မော်ရော်နိုင်း ၆

အခန်းကြီး ၆

နောင်တရသောလူတို့သည် ဗတ္တိဇံခံပြီး၊ မိဿဟာယဖွဲ့ကြ၏—အသင်းတော်၏အသင်းဝင်၊ နောင်တရသောသူတို့သည် ခွင့်လွှတ်ခံရကြ၏—အစည်းအဝေးများကို သန့်ရှင်းသောဝိညာဉ်တော်၏တန်ခိုးအားဖြင့် စီမံကြ၏။ အေဒီ ၄၀၁–၄၂၁ ခန့်။

၁ ယခုမူကား၊ ငါသည် ဗတ္တိဇံအကြောင်းကို ပြော၏။ ရှုလော့၊ အသင်းလူကြီးများ၊ ယဇ်ပုရောဟိတ်များနှင့် ဆရာများသည် ဗတ္တိဇံခံကြ၏။ သူတို့သည် ထိုသို့ပြုဖို့ ထိုက်တန်သော အကျိုးကို ဖြစ်အပ်စေခြင်းမရှိလျှင်၊ ဗတ္တိဇံမခံရကြ။

၂ သူတို့သည် ကျိုးပဲ့သောနှလုံးသားနှင့် ကြေကွဲသောစိတ်ဖြင့်ထွက်မလာကြ၊ ထို့အတူ သူတို့၏ခပ်သိမ်းသောအပြစ်များမှ အမှန်ပင်နောင်တရကြကြောင်း အသင်းတော်သို့ သက်သေမခံကြလျှင် ဗတ္တိဇံပေးရန် အဘယ်သူ့ကိုမျှ လက်မခံ။

၃ ထို့အတူ၊ သူတို့သည် ခရစ်တော်၏နာမတော်ကို မခံယူ၊ အဆုံးတိုင်အောင် သူ့ကို အစေခံဖို့ သန္နိဌာန်မရှိကြလျှင်၊ ဗတ္တိဇံကို အဘယ်သူမျှ မရရှိကြ။

၄ ထို့အတူ၊ သူတို့သည် ဗတ္တိဇံအဖို့ လက်ခံခြင်းကို ရရှိကြပြီး၊ သန့်ရှင်းသောဝိညာဉ်တော်၏တန်ခိုးအားဖြင့်၊ အရှိန်ဩဇာသက်ရောက်၍ သန့်စင်ကြပြီးနောက်တွင်၊ ခရစ်တော်၏အသင်းတော်ရှိလူများ၌ ရေတွက်ခံရကြ၏။ သူတို့၏အမည်တို့ကိုလည်း မှတ်ယူထားသည်မှာ၊ သူတို့ယုံကြည်ခြင်း၏ ဖန်တီးရှင်နှင့် စုံလင်စေသောသူ ခရစ်တော်၏ ကောင်းမှုများကိုသာ မှီခိုလျက်၊ သူတို့ကို မှန်သောတရားလမ်း၌ ရှိစေဖို့၊ ဆုတောင်းခြင်းဖြင့် အစဉ်မပြတ် စောင့်ကြည့်စေဖို့၊ သူတို့ကို အောက်မေ့၍၊ ဘုရားသခင်၏ကောင်းမြတ်တော်မူသော နှုတ်ကပတ်တော်အားဖြင့် အားဖြည့်နိုင်ကြခြင်းငှာပေတည်း။

၅ အသင်းတော်သည်လည်း အစာရှောင်ခြင်းငှာနှင့် ဆုတောင်းခြင်းငှာ၊ ထို့အတူ၊ သူတို့စိတ်ဝိညာဉ်၏ကောင်းကျိုးကို အချင်းချင်း ပြောဆိုကြခြင်းငှာ၊ အကြိမ်ကြိမ် အတူတကွတွေ့ဆုံစုဝေးကြ၏။

၆ ထို့အတူ၊ သူတို့သည် ကိုယ်တော်ရှင်ယေရှုကို အောက်မေ့ကြဖို့ရာ၊ မုန့်နှင့် စပျစ်ရည်ကို သုံးဆောင်ကြခြင်းငှာ၊ အကြိမ်ကြိမ် အတူတကွ တွေ့ဆုံစုဝေးကြ၏။

၇ သူတို့သည် မိမိတို့၌ ဒုစရိုက်မရှိရမည့်အကြောင်း ကျင့်စောင့်ဖို့ ဂရုပြုကြ၏။ ဒုစရိုက်ကိုကျူးလွန်ကြောင်း တွေ့ရသူအဘယ်သူကိုမဆို၊ အသင်းတော်မှ သက်သေသုံးဦးတို့က အသင်းလူကြီးတို့ရှေ့ ၌ ပြစ်ဒဏ်ချမှတ်ပြီး၊ သူတို့သည် နောင်တရခြင်းမရှိ၊ ထို့အတူ ဝန်ခံခြင်းမရှိကြလျှင်၊ သူတို့၏အမည်များ ပယ်ဖျောက်ခံရကြ၏။ သူတို့သည် ခရစ်တော်၏လူမျိုးတို့၌ ရေတွက်ခြင်းကိုလည်း မခံရကြ။

၈ သို့ရာတွင်၊ သူတို့သည် စစ်မှန်သောရည်ရွယ်ချက်ဖြင့် အကြိမ်ကြိမ်နောင်တရ၍၊ ခွင့်လွှတ်ခြင်းကို ရရှိခြင်းငှာ ကြိုးစားအားထုတ်သမျှ၊ ခွင့်လွှတ်ခံရကြ၏။

၉ သူတို့၏အစည်းအဝေးများကိုလည်း ဝိညာဉ်တော်၏ပြုပြင်ခြင်းတို့အတိုင်း၊ သန့်ရှင်းသောဝိညာဉ်တော်၏တန်ခိုးအားဖြင့်၊ အသင်းတော်က စီမံ၏။ အကြောင်းမူကား၊ ဟောပြောခြင်းငှာဖြစ်စေ၊ တိုက်တွန်းခြင်းငှာဖြစ်စေ၊ ဆုတောင်းခြင်းငှာဖြစ်စေ၊ ပဌနာပြုခြင်းငှာဖြစ်စေ၊ သီဆိုခြင်းငှာဖြစ်စေ သူတို့ကို သန့်ရှင်းသောဝိညာဉ်တော်၏ တန်ခိုးလမ်းညွှန်တော်မူသည့်အတိုင်း၊ ထိုကဲ့သို့ပင် ပြုကြ၏။