1 Ināianei ā, nana, kei te hiahia au kia paku kōrero atu ki ngā mōrehu o tēnei iwi kua tohua nei, mehemea ka hoatu e te Atua aku kupu ki a rātou, kia mōhio ai rātou e pā ana ki ngā mea o ō rātou tūpuna; āe rā, kei te kōrero atu au ki a koutou, e koutou ngā mōrehu o te whare o Iharaira; ā, koinei ngā kupu e kōrero ai au ki a koutou:

2 E mōhio ana rānei koutou nō te whare o Iharaira koutou.

3 E mōhio ana rānei koutou me tae mai koutou ki te rīpenetātanga, ki te kore, kua kore koutou e whakaorangia.

4 E mōhio ana rānei koutou me whakatakoto iho e koutou ā koutou rākau whawhai, ā, kia mutu atu tā koutou āhuareka atu anō i ngā rā e takoto ake nei ki te whakaheke toto, kia kaua e mau ki ērā mea anō, hāunga i runga i te whakahau a te Atua ki a koutou.

5 E mōhio ana rānei koutou me tae mai koutou ki te mātauranga a ō koutou tūpuna, ā, kia rīpenetā i ō koutou hara me ō koutou hē, ā, kia whakapono i a Ihu Karaiti, nā, koia te Tama a te Atua, ā, kua whakamatea ia e ngā Hūrai, ā, kua ara ake anō ia i runga i te mana o te Matua, nā konā kua wikitōria ia i runga i te rua tūpāpaku; waihoki, kua horomia ake e ia te wero o te mate.

6 Ā, ka pahawa ake i a ia te aranga ake o te hunga mate, nā konā me ara ake te tangata kia tū ai i te aroaro o te nohanga-whakawā.

7 Ā, kua pahawa ake i a ia te hokonga o te ao, nā konā ka noho te tangata e kitea harakoretia ana i tōna aroaro i te rā whakawā ki te aroaro o te Atua i tōna kīngitanga, kia waiata mutungakore me ngā kaiwaiata i runga rā i ngā whakamoemititanga, ki te Matua, ā, ki te Tama anō hoki, ā, ki te Wairua Tapu anō hoki, he Atua kotahi rātou, i tētahi āhuatanga harikoa kāore ōna mutunga.

8 Nō reira me rīpenetā koutou, ā, kia rumakina i runga i te ingoa o Ihu, ā, kia mau ki te rongopai o te Karaiti, e whakatakotohia iho ai ki mua i a koutou, ehara i te mea i roto anake i tēnei tuhinga, engari i roto anō hoki i te tuhinga e puta ai ki ngā Tauiwi mai i ngā Hūrai, ko taua tuhinga e puta mai ai i ngā Tauiwi ki a koutou.

9 Nana rā, kua tuhia tēnei mea i runga i te whakaaro kia whakapono ai koutou ki tērā; ā, ki te whakapono koutou ki tērā ka whakapono anō koutou ki tēnei; ā, ki te whakapono koutou ki tēnei ka mōhio koutou e pā ana ki ō koutou tūpuna, me ngā mahinga whakamīharo i meatia ai e te mana o te Atua ki waenganui i a rātou.

10 Ā, ka mōhio anō hoki koutou e pā ana ki ngā uri o Hākopa; nō reira kua tatauria iho koutou i waenganui i te iwi o te kawenata tuatahi; ā, mehemea ka whakapono koutou ki te Karaiti, kātahi ka rumakina, ki te wai tuatahi, kātahi ki te ahi me te Wairua Tapu, e whai ana i te tauira a te Kaiwhakaora, e rite ana ki tērā i whakahaua ai tātou, ka ora koutou hei te rā whakawā. Āmine.