မော်ရော်နိုင်း ၈

အခန်းကြီး ၈

ကလေးသူငယ်တို့၏ဗတ္တိဇံသည် ဆိုးသောစက်ဆုပ်ရွံရှာဖွယ်အမှုဖြစ်၏—ကလေးသူငယ်တို့သည် အပြစ်ဖြေခြင်းမင်္ဂလာကြောင့် ခရစ်တော်အားဖြင့် အသက်ရှင်ကြ၏—ယုံကြည်ခြင်း၊ နောင်တရခြင်း၊ သိမ်မွေ့အောက်ကျို့ခြင်းနှင့် စိတ်နှလုံးနှိမ့်ချခြင်း၊ သန့်ရှင်းသောဝိညာဉ်တော်ကို လက်ခံရရှိခြင်းနှင့် အဆုံးတိုင်အောင်တည်ကြည်ခြင်းတို့သည် ကယ်တင်ခြင်းသို့ ဦးဆောင်၏။ အေဒီ ၄၀၁–၄၂၁ ခန့်။

၁ ဤအရာသည်ကား၊ ငါ၏အဘမော်မုန်က ငါမော်ရော်နိုင်းထံသို့ ရေးထားသည့် အမှာစာဖြစ်၏။ အမှုတော်ဆောင်ခြင်းသို့ ငါ့ကို ခေါ်သွင်းပြီးနောက် မကြာမြင့်မီတွင် ထိုအမှာစာကို ရေး၏။ ဤသို့အားဖြင့် သူသည် ငါ့ထံသို့ ရေး၍ဆိုလေသည်ကား၊

၂ ငါ၏ချစ်သား၊ မော်ရော်နိုင်း၊ သင့်ကို သင်၏ကိုယ်တော်ရှင်ယေရှုခရစ်တော်က အောက်မေ့တော်မူလျက်၊ သင့်ကို သူ၏အမှုတော်ဆောင်ခြင်းနှင့် သူ၏သန့်ရှင်းသောအမှုတော်၌ ခန့်အပ်တော်မူ၍၊ ငါသည် လွန်စွာရွှင်လန်းဝမ်းမြောက်၏။

၃ ငါသည် သင့်ကို ငါ၏ဆုတောင်းခြင်းများ၌ အစဉ်မပြတ်အောက်မေ့၍၊ ခမည်းတော်ဘုရားသခင်ထံသို့ သူ၏သန့်ရှင်းသောသား ယေရှု၏နာမတော်အားဖြင့်၊ အစဉ်မပြတ် ဆုတောင်းလျက်ရှိသည်မှာ၊ သူ၏အတိုင်းမသိသော ကောင်းမြတ်ခြင်းနှင့် ကျေးဇူးတော်တို့အားဖြင့်လည်းကောင်း၊ သူ၏နာမတော်ကို ယုံကြည်ခြင်း၌ အဆုံးတိုင်အောင်တည်ကြည်ခြင်းအားဖြင့်လည်းကောင်း သင့်ကို ကာကွယ်စောင့်မတော်မူပါမည့် အကြောင်းပေတည်း။

၄ ယခုမူကား၊ ငါ့သား၊ ငါ့ကို အလွန်ဝမ်းနည်းပူဆွေးစေသည့်အရာနှင့်စပ်လျဉ်း၍ သင့်ကို ငါဆို၏။ အကြောင်းမူကား၊ သင်တို့၌ ငြင်းခုံခြင်းများပေါ်ပေါက်လာ၍ ငါ့ကို ဝမ်းနည်းပူဆွေးစေ၏။

၅ အကြောင်းမူကား၊ ငါသည် သမ္မာတရားကို သိရလေသဖြင့်၊ သင်တို့၏ကလေးသူငယ်တို့၏ ဗတ္တိဇံနှင့်စပ်လျဉ်းပြီး၊ သင်တို့၌ ငြင်းခုံခြင်းများရှိလေပြီ။

၆ ယခုမူကား၊ ငါ့သား၊ ငါအလိုရှိသည်ကား၊ ဤဆိုးရွားသောမှားယွင်းမှုကို သင်တို့ထံမှ ဖယ်ရှားခြင်းအလို့ငှာ၊ လုံ့လဝီရိယထက်သန်စွာ သင်တို့အလုပ်လုပ်ကြစေကြောင်းပေတည်း။ အကြောင်းမူကား၊ ဤရည်ရွယ်ချက်အတွက် ဤအမှာစာကို ငါရေးလေပြီ။

၇ အကြောင်းမူကား၊ ငါသည် သင်တို့ထံမှ ဤအရာတို့ကို သိရပြီးလျှင်ပြီးချင်း၊ ထိုအမှုနှင့်စပ်လျဉ်း၍ ကိုယ်တော်ရှင်ထံ မေးလျှောက်၏။ ကိုယ်တော်ရှင်၏နှုတ်ကပတ်တော်သည်လည်း သန့်ရှင်းသောဝိညာဉ်တော်၏တန်ခိုးအားဖြင့် ငါ့ထံသို့ ရောက်လာပြီး၊ မိန့်တော်မူလေသည်ကား၊

၈ သင်တို့၏ရွေးနှုတ်ရှင်၊ သင်တို့၏ကိုယ်တော်ရှင်နှင့် သင်တို့၏ဘုရားသခင် ခရစ်တော်၏နှုတ်ကပတ်တော်တို့ကို နားထောင်ကြလော့။ ရှုလော့၊ ဖြောင့်မတ်သောသူတို့ကို နောင်တရခြင်းသို့ ခေါ်ခြင်းငှာ လောကထဲသို့ ငါကြွလာတော်မူသည်မဟုတ်။ အပြစ်ရှိသူတို့ကို ခေါ်ခြင်းငှာလာ၏။ ကျန်းမာသောသူတို့သည် ဆေးသမားမလိုအပ်ကြ။ ဖျားနာသောသူတို့သာလျှင် လိုအပ်ကြ၏။ သို့ဖြစ်၍၊ ကလေးသူငယ်တို့သည် စင်ကြယ်ကြ၏။ အကြောင်းမူကား၊ သူတို့သည် အပြစ်ကျူးလွန်နိုင်စွမ်း မရှိကြ။ သို့ဖြစ်၍၊ အာဒံ၏ကျိန်ခြင်းကို ငါ့ကြောင့် သူတို့ထံမှ ဖယ်ရှားသဖြင့်၊ ထိုကျိန်ခြင်းက သူတို့အပေါ်အစိုးမရတော့။ အရေပြားလှီးခြင်းတရားသည်လည်း ငါ့ကြောင့် ရပ်စဲသွားပေပြီ။

၉ ဤကဲ့သို့အားဖြင့် သန့်ရှင်းသောဝိညာဉ်တော်သည် ဘုရားသခင်၏နှုတ်ကပတ်တော်ကို ငါ့ထံသို့ ထင်ရှားစွာပြတော်မူ၏။ သို့ဖြစ်၍၊ ငါ၏ချစ်သား၊ သင်တို့သည် ကလေးသူငယ်တို့ကို ဗတ္တိဇံပေးရမည်ဟူသည်မှာ၊ ဘုရားသခင်ရှေ့ ၌ ပြင်းစွာသော ပြက်ရယ်ပြုခြင်းဖြစ်ကြောင်း ငါသိ၏။

၁၀ ရှုလော့၊ သင်တို့ကို ငါဆိုသည်မှာ၊ သင်တို့သွန်သင်ရမည့် ဤအရာတို့သည်ကား—အပြစ်ကျူးလွန်နိုင်စွမ်းရှိသောသူနှင့် တာဝန်ရှိသောသူတို့အား နောင်တရခြင်းနှင့် ဗတ္တိဇံအကြောင်းပေတည်း။ ထိုမှတစ်ပါး၊ မိဘတို့သည် နောင်တရပြီးဗတ္တိဇံခံ၍၊ သူတို့၏ကလေးသူငယ်များကဲ့သို့ သူတို့ကိုယ်သူတို့နှိမ့်ချရမည့်အကြောင်းကို သင်တို့ သွန်သင်ပေးကြလော့။ သူတို့သည်လည်း သူတို့၏ကလေးသူငယ်များနှင့်အတူ ကယ်တင်ခြင်းသို့ ရောက်ကြလိမ့်မည်။

၁၁ သူတို့၏ကလေးသူငယ်တို့သည် နောင်တရခြင်း မလိုအပ်ကြ။ ဗတ္တိဇံလည်း မလိုအပ်။ ရှုလော့၊ နောင်တရခြင်းကြောင့်၊ ဗတ္တိဇံခံ၍၊ ပညတ်တော်များကို ပြီးပြည့်စုံစေခြင်းအတွက် ဖြစ်လေပြီး၊ အပြစ်များမှလွှတ်ခြင်းသို့တိုင်အောင်ပင်တည်း။

၁၂ သို့ရာတွင်၊ ကလေးသူငယ်တို့သည် ကမ္ဘာတည်ကတည်းကပင် ခရစ်တော်အားဖြင့် အသက်ရှင်ကြ၏။ ထိုသို့မဟုတ်လျှင်၊ ဘုရားသခင်သည် ဘက်လိုက်သောဘုရားသခင်ဖြစ်ပြီး၊ ပြောင်းလဲနိုင်သောဘုရားသခင်လည်းဖြစ်၏။ လူကို မျက်နှာလိုက်သောသူလည်းဖြစ်၏။ အကြောင်းမူကား၊ အဘယ်မျှများစွာသော ကလေးသူငယ်တို့သည် ဗတ္တိဇံမခံဘဲ သေကြလေပြီနည်း။

၁၃ သို့ဖြစ်၍၊ ကလေးသူငယ်တို့သည် ဗတ္တိဇံမခံဘဲ ကယ်တင်ခြင်းသို့ မရောက်နိုင်လျှင်၊ အဆုံးမရှိသည့်ငရဲသို့ သွားပြီးကြပြီးဖြစ်ရလေမည်။

၁၄ ရှုလော့၊ သင်တို့ကို ငါဆိုသည်ကား၊ ကလေးသူငယ်တို့မှာ ဗတ္တိဇံလိုအပ်သည်ဟု ထင်မှတ်သောသူသည် ခါးစွာသောသည်းခြေ၌လည်းကောင်း၊ ဒုစရိုက်အနှောင်အဖွဲ့တို့၌လည်းကောင်း ရှိကြ၏။ အကြောင်းမူကား၊ ထိုသူ၌ ယုံကြည်ခြင်းမရှိ၊ မျှော်လင့်ခြင်းမရှိ၊ မေတ္တာလည်းမရှိ။ သို့ဖြစ်၍၊ ထိုသူသည် တွေးတောလျက်ရှိစဉ်တွင်၊ ငရဲသို့ ဆင်းသွားရမည်။

၁၅ အကြောင်းမူကား၊ ကလေးသူငယ်တစ်ဦးကို ဗတ္တိဇံကြောင့် ဘုရားသခင် ကယ်တင်တော်မူပြီး၊ အခြားတစ်ဦးသည် ဗတ္တိဇံမရှိသောကြောင့် ပျက်စီးရမည်ဟု ထင်မှတ်ခြင်းမှာ အလွန်ဆိုးရွားသော ဆိုးညစ်ခြင်းပေတည်း။

၁၆ ကိုယ်တော်ရှင်၏လမ်းစဉ်များကို ဤကဲ့သို့အားဖြင့် မှောက်လှန်ကြသောသူတို့သည် အမင်္ဂလာရှိကြ၏။ အကြောင်းမူကား၊ သူတို့သည် နောင်တမရလျှင်၊ ပျက်စီးကြလိမ့်မည်။ ရှုလော့၊ ငါသည် ဘုရားသခင်ထံမှ အခွင့်အာဏာကို ရရှိလျက် ရဲရင့်စွာဟောပြော၏။ ငါသည် လူပြုနိုင်သည့်အရာကို ကြောက်ခြင်းလည်းမရှိ။ အကြောင်းမူကား၊ စုံလင်သောချစ်ခြင်းသည် အကြောက်တရားအားလုံးကို ပယ်ရှားတတ်၏။

၁၇ ငါသည် ထာဝရတည်မြဲသောချစ်ခြင်းဖြစ်သည့် မေတ္တာဖြင့်လည်း ပြည့်ဝ၏။ သို့ဖြစ်၍၊ ခပ်သိမ်းသောကလေးတို့သည် ငါနှင့်တူကြ၏။ သို့ဖြစ်၍၊ ငါသည် ကလေးသူငယ်တို့ကို စုံလင်သောချစ်ခြင်းဖြင့် ချစ်၏။ သူတို့အားလုံးသည်လည်း အတူတူဖြစ်ကြပြီး၊ ကယ်တင်ခြင်းကို ခံယူကြသောသူများပေတည်း။

၁၈ အကြောင်းမူကား၊ ဘုရားသခင်သည် ဘက်လိုက်သောဘုရားသခင်မဟုတ်၊ ပြောင်းလဲတတ်သောဘုရားလည်းမဟုတ်ဘဲ၊ ထာဝရကာလတစ်ခုလုံးမှ ထာဝရကာလတစ်ခုလုံးသို့တိုင် မပြောင်းလဲတတ်သောသူဖြစ်ကြောင်း ငါသိ၏။

၁၉ ကလေးသူငယ်တို့သည် နောင်တမရနိုင်ကြ။ သို့ဖြစ်၍၊ သူတို့ထံသို့ ဘုရားသခင်၏စင်ကြယ်သော ကရုဏာတော်တို့ကို ငြင်းဆိုခြင်းသည် အလွန်ဆိုးရွားသော ဆိုးညစ်ခြင်းပေတည်း။ အကြောင်းမူကား၊ သူ၏ကရုဏာတော်ကြောင့်၊ သူတို့အားလုံးသည် သူ့အားဖြင့် အသက်ရှင်ကြ၏။

၂၀ ကလေးသူငယ်များ ဗတ္တိဇံလိုအပ်သည်ဟု ဆိုသောသူသည်လည်း ခရစ်တော်၏ကရုဏာတော်တို့ကို ငြင်းဆို၍၊ သူ၏အပြစ်ဖြေခြင်းမင်္ဂလာနှင့် သူ၏ရွေးနှုတ်ခြင်းတန်ခိုးတို့ကို အလေးမထားဘဲလျစ်လျူရှု၏။

၂၁ ထိုကဲ့သို့သောသူတို့သည် အမင်္ဂလာရှိကြ၏။ အကြောင်းမူကား၊ သူတို့သည် သေခြင်း၊ ငရဲနှင့် အဆုံးမရှိသည့် စိတ်ဆင်းရဲကိုယ်ဆင်းရဲဖြစ်ခြင်းတို့၏ ဘေးအန္တရာယ်၌ ရှိကြ၏။ ငါသည် ထိုစကားများကို ရဲရင့်စွာဟောပြော၏။ ဘုရားသခင်သည် ငါ့ကို မိန့်တော်မူ၏။ ထိုစကားများကို နားထောင်၍ ပမာဏပြုကြလော့၊ သို့မဟုတ်လျှင်၊ ထိုစကားများသည် ခရစ်တော်၏တရားပလ္လင်၌ သင်တို့တစ်ဖက်၌ တည်လိမ့်မည်။

၂၂ အကြောင်းမူကား၊ ရှုလော့၊ ကလေးသူငယ်ခပ်သိမ်းနှင့်၊ ဥပဒေမရှိသော သူခပ်သိမ်းတို့သည်လည်း ခရစ်တော်အားဖြင့် အသက်ရှင်ကြ၏။ အကြောင်းမူကား၊ ရွေးနှုတ်ခြင်းတန်ခိုးသည် ဥပဒေမရှိသောသူတို့အပေါ်သို့ ကျရောက်၏။ သို့ဖြစ်၍၊ ပြစ်ဒဏ်ချမှတ်ခြင်းကို မခံရသောသူ၊ သို့မဟုတ် ပြစ်ဒဏ်ချမှတ်ခြင်းအောက်၌ မရှိသောသူသည် နောင်တမရနိုင်။ ထိုကဲ့သို့သောသူတို့အဖို့ ဗတ္တိဇံသည် အကျိုးမရှိ—

၂၃ သို့ရာတွင်၊ ခရစ်တော်၏ ကရုဏာတော်များနှင့် သူ၏သန့်ရှင်းသောဝိညာဉ်တော်ကို ငြင်းဆိုလျက်၊ သေခြင်းနှင့်ဆိုင်သောအကျင့်တို့ကို ကိုးစားခြင်းသည် ဘုရားသခင်ရှေ့၌ ပြက်ရယ်ပြုခြင်းပေတည်း။

၂၄ ရှုလော့၊ ငါ့သား၊ ဤအမှု မဖြစ်သင့်။ အကြောင်းမူကား၊ နောင်တရခြင်းမှာ၊ ပြစ်ဒဏ်ချမှတ်ခြင်းအောက်နှင့် ပညတ်တရားကို ချိုးဖောက်၍ကျိန်ခြင်းအောက်၌ ရှိကြသောသူများအတွက်ဖြစ်၏။

၂၅ နောင်တရခြင်း၏ပထမဦးဆုံးအကျိုးမှာ ဗတ္တိဇံဖြစ်၏။ ဗတ္တိဇံသည်လည်း ယုံကြည်ခြင်းအားဖြင့်၊ ပညတ်တော်များကို ပြီးပြည့်စုံစေသည့်တိုင်အောင် ဖြစ်၏။ ပညတ်တော်များကို ပြီးပြည့်စုံစေခြင်းကလည်း အပြစ်များမှလွှတ်ခြင်းကို ဖြစ်စေ၏။

၂၆ အပြစ်များမှလွှတ်ခြင်းက သိမ်မွေ့အောက်ကျို့ခြင်းနှင့် စိတ်နှလုံးနှိမ့်ချခြင်းတို့ကို ဖြစ်စေ၏။ သိမ်မွေ့အောက်ကျို့ခြင်းနှင့် စိတ်နှလုံးနှိမ့်ချခြင်းတို့ကြောင့်၊ မျှော်လင့်ခြင်းနှင့် စုံလင်သောချစ်ခြင်းတို့ဖြင့်ဖြည့်ပေးသည့် နှစ်သိမ့်သူတည်းဟူသော သန့်ရှင်းသောဝိညာဉ်တော်၏ အကြည့်အရှုကြွရောက်တော်မူခြင်းကို ဖြစ်စေ၏။ ထိုချစ်ခြင်းသည်ကား၊ လုံ့လဝီရိယထက်သန်သော ဆုတောင်းခြင်းအားဖြင့်၊ သန့်ရှင်းသောသူခပ်သိမ်းတို့ ဘုရားသခင်နှင့် အတူနေထိုင်ကြသည့် ပြီးဆုံးခြင်းသို့ ရောက်သည့်တိုင်အောင်တည်၏။

၂၇ ရှုလော့၊ ငါ့သား၊ ငါသည် မကြာမြင့်မီ၌ လာမန်အမျိုးသားတို့ကို သွား၍ မတိုက်ခိုက်ရသေးလျှင်၊ သင့်အဖို့ တစ်ဖန်ရေးဦးမည်။ ရှုလော့၊ သူတို့ နောင်တမရလျှင်၊ ဤလူမျိုး၏မာန၊ သို့မဟုတ် နီဖိုင်းလူမျိုးတို့၏မာနက သူတို့၏ပျက်စီးခြင်းကို ဖြစ်စေ၏။

၂၈ ငါ့သား၊ သူတို့ထံသို့ နောင်တရခြင်း ရောက်လာနိုင်စေခြင်းငှာ သူတို့အတွက် ဆုတောင်းလော့။ သို့ရာတွင်၊ ရှုလော့၊ သူတို့ကို ဝိညာဉ်တော်ပဲ့ပြင်ဆုံးမတော်မူခြင်းမှ ရပ်တန့်တော်မူလေသည်ကို ငါစိုးရိမ်၏။ ပြည်၏ ဤအရပ်တွင်၊ သူတို့သည် ဘုရားသခင်ထံမှလာသည့် ခပ်သိမ်းသော တန်ခိုးနှင့် အခွင့်အာဏာတို့ကို အနိုင်ယူဖို့ ကြိုးစားလျက်ရှိကြ၏။ သူတို့သည် သန့်ရှင်းသောဝိညာဉ်တော်ကိုလည်း ငြင်းဆိုလျက်ရှိကြ၏။

၂၉ ငါ့သား၊ ထိုကဲ့သို့ အလွန်ကြီးစွာသောအသိပညာကို ငြင်းပယ်ပြီးနောက်၊ ပရောဖက်တို့အားဖြင့် ဟောပြောသည့် ပရောဖက်ပြု၍ဟောခြင်းတို့နှင့် ငါတို့၏ကယ်တင်ရှင်ကိုယ်တိုင်၏ နှုတ်ကပတ်တော်တို့ကို ပြီးပြည့်စုံစေသည့်တိုင်အောင်ပင်၊ မကြာမြင့်မီ၊ သူတို့ပျက်စီးကြရမည်။

၃၀ ငါ့သား၊ သင့်ထံသို့ ငါရေးမည့်၊ သို့မဟုတ်၊ သင့်ကို တစ်ဖန်တွေ့ဆုံမည့်အချိန်ထိ မင်္ဂလာရှိပါစေ။ အာမင်။