1 Ndien edikem ete ke ufaŋ isua iba ama ekebe ete Abinadi aka ke otu mmɔ nte owo efen, man mmɔ ekufiɔk enye, onyuŋ ɔtɔŋɔ nditiŋ nte prophet ke otu mmɔ, ete: Ntem ke Jehovah ɔnɔ mi uyo, ete—Abinadi, ka nyuŋ tiŋ nte prophet nnɔ ikɔt mi emi, koro mmɔ esɔŋ esit mmɔ ebaŋa mme ikɔ mi; mmɔ ikabakere esit ibaŋa mme idiɔk edinam mmɔ, ke ntak oro, ami nyekese mmɔ ke iyaresit mi, iŋ, ke ɔkpɔsɔŋ iyaresit ke ami ndikise mmɔ ke mme ukwaŋ-ŋkpɔ ye mme mbubiam mmɔ.

2 Iŋ, ɔyɔdɔdiɔk ɔnɔ emana emi! Ndien Jehovah ɔdɔhɔ mi ete: Nyan ubɔk fo nyuŋ tiŋ nte prophet, ete: Ntem ke Jehovah ɔdɔhɔ, eyedikem ete ke emana emi, ke ntak mme ukwaŋ-ŋkpɔ mmɔ, eyeda mmɔ esin ke ufin, enyuŋ emia mmɔ ke mbaŋ; iŋ, ndien mme owo eyebin mmɔ, enyuŋ ewot mmɔ; ndien mme utere enyɔŋ, ye mme ebua, iŋ, ye mme unam ikɔt, eyeta obuk mmɔ.

3 Ndien eyedikem ete uwem edidem Noah eyenyene ufɔn kpa nte ɔfɔŋ ke ufiop otuŋikaŋ; koro enye ɔyɔɔfiɔk ete ke ami ndi Jehovah.

4 Ndien eyedikem ete ke ami nyamia ikɔt mi emi ye mme idiɔk ukut, iŋ, ye akaŋ nko ye udɔŋɔ; ndien ami nyanam nte mmɔ etuaŋa ke ofuri usen.

5 Iŋ, ndien ami nyanam nte ebɔp mmɔ mme mbiomo ke edem mmɔ; ndien eyebin mmɔ enɔ iso iso nte imum ass.

6 Ndien eyedikem ete ke ami nyɔdɔŋ edim-itiat ke otu mmɔ, ndien enye ayamia mmɔ; ndien ŋko ofum edem usiahautin ayamia mmɔ; ndien mme ŋkpɔnta eyefina isɔŋ mmɔ ŋko, enyuŋ eta mkpasip mmɔ.

7 Ndien akwa udɔŋɔ ayamia mmɔ—ndien kpukpru emi ke ami ndinam ke ntak mme ukwaŋ-ŋkpɔ ye mme mbubiam mmɔ.

8 Ndien eyedikem ete ibɔhɔke mmɔ ekabare esit ami nyosobo mmɔ ofuri ofuri nsio ke iso isɔŋ; edi mmɔ eyekpɔŋ ŋwed enim ebaŋa mmɔ, ndien ami nyetim mmɔ nnim nnɔ mme idut efen emi edinyenede isɔŋ emi; iŋ, kpa emi ke ami ndinam man ami nda nwut mme idut mme mbubiam mbon emi. Ndien ediwak ŋkpɔ ke Abinadi eketiŋ nte prophet abaŋa mbon emi.

9 Ndien edikem ete mmɔ eyaresit ye enye; ndien mmɔ emum enye enyuŋ ebɔp enye emen eka ke iso edidem, enyuŋ edɔhɔ edidem ete: Sese, nnyin imida erenowo idi ke iso fo emi etiŋde idiɔk nte prophet abaŋa ikɔt fo, onyuŋ ɔdɔhɔ ete ke Abasi oyosobo mmɔ.

10 Ndien enye ŋko etiŋ idiɔk nte prophet abaŋa uwem fo, onyuŋ ɔdɔhɔ ete ke uwem fo eyetie nte ɔfɔŋ ke otuŋikaŋ ikaŋ.

11 Ndien nko, enye ɔdɔhɔ ete ke afo eyetie nte ŋkɔk, kpa nte nsad ŋkɔk ke iŋwaŋ, emi mme unam efehede ebe enyuŋ edigide ke ikpat.

12 Ndien nko, enye ɔdɔhɔ ke afo eyetie nte nsek mfri akpap, emi, ke ini enye adatde ama, edieke ofum ofumde, asuan enye ke iso isɔŋ. Ndien enye anam ŋkari nte ke Jehovah etiŋ enye. Ndien enye ɔdɔhɔ ke kpukpru emi eyetibe ɔnɔ fi ibɔhɔke afo akabare esit, ndien emi ke ntak mme ukwaŋ-ŋkpɔ fo.

13 Ndien idahaemi, O edidem, nso akpan idiɔk ke afo anam, mme nso akpan idiɔk ŋkpɔ ke ikɔt fo enam, man Abasi obiom nnyin ikpe mme erenowo ebiere ikpe ɔnɔ nnyin?

14 Ndien idahaemi, O edidem, sese, nnyin iduehe, ndien afo, O edidem, unamke idiɔk ŋkpɔ; ke ntak oro, erenowo emi osu nsu abaŋa fi, ndien enye etiŋ nte prophet ke ikpikpu.

15 Ndien sese, nnyin imenyene odudu, nnyin idisuhɔkere iduk ufin, mme mme asua nnyin ndimum nnyin nte mbon nkpɔkɔbi; iŋ, ndien afo omoforo ke isɔŋ, ndien afo ŋko oyoforo.

16 Sese, se erenowo oro mi, nnyin imiyak enye isin fi kubɔk; afo emekeme ndinam ye enye nte afo amade.

17 Ndien edikem ete edidem Noah anam ete etop Abinadi esin ke ufɔk ŋkpɔkɔbi; ndien enye ɔnɔ uyo ete mme oku esobo idem mmɔ kiet man enye enyene esop ye mmɔ abaŋa se enye anade nte anam enye.

18 Ndien edikem ete mmɔ edɔhɔ edidem ete: Da enye di mi man nnyin ibup enye mbume; ndien edidem ɔnɔ uyo ete eda enye edi ke iso mmɔ.

19 Ndien mmɔ etɔŋɔ ndibup enye mbume, man mmɔ enam enye edue, man otodo mmɔ enyene se edade edori enye ikɔ; edi enye ɔbɔrɔ mmɔ uko uko, onyuŋ akan ɔbɔrɔ kpukpru mbume mmɔ, iŋ, ke mkpaidem mmɔ; koro enye ama akan ɔbɔrɔ kpukpru mbume mmɔ, onyuŋ etimere mmɔ ke kpukpru mme ikɔ mmɔ.

20 Ndien edikem ete owo mmɔ kiet ɔdɔhɔ enye ete: Nso ke mme ikɔ emi ewetde ɔwɔrɔ, ye emi mme ete nnyin ekekpepde, ete:

21 Ikpat owo nti mbuk eye didie ke enyɔŋ ikpɔ obot; emi ɔkwɔrɔde emem; emi adade nti mbuk eti edi; emi ɔkwɔrɔde erinyaŋa; emi ɔdɔhɔde Zion ete, Abasi Fo ada ukara;

22 Mbon ukpeme fo eyemenere uyo; ye uyo kiet ke mmɔ edikwɔ; koro mmɔ eyekut enyin ke enyin ke ini Jehovah afiakde ke Zion;

23 Ebumere ke idaresit; ekwɔ ye uyo kiet mbufo mme ŋwure ebiet Jerusalem; koro Jehovah ɔdɔŋde ikɔt esie esit, enye afak Jerusalem;

24 Jehovah ama ɔfuhɔre edisana ubɔk esie ke enyin ofuri idut, ndien ofuri utit ererimbot eyekut erinyaŋa Abasi nnyin?

25 Ndien idahaemi Abinadi ɔdɔhɔ mmɔ ete: Ndi mbufo edi mme oku, enyuŋ enam ŋkari ndikpep mbon emi, ye ndifiɔk spirit nditiŋ nte prophet, ndien edi enyene udɔŋ ndifiɔk nto mi se mme ŋkpɔ emi ewɔrɔ?

26 Ami ndɔhɔ mbufo nte, ɔyɔdɔdiɔk ɔnɔ mbufo koro ekwaŋade mme usuŋ Jehovah! Koro edieke mbufo efiɔkde mme ŋkpɔ emi mbufo mikpepke mmɔ; ke ntak oro, mbufo emekwaŋ mme usuŋ Jehovah.

27 Mbufo isinke esit mbufo ibaŋa ndifiɔk; ke ntak oro, mbufo inyeneke ifiɔk. Ndien idahaemi, nso ke mbufo ekpep mbon emi?

28 Ndien mmɔ edɔhɔ ete: Nnyin ikpep ibet Moses.

29 Ndien enye afiak ɔdɔhɔ mmɔ ete: Edieke mbufo ekpepde ibet Moses ntak emi mbufo minimke enye? Ntak emi mbufo esinde esit mbufo ke inyene? Ntak emi mbufo enamde mme use enyuŋ ebiatde odudu mbufo ye iban akpara, iŋ, enyuŋ enam mbon emi enam idiɔk ŋkpɔ, man Jehovah enyene ntak ndidɔŋ mi nditiŋ nte prophet mbaŋa mbon emi, iŋ, kpa akwa idiɔk mbaŋa mbon emi?

30 Ndi mbufo ifiɔkke ite ke ami ntiŋ akpanikɔ? Iŋ, mbufo ifiɔkke ite ke ami ntiŋ akpanikɔ; ndien ke akpana mbufo enyek idem ke iso Abasi.

31 Ndien eyedikem ete ke eyebɔ ufen mbufo ke ntak mme ukwaŋ-ŋkpɔ mbufo, koro mbufo edɔhɔde ete ke mbufo ekpep ibet Moses. Ndien nso ke mbufo efiɔk ebaŋa ibet Moses? Ndi erinyaŋa oto ke ibet Moses? Mbufo edɔhɔ nso?

32 Ndien mmɔ ebɔrɔ enyuŋ edɔhɔ ete ke erinyaŋa oto ke ibet Moses.

33 Edi idahaemi Abinadi ɔdɔhɔ mmɔ ete: Ami mɔfiɔk ke edieke mbufo enimde mme ibet Abasi ke eyenyaŋa mbufo; iŋ, edieke enimde mme ibet emi Jehovah ɔkɔnɔde Moses ke obot Sinai, ete:

34 Ami ndi Jehovah Abasi fo, emi okosiode fi ke isɔŋ Egypt, ke ufɔk ufin efep.

35 Afo kunyene Abasi efen ukɔrɔ ye ami.

36 Afo kunam unɔ idem fo edisɔi ŋkpɔ, mme mbiet ŋkpɔ ndomo kiet emi odude ke heaven ke enyɔŋ, mme mme ŋkpɔ emi edude ke isɔŋ ke idak.

37 Ndien idahaemi Abinadi ɔdɔhɔ mmɔ ete, Ndi mbufo emenam kpukpru emi? Ami ndɔhɔ mbufo, Iŋ iŋ, mbufo inamke. Ndien ndi mbufo emekpep mbon emi ete mmɔ enam kpukpru ŋkpɔ emi? Ami ndɔhɔ mbufo, Iŋ iŋ, mbufo inamke.