matua pū anō.

18 Engari ināianei, nana, e ārahina ana rātou huri noa e Hātana, he pērā pū anō i te pāpapa i mua i te hau, anō nei rānei he waka e pīoioi ana i ngā ngaru, kāore ōna punga, kāore hoki rānei ōna mea hei urungi; ā, e rite ana rātou ki a ia.

19 Ā nana, kua waiho atu e te Ariki ō rātou manaakitanga, i āhei ai i a rātou te whiwhi i runga i te whenua, mō ngā Tauiwi e nōhia ai te whenua.

20 Engari nana, ka pahawa ake, nā, ka āia atu rātou, ā, ka whakamararatia atu e ngā Tauiwi; ā, whai muri iho i tā rātou whakamararatanga atu e ngā Tauiwi, nana, kātahi te Ariki ka mahara ki te kawenata i kawenatatia e ia ki a Aperahama, ā, ki te whare katoa o Iharaira.

21 Waihoki, ka maumahara te Ariki i ngā inoi a te hunga tika, kua tukuna ake ki a ia mō rātou.

22 Kātahi, E koutou e ngā Tauiwi, me pēhea koutou e tū ai i te aroaro o te mana o te Atua, ki te kore koutou e rīpenetā, ā, e tahuri atu i ā koutou mahi kino?

23 Kāore rānei koutou e mōhio ana kei roto koutou i ngā ringaringa o te Atua? Kāore rānei koutou e mōhio ana nōna te mana katoa, ā, ka pōkaia te whenua i runga i tana whakahau nui anō nei he pukapuka pōkai?

24 Nō reira, e rīpenetā koutou, whakaitia koutou e koutou anō i mua i tōna aroaro, kei puta mai ia i runga i te tika ki a koutou—kei haere atu ētahi mōrehu o ngā uri o Hākopa ki waenganui i a koutou anō nei he raiona, ā, ka haehaetia koutou, ā, kāore he mea hei whakaputa.