1 Ndien edikem ete ke Zeniff ama yak ukara obio ɔnɔ Noah, eyen esie kiet; ke ntre Noah ama ɔtɔŋɔ ndikara ke itie esie; ndien enye ikisaŋake ke ido ete esie.

2 Koro sese, enye ikinimke mme ibet Abasi, edi enye akasaŋa etiene mme udɔŋ esit esie mmɔŋ. Ndien enye ama enyene uwak iban ye iban esa. Ndien enye amanam ikɔt esie enam idiɔk ŋkpɔ, enyuŋ enam enye emi ekedide mbubiam ke iso Jehovah. Iŋ, ndien mmɔ enam use ye kpukpru utɔ ibak.

3 Ndien enye enim etibe ubak kiet ke itie ition eke kpukpru se mmɔ enyenede, ubak kiet ke itie ition eke gold mmɔ ye sidibe mmɔ, ye ubak kiet ke itie ition eke ziff mmɔ ye copper mmɔ, ye brass mmɔ ye ukwak mmɔ; ye ubak kiet ke itie ition eke mme enaŋ ubom mmɔ, ye ŋkọ ubak kiet ke itie ition eke kpukpru mkpasip mmɔ.

4 Ndien kpukpru emi enye akanam ndiŋwam idem esie, ye iban esie ye iban esa esie; ŋko ye mme oku esie, ye iban mmɔ ye iban esa mmɔ; ke ntem enye ama ɔkpuhɔ mme ŋkpɔ abaŋade ukara.

5 Koro enye emen kpukpru mme oku efep emi ete esie okosiode enim, onyuŋ osio mbufa enim ke itie mmɔ, utɔ nte ekemenere ke ntaŋidem esit mmɔ.

6 Iŋ, ndien ntem ke ekeŋwam mmɔ ke ifu mmɔ, ye ke ukpono ndem mmɔ, ye ke mme use mmɔ, ke mme etibe emi edidem Noah okodoride ikɔt esie; ntem ke mbon oro ekenam utom ata eti eti ndisɔŋɔ ukwaŋ-ŋkpɔ.

7 Iŋ, ndien mmɔ ŋko ekabare edi mme okpono ndem, ke ntak emi ekebiaŋade mmɔ ye ikpikpu ye mme nnem-inua ikɔ eke edidem ye mme oku; koro mmɔ eketiŋde edinem ikɔ enɔ mmɔ.

8 Ndien edikem ete edidem Noah ɔbɔp ediwak ediye ye ikpɔ ufɔk; ndien enye abana mmɔ ye ndiye utom eto, ye kpukpru utɔ ŋkpɔ uto, eke gold, ye eke sidibe, ye eke ukwak, ye eke brass, ye eke ziff, ye eke copper;

9 Ndien enye ŋko ɔbɔp ɔnɔ idem esie akamba okure, ye ebekpo ke ufɔt esie, kpukpru emi ekedide eke ediye eto enyuŋ ebana ye gold ye sidibe ye mme ŋkpɔ uto.

10 Ndien enye ŋko anam ete mbon utom esie enam kpukpru utɔ ediye utom ke esit temple, ke ediye eto, ye ke copper, ye ke brass.

11 Ndien mme ŋkpɔ-itie emi ekediaŋare enim enɔ mme akwa oku, emi ekekponde ekan kpukpru mme ŋkpɔ-itie eken, enye abana ye ata gold; ndien enye anam ebɔp ŋkpɔ udori ubɔk ke iso mmɔ, man mmɔ ebere idem mmɔ ye ubɔk mmɔ ke enye ke ini mmɔ editiŋde nsu nsu ikɔ ye mme ikpikpu ikɔ inɔ ikɔt esie.

12 Ndien edikem ete enye ɔbɔp tower ekpere temple; iŋ, ata edikoŋ tower, okoŋ tutu ete ke enye ekeme ndida ke enyɔŋ esie nyuŋ nse isɔŋ Shilom, ŋko ye isɔŋ Shemlon, emi mme Lamanite ekenyenede; ndien enye ŋko ekeme ndise kpukpru isɔŋ emi akanare okuk.

13 Ndien edikem ete enye anam ebɔp ediwak ufɔk ke isɔŋ Shilom; ndien enye anam ebɔp akwa tower ke obot ke edem edere isɔŋ Shilom, emi ekedide ebiet udibe ɔnɔ nditɔ Nephi ke ini mmɔ ekefehede ewɔrɔ ke isɔŋ oro; ndien ntem ke enye akanam ye mme inyene emi enye ɔkɔbɔde oto etibe ikɔt esie.

14 Ndien edikem ete enye esin esit esie ke inyene esie, onyuŋ abiat ini esie ke uwem atahare ye iban esie ye iban esa esie; ndien ntem ŋko ke mme oku esie ekebiat ini mmɔ ye iban akpara.

15 Ndien edikem ete enye ɔtɔ iŋwaŋ-vine akanare ke isɔŋ; ndien enye etibi mme obube wine, onyuŋ anam ediwak wine; ndien ke ntak oro enye akabare edi ama mmin, ŋko ye ikɔt esie.

16 Ndien edikem ete mme Lamanite etɔŋɔ ndidiŋwana ye ikɔt esie, ke mkpri ibat owo, ye ndiwot mmɔ ke mme iŋwaŋ mmɔ, ye ke ini mmɔ ebɔkde mme ufene mmɔ.

17 Ndien edidem Noah ɔdɔŋ mbon ukpeme ekanare isɔŋ ndibin mmɔ nsio; edi enye ikidɔŋke ekem ibat, ndien mme Lamanite ediŋwana ye mmɔ enyuŋ ewot mmɔ, enyuŋ ebin ediwak ufene mmɔ esio ke isɔŋ; ke ntem mme Lamanite etɔŋɔ ndisobo mmɔ, ye ndisio usua mmɔ ŋwut mmɔ.

18 Ndien edikem ete edidem Noah ɔdɔŋ mbon ekɔŋ esie ekeŋwana ye mmɔ, ndien ebin mmɔ efiak edem, mme mmɔ ebin mmɔ efiak edem ke esisit ini, ke ntak oro, mmɔ enyɔŋ edi ye idaresit ke mbume mmɔ.

19 Ndien idahaemi, ke ntak akwa edikan ke ekɔŋ emi mmɔ emenere ke ntaŋidem esit mmɔ; mmɔ ebure mbure ke odudu mmɔ, ete ke aba ye duop mmɔ ekan eŋwana ye mme tɔsin eke mme Lamanite; ndien ntem ke mmɔ ekebure mbure, enyuŋ edaresit ke iyip, ye ndiduɔk iyip nditɔ eka mmɔ, ndien emi ke ntak ibak edidem ye mme oku mmɔ.

20 Ndien edikem ete ke erenowo kiet ama odu ke otu mmɔ emi enyiŋ esie ekedide Abinadi; ndien enye asaŋa ke otu mmɔ, onyuŋ ɔtɔŋɔ nditiŋ nte prophet, ete: Sese, ntem ke Jehovah ɔdɔhɔ, ndien ntem ke enye ɔnɔ mi uyo, ete: Ka, nyuŋ dɔhɔ mbon emi ete, ntem ke Jehovah ɔdɔhɔ—Ɔyɔdɔdiɔk ɔnɔ mbon emi, koro ami mokut mme mbubiam mmɔ, ye ibak mmɔ, ye mme use mmɔ; ndien ibɔhɔke mmɔ ekabare esit ami nyedise mmɔ ke iyaresit mi.

21 Ndien ibɔhɔke mmɔ ekabare esit enyuŋ eŋwɔŋɔre etiene Jehovah Abasi mmɔ, sese, ami nyayak mmɔ nsin ke ubɔk mme asua mmɔ; iŋ, ndien eyeda mmɔ esin ke ufin; ndien mmɔ eyekut ukut ke ubɔk mme asua mmɔ.

22 Ndien eyedikem ete mmɔ eyefiɔk ete ke ami ndi Jehovah Abasi mmɔ, ndien ke ndi Abasi ufup, ndade mme ukwaŋ-ŋkpɔ ikɔt mi ndori mmɔ ke idem.

23 Ndien eyedikem ete ibɔhɔke mbon emi ekabare esit enyuŋ eŋwɔŋɔre etiene Jehovah Abasi mmɔ, eyeda mmɔ esin ke ufin; ndien owo ndomo kiet idinamke mmɔ ebɔhɔ, ibɔhɔke edi Jehovah Abasi Ibom.

24 Iŋ, ndien eyedikem ete ke ini mmɔ edisemede inɔ mi ami ndisɔpke ŋkop mme eseme mmɔ; iŋ, ndien ami nyayak nte mme asua mmɔ emia mmɔ ufen.

25 Ndien ibɔhɔke mmɔ ekabare esit esine ɔfɔŋikpo ye ntɔŋ, enyuŋ eseme ke ɔkpɔsɔŋ enɔ Jehovah Abasi mmɔ, ami ndikopke mme akam mmɔ, nko ami ndinamke mmɔ ebɔhɔ ke mme ukut mmɔ; ndien ntem ke Jehovah ɔdɔhɔ, ndien ntem ke enye ɔnɔ mi uyo.

26 Idahaemi edikem ete ke ini Abinadi ama eketiŋ mme ikɔ emi ɔnɔ mmɔ mmɔ ema eyaresit ye enye, enyuŋ eyom ndimen uwem esie mfep; edi Jehovah ama anam enye ɔbɔhɔ ke ubɔk mmɔ.

27 Idahaemi ke ini edidem Noah ama okokop mme ikɔ emi Abinadi eketiŋde ɔnɔ mbon oro, enye ŋko ama ayaresit; ndien enye ɔdɔhɔ ete: Abinadi edi anie, emi enye edibierede ikpe inɔ mi ye ikɔt mi, mme Jehovah edi anie, emi edidade utɔ akwa ukut oro inɔ ikɔt mi?

28 Ami nnɔ fi uyo nte ada Abinadi edi mi, man ami nwot enye, koro enye etiŋ mme ŋkpɔ emi man enye edemere ikɔt mi ke iyaresit ye kiet eken, onyuŋ esin mme eneni ke otu ikɔt mi; ke ntak oro ami nyowot enye.

29 Idahaemi mme enyin mbon oro ema kim; ke ntak oro mmɔ esɔŋ esit mmɔ ye mme ikɔ Abinadi, ndien mmɔ eyom tɔŋɔ ke ini oro ka iso ndimum enye. Ndien edidem Noah ɔsɔŋ esit esie abaŋa ikɔ Jehovah, ndien enye ikikabakere esit ke mme idiɔk edinam esie.