1 Ināianei ā, e kōrero ana anō hoki au e pā ana ki te hunga kāore nei i te whakapono i te Karaiti.

2 Nana, ka whakapono rānei koutou hei te rā o tā koutou toronga—nana, ina haere mai te Ariki, āe rā, ko taua rā nui pū anō e pōkaia ake ai te whenua kia rite ai ki tētahi pukapuka pōkai, ā, ka rewa iho ngā pūmotu i te wera whitawhita, āe rā, hei taua rā nui ina kawea mai koutou kia tū ai i te aroaro o te Reme a te Atua—ko reira koutou kī ake ai kāore he Atua?

3 Ko reira koutou whakakore tonu i te Karaiti, ka taea rānei e koutou te titiro ake ki te Reme a te Atua? E whakaaro ana rānei koutou ka noho koutou me ia i raro i tētahi mōhioranga ki tō koutou kaniawhea? E whakaaro ana rānei koutou ka hari koutou kia noho ki tērā Mea Tapu, i te mea e ohooho ana ō koutou wairua i runga i te mātauranga ki te kaniawhea mō tā koutou takahi noa i āna ture?

4 Nana, ko taku kupu tēnei ki a koutou ka nui ake tō koutou pōuri ki te noho tahi me tētahi Atua tapu, ki tētahi Atua tika i runga i te mātauranga ki tō koutou poke i tōna aroaro, i tō koutou me i noho tahi me ngā wairua kua whakawākia kia noho i te ao rēwera.

5 Nana rā, ina kawea mai koutou kia kite ai i tō koutou tahanga i te aroaro o te Atua, me te korōria anō hoki o te Atua, me te tapu o Ihu Karaiti, ka tahuna ki runga i a koutou he kapura ahi e kore nei e taea te tinei.

6 Kāti rā e koutou e te hunga whakaponokore, tahuri mai koutou ki te Ariki; karanga kaha ake ki te Matua i runga i te ingoa o Ihu, me kore pea koutou e kitea kohakoretia, he poke kore, he pūrotu, ā, he mā, i te mea kua whakamākia e te toto o te Reme, hei taua rā whakamutunga nui.

7 Hei āpiti anō, kei te kōrero atu au ki a koutou te hunga e whakakore i ngā whakakitenga a te Atua, ā, e kī ake ana kua whakamutua atu ērā mea, nā, kāore he whakakitenga, he poropititanga rānei, he takoha rānei, he mahutanga rānei, he kōrerotanga rānei i ngā reo kē, me te whakamāoritanga i ngā reo;

8 Nana ko taku kupu tēnei ki a koutou, kāore te tangata e mōhio ana ki te rongopai a te Karaiti e whakakore nei i ēnei mea; āe rā, kāore anō ia kia pānui i ngā karaipiture; mehemea i pānui, kāore ia i te mārama ki ērā mea.

9 Nā te mea kāore nei mātou e pānui nei he rite te Atua inānahi, ināianei, ā, āke tonu atu, ā, kāore he paku ātarangi o te panonitanga i roto i a ia?

10 Ināianei ā, mehemea kua whakaarohia ake e koutou tētahi atua e tīni ana, ā, kei roto rā hoki tētahi ātarangi panonitanga, kātahi rā kua whakaarohia ake e koutou anō tētahi atua ehara nei i te Atua mahi merekara.

11 Engari nana, māku koutou e whakakite atu tētahi Atua mahi merekara, ko te Atua pū anō o Aperahama, ā, me te Atua anō o Īhaka, me te Atua o Hākopa; ā, ko taua Atua anō nāna nei ngā rangi me te whenua i hanga, me ngā mea katoa kei roto.

12 Nana, nāna nei a Arama i hanga, ā, nā Arama puta mai ai te takanga o te tangata. Ā, nā te takanga o te tangata haere mai ai a Ihu Karaiti, ko te Matua pū anō o te Tama; ā, nā te haerenga mai a te Karaiti puta mai ai te hokonga o te tangata.

13 Ā, nā te hokonga o te tangata, i puta mai ai i a Ihu Karaiti, kua whakahokia mai rātou ki te aroaro o te Ariki; āe rā, mā konei hokona ai ngā tāngata katoa, nā te mea ka puta i te matenga o te Karaiti te aranga, e puta ake ai i reira tētahi hokonga mai i tētahi moe mutunga kore, mai i taua moe whakaohongia ake ai ngā tāngata katoa i runga i te mana o te Atua ina whakatangihia ake te tētere; ā, ka puta mai rātou, nui mai, iti mai, ā, ka tū katoa rātou i mua i tōna pae, I te mea kua hokona, ā, kua wetekina iho i tēnei here mau tonu o te mate, ko taua matenga he matenga tīnana.

14 Kātahi ka puta mai te whakawākanga o te Mea Tapu ki runga i a rātou; kātahi ka puta mai te wā e poke tonu ai te mea e poke ana; ā, e tika tonu ai te mea e tika ana; e hari tonu ai te mea e hari ana; ā, e pōuri tonu ai te mea e pōuri ana.

15 Ināianei ā, E koutou katoa kua whakaarohia ake e koutou anō tētahi atua tē taea te mahi merekara, ka ui atu au ki a koutou, kua pahemo atu ēnei mea katoa, kua kōrerotia nei? Kua tae mai te mutunga? Nana ko taku kupu tēnei ki a koutou, Kāo; ā, kāore anō te Atua kia mutu hei Atua mahi merekara.

16 Nana, ehara rānei ngā mea i meatia nei e te Atua i te mea whakamīharo i ō koutou karu? Āe rā, ko wai e taea te mārama ngā mahinga whakamīharo a te Atua?

17 Ko wai e kī ake ai ehara i te merekara te putanga ake o te rangi me te whenua i runga tana kupu; ā, nā te kaha o tana kupu hangaia ai te tangata mai i te puehu o te whenua; ā, nā te kaha o tana kupu kua meatia ngā merekara?

18 Ā, ko wai e kī ake ai kāore a Ihu Karaiti i mea ai i ngā merekara maha? Ā, he maha ngā merekara nunui i meatia ai e ngā ringaringa o ngā āpōtoro.

19 Ā, mehemea i mea ai ētahi merekara, nā, he aha i mutu ai i te Atua hei Atua mahi merekara, heoi, he Mea panoni kore tonu? Ā nana, ko taku kupu tēnei ki a koutou kāore ia e panoni; mehemea i pērā kua mutu ia hei Atua; ā, kāore ia e mutu hei Atua, ā, he Atua mahi merekara ia.

20 Ā, ko te take e mutu ai āna mahi merekara i waenganui i ngā tamariki a te tangata he mea nā tō rātou whakaponokore, ā, ka māwehe atu i te huarahi tika, ā, kāore e mōhio ana ki te Atua hei whakawhirinakitanga mō rātou.

21 Nana, ko taku kupu tēnei ki a koutou, ko te tangata e whakapono ana i te Karaiti, kāore e rangirua ana, ka tukuna atu ki a ia ērā mea katoa e tonoa ai e ia ki te Matua i runga i te ingoa o te Karaiti; ā, koinei te whakaari ki a koutou katoa, ki ngā tōpito katoa anō o te ao.

22 Nana rā, pēnei tā Ihu Karaiti kī, te Tama a te Atua, ki āna apataki e noho mai ai, āe rā, ki āna apataki katoa anō hoki, i te rongonga o te whakaminenga: Haere koutou ki te ao katoa, ā, kauhautia atu te rongopai ki ngā mea katoa;

23 Ā, ka whakaorangia te tangata e whakapono ai, ā, e rumakina ai, engari ka pāpunitia te tangata e kore nei e whakapono;

24 Ā, ka whai atu ēnei tohu i te hunga whakapono—ka peia atu rātou i ngā rēwera i runga i tōku ingoa; ka kōrero rātou i ngā reo hou; ka tango ake rātou i ngā nākahi; ā, ki te inu ake rātou i ngā mea whakamate tangata e kore rātou e tūkinotia; ā, ka whakapā i ō rātou ringaringa ki runga i te hunga tūroro, ā, ka ora;

25 Ā, ko te tangata e whakapono ai i tōku ingoa, kāore e rangirua ana, ka whakaū atu au ki a ia aku kupu katoa, tae atu ana ki ngā tōpito katoa o te ao.

26 Ināianei ā, nana, ko wai e taea te tū atu ki ngā mahinga a te Ariki? Ko wai e taea te whakakore i āna kōrero? Ko wai e tū atu ki te mana nui o te Ariki? Ko wai e whakahāwea i ngā mahinga a te Ariki? Ko wai e whakahāwea i ngā tamariki a te Karaiti? Nana, ka mīharo koutou, ā, ka ngaro koutou katoa te hunga whakahāwea i ngā mahinga a te Ariki.

27 Kāti rā, kaua e whakahāwea, kaua e mīharo, engari whakarongo ki ngā kupu a te Ariki, ā, uia atu te Matua i runga i te ingoa o Ihu mō ngā mea katoa e hapa ana koutou. Kaua e rangirua, engari kia kaha te whakapono, ā, kia tīmata pērā i ngā wā onamata, ā, kia haere mai ki te Ariki i runga i tō ngākau katoa, ā, whakamahia tō ake whakaoranga i runga i te wehi me te wiriwiri i tōna aroaro.

28 Kia matatau i roto i ngā rā o tō koutou whakamātautauranga; tīhoretia iho i a koutou ngā mea poke katoa; kaua e ui atu, kia taea ai e koutou te whakapau i ō koutou mate kanehe, engari ui atu i runga i te kaha toka tū moana, kia kore ai koutou e tuku i tētahi whakawainga, engari kia mahi koutou ki te Atua pono, ki te Atua e ora ana.

29 Me titiro koutou kei rumakina koutou i runga i te hē; titiro kei kai i te hakarameta o te Karaiti i runga i te hē; engari titiro kia mahia ēnei mea katoa i runga i te tika, ā, mahia ēnā i runga i te ingoa o Ihu Karaiti, te Tama a te Atua e ora ana; ā, ki te pēnei koutou, me te ū ki te mutunga, e kore nei koutou e makaia ki waho.

30 Nana, e kōrero ana au ki a koutou me te mea nei kei te kōrero au mai i te hunga mate; nā te mea e mōhio ana ahau ka riro i a koutou aku kupu.

31 Kaua e whakahē i a ahau nā ōku ngoikoretanga, i tōku matua rānei, nā ōna ngoikoretanga, i a rātou anō rānei te hunga kua tuhia i mua i a ia; engari me tuku whakawhetai kē koutou ki te Atua mōna ō mātou ngoikoretanga i whakakite atu ai ki a koutou, kia ako koutou me pēhea e mātau ake i a mātou.

32 Ināianei ā, nana, kua tuhia tēnei tuhinga e mātou e hāngai ana ki ō mātou mātauranga, i roto i ngā pū e karangatia nei i waenganui i a mātou ko te Ihipiana rerekē, he mea tuku iho, ā, he mea tīni e mātou, e rite ana ki te āhuatanga o te kōrero.

33 Ā, mehemea i rite te nui o ā mātou papa kua tuhia iho i te reo Hiperu; engari kua tīnia anōtia te reo Hīperu e mātou anō hoki; ā, me i taea e mātou te tuhi i te reo Hīperu, nana, kua kore he ngoikoretanga i roto i tō mātou tuhinga.

34 Engari e mōhio ana te Ariki ki ngā mea kua tuhituhi, waihoki kāore he iwi atu anō e mōhio ana ki tō mātou reo; ā, nā te mea kāore he iwi atu anō e mōhio ana ki tō mātou reo, nō reira ia whakarite ai he huarahi mō tōna whakamāoritanga.

35 Ā, kua tuhia ēnei mea katoa kia mā ai i a mātou ō mātou kākahu i ngā toto o ō mātou tuakana, ko rātou nei kua memeha atu i runga i te whakaponokore.

36 Ā nana, koinei mea kua manakohia mai e koutou e pā ana ki ō mātou tuakana, āe rā, ko tā rātou whakahokinga pū anō ki te mātauranga o te Karaiti, he mea e rite ana ki ngā inoi o te hunga tapu katoa kua noho i te whenua.

37 Ā, mā te Ariki a Ihu Karaiti e tuku kia whakautua ā rātou inoi e rite ana ki tō rātou whakapono; ā, mā te Atua te Matua e mahara ki te kawenata i kawenata ai ia ki te whare o Iharaira; ā, māna rātou e manaaki mō āke tonu atu, mā roto i te whakapono i runga i te ingoa o Ihu Karaiti. Āmine.