1 Ndien edikem ete nnyin ifiak itɔŋɔ ndisiak obio oro ŋko nnyin ifiak itɔŋɔ ndinyene isɔŋ oro ke emem. Ndien ami nnam ete enam mme ŋkpɔ ekɔŋ ke utɔ ke utɔ, man otodo ami nyene mme ŋkpɔ ekɔŋ nnɔ ikɔt mi mbaŋa ini emi mme Lamanite edifiakde idi ekɔŋ ye ikɔt mi.

2 Ndien ami nnim mbon ukpeme ŋkanare isɔŋ oro, man mme Lamanite ekufiak edi sobo ye nnyin ke mbuat nyuŋ nsobo nnyin; ndien ke ntre ami mma mkpeme ikɔt mi ye mme ufene mi, nnyuŋ mkpeme mmɔ ndiduɔ nduk ke ubɔk mme asua nnyin.

3 Ndien edikem ete nnyin ida isɔŋ mme ete nnyin inyene ke ediwak isua, iŋ, ke ufaŋ isua edip ye iba.

4 Ndien ami mma nnam nte erenowo etibi isɔŋ, enyuŋ ekɔri kpukpru utɔ mkpasip ye kpukpru utɔ mfri ke utɔ ke utɔ.

5 Ndien ami nnam ete iban efiak ndidi, ye ɔkpɔsɔŋ utom, ye utom, ye utom eke kpukpru utɔ ediye linen, iŋ, ye ɔfɔŋ ke utɔ ke utɔ, man nnyin ifuk iferi nnyin; ndien ke ntem nnyin ima iforo ke isɔŋ—ke ntem nnyin ima inyene emem ke anyan ini ke isɔŋ ke ufaŋ isua edip ye iba.

6 Ndien edikem ete edidem Laman akpa, ndien eyen esie ɔtɔŋɔ ndikara ke itie esie. Ndien enye ɔtɔŋɔ ndidemere ikɔt esie ke nsɔŋ ibuot mbaŋa ikɔt mi; ke ntak oro mmɔ etɔŋɔ ndibeŋe idem nnɔ ekɔŋ, ye ndiŋwana ekɔŋ ye ikɔt mi.

7 Edi ami mma ndɔŋ mbon uyep mi eka ekanare isɔŋ Shemlon, man ami mfiɔk mbaŋa mbeŋe idem mmɔ, man ami mkpeme idem mbaŋa mmɔ, man mmɔ ekudusobo ikɔt mi nyuŋ nsobo mmɔ.

8 Ndien edikem ete mmɔ edɔk edi ke edem edere isɔŋ Shilom, ye ediwak udim ekɔŋ mmɔ, iren emi ekamade mme utigha, ye mme idaŋ, ye mme ofut, ye mme ikwa, ye mme itiat, ye mme ikaŋ ɔkpɔ; ndien mmɔ efat idet ibuot mmɔ edɔrɔ; ndien mmɔ ekune ikpa unam ke isin mmɔ.

9 Ndien edikem ete ami nnam ete edip iban ye nditɔ ikɔt mi ke ikɔt; ndien ami ŋko nnam ete kpukpru ŋkani iren mi emi ekemede ndikama mme ŋkpɔ ekɔŋ, ŋko ye kpukpru mkparawa mi emi ekekemede ndikama mme ŋkpɔ ekɔŋ, esobo idem mmɔ ɔtɔ kiet ndika ekɔŋ ye mme Lamanite; ndien ami nnim mmɔ ke mme idaha mmɔ, owo kiet kiet nte asaŋade ye isua esie.

10 Ndien edikem ete nnyin idɔk ika ndiŋwana ekɔŋ ye mme Lamanite; ndien ami, kpa ami, ke usɔŋ mi, mma nka ndiŋwana ekɔŋ ye mme Lamanite. Ndien edikem ete nnyin idɔk ika ke odudu Jehovah ndiŋwana ekɔŋ.

11 Idahaemi, mme Lamanite ikifiɔkke ŋkpɔ ndomo kiet ibaŋa Jehovah, mme odudu Jehovah, ke ntak oro mmɔ ekeberedem ke odudu mmɔ. Edi mmɔ ekedi mbon enyenede odudu, nte odudu mme owo.

12 Mmɔ ekedi mbon ikɔt, ye mbon obom, ye mbon afai, enim ke ido mme ete mmɔ, emi edide emi—Enim ete ke ekebin mmɔ esio ke isɔŋ Jerusalem ke ntak mme ukwaŋ-ŋkpɔ mme ete mmɔ, ndien ete ke nditɔ eka mmɔ ema edue mmɔ ke wilderness, ndien ke ema edue mmɔ ŋko ke ini ekebede inyaŋ;

13 Ndien nko, ke ema edue mmɔ ke ini mmɔ ekedude ke isɔŋ akpa inyene mmɔ, ke ini mmɔ ema ekebe inyaŋ, ndien kpukpru emi ke ntak ete Nephi oro ama ɔbuɔtidem akan ke ndinim mme ibet Jehovah—ke ntak oro Jehovah ama ɔdiɔŋ enye, koro Jehovah ama okop mme akam esie onyuŋ ɔbɔrɔ mmɔ, ndien enye ada iso ke isaŋ mmɔ ke wilderness.

14 Ndien nditɔ eka esie ema eyaresit ye enye ke ntak emi mmɔ mikifiɔkke mme edinam Jehovah; mmɔ ŋko ema eyaresit ye enye ke enyɔŋ mme mmɔŋ ke ntak emi mmɔ ekesɔŋde esit mmɔ ye Jehovah.

15 Ndien nko, mmɔ ema eyaresit ye enye ke ini mmɔ ekesimde isɔŋ eŋwɔŋɔ, koro mmɔ ekedɔhɔ ete ke enye ama emen ukara mme owo osio ke ubɔk mmɔ; ndien mmɔ eyom ndiwot enye.

16 Ndien nko, mmɔ ema eyaresit ye enye koro enye akadahade aka wilderness nte Jehovah ɔkɔnɔde enye uyo, onyuŋ ataŋ mme ŋwed emi ekemiŋde ke mme usan brass, koro mmɔ ekedɔhɔ ete ke enye ɔkɔbɔ oto mmɔ ke nkanubɔk.

17 Ndien ke ntem ke mmɔ ekpep nditɔ mmɔ ete mmɔ esua mmɔ, ndien ete mmɔ ewot mmɔ, ndien ete mmɔ ebɔ ke nkanubɔk enyuŋ edia mmɔ ŋwo, enyuŋ enam kpukpru se mmɔ ekande ndisobo mmɔ; ke ntak oro mmɔ enyene nsinsi usua enɔ nditɔ Nephi.

18 Ke ntak emi ke edidem Laman, ke abiaŋa esie, ye nsu ye ŋkari, ye mme eŋwɔŋɔ mkpɔk-inua esie, akabiaŋa mi, man ami nda mbon emi ndɔk ndi ke isɔŋ emi, man mmɔ esobo mmɔ; iŋ, ndien nnyin imikut ndutuhɔ ke ediwak isua emi ke isɔŋ emi.

19 Ndien idahaemi ami, Zeniff, ke ini mma nketiŋ kpukpru mme ŋkpɔ emi nnɔ ikɔt mi mbaŋa mme Lamanite, ami mma ndemede odudu mmɔ ndika ekɔŋ ye odudu mmɔ, ndisin idorenyin mmɔ ke Jehovah; ke ntak oro, nnyin ima iŋwana ye mmɔ, iso ye iso.

20 Ndien edikem ete nnyin ifiak ibin mmɔ isio ke isɔŋ nnyin; ndien nnyin iwot mmɔ iwak, ewak tutu nnyin ikanke ibat mmɔ.

21 Ndien edikem ete nnyin ifiak inyɔŋ ika isɔŋ nnyin, ndien ikɔt mi efiak etɔŋɔ ndibɔk ufene mmɔ, ye nditibi isɔŋ mmɔ.

22 Ndien idahaemi ami, koro nsɔŋde, mma nyak ukara nnɔ eyen eren mi kiet; ke ntak oro, ami ntiŋke ikɔ aba. Ndien yak Jehovah ɔdiɔŋ ikɔt mi. Amen.